རྒྱ་སོག་བར་གྱི་འཁྲུག་འཛིང་།

གཟའ་ཉི་མར་ལྷོ་སོག་པོའི་གྲོང་ཁྱེར་ཞིག་ཏུ་རྒྱ་རིགས་དང་སོག་རིགས་བར་འཁྲུག་འཛིང་ཤོར་སྐབས་ས་གནས་རྒྱ་མི་ཉེན་རྟོག་པས་རྒྱ་རིགས་ཚོ་སྣང་མེད་དུ་བཞག་སྟེ་སོག་པོ་སྐོར་ཞིག་འཛིན་བཟུང་བྱས་འདུག

ཟླ་འདིའི་ཕྱི་ཚེས་ ༢༡ ཉིན། ད་ལྟ་རྒྱ་ནག་གི་མངའ་ཁོངས་སུ་ཡོད་པའི་ལྷོ་སོག་པོའི་ཤིན་ལེན་ཀོ་ལི་ཐི་གྲོང་ཁྱེར་གྱི་སྤྱི་གླིང་ཞིག་ཏུ། རྒྱ་རིགས་ར་བཟི་མཁན་ ༣ གྱིས་ནང་སོག་འབྲོག་པ་ཞིག་ལ་གཅར་རྡུང་བཏང་སྟེ་རྨས་སྐྱོན་ཚབས་ཆེན་བཟོས་ཡོད་པ་མ་ཟད་མི་གཞན་ལའང་སྐད་ཆ་འདྲ་མིན་བཤད་ཡོད་ཀྱང་། ས་གནས་ཉེན་རྟོག་པས་རྒྱ་མི་དེ་དག་ལ་གང་ཡང་མ་བྱས་པར་རྨས་སྐྱོན་ཕོག་པའི་སོག་པོ་དེར་གཅར་རྡུང་བཏང་མཐར་འཛིན་བཟུང་བྱས་ཡོད་སྟབས། དེའི་རྗེས་སོག་པོ་བཅུ་གྲངས་ཤིག་གིས་ཉེན་རྟོག་ཁང་གི་སྒོ་དང་སྒེའུ་ཁུང་། རླངས་འཁོར་སོགས་ལ་གཏོར་བཅོམ་བཏང་ཡོད་པ་མ་ཟད། ཉེས་མེད་འཛིན་བཟུང་བྱེད་མཁན་ཉེན་རྟོག་པ་ཚོ་ལས་གནས་ནས་འཕུད་དགོས་པ་དང་།  སོག་པོ་དེ་དག་གང་མགྱོགས་གློད་ཀྲོལ་གཏོང་དགོས་པའི་ཞུ་གཏུག་བྱས་སྐབས། གློ་བུར་དུ་དྲག་ཆས་ཉེན་རྟོག་པ་བསླེབས་ཏེ་ངོ་རྒོལ་བ་རྣམས་ཁ་འཐོར་དུ་བཏང་ཡོད་པ་མ་ཟད། སོག་པོ་བཅུ་གྲངས་ཤིག་འཛིན་བཟུང་བྱས་ཡོད་འདུག

གོང་གི་གནད་དོན་ཐད་ས་གནས་སོག་པོ་ཞིག་གིས་བརྗོད་དོན། “ རྒྱ་རིགས་ ༣ དེ་ཕྱུག་པོ་ཡིན་ལ།  ས་གནས་ཉེན་རྟོག་ཁང་གི་ལས་བྱེད་ཚོ་ཡང་རྒྱ་རིགས་རྐྱང་རྐྱང་ཡིན་སྟབས། ཁོ་ཚོ་འཛིན་བཟུང་མ་བྱས་པར་ཉེས་རྡུང་ཕོག་པའི་སོག་པོ་འཛིན་བཟུང་བྱས་པ་དེས། རྒྱ་རིགས་ལས་བྱེད་ཚོས་འབྲོག་པ་དང་ནང་སོག་ཚོར་མཐོང་ཆུང་དང་བརྙས་བཅོས་གཏོང་གི་ཡོད་པ་དང་། ལྷག་པར་དུ་གྲངས་ཉུང་མི་རིགས་ལ་མཐོང་ཆུང་བཏང་བ་ཞིག་ཡིན་ལ།  རྒྱལ་ཁབ་ཀྱི་ལས་བྱེད་པས་མི་རིགས་དབྱེ་འབྱེད་ཀྱི་ལས་ཀ་བྱེད་ཀྱི་འདུག ” ཅེས་བརྗོད་འདུག

པཱོ་ཞོན་དྲ་བའི་གསར་འགོད་པས་གནས་ཚུལ་སྤེལ་བའི་ནང་། ཤིན་ལིན་ཀོ་ལི་ཐའི་གྲོང་ཁྱེར་ཉེན་རྟོག་ལས་ཁུངས་ཀྱི་མགོ་ཁྲིད་སྔ་ཕྱི་ཚང་མ་ཕྱི་ལོགས་ནས་ཡོང་བའི་རྒྱ་རིགས་རྐྱང་རྐྱང་ཡིན་པ་མ་ཟད། སོག་རིགས་འདུས་སྡོད་བྱས་པའི་ས་ཁུལ་ཡོངས་ཀྱི་རྫོང་དང་ཞང་རིམ་པའི་ཉེན་རྟོག་པ་ཚང་མ་རྒྱ་རིགས་ཡིན་འདུག རྒྱ་གཞུང་གིས་ཕྱི་ལོ་ ༡༩༤༧ ལོར་ནང་སོག་དབང་བསྒྱུར་བྱས་པ་ནས་བཟུང་ནང་སོག་ཏུ་སྡོད་པའི་རྒྱ་རིགས་ཚོས་ས་གནས་སོག་པོ་ཚོར་མཐོང་ཆུང་དང་གཉའ་གནོན་གཏོང་བ་རྒྱུན་ལྡན་ཞིག་ཏུ་གྱུར་ཡོད་སྐོར་བརྗོད་འདུག