༧གོང་ས་མཆོག་དང་ཌ་ཌའི་བགྲོ་གླེང་།

གཟའ་ཉི་མའི་ཉིན་པུ་ནེ་གྲོང་ཁྱེར་དུ་ཧིན་རྡུའི་རྣལ་འབྱོར་པ་ཌ་ཌ་མཆོག་གི་འཁྲུངས་སྐར་ཐོག་༧གོང་ས་མཆོག་ཆིབས་བསྒྱུར་གྱིས་བྱམས་བརྩེ་སྐོར་ལ་བགྲོ་གླེང་གནང་འདུག

 ཁ་སང་ཚེས་ ༢༨ ཉིན་གྱི་ཞོགས་པ་ཆུ་ཚོད་ ༩།༣༠ སྟེང་། ༧གོང་ས་མཆོག་རྒྱ་གར་གྱི་མ་ཧ་རཱ་ཤཱི་ཊི་རཱ་(MP) མངའ་སྡེའི་གྲོང་ཁྱེར་པུ་ནེ་(Pune) ནང་རྟེན་གཞི་བྱས་པའི་ཧིན་རྡུའི་རྣལ་འབྱོར་ཝ་སི་ཝཱ་ནེ་ལྟེ་གནས་ཁང་(Sadhu Vaswani Mission) གི་གོ་སྒྲོག་འོག ལྟེ་གནས་ཁང་དེའི་དབུ་འཛིན་རྣལ་འབྱོར་པ་ཆེ་མོ་ཌ་ཌ་ཝ་སི་ཝཱ་ནེ་(Dada J.P vaswani) མཆོག་དགུང་གྲངས་ ༩༥ ལ་ཕེབས་པའི་འཁྲུངས་སྐར་མཛད་སྒོར་ཆིབས་བསྒྱུར་བསྐྱངས་ཏེ། རྒྱ་གར་གྱི་གློག་བརྙན་འཁྲབ་སྟོན་པ་གྲགས་ཅན་ཨ་མེར་ཁན་(Aamir Khan) གྱིས་མདོ་འཛིན་འོག ༧གོང་ས་མཆོག་དང་ཧིན་རྡུའི་རྣལ་འབྱོར་བ་ཆེ་མོ་ཌ་ཌ་བཅས་ཀྱིས་བྱམས་བརྩེ་དང་ཀུན་སྤྱོད། བསམ་བློ་སོགས་ཀྱི་སྐོར་ལ་ཆུ་ཚོད་ ༢ རིང་དྲི་བ་དྲིས་ལེན་གྱི་བགྲོ་གླེང་ཞིག་གནང་ཡོད་ཅིང་། དེར་མི་ ༥༠༠༠ ལྷག་མཉམ་ཞུགས་བྱུང་འདུག

བགྲོ་གླེང་གི་ཐོག་མར་ཨ་མེར་ཁན་གྱིས་ཆོས་ལུགས་ཀྱི་དབུ་ཁྲིད་རྣམ་གཉིས་ལ་སོ་སོའི་མི་ཚེ་དང་ལྟ་གྲུབ་སྐོར་ལ་དྲི་བ་བཏང་བར། ཌ་ཌ་མཆོག་གིས་བྱམས་རྩེའི་ངོས་འཛིན་དང་འཛམ་གླིང་ནང་ཆོས་ལུགས་རིས་མེད་ཀྱི་སློབ་སྦྱོང་དར་སྤེལ་གཏོང་རྒྱུ་གལ་ཆེན་ཡིན་སྐོར་དང་། ༧གོང་ས་མཆོག་གིས་ཌ་ཌའི་བཀའ་ལན་དེར་རྒྱབ་སྐྱོར་དང་སྦྲགས་ཆོས་ལུགས་ཀུན་ལ་བརྩི་མཐོང་སྤྲོད་པའི་ཤེས་ཡོན་ལྟེ་གནས་ཁང་གང་མང་དགོས་སྐོར་གསུངས་འདུགཨ་མེར་ཁན་གྱིས་༧གོང་ས་མཆོག་ལ་བདེ་སྐྱིད་ཀྱི་གོ་དོན་དྲིས་པར། བདེ་སྐྱིད་ནི་དགའ་བདེ་གཅིག་པུ་ལས་འབྱུང་དགོས་པའི་ངེས་པ་མེད་པ་དང་། འཛམ་གླིང་མི་འབོར་ཐེར་འབུམ་བདུན་ལྷག་ཡོད་པ་ཚང་མར་བདེ་སྐྱིད་འཐོབ་པའི་ཐོབ་ཐང་གཅིག་མཚུངས་ཡོད་སྐོར་གསུངས་འདུགརྒྱ་གར་གྱི་ཤེས་ཡོན་ལམ་ལུགས་ནང་ཆོས་ལུགས་རིས་མེད་ཀྱི་ཀུན་སྤྱོད་འཇོག་དགོས་པ་དང་། དེང་གི་ཤེས་ཡོན་ཁྲོད་བྱམས་བརྩེའི་རིན་ཐང་དང་འདོད་ཆུང་ཆོག་ཤེས། སྒྲིག་ཁྲིམས། བཟོད་བསྲན་སོགས་སློབ་དགོས་སྐོར་གསུངས་འདུག

 བྱམས་བརྩེ་སྐོར་གྱི་དྲི་བ་དྲིས་ལན་སྐབས་༧གོང་ས་མཆོག་གིས་ “ངའི་ཆོས་ནི་བྱམས་པ་དང་རྩེ་བ་ཡིན་”ཞེས་དང་། ཕ་མའི་བྱམས་རྩེ་ཡིས་མི་ཞིག་གི་བསམ་བློར་ཇི་ལྟར་ཤུགས་རྐྱེན་ཐེབས་མིན་ཐད་“ངའི་ཨ་མ་གྲོང་གསེབ་ཀྱི་ཞིང་པ་ཡིག་རྨོངས་པ་ཞིག་ཡིན། འོན་ཀྱང་། ཁོང་གིས་ང་ལ་བརྩེ་སེམས་ཀྱི་རྩ་བའི་བསླབ་བྱ་གནང་བྱུང་། ད་ལྟ་ངས་བྱམས་དང་བརྩེ་བ་རྗོད་ཀྱི་ཡོད་པ་འདི་ཁོང་གི་ས་ནས་སྦྱངས་པ་ཡིན” ཞེས་གསུངས་འདུག་ལ། ཨ་མེར་ཁན་གྱིས་ཀྱང་“ང་རང་ཆུང་དུས་པིང་པོང་(Table Tenis) རྩེད་རྒྱུར་དགའ་བོ་དང་ཡག་པོ་རྩེད་ཀྱི་ཡོད། རྟག་པར་ང་རྩེད་མོ་རྩེ་ས་ནས་ཕྱིར་ནང་དུ་ལོག་ཡོང་དུས་ཨ་མས་ང་ལ་རྒྱལ་ཁ་ཐོབ་ཡོད་མེད་འདྲི་ཡི་རེད། ངས་ཐོབ་སོང་ལབ་སྐབས་ཨ་མ་དགའ་ནས་ང་ལ་འཐམ་གྱི་ཡོད། ངས་ནམ་ཡང་བརྗེད་ཐབས་མེད་པ་ཞིག་ནི། ང་ག་དུས་ཐོབ་ན་ཨ་མས་ངའི་འགྲན་ཡ་ཤོར་མཁན་དེའི་སྐོར་འདྲི་བ་རེད་ལ། མོས་ང་ལ་འགྲན་ཡ་ཤོར་མཁན་དེ་ད་ལྟ་ནང་ལ་འབྱོར་ཡོད་པ་མ་ཟད། ཁོང་གི་ཨ་མས་ང་ནང་བཞིན་སོ་སོའི་བུ་ལ་སྐད་ཆ་འདྲི་ཡི་ཡོད་པ་རེད། མོས་སོ་སོའི་བུ་ཤོར་པ་གོ་དུས་ཏན་ཏན་མ་སྐྱིད་པ་ཡོང་གི་ཡོད་པ་རེད། མ་རེད་དམ་ཞེས་གཞན་དོན་ལ་སེམས་ཁུར་བྱེད་པ་ནི་ཁོང་གིས་མི་གཞན་ལ་བཟུང་པའི་བྱམས་རྩེ་རེད། དེས་ང་ལ་ཤུགས་རྐྱེན་ཐེབས་ཡོད་”ཅེས་བརྗོད་འདུག

ཡང་༧གོང་ས་མཆོག་གིས་ “ང་ཆོས་ལུགས་ཀྱི་དབུ་ཁྲིད་ཅིག་གིས་འདི་འདྲ་བཤད་སྐབས་ཁྱེད་ཚོ་ཧང་སངས་སྲིད་ཀྱང་། ཞལ་འདོན་གྱི་ནུས་སྟོབས་ཐད་ང་རང་ཅུང་དོགས་པ་ཡོད། གང་ཡིན་ཟེར་ན། གལ་སྲིད་དཀའ་ངལ་རིགས་དཀོན་མཆོག་གིས་བཟོས་པ་ཡིན་ན། དཀའ་ངལ་དེ་དག་དཀོན་མཆོག་གིས་སེལ་ཐུབ་ངེས་རེད། འོན་ཀྱང་། དཀའ་ངལ་རིགས་ང་ཚོས་བཟོས་ཡོད་སྟབས་ང་ཚོས་སེལ་དགོས་རེད། དཀའ་ངལ་རིགས་ལག་ལེན་ཐོག་ནས་སེལ་དགོས་པ་རེད་མ་གཏོགས་གསོལ་བ་སྨོན་ལམ་བཏབས་ནས་སེལ་མི་ཐུབ། ང་རང་ཞལ་འདོན་དང་སྒོམ་སྒྲུབ་ལ་ཡིད་ཆེས་བྱེད་མཁན་ནང་པའི་དགེ་སློང་ཞིག་རེད། ཡིན་ནའང་ང་ཚོས་ལས་འབྲས་ལའང་ཡིད་ཆེས་བྱེད་དགོས་རེད། ཚང་མ་ལས་ག་རེ་བྱས་པ་ལས་འབྱུང་གི་ཡོད་རེད་མ་གཏོགས་ཞལ་འདོན་དང་སྨོན་ཚིག་ལས་འབྱུང་གི་མེད། ”ཅེས་གསུངས་འདུག

ཨ་མེར་ཁན་གྱི་དྲི་བ་ཞིག་ཏུ་ཌ་ཌ་མཆོག་གིས་ “མི་ཞིག་ཡིན་ན་དུས་རྒྱུན་སེང་གེ་ལྟ་བུ་ཞིག་བྱ་དགོས་པ་ལས་ཁྱི་ལྟ་བུ་ཞིག་བྱ་མི་རུང་པ་དང་། གལ་སྲིད་ཁྱེད་ཀྱིས་ཁྱི་ཞིག་གི་མདུན་དུ་རུས་པ་ཞིག་གཡུག་ཚེ། ཁྱི་དེ་རུས་པའི་རྗེས་སུ་རྒྱུག་འགྲོ་བ་རེད། གལ་སྲིད་ཁྱེད་ཀྱིས་སེང་གེ་ཞིག་ལ་མེ་མདའ་བརྒྱབ་པ་ཡིན་ན། སེང་གེ་དེས་མེ་མདའ་རྒྱག་མཁན་ཕྱོགས་སུ་རྒྱུག་ཡོང་གི་རེད། དེ་ནང་བཞིན་ང་ཚོར་དོན་རྐྱེན་གང་ཞིག་བྱུང་ཡང་དེའི་ཐད་བསམ་བློ་བཏང་མ་བསྡད་པར། དོན་རྐྱེན་གྱི་འབྱུང་རྩ་ཤེས་པར་བྱ་དགོས” ཞེས་གསུངས་འདུག 

ཡང་ཨ་མེར་ཁན་གྱིས་ཕོ་མའི་བརྩེ་དུང་ཕྱོགས་ནས་ཁོང་རྣམ་པ་གཉིས་ལ་བཀའ་འདྲི་ཞུས་སྐབས། ཌ་ཌ་མཆོག་གིས་ཁོ་རང་ཆུང་ཆུང་སྐབས་བརྩེ་དུང་གི་ཚོར་བ་བསླེབས་མྱོང་ཡོད་སྐོར་གསུངས་འདུག་ལ། ༧གོང་ས་མཆོག་གིས་བདེ་སྐྱིད་ལྡན་པའི་བཟའ་ཟླའི་འབྲེལ་ལམ་ཐད་ནས་ཕྱིའི་མཛེས་སྡུག་ལྡན་པའི་རྣམ་པ་ལས་ནང་གི་མཛེས་སྡུག་ལ་ངོས་འཛིན་ཐུབ་པ་བྱ་རྒྱུ་གལ་ཆེ་བར་གསུངས་འདུག མཐར་ཨ་མེར་ཁན་གྱིས་མང་ཚོགས་ཚོར་འགྲན་རྩོད་ཁྲོད་ཡིན་ཡང་སྙིང་རྗེ་ལྡན་པ་དང་སོ་སོའི་ཁ་གཏད་ཀྱང་འགྲོ་བ་མི་ཞིག་ཡིན་པར་བལྟ་དགོས་སྐོར་དང་སྦྲགས་ཆུ་ཚོད་གཉིས་རིང་གི་བགྲོ་གླེང་མཇུག་བསྡུས་ཡོད་པ་རེད།

གཞན་ཕྱི་ཚེས་ ༢༨ ཉིན་༧གོང་ས་མཆོག་གིས་པུ་ནེ་གྲོང་ཁྱེར་གྱི་ཤེ་ཝ་རྗེ་མ་ཧཱ་རཱ་ཇི་ལོ་རྒྱུས་འགྲེམས་སྟོན་ཁང་(Shivaji Maharaj Museum of India History) དུ་ཆིབས་བསྒྱུར་དང་། དེར་བོད་པའི་འགྲེམས་སྟོན་ཚན་པ་ཞིག་དབུ་འབྱེད་ཀྱང་གནང་ཡོད་འདུག

གསར་འགོད་པ། བནྟེ་སྐྱབས།