དེ་རིང་ངྷ་སའི་ནང་བསྟན་སྲི་ཞུ་ཁང་གིས་མཁན་ཆེན་ཚུལ་ཁྲིམས་བློ་གྲོས་མཆོག་གིས་བོད་པའི་སློབ་གསོའི་ལས་དོན་ཐོག་གཏམ་བཤད་གནང་བའི་སྒྲ་ཡིག་ཐོག་ཏུ་ཕབ་པའི་དཔེ་དེབ་ཞིག་དཔར་འགྲེམས་གནང་སོང་།
དེ་རིང་སྔ་དྲོའི་ཆུ་ཚོད་ ༡༠ སྟེང་། ངྷ་རམ་ས་ལའི་ནང་བསྟན་སྲི་ཞུ་ཁང་གིས་ ༢༠༠༩ ལོར་གསེར་རྟ་བླ་རུང་ལྔ་རིག་ནང་བསྟན་སློབ་གླིང་གི་མཁན་ཆེན་ཚུལ་ཁྲིམས་བློ་གྲོས་མཆོག་གིས་མདོ་སྨད་མགོ་ལོག་ས་ཁུལ་གྱི་དགེ་རྒན་ཁག་ཅིག་ལ་ “དགེ་རྒན་གྱི་བསླབ་བྱ་དང་། སྲོལ་རྒྱུན་གྱི་བོད་ཡིག་སློབ་སྟངས “ཞེས་པའི་བརྗོད་གཞིའི་ཐོག་གཏམ་བཤད་གནང་ཡོད་པ་དེ། མདོ་ཁམས་རི་བོ་ཆེ་ངག་དབང་ཚུལ་ཁྲིམས་ལགས་ཀྱིས་ཡིག་ཐོག་ཏུ་ཕབ་སྒྲིག་གནང་སྟེ་ནང་བསྟན་སྲི་ཞུ་ཁང་གིས་དེབ་གཟུགས་སུ་དཔར་བསྐྲུན་བྱས་པ་༼དུས་རབས་ཀྱི་རྔ་སྒྲ༽ཞེས་པའི་དེབ་དེ་དབུ་འབྱེད་གནང་སོང་།
དཔེ་དེབ་དབུ་འབྱེད་ཐོག་སྲི་ཞུ་ཁང་གི་འགན་འཛིན་ཧྥ་རན་སི་ནས་ཡིན་པ་ངག་དབང་འཕྲིན་ལས་ལགས་དང་། སྒྲ་ཕབ་སྒྲིག་གནང་མཁན་མདོ་ཁམས་རི་བོ་ཆེ་ངག་དབང་ཚུལ་ཁྲིམས་ལགས། དེ་བཞིན་རྫ་ཚེ་རིང་བཀྲ་ཤིས་ལགས་བཅས་ཀྱིས་མཁན་ཆེན་ཚུལ་ཁྲིམས་བློ་གྲོས་མཆོག་གི་ཟབ་ཅིང་རྒྱ་ཆེ་བའི་བཀའ་དགོངས་དང་། ཐེངས་འདིར་དཔར་འགྲེམས་གནང་བའི་དཔེ་དེབ་དེའི་དགེ་མཚན་སྐོར་ལ་གཏམ་བཤད་གནང་སོང་།
མདོ་ཁམས་རི་བོ་ཆེ་ངག་དབང་ཚུལ་ཁྲིམས་ལགས་ཀྱིས་དཔེ་དེབ་མཇུག་ཏུ་ངོ་སྤྲོད་གནང་བའི་ནང་། “ ཕྱི་ལོ་ ༢༠༡༢ ་ཟླ་ ༨ པའི་ནང་ཚོགས་པའི་མགོ་ཁྲིད་ཀྱིས་ <<འཆད་ཁྲིད་རིག་པའི་དགའ་ཚལ>> ཡིག་ཐོག་ཏུ་ཕབ་སྒྲིག་བྱ་དགོས་པའི་སྐད་ཆ་བཤད་བྱུང་། དེ་ནི་མཁན་ཆེན་མཆོག་གི་བཀའ་སློབ་ལ་གཟབ་ཉན་དང་འབྲེལ་འདྲིས་བྱེད་པའི་གོ་སྐབས་ཡག་པོ་ཞིག་ཡིན་སྟབས། ངས་དགའ་བཞིན་སྤྲོ་བཞིན་ཁས་ལེན་བྱས་པ་ཡིན། རྗེས་སུ་བསམ་བློ་ཞིབ་ཏུ་གཏོང་སྐབས། ངེས་དོན་གྱི་མཁས་པ་ཆེན་པོ་ཞིག་གི་བཀའ་སློབ་ཕབ་སྒྲིག་བྱེད་པ་ལ། བསམ་བློའི་རིག་གནས་ཕུན་སུམ་ཚོགས་པ་ཞིག་ཡོད་དགོས་པ་མ་ཟད། རང་རྩོམ་ལས་ལྷག་པའི་འགན་འཁྲི་ལྗིད་པོ་ཞིག་ཀྱང་ཡོད་པར། ང་རང་གིས་བསམ་གཞིག་གཏན་ནས་བྱས་མི་འདུག གལ་ཏེ་སྔོན་ནས་དེའི་སྐོར་ལ་བསམ་གཞིག་ཕྲན་བུ་ཡོད་ན། ང་ལ་མཁན་ཆེན་མཆོག་གི་བཀའ་སློབ་ཕབ་སྒྲིག་བྱེད་པའི་སྤོབས་པ་གཏན་ནས་མེད” ཅེས་བཀོད་འདུག
དེའི་རྗེས་རྫ་ཚེ་རིང་བཀྲ་ཤིས་ལགས་ཀྱིས། ནང་བསྟན་སྲི་ཞུ་ཁང་གིས་བོད་མི་རིགས་ཀྱི་ཆོས་དང་རིག་གཞུང་ལ་ཞབས་འདེགས་ཞུ་བཞིན་པར་རྗེས་སུ་ཡི་རངས་དང་འབྲེལ། དེང་སྐབས་བོད་ནང་གི་གནས་སྟངས་ཛ་དྲག་ཆགས་ཡོད་པའི་སྐབས་འདིར། མཁན་པོ་ཚུལ་ཁྲིམས་བློ་གྲོས་མཆོག་གིས་དངོས་ཡོད་བོད་ཀྱི་སྐད་ཡིག་དང་སློབ་གསོའི་སྐོར་ལ་གཏམ་བཤད་གནང་བ་ད་རེབ་ཡིག་ཐོག་ཏུ་ཕབ་སྒྲིག་གནང་པ་དེ་བོད་ཀྱི་ཕྱི་ནང་གཉིས་སུ་ཕན་ཐོགས་ཆེན་པོ་འབྱུང་ངེས་ཡིན་སྟབས་བརྒྱུད་ལམ་ཁག་ཏུ་གང་ཐུབ་ཁྱབ་བསྒྲགས་གནང་གལ་ཆེ་སྐོར་བརྗོད་བྱུང་།
མཇུག་ཏུ། ནང་བསྟན་སྲི་ཞུ་ཁང་གི་འགན་འཛིན་ངག་དབང་འཕྲིན་ལས་ལགས་ཀྱིས། ནང་བསྟན་སྲི་ཞུ་ཁང་ལ་རྩ་བའི་ནང་པའི་བསྟན་པ་འཛིན་སྐྱོང་སྤེལ་གསུམ་གཙོས་པའི་ལས་གཞི་མང་པོ་ཞིག་ཡོད་ཀྱང་། ཐེངས་འདིར་མཁན་ཆེན་མཆོག་གི་བཀའ་སློབ་དེ་བོད་པའི་སྤྱི་ཚོགས་ནང་ཧ་ཅང་གལ་གནད་ཆེན་པོ་ཡིན་པའི་ངོས་འཛིན་ཐོག་དཔར་སྐྲུན་འགྲེམས་སྤེལ་བྱས་པ་ཡིན་སྐོར་བརྗོད་བྱུང་།
དུས་རབས་ཀྱི་རྔ་སྒྲ་ཞེས་པའི་དཔེ་དེབ་དེར་དོན་ཚན་ ༡༤ དང་ཡིག་འབྲུ་ཁྲི་ ༧ ། ཤོག་ངོས་ ༢༧༧ བཅས་ཀྱིས་གྲུབ་ཡོད་འདུག
![Because of high altitudes in the Himalayas, difficult terrain and often poor weather, the Kailash Manasarovar pilgrimage if one of the most challenging in the world [File: Purnima Shrestha/Reuters]](https://tibettimes.net/wp-content/uploads/2026/05/Screen-Shot-2026-05-14-at-5.25.22-PM-360x180.png)
ཧྥ་དང་ཕ་གཉིས་ཀྱི་སྒྲ་སྦེད་དེ་ཁ་ཁ་རེད། ཕ་བྲིས་ན་རྦེད་དེ་ནོར་བ་རེད།
གནས་ཚང་གིས་དྲན་སྐུལ་བྱས་པ་དེ་དངོས་གནས་རེད་ཤག
ང་ཚོའི་སྤྱི་ཚོགས་ནང་དུ་ཆོས་དང་རིགས་གཞུང་ཁ་ལ་འཁྱེར་མཁན་གྱི་ཚོང་པ་མང་པོ་ཡོད་རེད། གཟབ་པར་གྱིས།
ལས་འདི་རིགས་ཉེན་ཁ་ཆེན་པོ་ཞེ་དྲག་རེད། གལ་སྲིད་དོན་རྐྱེན་འདིར་རྐྱེན་བྱས་མཁན་ཆེན་འཇུས་སོང་བ་ཡིན་ན་སུས་འགན་འཁུར་རམ། ཕྱི་ལ་གློད་ཐུབ་པའི་ལས་ཀ་སུས་ལས་ཐུབ་བམ། བྱ་བྲལ་རིན་པོ་ཆེ་ནང་བཞིན་དུ་མི་གཏོང་བའི་ངེས་པ་ཡོད་དམ། ཚོང་པ་ཚོ། ད་གཞན་ཕན་ཅིག་སྒོམ་རོགས།
དེང་སང་བཙན་བྱོལ་སྤྱི་ཚོགས་སུའང་རྒྱ་དམར་པོས་བློ་ངན་གྱིས་བོད་ཀྱི་བརྡ་སྤྲོད་དང་ཡོངས་སུ་འགལ་བའི་མིང་ཚིག་ལ་མ་བརྟགས་པར་བེད་སྤྱོད་པར་བློ་ཕམ་གྱི་གནས་མ་ཡིན་ནམ། དཔེ་ཚོན་ཙམ་ཞུས་ན། France ལ་ཧྥ་རན་སི། English ལ་དབྱིན་ཡིག་ལྟ་བུ་འབྲི་སྲོལ་རྒྱ་ཡམས་སུ་སོང་བས། དོན་དངོས་ནི། ང་ཚོའི་དབྱངས་གསལ་དེ་འབྱུང་ཁུངས་འཕགས་ཡུལ་ལེགས་སྦྱར་ལྟར་མཚུངས་པས་། མིང་ཚིག་རྣམས་ཀྱང་། ཁུངས་ག་ནས་ཡིན་ནམ་གཟིགས་དང་། France ཨིན་ཡིག་ལས་ཐད་ཀར་ཕབ་ན། ཕ་རནྶ། འདི་ལ་ཧ་སྒྲ་གཏན་ནས་མེད་པ་ལ་དེང་སང་ཚགས་ཤོག་མང་ཆེ་བར་འདི་བཀོད་པས་གཟབ་ནན་ཞུ་ཆུང་ཡིན།