ཀུའུ་ཁེ་ལའི་ཡིས་ལྐོག་གསོད་བྱས་པའི་དབྱིན་ཇིའི་ཚོང་པ་ནཱེལ་ཧི་ཝོའུ་ཌི་ཡི་ཨ་མས་ཨ་སྒོར་ཁྲི་ ༨༢༠ ཙམ་གྱི་སྐྱིན་ཚབ་སྤྲོད་དགོས་པའི་རེ་སྐུལ་བྱས་འདུག
ཉེ་ལམ་རྒྱལ་སྤྱིའི་གསར་ལམ་ཁག་ཏུ་རྒྱ་ནག་གཞུང་ཕྱོགས་ནས་མི་འགྱངས་བར་ཧྲན་ཏུང་ཞིང་ཆེན་ཅི་ནན་འབྲིང་རིམ་མི་དམངས་ཁྲིམས་ཁང་གིས་པའོ་ཤི་ལའི་ལ་ཁྲིམས་བཤེར་བྱ་རྒྱུ་ཡིན་ལུགས་ཕྱིར་བསྒྲགས་བྱས་པའི་གནས་ཚུལ་ཐོན་པ་དང་བསྟུན་ཏེ། པའོ་ཡི་ཆུང་མ་ཀུའུ་ཁེ་ལའི་ཡིས་ལྐོག་གསོད་བྱས་པའི་དབྱིན་ཇིའི་ཚོང་པ་ནཱེལ་ཧི་ཝོའུ་ཌི་ (Neil Heywood) ཡི་ཨ་མ་ཨིན་ཧི་ཝོའུ་ཌི་(Ann Heywood)ཡིས། ཟླ་འདིའི་ཕྱི་ཚེས་ ༡༡ ཉིན་ཨ་རིའི་ཝོལ་སུ་ཊི་རི་ཊི་གསར་ཤོག་(The Wall Street Journal)ཐོག རྒྱ་གཞུང་གིས་ནཱེལ་ཧི་ཝོའུ་ཌི་ཡི་བྱིས་པ་ ༢ ཀྱི་འཚོ་བའི་འགན་ལེན་ཆེད། ཀུའུ་ལ་ཨ་སྒོར་ཁྲི་ ༨༢༠ ཙམ་གྱི་སྐྱིན་ཚབ་སྤྲོད་དུ་འཇུག་དགོས་པའི་ཆ་རྐྱེན་བཏོན་ཡོད་འདུག
ཨིན་ཧི་ཝོའུ་ཌི་ལགས་ཀྱིས་བརྗོད་དོན།“ ནཱེལ་ལྐོག་གསོད་བྱས་པའི་གནད་དོན་ཐད་ཐེངས་མང་རྒྱ་གཞུང་ལ་ནན་ཏན་གྱིས་འབྲེལ་གཏུག་བྱས་ཀྱང་དོན་དངོས་རང་བཞིན་གྱི་ཡ་ལན་མ་སྤྲད་པར་བློ་ཕམ་དང་ཧང་སང་སོང་། ད་ལྟའི་བར་རྒྱ་གཞུང་ལ་དགོས་མེད་ཀྱི་ངོ་ཚ་མི་བཟོ་ཆེད་ལྐོག་གསོད་དོན་རྐྱེན་འདིའི་ཐད་སྤྱི་ཚོགས་ཐོག་གླེང་སློང་སྣ་ཚོགས་སྤེལ་མེད་ཀྱང་། ད་ལྟའི་གནས་སྟངས་འདིས་སྐད་ཆ་མི་བཤད་ཐབས་མེད་བཟོས་སོང་།”ཞེས་དང་།
ཁོ་མོས། ཕ་ལྐོག་གསོད་བྱས་པ་ལ་བརྟེན་ནས་ཤུལ་དུ་ལུས་པའི་ལོ་ ༨ དང་ལོ་ ༡༢ ཡིན་པའི་བྱིས་པ་ ༢ ཀྱི་ལུས་སེམས་ལ་འཇིགས་སྣང་དང་གནོད་འཚེ་ཐེབས་ཡོད་པ་དང་། བདེ་འཇགས་མིན་པའི་ཁོར་ཡུག་ཁྲོད་མ་འོངས་པར་བྱིས་པ་གཉིས་ལ་འཚོ་བའི་འགན་ལེན་ཅི་ཡང་མེད་སྟབས། རྒྱ་གཞུང་གི་མགོ་ཁྲིད་ཚོས་ཡ་ང་བའི་གྱོད་དོན་འདིའི་མཇུག་འབྲས་དྲང་བདེན་སྒོས་ཐག་གཅོད་བྱས་ཏེ། ཁྱིམ་མི་ཚོའི་སྡུག་བསྔལ་སེལ་དུ་འཇུག་པའི་རེ་བ་དང་ཡིད་ཆེས་ཡོད་སྐོར་བརྗོད་འདུག
པེ་ཅིན་གྱི་ཉེས་དོན་ཆེད་ལས་ཁྲིམས་རྩོད་པ་མའོ་ཧྲོ་ཕིན་གྱིས་བརྗོད་དོན། “རྒྱ་ནག་སྐམ་ས་ཆེན་མོའི་ནང་ལག་བསྟར་བྱེད་བཞིན་པའི་བཅའ་ཁྲིམས་ལྟར་ན། ཁྲིམས་འགལ་གྱི་བྱ་སྤྱོད་ལ་བརྟེན་ནས་ཕ་རོལ་པོར་གནོད་འཚེ་ཕོག་པ་ཡིན་ན། གནོད་འཚེ་ཕོག་མཁན་གྱི་ཁྱིམ་མི་ཉེ་འབྲེལ་གྱིས་སྐྱིན་གསབ་སྤྲོད་དགོས་པའི་རེ་བ་འདོན་ཆོག་ཀྱང་། སྐྱིན་གསབ་དངུལ་གྱི་གྲངས་འབོར་འདི་འདྲ་ཆེན་པོ་རྒྱ་ནག་ནང་ཡོད་པ་མ་རེད་ ”ཅེས་བརྗོད་འདུག
ཆབ་སྲིད་དཔྱད་བརྗོད་པ་ཚོས་ཨིིན་གྱིས་གནད་དོན་འདི་གླེང་སློང་བྱེད་པའི་དུས་ཚོད་ཡག་ཤོས་ཤིག་ཏུ་ཁེལ་ཡོད་པ་དང་། གླེང་སློང་དེས་མི་འགྱངས་བར་ཁྲིམས་བཤེར་བྱ་འཆར་ཡོད་པའི་པའོ་ཤི་ལའི་ལ་ཤུགས་རྐྱེན་ཐེབས་སྲིད་པ་མ་ཟད། ད་རེབ་གནད་དོན་དེ་ཐག་གཅོད་ཐུབ་པའི་རེ་བ་ཡོད་སྐོར་དང་། སྐྱིན་གསབ་དེ་ཀུའུ་ཡིས་སྤྲོད་དགོས་སྐོར་རྗོད་ཀྱི་ཡོད་ཀྱང་། ཀུའུ་ཁེ་ལའི་དང་ཝང་ལི་ཅིན་གྱི་གནད་དོན་སོགས་པའོ་ཤི་ལའི་ཡི་གནད་དོན་ནང་འདུས་ཡོད་སྟབས། པའོ་ཡི་གནད་དོན་གསལ་བོ་ཆགས་རྗེས་དེར་གཏོགས་ཀྱི་གནད་དོན་ཚང་མ་ཕྱི་ལ་འཐོན་རྒྱུ་ཡིན་སྟབས། སྐབས་དེར་སྐྱིན་གསབ་དེ་ཀུའུ་ཚང་གཅིག་པུ་མིན་པར་པའོ་ཁྱིམ་ཚང་གིས་ཀྱང་འགན་ལེན་དགོས་སྐོར་སོགས་བརྗོད་ཀྱི་འདུག
གསར་འགོད་པ། པདྨ་མཚོ།
གསར་འགྱུར་དཀྱིལ་དུ་པར་བཀོད་འདུག་ཀྱང་མི་དེ་གཉིས་སུ་ཡིན་མིན་པར་གྱི་གཤམ་དུ་མིང་ངམ་འགྲེལ་བཤད་དུམ་བུ་རེ་བཀོད་ན་ལེགས།
གཞན་མི་དེ་གཉིས་སུ་ཡིན་མི་ཤེས།