ལྷན་ཚོགས་དང་འཛིན་སྐྱོང་གཉིས་མཉམ་འབྲེལ་ཐོག་བསྐྱར་ཞིབ་བྱོས།

ཁ་སང་དེ་རིང་གཉིས་ལ་སྨན་པའི་ལྷན་ཚོགས་ཀྱི་དམིགས་བསལ་ཚོགས་འདུ་ཚོགས་ཏེ། ཚོགས་མི་བསྡུ་རུབ་དང་དཔལ་འབྱོར་འདུ་འགོད་། མ་འོངས་པར་བཀའ་སྤྱི་གཉིས་ཀྱིས་སྨན་པའི་ལྷན་ཚོགས་ལ་རྒྱབ་སྐྱོར་མཐུན་འགྱུར་དགོས་པ་བཅས་ཀྱི་གྲོས་ཆོད་བཞག་སོང་།  

ཁ་སང་དང་དེ་རིང་ཉིན་གཉིས་རིང་དྷ་ས་དབུས་སྨན་རྩིས་མཐོ་སློབ་ཚོགས་ཁང་དུ། བཙན་བྱོལ་བོད་མིའི་གསོ་བ་རིག་པའི་སྨན་པའི་ལྷན་ཚོགས་ཀྱི་དམིགས་བསལ་ཚོགས་འདུ་ཚོགས་ཡོད་པ་དང་། ཁ་སང་གི་ཚོགས་འདུ་དབུ་འཛུགས་སྟེང་། སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་། འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག ཝ་ཎ་མཐོ་སློབ་ཀྱི་ཉེ་བའི་རིག་བདག་དགེ་བཤེས་ངག་དབང་བསམ་གཏན་ལཊ་བཅས་ཕེབས་འདུག

ཐེངས་འདིའི་ཉིན་གཉིས་རིང་གི་ཚོགས་འདུའི་ཐོག རྒྱ་གར་སྲོལ་རྒྱུན་སྨན་གྱི་སྡེ་ཚན་ཨཱ་ཡུ་ཤའི་ཁྲིམས་སྒྲིག་འགྲོ་ལུཊ་དང་། གསོ་བ་རིག་པ་རྒྱ་གར་གཞུང་གི་ཁྲིམས་ཐོག་ནས་ངོས་ལེན་གནང་ཕྱོགས་དང་། འབྱུང་འགྱུར་རྒྱ་གར་དབུས་གཞུང་ལ་འབྲེལ་ལམ་བྱེད་ཕྱོགས་བཅས་བརྗོད་གཞི་ཁག་གི་ཐོག་བགྲོ་གླེང་གནང་མཐར་བོད་མིའི་སྒྲིག་འཛུཊ་བཀའ་སྤྱི་གཉིས་དང་། གསོ་རིག་སློབ་གཉེར་ཁང་། དེབ་སྐྱེལ་ཟིན་པའི་སྨན་པ་བཅས་སྤྱི་སྒེར་ཚང་མས་སྨན་པའི་ལྷན་ཚོཊ་ལ་འཕྱར་གྲུ་མཉམ་འདེགས་གནང་རྒྱུ་དང་། གྲོས་ཚོགས་ཀྱིས་གཏན་ལ་ཕབ་པའི་རྒྱུན་གྲོན་གསོལ་རས་ཙམ་མིན་པར་བོད་མིིའི་སྒྲིག་འཛུགས་ཀྱི་སྔོན་རྩིས་རྒྱུན་གྲོན་ཁོ་ནར་གཏོང་ཐབས་བྱ་རྒྱུ། སྨན་པའི་ལྷན་ཚོགས་སུ་ཧི་མ་ལ་ཡའི་རི་རྒྱུད་དང་ཕྱི་རྒྱལ་ནས་འཐུས་མི་བསྡུ་རུབ་བྱ་རྒྱུ། སྨན་པའི་ལྷན་ཚོགས་ནས་ཉམས་ཞིབ་སྡེ་ཚན་ཞིག་གསར་འཛུགས་བྱ་རྒྱུ་བཅས་ལ་གྲོས་ཆོད་བཞག་ཡོད་འདུག  

ཚོགས་འདུའི་ཉིན་དང་པོར་སྨན་པའི་ལྷན་ཚོཊ་ཀྱི་ཚོགས་གཙོ་ངག་དབང་བཟོད་པ་ལཊ་ཀྱིས། ཕྱི་ལོ་ ༢༠༠༤ ལོར་བོད་མི་མང་སྤྱི་འཐུས་ལྷན་ཚོགས་ཀྱི་ཁྲིམས་ཡིག་གཏན་འབེབས་གཞིར་བཟུང་བཙན་བྱོལ་བོད་མིའི་གསོ་བ་རིག་པའི་ཆེས་མཐོའི་སྨན་པའི་ལྷན་ཚོཊ་དབུ་བརྙེས་པ་དང་། འདས་པའི་ལོ་ ༩ རིང་ལྷན་ཚོགས་ཀྱི་ཁྲིམས་སྒྲིག་ལྟར་མཐོ་སློབ་ཁག་དང་། ཚད་ལྡན་སྨན་པ་རྣམས། སྨན་ཁང་དང་སྨན་སྦྱོར་སྡེ་ཚན་ཁག་བཅས་ཀྱི་དེབ་སྐྱེལ་དང་ལས་དོན་ཡོངས་ཞོར་ལས་གནང་པ་ཡིན་སྐོར་དང་། ད་ལྟའི་ཆར་ཚོགས་མི་དང་དཔལ་འབྱོར་ཕྱོགས་གཉིས་ཐད་ནས་དཀའ་ངལ་གང་མང་ཡོད་སྟབས། མ་འོངས་པར་འབྲེལ་ཡོད་ཚང་མས་ཁུར་མཉམ་ལེན་བྱ་དགོས་སྐོར་བརྗོད་བྱུང་།

ཉེ་བའི་རིག་བདག་དགེ་བཤེས་ངག་དབང་བསམ་གཏན་ལགས་ཀྱིས། ད་ཆར་བོད་སྨན་རྒྱ་གར་གཞུང་གི་ངོས་ལེན་ཡོད་པའི་གནས་སྟངས་བྱུང་སྟེ་ལག་འཁྱེར་ཚད་ལྡན་དང་ཡན་ལག་སྨན་ཁང་གསར་འཛུཊ། སྨན་ཚོང་འགྲེམས་བཅས་ཀྱི་མཐུན་རྐྱེན་རག་ཡོད་སྟབས། མ་འོངས་པར་སྨན་རྩིས་ཁང་གཙོས་འབྲེལ་ཡོད་ཚང་མས་རྒྱ་གར་གྱི་གནད་ཡོད་མི་སྣ་དང་ཚོགས་པ་ཁག་ལ་མུ་མཐུད་འབྲེལ་བ་བྱས་ཏེ། བོད་སྨན་ཁྱབ་སྤེལ་དང་དཔལ་འབྱོར་འདུ་འགོད་ཡར་རྒྱས་སུ་གཏོང་རྒྱུ་དང་། སྨན་པའི་ལམ་ལུགས་དང་སློབ་གཉེར་སྤུས་དག་པོ་སྤྲོད་རྒྱུ། ལྷག་པར་དུ་སྨན་དང་ནད། སྨན་སྦྱོར་སོགས་ཀྱི་ཐོག་འགྲོ་སོང་ལ་མ་འཛེམ་པར་ཉམས་ཞིབ་གནང་རྒྱུར་འབད་བརྩོན་བྱེད་དགོས་སྐོར་བརྗོད་བྱུང་།   

དེའི་རྗེས་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས། སྨན་པའི་ལྷན་ཚོགས་ཀྱི་གནད་དོན་འདིའི་ཐོག་ལྷན་ཚོགས་ཀྱི་ཚོགས་གཙོ། སྲིད་སྐྱོང་དང་འཕྲོད་བསྟེན་བཀའ་བློན། འཕྲོད་བསྟེན་དྲུང་ཆེ་དང་དྲུང་འཕར། སྤྱི་འཐུས་ཚོགས་གཙོ་སྦྲེལ་པོ་བཅས་ཀྱི་གམ་དུ་བཅར་བ་ལྟར། ཚོགས་གཙོ་སྦྲེལ་པོས་གལ་ཆེན་དུ་བརྩིས་ཏེ་རྒྱུན་ལས་ནང་ཁུལ་གོ་བསྡུར་དང་། སྲིད་སྐྱོང་དང་འཕྲོད་བསྟེན་བཀའ་བློན་མཉམ་དུ་གོ་བསྡུར་ཞུས་ཡོད་པ་མ་ཟད། ཐེངས་འདིར་སྤྱི་འཐུས་རྒྱུན་ལས་གཉིས་ཆེད་དུ་ཚོགས་འདུའི་ནང་དོན་ཤེས་རྟོགས་ཆེད་ཚོགས་ཞུགས་གནང་ཡོད་སྐོར་དང་འབྲེལ། ད་ལྟའི་བར་མཐུན་རྐྱེན་དང་ཕྱོགས་ཡོངས་ནས་དཀའ་ངལ་འཕྲད་ཡོད་ཀྱང་། ད་བར་ལས་དོན་མང་པོ་ཞིག་འགྲུབ་ཡོད་པ་དང་། ད་དུང་མཐུན་རྐྱེན་དང་རྒྱབ་སྐྱོང་རག་པ་ཡིན་ན། དེ་ལས་ལྷག་པའི་ལས་དོན་འགྲུབ་ཐུབ་སྟབས། འཛིན་སྐྱོང་བཀའ་ཤག་དང་འཕྲོད་བསྟེན་ལས་ཁུངས་བཅས་ནས་རྒྱབ་སྐྱོར་དང་མཐུན་རྐྱེན་སྦྱོར་རྒྱུ་ཧ་ཅང་གལ་ཆེན་པོ་ཆགས་ཡོད་སྐོར་གསུངས་སོང་།

དེ་རིང་ཚོགས་འདུ་མཇུག་བསྡོམས་ཐོག་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་ཕེབས་ཏེ། ནོར་གླིང་ཉེ་འཁྲིས་སུ་ཡོད་པའི་སྤི་ཏི་ཝ་རི་སྨན་སྦྱོར་ཁང་ལ་དེབ་སྐྱེལ་ཡིག་ཆ་གསོལ་བསྩལ་གནང་རྗེས། འཕྲོད་བསྟེན་བཀའ་བློན་མཆོག་གིས། ཆེས་མཐོའི་སྨན་པའི་ལྷན་ཚོགས་དེ་འཕྲོད་བསྟེན་ལས་ཁུངས་ཀྱི་ཐད་ཀའི་སྟངས་འཛིན་འོག་མེད་པའི་སྒྲིག་འཛུགས་ཤིག་ཡིན་ཡང་།  སྨན་དང་འབྲེལ་བ་ཡོད་པའི་དབང་གིས་འཕྲོད་བསྟེན་ལས་ཁུངས་ལ་འབྲེལ་བ་ཡོད་པ་ཞིག་ཡིན་སྟབས། ད་ལྟའི་སྨན་པའི་ལྷན་ཚོགས་ཀྱི་ཕུགས་རྒྱང་རིང་པོའི་ལས་དོན་ཆེད་རྒྱ་གར་གཞུང་དང་འབྲེལ་བ་གནང་རྒྱུ་དང་། དཔལ་འབྱོར་གནས་སྟངས་བཅས་དཀའ་ངལ་གཉིས་ཀྱི་ཐོག་བཀའ་ཤག་ནང་གྲོས་བསྡུར་གནང་སྟེ། མ་འོངས་པར་དཔལ་འབྱོར་ཐོག་སྨན་རྩིས་ཁང་དང་ཝ་ཎ་མཐོ་སློབ་བཅས་ཀྱིས་མཐུན་འགྱུར་གནང་བ་ཡིན་ན། བཀའ་ཤག་གི་ངོས་ནས་སྟོང་མིན་ཙམ་གནང་རྒྱུའི་ཞལ་བཞེས་གནང་ཡོད་སྐོར་སོགས་གསུངས་སོང་།

མཇུག་ཏུ་ཁྲི་ཟུར་ཟམ་གདོང་རིན་པོ་ཆེ་མཆོག་གིས། སྔོན་མ་གསོ་བ་རིག་པ་རྒྱ་གར་གཞུང་གིས་ངོས་ལེན་ཡོང་ཐབས་ལ་འབད་བརྩོན་བྱས་ཡོད་པ་དང་། གལ་སྲིད་རྒྱ་གར་གཞུང་གིས་ངོས་ལེན་མ་བྱས་ཀྱང་ང་ཚོ་རང་རྐྱ་འཕེར་བའི་ཐོག་སྡོད་རྒྱུའི་དམིགས་ཡུལ་བཟུང་སྟེ་ཁྲིམས་ཡིག་གཏན་འབེབས་བྱས་ཀྱང་། ཕྱིས་སུ་གསོ་བ་རིག་པ་རྒྱ་གར་གཞུང་གིས་ཁྲིམས་མཐུན་ངོས་འཛིན་ཐོབ་ཡོད་སྟབས་སྨན་པའི་ལྷན་ཚོགས་ཀྱི་ཕྱག་ལས་གནང་བའི་རྒྱ་ཁྱོན་དང་ངོ་བོ། གལ་གནད་ཆེ་ཆུང་བརྩི་སྟངས་ལ་འགྱུར་བ་ཆེན་པོ་འགྲོ་བཞིན་པ་མཁྱེན་པའི་ཐོག རྒྱ་གར་ནང་སྨན་གྱི་སློབ་སྦྱོང་དང་སྨན་སྦྱོར་གྱི་ཕྱག་ལས་གནང་མཁན་ཚོས་རྒྱ་གར་གཞུང་གི་ཨེམ་སེ་སེའི་ཁྲིམས་ནང་། ང་ཚོའི་སྲུང་དགོས་པའི་ཁྲིམས་དང་ཐོབ་བྱའི་ཁེ་ཕན་དང་མཐུན་རྐྱེན། ཉེན་ཁ། ཁྲིམས་འགལ་བྱུང་བ་ཡིན་ན་གང་ཡོང་སྲིད་མིན་སོགས་སྨན་པའི་ལྷན་ཚོགས་དང་སྨན་གྱི་སྒྲིག་འཛུགས་ཁག་གིས་མཁྱེན་དགོས་སྐོར་གསུངས་བྱུང་།  

ཁོང་གིས། “ སྨན་པའི་ལྷན་ཚོགས་ཀྱི་ཁྲིམས་སྒྲིག་དེ་གསོ་བ་རིག་པ་གཞུང་འབྲེལ་ངོས་ལེན་མེད་སྐབས་བཟོས་པ་ཡིན་སྟབས། དེར་བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་ཚོགས་ཆུང་བཙུགས་ཏེ། སྐབས་དེར་གཏན་འབེབས་བྱས་པའི་སྒྲིག་གཞི་ཇི་མ་ཇི་བཞིན་འགྲོ་ཐུབ་མིན་དང་། རྒྱ་གར་གཞུང་གི་ཁྲིམས་མཐུན་ངོས་ལེན་གནང་རྗེས་འགྱུར་བ་ཕྱིན་མིན། ང་ཚོའི་ཁྲིམས་དང་སྒྲིག་གཞིའི་ཐོག་འགྱུར་བ་གཏོང་རྒྱུ་ཡོད་མེད་བཅས་ལ་བསྐྱར་ཞིབ་གནང་དགོས་པ་ཞིག་རེད་བསམ་གྱི་འདུག ལྷན་ཚོགས་ལ་མཚོན་ནའང་ད་ཆར་དཔལ་འབྱོར་ཐོག་དཀའ་ངལ་ཡོད་སྐོར་གསུང་གི་འདུག སྨན་པའི་ལྷན་ཚོགས་དེ་སྤྱི་འཐུས་གྲོས་ཚོགས་ཀྱིས་གཏན་ལ་ཕབ་པའི་ཁྲིམས་ཡིག་ཅིག་གི་འོག་བཙུགས་པའི་སྒྲིག་འཛུགས་ཤིག་རེད།  སྒྲིག་འཛུགས་དེ་རང་སྐྱོང་གི་སྡེ་ཚན་ཞིག་ལས། གཞུང་གི་འཛིན་སྐྱོང་དབང་འཛིན་འོག་རྩ་བ་ཉིད་ནས་མེད་པའི་སྡེ་ཚན་ཞིག་རེད། ཟུར་འཛུགས་སྡེ་ཚན་ཞིག་ལ་གཞུང་གི་ངོས་ནས་དཔལ་འབྱོར་གྱི་མཐུན་རྐྱེན་སྦྱར་མི་ཆོག་པ་ཡོད་པ་མ་རེད། ང་ཚོ་འཛིན་སྐྱོང་ནང་ཡོད་སྐབས་སྨན་པའི་ལྷན་ཚོགས་ཀྱི་ཁྱབ་ཁོངས་སྡེ་ཚན་དེ་དཔལ་འབྱོར་འདུ་འགོད་ཀྱི་སྡེ་ཚན་མིན་པའི་དབང་གིས་ལོ་དང་པོ་དང་གཉིས་པར་རྒྱབ་སྐྱོར་ཞུས་པ་རེད། དེང་སང་སྨན་གྱི་ལས་དོན་ཉུང་བ་དང་དཔལ་འབྱོར་འདུ་འགོད་ཆེ་བ་ཆགས་བསྡད་ཡོད་པ་རེད། གང་དུ་བལྟས་ཀྱང་སྨན་པ་ཚང་མ་ཚོང་དཔོན་གྱི་སྲོལ་འདྲ་ཆགས་བསྡད་ཡོད་པ་རེད། སྨན་སྦྱོར་སྡེ་ཚན་ཁག་གིས་སྨན་སྦྱོར་སྐབས་ཕྱི་ལོགས་ཀྱི་རྒྱབ་ཤོག་ཁྲ་ཁྲ་ཟིང་ཟིང་བཟོ་བ་ལས། རྒྱུད་དང་རྒྱ་གཞུང་ནང་བཤད་པ་ལྟར་གནང་གི་མི་འདུག སྨན་གྱི་སྡེ་ཚན་ཁག་དཔལ་འབྱོར་སྐྱོ་བོ་མ་རེད་ལ། སྨན་པའི་ལྷན་ཚོགས་ཀྱིས་ཀྱང་རང་འགུལ་ཐོག་དཔལ་འབྱོར་འདུ་འགོད་གནང་ཐུབ་པ་དགོས་པ་རེད། གནང་ཐུབ་ཆེད་གཞུང་ལ་རྒྱབ་བསྙེས་ཏེ་གཞན་རྟེན་གྱི་བསམ་བློ་མགོ་ནས་བསླབ་བཞག་པ་ཡིན་ན་ཡོང་གི་མ་རེད། ད་ཆར་སྨན་པའི་ལྷན་ཚོགས་ཀྱིས་འདང་ངེས་ཀྱི་དཔལ་འབྱོར་འདུ་འགོད་གནང་ཐུབ་ཀྱི་མེད་པ་ ལོ་དགུའི་ནང་གསལ་བོ་ཆགས་ཡོད་སྟབས། སྨན་པའི་ལྷན་ཚོགས་དང་འཛིན་སྐྱོང་གཉིས་ཀའི་ངོས་ནས་བསྐྱར་ཞིབ་གནང་སྟེ་མ་འོངས་པའི་ལམ་ཕྱོགས་བཙལ་རྒྱུ་གལ་ཆེན་པོ་རེད།” ཅེས་གསུངས་བྱུང་།

ཡང་ཁོང་གིས། “ རྒྱ་གར་གཞུང་གིས་གསོ་བ་རིག་པ་ངོས་འཛིན་རག་པ་དེར་༸གོང་ས་མཆོག་གིས་དམིགས་བསལ་ཐུགས་སྣང་གནང་སྟེ་རག་པ་རེད་མ་གཏོགས། ང་ཚོ་འོག་ནས་ལོ་བཅུ་གྲངས་རིང་འབད་བརྩོན་བྱས་ནས་ཡོང་ཡ་མེད་པའི་གནས་སྟངས་ཤིག་ལ་བསླེབས་པ་རེད། ད་ལྟ་བྱུང་བ་དེར་ང་ཚོས་ལས་དོན་ག་རེ་བྱས་ཀྱང་། ལྐོག་ལྐོག་སུད་སུད་དང་ཁྲིམས་འགལ་ཆགས་པར་ཞེ་སྣང་བྱེད་མི་དགོས་པར། རྒྱ་གར་ཙམ་མ་ཟད་ཡུལ་ལུང་གཞན་གང་དུ་ཕྱིན་ཡང་། གསོ་བ་རིག་པ་རང་གི་ཐོག་ཕྱིན་པ་མ་གཏོགས། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རིག་གཞུང་ཆ་ཤས་ཡིན་པའི་ངོ་བོ་སྟོན་མི་དགོས་པ་དེ་དག་རླབས་ཆེན་གྱི་གྲུབ་འབྲས་ཤིག་རེད་བསམ་གྱི་ཡོད། དེ་མ་གཏོགས་གཞན་རྒྱལ་སྤྱིའི་ནང་བོད་ཀྱི་སྨན་མང་ཆེ་བ་རྒྱ་ནག་སྨན་གྱི་ཁ་བྱང་འོག་ཚུད་ནས་འགྲོ་བཞིན་པ་རེད། སྨན་པའི་ལྷན་ཚོགས་དང་སྨན་གྱི་སྡེ་ཚན་ཚང་མས་དགོངས་པ་བཞེས་དགོས་པ་གཙོ་བོ། ཁྲིམས་མཐུན་ངོས་ལེན་བྱུང་ཚར་རྗེས་ང་ཚོས་རྒྱ་གར་གཞུང་གི་ངོས་ལེན་དམིགས་ཡུལ་ནང་བཀོད་ཡོད་པ་རེད། ང་རང་ཚོར་གང་ཡོད་པ་དེར་བདག་པོ་རྒྱག་དགོས་པ་ཞིག་དང་ཐུབ་པ་ཞིག དེབ་སྐྱེལ་སོགས་གང་ཡིན་ནང་བཟོ་གྲྭ་གཞན་གྱི་ལག་མ་ཤོར་བ་བཟོ་རྒྱུ་ཛ་དྲག་གི་གནས་ཚུལ་ཞིག་རེད་ལ། ཁྲིམས་མཐུན་བདག་དབང་སྲུང་སྐྱོབ་བྱེད་ཐུབ་པ་ཞིག་དང་བྱེད་རྒྱུའི་གོ་སྐབས་ལ་བསླེབས་ཡོད་པ་རེད་བསམ་གྱི་འདུག ” ཅེས་གསུངས་བྱུང་།