གྲོས་ཚོགས་ཚོགས་དུས་དྲུག་པ་དབུ་འཛུགས་གནང་སོང་།

དེ་རིང་སྔ་དྲོར་སྐབས་བཅོ་ལྔ་བའི་སྤྱི་འཐུས་གྲོས་ཚོགས་ཚོགས་དུས་དྲུག་པ་དབུ་འཛུགས་གནང་སྟེ། སྤྱི་འཐུས་ཚོགས་གཙོ་མཆོག་གིས་རྒྱ་གཞུང་གི་བྱེད་ཕྱོགས་སྐོར་དང་མང་ཚོགས་རྩིས་ཁྲ་ཚོགས་ཆུང་གི་སྙན་ཐོ། སྤྱི་འཐུས་ཀརྨ་ཆོས་འཕེལ་གྱི་གསལ་བསྒྲགས་སྐོར། དེ་བཞིན། ལྐོག་ཟ་རུལ་སུངས་བཅས་ཀྱི་ཐོག་གཏམ་བཤད་གནང་སོང་།

དེ་རིང་སྔ་དྲོའི་ཆུ་ཚོད་ ༩།༣༠ སྟེང་། སྐབས་བཅོ་ལྔ་བའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པ་གངས་སྐྱིད་བཀའ་ཤག་ཚོགས་ཁང་དུ་དབུ་འབྱེད་གནང་སོང་། ཐེངས་འདིའི་གྲོས་ཚོགས་ཐོག་སྤྱི་འཐུས་ཚོགས་གཙོ་གཞོན་གཉིས་གཙོས་པའི་སྤྱི་འཐུས་ ༤༠ དང་། སྲིད་སྐྱོང་བློ་བཟང་སེང་གེ་མཆོག་གིས་དབུས་པའི་ཕྱག་རོགས་བཀའ་བློན་རྣམ་པ། ཟུར་ཉན་དུ་ལྷན་ཁག་ཁང་གི་དྲུང་ཆེ་དང་གསར་འགོད་པ་བཅས་འཛོམས་སོང་། ཚོགས་འདུ་དབུ་འཛུགས་ཐོག་ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་མོའི་རྒྱལ་གླུ་གྱེར་འདོན་དང་ཚོགས་འདུ་དབུ་འཛུགས་གཏམ་བཤད་བཅས་གནང་གྲུབ་རྗེས། བོད་ཕྱི་ནང་གཉིས་སུ་རང་ལུས་མེར་བསྲེཊ་གནང་མཁན་རྣམས་ཀྱི་ཆེད་དུ་མྱ་ངན་གུས་འདུད་ཀྱི་གྲོས་ཆོད་དང་། བོད་ནང་གི་ཛ་དྲག་གི་གནས་སྟངས་ཐོག་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་འཆར་བཅས་ཀྱི་ཐོག་བགྲོ་གླེང་གནང་སོང་།

བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་དབུ་འཛུགས་གཏམ་བཤད་གནང་དོན། སྐབས་བཅོ་ལྔ་བའི་གྲོས་ཚོགས་ཚོགས་དུས་ལྔ་བ་ནས་ད་བར་བོད་ནང་ཛ་དྲག་གི་གནས་བབ་ལྷག་ཡོད་ཀྱང་། རྒྱ་གཞུང་གིས་ད་ཆར་ཡང་བོད་ནང་ཕྱིའི་འཛུགས་སྐྲུན་དང་ཡར་རྒྱས་ཀྱི་ལས་གཞི་ཁོ་ནས་བོད་མིའི་མངོན་འདོད་དང་། རྩོད་རྙོག་སེལ་ཐུབ་ཀྱི་ཡོད་པའི་སྲིད་ཇུས་ལག་བསྟར་བྱས་ཏེ། བོད་མིའི་ཆོས་དང་རིག་གཞུང་། ཁོར་ཡུག་དང་བཅས་པ་རྩ་བརླག་ཏུ་འགྲོ་བཞིན་ཡོད་པ་ལས། བོད་མིའི་མངོན་འདོད་རྩ་བ་ཉིད་ནས་སྐོང་ཐུབ་ཀྱི་མེད་པ་དང་། ད་ལྟའི་བར་གྱི་གནས་སྟངས་ལ་གཞིགས་ན། རྒྱ་གཞུང་གིས་དངོས་ཡོད་གནས་སྟངས་ལ་གཞི་བཅོལ་ཏེ་བོད་མིའི་དཀའ་རྙོག་སེལ་བའི་ཆོད་སེམས་མེད་པའི་རྣམ་པ་གསལ་བོ་ཡིན་པ་དང་། ལས་གཞི་མང་ཆེ་བ་རྒྱ་ནག་རང་གི་ཁེ་ཕན་ཆེད་རྩོམ་གྱི་ཡོད་སྟབས། མ་འོངས་པར་རྒྱ་ནག་གི་མགོ་ཁྲིད་ཚོས་བོད་ནང་གི་བོད་མིའིོ་མངོན་འདོད་གང་ཡིན་ཇི་བཞིན་རྟོགས་པར་བྱས་ཏེ། བོད་མིའི་དཀའ་ངལ་སེལ་ཐབས་བྱེད་དགོས་པའི་འབོད་སྐུལ་གནང་སོང་།  

དེ་བཞིན་མང་ཚོགས་རྩིས་ཁྲ་ཚོགས་ཆུང་གི་སྙན་ཐོའི་སྐོར་ལ་ཚོགས་གཙོ་མཆོག་གིས། “ ཐེངས་འདིར་སྐབས་ལྔ་བའི་མང་ཚོགས་རྩིས་ཁྲ་ཚོགས་ཆུང་གི་སྙན་ཐོ་ཡོང་གི་རེད། མང་ཚོགས་ཀྱིས་མཁྱེན་དགོས་པའི་རིགས་གྲོས་ཚོགས་ནང་ཆ་ཚང་སྙན་སྒྲོན་བྱ་རྒྱུའི་ཐག་གཅོད་བྱས་ཡོད། དེ་སྔ་མང་ཚོགས་རྩིས་ཁྲ་ཚོགས་ཆུང་ཐེངས་བཞིར་བཙུགས་ཟིན་ཡང་། གྲོས་ཚོགས་ནང་བགྲོ་གླེང་མཐིལ་ཕྱིན་པ་ཞིག་དང་ང་ཚོའི་ཐུགས་བློ་ཁེངས་པ་ཞིག་བྱུང་ཡོད་པ་མ་རེད། ད་རེབ་གྲོས་ཚོགས་ཀྱི་བཀའ་འཁྲོལ་དང་སྦྲགས་ཏེ་ཉིན་གཅིག་གཉིས་རིང་བགྲོ་གླེང་ཡོང་ཐུབ་པར་འབད་བརྩོན་བྱེད་རྒྱུ་ཡིན། དེའི་རྗེས་སུ་གྲོས་ཚོགས་ཀྱི་བཀའ་འཁྲོལ་བྱུང་བ་ཡིན་ན་བཀའ་ཤག་ལ་ཟླ་བཞི་ཙམ་གྱི་མཇུག་སྐྱོང་ལག་བསྟར་བྱ་རྒྱུའི་དུས་ཚོད་ཕུལ་ཏེ། རྗེས་སུ་སྤྱི་འཐུས་རྒྱུན་ལས་ཀྱིས་དོན་ཚན་རེ་རེ་བཞིན་ཞིབ་ཚགས་ཀྱིས་གཟིགས་ཏེ་གྲོས་ཚོགས་རྗེས་མའི་ནང་གནས་ཚུལ་གསལ་བོ་ཆགས་མིན་དང་། གཙང་མ་བཟོ་ཐུབ་ཐབས་ལ་རེ་བ་རྒྱག་གི་ཡོད” ཅེས་གསུངས་བྱུང་།

ཡང་ཚོགས་གཙོ་མཆོག་གིས་ཉེ་ཆར་བཀའ་ཤག་གིས་གསོལ་འདེབས་བྱས་པ་ལྟར། དམངས་གཙོའི་དུས་དྲན་ཉིན་གཞུང་ཞབས་སྡེ་འགན་ཡན་གྱི་ལས་བྱེད་ཚོར་༸གོང་ས་མཆོག་གིས་བཀའ་སློབ་གནང་བའི་སྐོར་གསུངས་དོན། “ ཉེ་ཆར་ལས་བྱེད་ཚོར་༸གོང་ས་མཆོག་གིས་བཞུགས་མོལ་ཚོགས་འདུ་གནང་སྐབས། སྤྱི་ཚོགས་ནང་སྐུ་དྲག་གསར་བ་ཞེས་པའི་ཚིག་ཅིག་ཡོང་གི་ཡོད་པ་༸གོང་ས་མཆོག་གི་ཐུགས་དགོངས་ལ་ཡོད་པ་དེ་ལས་བྱེད་ཚོར་བཀའ་གནང་བ་རེད། དེའི་ཐོག་ང་རང་ཚོའི་མཛད་གཙོ་རྣམ་པ་ནས་མར་རྩིས་ཏེ་ལས་བྱེད་ཚང་མས་འདི་ལ་ཐུགས་སྣང་ཆེན་པོས་དགོངས་བཞེས་གནང་སྟེ། སོ་སོའི་ཉིན་རེའི་ལས་དོན་བྱེད་ཕྱོགས་དེ་བཟང་སྤྱོད་དང་མཐུན་པ། མི་མང་གི་དགོས་མཁོ་དང་འཚམ་པ། མི་མང་ལ་འབྲེལ་བ་བྱེད་སྐབས་སོ་སོར་དབང་ཆ་ཡོད་བསམ་སྟེ་དབང་ཡོད་བཏང་བའི་རྣམ་པ་མ་ཡིན་པར། གུས་བརྩི་དང་ལྡན་པའི་ལས་དོན་བསྒྲུབ་རྒྱུ་ཧ་ཅང་གལ་ཆེན་པོ་རེད་བསམ་གྱི་ཡོད ”ཅེས་གསུངས་བྱུང་།

ཉེ་ཆར་སྤྱི་འཐུས་ཀརྨ་ཆོས་འཕེལ་ལགས་གསར་འགོད་གསལ་བསྒྲགས་སྤེལ་བའི་ཐད་ཚོགས་གཙོ་མཆོག་གིས། “གསར་འགོད་གསལ་བསྒྲགས་དོན་ཚན་གསུམ་གྱི་སྔོན་དེར། སྤྱི་འཐུས་རྒྱུན་ལས་སུ་༸གོང་ས་མཆོག་གི་བཀའ་སློབ་གནང་སྐབས་ངོ་བཅར་ཞུས་པའི་ཚོགས་གཙོ་གཞོན་གཉིས་དང་། ཚོགས་དྲུང་གསུམ་གྱིས་སྤྱི་འཐུས་རྒྱུན་ལས་ལ་གསལ་བཤད་གནང་བའི་སྐབས་སུ། ༸གོང་ས་མཆོག་སྔོན་མ་དགུང་གྲངས་ ༡༡༣ ལ་བཞུགས་རྒྱུའི་དགོངས་པ་ཡོད་པ་དང་། ད་ལྟའི་ཆར་དགུང་ལོ་ ༡༠༨ ཙམ་མེད་འགྲོ་གསུངས་པ་དེར་ང་འབྲེལ་བ་ཆགས་ཀྱི་མི་འདུག་ཅེས་གསུངས་འདུག མང་ཚོགས་ཀྱི་གོ་བ་ལེན་ཕྱོགས་ཐོག་ཚོགས་གཙོ་གཞོན་གཉིས་དང་། དྲུང་ཆེ་བཅས་ཀྱིས་སྤྱི་འཐུས་བྱེ་བྲག་པ་དེས་༸གོང་ས་མཆོག་གིས་བཀའ་གནང་བ་དེར་རྩ་བ་ཉིད་ནས་འབྲེལ་བ་ཡོད་པ་མ་རེད་ཅེས་པའི་གནས་སྟངས་ལ་གཟིགས་པ་ཡིན་ན། ཏག་ཏག་བསྡད་ཡོད་པ་མ་རེད་ཅེས་ཞུ་རྒྱུ་ཡིན” ཞེས་དང་། “ དོན་ཚན་དང་པོའི་ནང་ངས་གྲོས་ཚོགས་ནང་སྔ་རྗེས་བཤད་མ་མྱོང་ཞེས་པ་དེ་རེད། ཚིག་རང་གི་ཐོག་ནས་གྲོས་ཚོགས་ནང་ངག་ཐོག་གསལ་བཤད་གནང་བ་དེ་སྔ་རྗེས་ཚང་མར་བལྟས་པ་ཡིན་ན་མིན་པའི་སྲོལ་ཡོད་ཀྱང་། ལོ་ ༤༠ ལྷག་གི་སྔོན་དུ་༸གོང་ས་མཆོག་གིས་གསུངས་བཞག་པ་དེ་ཚོ་ད་ལྟའི་དུས་སུའང་གྲོས་ཚོགས་ནང་གླེང་སྟེ། ༸གོང་ས་མཆོག་ལ་དགོས་པ་དེ་རང་བཙན་ཡིན་པ་དང་། ཛ་དྲག་གནས་སྟངས་དང་གནས་སྟངས་གཞན་གྱི་དབང་གིས་དབུ་མའི་ལམ་ལ་ཕེབས་ཀྱི་ཡོད་པའི་འགྲེལ་བརྗོད་གནང་ཡོང་དུས། ཕུགས་ནས་༸གོང་ས་མཆོག་གི་དགོངས་པ་ད་ལྟའང་རང་བཙན་རེད་ཅེས་པའི་གོ་བ་དེ་རང་བཞིན་གྱིས་ཐེབས་འགྲོ་བའི་གནས་སྟངས་ཆགས་ཡོད། སྐབས་དེར་ཡང་ཚོགས་གཙོས་གོ་བ་དེ་རང་བླངས་བའི་ཐོག་ནས་ཐག་གཅོད་བྱས་པ་ཡིན། འཛིན་སྐྱོང་བཀའ་ཤག་གི་གསལ་བཤད་ནང་དུའང་གོ་བ་དེ་ག་རང་གི་ཐོག་གསལ་བཤད་གནང་བ་རེད། དེའི་རྗེས་སུ་དགའ་ལྡན་ཕོ་བྲང་གིས་གསར་འགོད་གསལ་བསྒྲགས་གནང་བ་དེ་ཡང་གོ་བ་དེ་འདྲ་ཞིག་གི་ཐོག་ནས་སྤེལ་གནང་བ་རེད།

སྤྱི་འཐུས་སྒེར་གྱི་ཐོག་གལ་སྲིད་ངས་དེ་འདྲ་ཞིག་བཤད་ཡོད་པ་ཡིོན་ན། དེའི་སྐབས་ཀྱི་སྤྱི་འཐུས་རྣམ་པས་གང་ཡང་གསུངས་ཡོད་པ་མ་རེད། མི་མང་གི་ངོས་ནས་བསམ་ཚུལ་སྣེ་གཅིག་འབྱོར་མ་སོང་། འཛིན་སྐྱོང་བཀའ་ཤག་གིས་ཀྱང་གང་ཡང་གསུངས་ཡོད་པ་མ་རེད་ཅེས་པ་དེ། འཛིན་སྐྱོང་བཀའ་ཤག་གི་སྐོར་བཀའ་ཤག་གིས་གསལ་བཤད་གནང་མདོག་ཁ་བོ་རེད། གསལ་བཤད་གནང་མཁན་ཁོ་རང་ཚོགས་གཙོ་ཟུར་པ་ཞིག་རེད། གྲོས་ཚོགས་ཀྱི་ལས་རིམ་དང་གྲོས་ཚོགས་སྟངས་འཛིན་གནང་མྱོང་མཁན་གྱི་སྤྱི་འཐུས་ཤིག་རེད། གྲོས་ཚོགས་ཀྱི་ལས་རིམ་དང་འགྲོ་སྟངས་ཆ་ཚང་མཁྱེན་གྱི་ཡོད་པ་རེད། སྐབས་དེར་ཚོགས་གཙོས་ཐག་གཅོད་གསལ་བོ་ཞུས་ཡོད། ལས་རིམ་ནང་ཚོགས་གཙོ་སྦྲེལ་པོས་གོ་བསྡུར་ཞུས་ཏེ་གྲོས་ཚོགས་ནང་བགྲོ་གླེང་མི་དགོས་པའི་ཐག་གཅོད་བྱས་ཡོད་ཅེས་གསལ་བོ་ཞུས་ཡོད། ཐག་གཅོད་དེའི་དབང་གིས་སྤྱི་འཐུས་རྣམ་པས་གྲོས་ཚོགས་སུ་མ་གསུངས་བ་མ་གཏོགས། གསུང་འདོད་མེད་པ་མ་རེད་ཅེས་གསལ་བཤད་ཞུ་འདོིད་བྱུང་།

མང་ཚོགས་ཀྱི་ངོས་ནས་བསམ་ཚུལ་སྣེ་གཅིག་ཅེས་པ་དེ་ཡང་བདེན་པ་མ་རེད། བསམ་ཚུལ་ཁ་ཤས་བྱུང་བ་རེད། དེ་ལ་སྤྱི་འཐུས་རྒྱུན་ལས་ཀྱིས་ཐག་གཅོད་གནང་སྟེ་འབྲེལ་ཡོད་ཚོར་བཀའ་ལན་ཡང་ཕུལ་ཡོད། གྲོས་ཚོགས་ནང་ཚོགས་གཙོས་ཐག་གཅོད་གནང་ཟིན་པ་རེད་ཅེས་ང་ཚོས་འབྲེལ་ཡོད་ཚོར་བཏང་ཡོད། དོན་ཚན་དང་པོ་དེ་གོ་བའི་ཐོག་ནས་༸གོང་ས་མཆོག་གི་གནས་ཚུལ་ཆ་ཚང་དགོངས་པར་ཨེ་ཡོད་བསམ་པའི་བསམ་ཚུལ་བསླེབས་བསྡད་ཀྱི་འདུག  ད་ལྟ་བཀུར་འོས་སྤྱི་འཐུས་ཀྱིས་༸གོང་ས་མཆོག་ལ་མཚན་འཁོད་སྙན་ཞུ་ཕུལ་ཡོད་ཤག་བྱེད་ཀྱི་ཡོད། དོན་ཚན་གསུམ་པར་འཁོད་པ་གཞིར་བཞག་དགོངས་སེལ་དང་སྦྲགས་འདས་པའི་གནས་ཚུལ་ཕྱིར་འཐེན་དང་། མ་འོངས་པར་གླེང་སློང་མི་བྱེད་པའི་དམ་བཅའ་བརྟན་པོ་ཡོད་པ་གསུངས་ཡོད་པ་རེད། གནད་དོན་དེའི་རིགས་སྤྱི་ཚོགས་ཟིང་ཟིང་བཟོ་ཆེད་མིན་སྟབས། གནད་དོན་དེའི་རིགས་ད་རེབ་གྲོས་ཚོགས་ནང་གསལ་བོ་དང་གཙང་མ་ཆགས་ཐུབ་པའི་རེ་ཞུ་གི་ཡོད། ” ཅེས་གསུངས་བྱུང་།

ཚོགས་གཙོ་མཆོག་གིས་ལྐོག་ཟ་རུལ་སུངས་སྐོར་གསུངས་དོན། “ བར་ལམ་སྤྱི་ཚོགས་ནང་ལྐོག་ཟ་རུལ་སུངས་ཀྱི་གནས་ཚུལ་ཁག་ཅིག་ཐོན་པ་རེད། གནད་དོན་མཁྱེན་མཁན་ཚོས་གཟིགས་པ་ཡིན་ན། ལྐོག་ཟ་རུལ་སུངས་ཀྱི་གནད་དོན་དེ་དག་དུས་ཚོད་མི་འདྲ་བའི་ནང་བྱུང་ཡོད་པ་རེད། ཡིན་ནའང་། གནས་ཚུལ་ཕྱིར་ཐོན་པའི་སྐབས་སུ་དུས་ཚོད་གཅིག་གི་ནང་ལ་ཐོན་ཡོད་སྟབས། མང་ཚོགས་ནང་བོད་མིའི་སྒྲིག་འཛུགས་ཁྱབ་ཁོངས་སུ་ལྐོག་ཟ་རུལ་སུངས་ཀྱི་གནས་སྟངས་ཤུགས་ཆེན་མེད་འགྲོ་བསམ་པའི་བསམ་ཚུལ་ཡོང་གི་ཡོད་སྟབས། ང་ཚོ་ཚང་མས་མཁྱེན་གྱི་ཡོད་པ་རེད། དངོས་ཡོད་གནས་སྟངས་ཀྱི་ཐོག་ལ་འཛིན་སྐྱོང་བཀའ་ཤག་དང་འབྲེལ་ཡོད་ནང་སྲིད་བཀའ་བློན་ལ་དྲི་བ་ཡང་ཡོད་པ་རེད། གསལ་བཤད་ཏན་ཏན་ཡོང་གི་རེད། གལ་ཆེ་ཤོས་བོད་མིའི་སྒྲིག་འཛུགས་ཀྱི་ཐད་ཀར་སྟངས་འཛིན་འོག་ཡོད་མིན་ལ་མ་ལྟོས་པར། རྩིས་ཞིབ་དུས་ཐོག་ཏུ་བཟོ་ཐུབ་མིན་ཐོག་ཁྱད་པར་འགྲོ་ཡི་ཡོད་པ་ཚང་མས་མཁྱེན་གྱི་ཡོད་པ་རེད། དེར་བརྟེན། སྤྱི་བར་བདག་པའི་དངུལ་དེ་གཞུང་གི་ཐད་ཀར་སྟངས་འཛིན་འོག་ཡོད་མེད་གང་ལྟར་ཡང་། རྩིས་ཞིབ་བྱ་དགོས་པ་དང་། ས་གནས་དང་དབུས་ནས་འགན་འཁུར་དགོས་རྒྱུ་གལ་ཆེན་པོ་ཆགས་ཀྱི་འདུག” ཅེས་སོགས་གསུངས་སོང་།

ཐེངས་འདིར་སྤྱི་འཐུས་གསུམ་གྱིས་ནད་དགོངས་ཞུས་ཡོད་པ་དང་། སྤྱི་འཐུས་གཅིག་ས་གནས་སུ་བཞུགས་མེད་པ་བཅས་སྤྱི་འཐུས་ ༤ ཚོགས་བཅར་ཞུས་ཡོད་མི་འདུག

གསར་འགོད་པ། དོན་གོ