ཚམ་ཚོམ་འཛེམས་ཟོན་སྤངས་ཏེ་གདོང་ལེན་ཞུ་རྒྱུ་ཡིན།

དེ་རིང་གྲོས་ཚོགས་ཚོགས་དུས་དྲུག་པའི་ཉིན་གཉིས་པར་སྲིད་སྐྱོང་མཆོག་གིས་གྲོས་ཚོགས་ལ་འདས་པའི་ལོ་གཉིས་ཀྱི་ལས་དོན་དང་། མ་འོངས་ལས་འཆར་བཅས་ཀྱི་ཐོག་གསལ་བཤད་གནང་སོང་།

དེ་རིང་སྐབས་བཅོ་ལྔ་བའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པ་ལས་ཉིན་གཉིས་པའི་སྔ་དྲོར། སྲིད་སྐྱོང་བློ་བཟང་སེང་གེ་མཆོག་གིས་སྤྱི་འཐུས་གྲོས་ཚོགས་ནང་། བཀའ་ཤག་གི་གསལ་བཤད་མདོར་བསྡུས་ཤིག་ཡིག་ཐོག་ནས་སྒྲོགས་སྦྱང་གནང་སྟེ། འདས་པའི་ལོ་གཉིས་རིང་སྐབས་བཅུ་བཞི་པའི་བཀའ་ཤག་གིས་ཐོག་མར་ནུས་ཤུགས་ཕྱོགས་སྒྲིལ་དང་ལས་འགུལ་བཅས་རིམ་པར་སྤེལ་ཏེ་མཐའ་མར་འབྲེལ་མོལ་ཐོག་གོ་རིམ་བསྒྲིགས་ཡོད་པ་དང་། ནུས་ཤུགས་ཕྱོགས་སྒྲིལ་དང་ལས་འགུལ་སྤེལ་བའི་ཁོངས་སུ་ད་ལྟའི་བར་ངྷ་སར་ཚོགས་ཆེན་དང་། ས་གནས་ཁག་ཏུ་མང་ཚོགས་འདུ་འཛོམས། གཞུང་དང་གྲོས་ཚོགས་ཁག་ལ་ཞུ་གཏུག རྒྱལ་སྤྱིའི་གསར་ལམ་དུ་བོད་དོན་དྲིལ་བསྒྲགས་བཅས་གནང་ཡོད་པ་དང་། ཉེ་ལམ་བོད་རྒྱ་ཞི་མོལ་ལས་དོན་ཚོགས་ཆུང་གི་ཚོགས་འདུ་ཐེངས་ ༢༦ པ་སྐོང་ཚོགས་ཀྱིས་༸གོང་ས་མཆོག་གི་སྐུ་ཚབ་དང་རྒྱ་ནག་གི་མགོ་ཁྲིད་གསར་བའི་སྐུ་ཚབ་བར་ཞི་མོལ་བརྒྱུད་བོད་དོན་དཀའ་རྙོག་སེལ་ཐབས་བྱ་རྒྱུའི་ཐབས་བྱུས་ཐོག་གྲོས་བསྡུར་གནང་ཡོད་སྐོར་སོགས་གསུངས་སོང་།  

མ་འོངས་ལས་འཆར་ཐད་སྲིད་སྐྱོང་མཆོག་གིས་གསུངས་དོན། “ ད་ལྟའི་བོད་ནང་གི་དངོས་ཡོད་གནས་སྟངས་དང་རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་སོགས་ཕྱོགས་གང་ནས་བལྟས་ཀྱང་། བོད་དོན་དཀའ་རྙོག་སེལ་ཐབས་སུ་དབུ་མའི་ལམ་གྱི་སྲིད་བྱུས་ལས་ལྷག་པའི་སྲིད་བྱུས་ལངས་ཕྱོགས་གཞན་མེད་པར་བཀའ་ཤག་གིས་ངོས་འཛིན་ཞུས་ཏེ། བོད་མིའི་སྒྲིག་འཛུགས་ནས་མང་ཚོགས་ཁྲོད་དབུ་མའི་ལམ་གྱི་གོ་རྟོགས་སྤེལ་རྒྱུའི་ལས་འགུལ་རིམ་པས་ལག་བསྟར་ཞུ་འཆར་ཡིན། དེ་སྔོན་འབྲེལ་མོལ་ཐེངས་བརྒྱད་པ་དང་དགུ་པའི་སྐབས་སུ་སྐུ་ཚབ་ཚོ་བརྒྱུད་རྒྱ་ནག་གཞུང་ལ་ཐད་ཀར་སྤྲད་པའི་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་དང་། བསམ་འཆར་གྱི་འགྲེལ་བརྗོད་ཡིག་ཆའི་ནང་དོན་ཁག་གོ་རྟོགས་སྤེལ་ཐབས་སུ་བཙན་བྱོལ་བོད་མིའི་སྤྱི་ཚོགས་དང་རྒྱལ་སྤྱིའི་སྤྱི་ཚོགས། ཁྱད་པར་རྒྱ་རིགས་མི་མང་བཅས་སྡེ་ཚན་སོ་སོར་དམིགས་པའི་ལས་འཆར་རིམ་པ་སྤེལ་རྒྱུ་ཡིན། དབུ་མའི་ལམ་དང་འབྲེལ་བའི་དཔེ་དེབ་དང་བརྙན་འཕྲིན། རྩོམ་པ་པོ་དང་མཁས་པ་སོགས་ཁྱད་མཁས་མི་སྣའི་ཚོགས་འདུ་དང་བགྲོ་གླེང་། གཞོན་སྐྱེས་ཚོར་ཆེད་དམིགས་ཀྱི་གོ་རྟོགས་སྤེལ་རྒྱུའི་ལས་འཆར། དེ་བཞིན་བཀའ་བློན་རྣམ་པ་དང་དྲུང་ཆེ་འགན་འཛིན་རྣམ་པ་བཅས་ས་གནས་ཁག་ཏུ་ཆེད་བསྐྱོད་ཀྱིས་དབུ་མའི་ལམ་གྱི་སྲིད་བྱུས་སྐོར་སློབ་གསོ་གོ་བསྐོན་སྔར་ལྷག་ཞུ་རྒྱུའི་འཆར་གཞི་ཡོད། ” ཅེས་གསུངས་བྱུང་།

ཡང་ཁོང་གིས་མུ་མཐུད། “ རང་དབང་དང་མང་གཙོའི་སྤྱི་ཚོགས་ནང་ཆབ་སྲིད་ཀྱི་ལངས་ཕྱོགས་འདྲ་མིན་ཡོང་གི་ཡོད་པ་རེད་ལ། ཡོང་ཆོག་པ་ཞིག་ཀྱང་རེད། འོན་ཀྱང་སོ་སོའི་ལངས་ཕྱོགས་དྲིལ་བསྒྲགས་བྱེད་སྐབས་ཕ་རོལ་པོར་དངོས་ཡོད་གནས་ཚུལ་དང་མ་མཐུན་པའི་ཁུངས་མེད་ཀྱི་སྐྱོན་བརྗོད་དང་སྒྲོ་བསྐུར་སྣ་ཚོགས་བྱེད་བཞིན་པ་ནི་བཟང་སྤྱོད་ལྡན་པའི་བྱེད་སྟངས་ཤིག་མ་ཡིན་པར་མ་ཟད། བོད་སྤྱིའི་རྩ་དོན་དང་ཆིག་སྒྲིལ་ལ་གནོད་གཞི་ལས་མ་འདས་སྟབས། དབུ་མའི་ལམ་གྱི་རྩ་དོན་ངོ་སྤྲོད་གསལ་བཤད་དང་། མཇུག་སྐྱོང་རྒྱབ་གནོན། རྩོད་སྒྲུབ་གདོང་ལེན་བྱ་སྒོ་ཅི་ཐོན་ལ་ཟོལ་འཇོག་མེད་པར་མདུན་མཆོངས་དང་། ཁྱད་པར་བོད་གངས་ཅན་པ་ཡོངས་ཀྱི་མེ་ཏོག་གང་ལ་ཕོག་པའི་ལྷ་སྐལ་འཕགས་མཆོག་ཐུགས་རྗེ་ཆེན་པོ་མིའི་རྣམ་པར་རོལ་བ་༸གོང་ས་སྐྱབས་མགོན་ཆེན་པོ་མཆོག་ལ་དྲིན་ལན་ལོག་འཇལ་དང་གོ་བ་ལོག་སྒྲུབ་ཀྱིས་མཚན་སྨད་ཞུ་མཁན་ཕྱི་ནང་གང་ནས་བྱུང་ཡང་གདོང་ལེན་ཞུ་རྒྱུ་བཅས་ཀྱི་ལས་འགན་བཀའ་ཤག་ལ་ཡོད་པ་ལྟར། ཚམ་ཚོམ་དང་འཛེམས་ཟོན་སྤངས་པའི་སྒོ་ནས་གདོང་ལེན་ཞུ་རྒྱུ་ཡིན་པས་གྲོས་ཚོགས་འཐུས་མི་རྣམས་པས་མཉམ་རུབ་གནང་བའི་ཡིད་ཆེས་ཡོད། ”ཅེས་གསུངས་བྱུང་།

གསར་འགོད་པ། དོན་གོ