ངྷ་རམ་ས་ལའི་ལམ་ཁ་གང་མགྱོཊ་བསྐྱར་བཟོ་བྱེད་རྒྱུ་ཡིན།

ངྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་དེ་གཟའ་ཕུར་བའི་ཉིན་ནས་མགོ་འཛུགས་ཞུ་རྒྱུ་ཡིན་པ་དང་། ཐེངས་འདིར་རྒྱལ་སྤྱིའི་གློག་བརྙན་གྲགས་ཆེན་དང་དངོས་བྱུང་གློག་བརྙན་སོགས་སྟོན་རྒྱུ་ཡིན་ཞིང་། ཞོར་དུ་གློག་བརྙན་སྐོར་ལ་ཟབ་སྦྱོང་ཞིག་ཀྱང་སྤྲོད་འཆར་ཡོད་འདུག   

དེ་རིང་ཕྱི་དྲོའི་ཆུ་ཚོད་ ༤ པའི་སྟེང་། ངྷ་ཤོད་ཀ་ཅ་རིར་གྲོང་གསེབ་འཛུགས་སྐྲུན་ལས་ཁུངས་ཀྱི་ཚོགས་ཁང་དུ། ཁྲུང་ཁྲུང་དཀར་མོ་སྒྱུ་རྩལ་ཐེབས་རྩ་ཁང་གི་གོ་སྒྲིག་འོག ༢༠༡༣ ལོའི་ངྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་ཐེངས་གཉིས་པའི་སྐོར་གྱི་གསར་འགོད་གསལ་བསྒྲགས་ཤིག་སྤེལ་སོང་། གསར་འགོད་གསལ་བསྒྲགས་ཐོག་ངྷ་ས་གྲོང་གསེབ་འཛུགས་སྐྲུན་ལས་ཁུངས་ཀྱི་འགན་འཛིན་གཞོན་པ་སྐུ་ཞབས་པལ་རཱ་ཤོ་(C Palrashu)ཕེབས་ཏེ་གཏམ་བཤད་གནང་སོང་།

གློག་བརྙན་དུས་སྟོན་དེ་ཟླ་འདིའི་ཚེས་ ༢༤ ནས་ ༢༧ ཉིན་བར་ངྷ་རམ་ས་ལའི་བོད་ཀྱི་ཟློས་གར་ཚོགས་ཁང་དང་ཧི་མ་ཅལ་མངའ་སྡེའི་སྐྱིད་སྡུག་ཚོགས་ཁང་ (Club House) གཉིས་ནང་རིན་མེད་ཐོག ས་གནས་རྒྱ་གར་ཡུལ་མི་དང་བོད་པ། ཕྱི་རྒྱལ་ཁག་གི་ཡུལ་སྐོར་སྤྲོ་འཆམ་པ་བཅས་ལ་གཟིགས་འབུལ་ཞུ་རྒྱུ་ཡིན་པ་དང་། ཐེངས་འདིའི་དུས་སྟོན་ཐོག་རྒྱལ་སྤྱིའི་གློག་བརྙན་སྐད་གྲགས་ཅན་ ༣༨ ཙམ་སྟོན་འཆར་ཡོད་ཅིང་། ཞོར་དུ་རྒྱ་གར་དང་རྒྱལ་སྤྱིའི་གློག་བརྙན་ཕབ་སྐྲུན་པ་དང་སྒྲིག་སྦྱོར་བ་སྐད་གྲགས་ཅན་ཁག་ཅིག་ཆེད་དུ་གདན་འདྲེན་ཞུས་ཏེ། ངྷ་རམ་ས་ལ་ཁུལ་གྱི་གློག་བརྙན་ཕབ་སྐྲུན་པ་དང་པ་དང་དོ་སྣང་ཅན་དག་ལ་གློག་བརྙན་སྐོར་གྱི་ཟབ་སྦྱོང་ཞིག་ཀྱང་སྤྲོད་འཆཪ་ཡོད་འདུག

ཁྲུང་ཁྲུང་དཀར་མོ་སྒྱུ་རྩལ་ཐེབས་རྩ་ཁང་གི་འགན་འཛིན་བསྟན་འཛིན་བསོད་ནམས་ལགས་ཀྱིས། ཐེངས་འདིའི་གློག་བརྙན་དུས་སྟོན་གྱི་དམིགས་ཡུལ་ངོ་སྤྲོད་གནང་བ་ལྟར་ན། ད་ལོའི་གློག་བརྙན་དུས་སྟོན་སྟེང་རྒྱལ་སྤྱིའི་རང་དབང་ཅན་གྱི་གློག་བརྙན་ཚད་ལྡན་མང་པོ་ཞིག་སྦྱན་འབུལ་ཞུས་ཏེ། བོད་པའི་མང་ཚོགས་ལ་སྤྱི་ཚོགས་གཞན་གྱི་རིག་གཞུང་སྐོར་ལ་གོ་རྟོགས་དང་བསམ་བློ་གསར་པ་སྤེལ་རྒྱུ་ཡིན་པ་དང་། ཐེངས་འདིར་གློག་བརྙན་སྐོར་གྱི་དམིགས་བསལ་ཟབ་སྦྱོང་ཞིག་བརྒྱུད་དེ། ཉམས་མྱོང་བརྗེ་རེས་དང་བསམ་ཚུལ་བསྡུ་ལེན་གནང་རྒྱུ་ཡིན་ཞིང་། གློག་བརྙན་དུས་སྟོན་འདི་བརྒྱུད་དེ་ས་གནས་རྒྱ་གར་ཡུལ་མི་དང་བོད་པ། ཕྱི་རྒྱལ་ཡུལ་སྐོར་སྤྲོ་འཆམ་པ་བཅས་ཀྱི་བར་མཐུན་སྒྲིལ་གོང་སྤེལ་དང་། གློག་བརྙན་དང་སྒྱུ་རྩལ་ལས་རིགས་འཕེལ་རྒྱས། མ་འོངས་པར་ངྷ་རམ་ས་ལ་འདི་རྒྱལ་སྤྱི་རང་བཞིན་གྱི་གློག་བརྙན་དུས་སྟོན་བྱེད་སྒོ་སྤེལ་ཡུལ་ཞིག་དང་། ཕྱི་རྒྱལ་ཡུལ་སྐོར་སྤྲོ་འཆམ་པ་མང་པོ་འཁོར་ས་ཞིག་བཟོ་ཐབས་བྱེད་རྒྱུ་ཡིན་སྐོར་སོགས་བརྗོད་བྱུང་།  

ཐེངས་འདིའི་གློག་བརྙན་དུས་སྟོན་སྟེང་གདན་འདྲེན་ཞུས་ཡོད་པའི་རྒྱ་གར་དང་རྒྱལ་སྤྱིའི་གློག་བརྙན་བཟོ་སྐྲུན་པ་གྲགས་ཅན་དག་ནི། པོ་ལན་ཊི་ (Poland) ཡི་རང་དབང་གློག་བརྙན་བཟོ་སྐྲུན་པ་སྐུ་ཞབས་ཇད་སེ་ཁུ་ ( Jacek Borcuch)ལགས་དང་རྒྱ་གར་གྱི་གློག་བརྙན་བཟོ་སྐྲུན་མཁན་ལྕམ་ནེ་ཤི་ཐཱ་ (Nishtha Jain)ལགས། སྐུ་ཞབས་ནེ་ཌེན་ (Nitin kakkar)ལགས། སྐུ་ཞབས་ཨ་བེ་ཇེ་ཌི་ (Avijit Mukul Kishore)། སྐུ་ཞབས་ནག་ཀུ་རཱ་ཇི་ (Nagraj Manjule) ལྕམ་གྷོ་ནེ་ཌི་ ( Guneet Monga) སྐུ་ཞབས་སངས་རྒྱས་རྡོ་རྗེ་(Sange Dorjee Thondok) ལགས། ཨ་རིའི་སྐུ་ཞབས་མད་སེ་མོན་ (Maximon Monihan)ལགས། སིན་གྷ་པོར་གྱི་སྐུ་ཞབས་ཨ་མེ་ཌི་(Amit  Virmani ) ལགས།  སིང་གྷ་ལཱའི་པཱར་སཱན་ནཱ་(Prasana Vithanage) དང་འཇར་མན་གྱི་སྐུ་ཞབས་རཱ་མོན་ ( Ramon  Zurcher)སོགས་ཡིན་འདུག  

བསྟན་འཛིན་བསོད་ནམས་ལགས་ཀྱིས། ད་ལོར་བོད་པའི་གློག་བརྙན་འཚོལ་ཞིབ་བྱས་པའི་ཁྲོད། སྐུ་ཞབས་བསྟན་འཛིན་ཚེ་བརྟན་ལགས་ཀྱི་གློག་བརྙན་༼ཕ་ས་བུ་ཐུག༽ ( Bringing  Tibet Home)  དང་། རྫོང་སར་མཁྱེན་བརྩེ་རིན་པོ་ཆེའི་གློག་བརྙན་༼དཔའ་བོ ༽(Vira)  གཉིས་ཡོད་ཀྱང་དུས་ཚོད་ཀྱི་དབང་གི་སྟོན་ཐུབ་མེད་པ་དང་། ལོ་རྗེས་མའི་གློག་བརྙན་དུས་སྟོན་ནང་སྟོན་ཐུབ་པའི་རེ་བ་རྒྱག་གི་ཡོད་ཅེས་བརྗོད་སོང་། 

དེ་རྗེས་སྐུ་ཞབས་པལ་རཱ་ཤོ་(C Palrashu) ལགས་ཀྱིས་བརྗོད་དོན། ཧི་མ་ཅལ་གཞུང་གི་ཡུལ་སྐོར་སྤྲོ་འཆམ་ལས་ཁུངས་ཀྱི་ངོས་ནས་གང་ཐུབ་ཀྱིས་ངྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་ལ་རྒྱབ་སྐྱོར་བྱེད་ཀྱི་ཡོད་པ་དང་། དུས་སྟོན་དེ་བརྒྱུད་ནས་ཕྱི་རྒྱལ་ཡུལ་སྐོར་སྤྲོ་འཆམ་པ་མང་པོ་ངྷ་སར་འགུག་ཐུབ་པ་མ་ཟད། ས་གནས་མང་ཚོགས་གཙོས་ལྷག་པར་གློག་བརྙན་བཟོ་སྐྲུན་ལ་དོ་སྣང་ཡོད་མཁན་ཚོར་གོ་སྐབས་ཡག་པོ་ཞིག་ཡིན་པ་དང་། ད་ལོའི་གློག་བརྙན་དུས་སྟོན་དེ་སྔར་ལོ་ནས་ཕྱོགས་གང་ཐད་ནས་ཡར་རྒྱས་སུ་ཕྱིན་ཡོད་པ་དང་། གཞུང་གིས་ཀྱང་དེ་ཧ་ཅང་གལ་ཆེན་དུ་གཟིགས་ཏེ། ངྷ་རམ་ས་ལའི་ལམ་ཁ་གང་མགྱོགས་བསྐྱར་བཟོ་བྱེད་ཐུབ་པར་འབད་བརྩོན་བྱེད་ཀྱི་ཡོད་པ། མ་འོངས་པར་ངྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་དེ་རྒྱལ་སྤྱིའི་ནང་སྐད་གྲགས་ཆེན་པོ་ཅན་ཞིག་ཆགས་ཐུབ་པའི་རེ་བ་རྒྱག་གི་ཡོད་ཅེས་བརྗོད་སོང་།

ཐེངས་འདིར་གཟིགས་འབུལ་ཞུ་རྒྱུའི་གློག་བརྙན་དག་ནི། རྒྱལ་སྤྱིའི་ཐོག་སྐད་གྲགས་ཡོད་པའི་གློག་བརྙན་ ༡༥ དང་། དངོས་བྱུང་ལོ་རྒྱུས་ལྡན་པའི་གློག་བརྙན་ ༩། དམིགས་བསལ་སྒྱུ་རྩལ་པས་བཟོས་པའི་གློག་བརྙན་ཐུང་ངུ་ ༦། རྒྱ་གར་ནང་གི་སྐད་གྲགས་ཆེ་བའི་གློག་བརྙན་ཐུང་ངུ་ ༨ བཅས་ཡོད་འདུག གློག་བརྙན་དེ་དག་གི་ཁྲོད་༼ ཟམ་པ་བརྒལ་བ་༽དང་༼ ཁྱོད་ཡོད་མེད་ཀྱི་ཉིན་མཚན༽། ༼དགོངས་དག་ནམ་ཡང་མི་ཞུ༽།༼ཞོགས་པ་བདེ་ལེགས་བྷམ་བྷེ༽། ༼ཟླ་མཚན་ཅན་གྱི་མི༽། ༼མཐའ་མཇུག༽།༼མེ་ཤུགས་འཕུར་མདའ༽ཡ་མཚན་ཅན་གྱི་བྱི་ལ༽བཅས་སོགས་སྟོན་རྒྱུ་ཡིན་འདུག

ངྷ་རམ་ས་ལ་རྒྱལ་སྤྱིའི་གློག་བརྙན་དུས་སྟོན་ཞེས་པ་འདི་ཁྲུང་ཁྲུང་དཀར་མོ་སྒྱུ་རྩལ་ཐེབས་རྩ་ཁང་གི་འགན་འཛིན་བོད་རིགས་གློག་བརྙན་བཟོ་སྐྲུན་མཁན་སྐུ་ཞབས་བསྟན་འཛིན་བསོད་ནམས་ལགས་དང་ཁོང་གི་བཟའ་ཟླ་རྒྱ་གར་བ་སྒྱུ་རྩལ་མ་རེ་ཌོ་( Ritu Sarin) གཉིས་ཀྱིས་ ༢༠༡༢ ལོར་མགོ་འཛུགས་བྱས་པ་ཞིག་ཡིན་འདུག

གསར་འགོད་པ། ལྷ་སྐྱབས་རྒྱལ།