ང་དང་བོད་རང་བཙན་ཤོག་ཁག་གི་འགྲན་རྩོད་ཐེངས་གཉིས།

ཝས་ཡིང་གིས་བརྩམས། ནགས་ཤོད་སད་མིས་བསྒྱུར། 

ཕྱི་རྒྱལ་ལ་འཚོ་བ་བསྐྱལ་ཡོད་དུས་ག་དུས་ཡིན་ནའང་རྒྱལ་ནང་དུ་འཕྲད་མི་སྲིད་པའི་མི་དང་ལས་དོན་འགར་གདོང་ཐུག་རྒྱག་གི་ཡོད། རྒྱལ་ནང་ནས་ཕྱིར་ཐོན་ཡོང་བའི་མི་མང་ཆེ་བས་རྒྱལ་ཁབ་གཅིག་གྱུར་དང་ལ་རྒྱར་གནོད་པའི་རིགས་ལ་རང་བཞིན་གྱིས་མི་འདོད་པའི་རྣམ་འགྱུར་སྟོན་གྱི་ཡོད་པ་མ་ཟད། འགན་འཁྲི་ཕྱི་བཤོལ་མེད་པར་མི་རིགས་ལ་རྒྱ་སྲུང་སྐྱོབ་བྱེད་པའི་འཐབ་རྩོད་ནང་མཆོངས་འགྲོ་གི་ཡོད། དེ་ནི་རྒྱལ་ཁབ་ཀྱི་དར་རྒུད་དང་མཚན་སྙན་ང་ཚོའི་ལས་དབང་དང་དམ་པོར་སྦྲེལ་ཡོད་པས་རེད། 

ཁེ་ན་ཌའི་ནུབ་ཁུལ་གྲོང་ཁྱེར་ཁའོ་ཀར་རེའི་(Calgary ) ནང་དུ་རྒྱ་གར་ནས་ཡོང་བའི་བོད་རང་བཙན་ཤོག་ཁག་པའི་མི་སྣ་མི་ཉུང་བ་ཞིག་ཞིག་གནས་སྡོད་བྱས་ཡོད། ལོ་འགའི་སྔོན་ནས་བཟུང༌། ཀྲུང་གོའི་དབུ་ཁྲིད་ག་དུས་ཁེ་ན་ཌར་ལས་དོན་གཟིགས་སྐོར་དུ་ཕེབས་སྐབས།  ཁོང་ཚོས་རྟག་ཏུ་མི་བཅུ་གྲངས་འགའ་རེ་གྲ་སྒྲིག་བྱས་ཏེ་ཀྲུང་གོིའི་དབུ་ཁྲིད་གཟིགས་སྐོར་ལ་ཕེབས་སའི་ལམ་ཕྱོགས་དེད་ནས་ངོ་རྒོལ་ཁྲོམ་སྐོར་བྱེད་པ་མ་ཟད། སྐད་སྒྲ་འདྲ་མི་འདྲ་སློང་ཨེ་ཐུབ་བལྟས་ཏེ་ནུབ་ཕྱོགས་ཀྲུང་རྒོལ་ཤོག་ཁའི་དོ་སྣང་ཡོང་རེ་བྱེད་ཀྱི་ཡོད་ལ། བོད་རང་བཙན་བྱེད་རྒྱུར་ཁོང་ཚོའི་རྒྱབ་སྐྱོར་རྙེད་ཐབས་བྱེད་ཀྱི་ཡོད། 

༡༩༩༨ ལོར་ཙུང་ལི་ཀྲུའུ་རུང་ཅི་ཁེ་ན་ཌར་ཕེབས་པ་མ་ཟད། ཁའོ་ཀར་རེ་ལ་ཡང་གཟིགས་སྐོར་དུ་བཅར་བ་རེད། སྐབས་དེར་སྐམ་ས་ནས་ཡོང་བའི་མི་མང་པོ་མེད་ཁར་མང་ཆེ་བ་ཁའོ་ཀར་རེ་སློབ་གྲྭ་ཆེན་མོར་སློབ་སྦྱོང་དང་གཟིགས་སྐོར་དུ་ཕེབས་པའི་མཁས་པ་དག་རེད། གཞུང་ཚབ་ཁང་གི་བཀོད་སྒྲིག་ལྟར། སློབ་ཕྲུག་ཚོགས་པས་སློབ་ཕྲུག་གོ་སྒྲིག་བྱས་ཏེ་ཙུང་ལིོ་ཀྲུའུ་རུང་ཅིའི་བཞུགས་གནས་མགྲོན་ཁང་མདུན་དུ་ཕེབས་བསུ་བཅར་དགོས། ཉིེན་དེའི་སྔ་མོི་ནས་སློབ་ཕྲུག་ཕལ་ཆེར་ ༡༠༠ ཙམ་གྱིས་སྐར་ལྔའི་དར་དམར་དང༌། དགའ་བསུའི་ཡི་གེ་འཁོད་པའི་འཕྲེད་དར་ཕྱར་ནས་མགྲོན་ཁང་མདུན་དུ་བསླེབས་ཚར་ཡོད། མི་བགྲོད་གཞུང་ལམ་གྱི་ས་བབ་ལེགས་ས་ཞིག་ཏུ་ཚང་མ་མཉམ་ཅིག་ཏུ་ལངས་ནས་ཙུང་ལི་ཕེབས་རྒྱུར་སྒུག དེ་འདྲ་ཞིག་ནས་བོད་རང་བཙན་ཤོག་ཁག་གི་མི་བཅུ་གྲངས་ཤིག་ཀྱང་བོད་རང་བཙན་མཚོན་པའི་གངས་སེང་དར་ཆ་ཁྱེར་ནས་སླེབས་བྱུང༌། དེ་མིན་ཡང་ཐའེ་ཝན་རང་བཙན་ཤོག་ཁག་ཉུང་ངུ་ཞིག་འདུག བོད་རང་བཙན་ཤོག་ཁག་ནང་དུ་ནུབ་ཕྱོགས་པའི་ཀྲུང་རྒོལ་མི་སྣ་འགའ་ཡང་དཀྱིལ་དུ་འཚངས་ནས་རྒྱབ་སྐྱོར་བྱེད་ཀྱི་ཡོད་དུས་ཁོང་ཚོའི་སྨྱོ་ཧམ་མངོན་གསལ་ཆེ།

ཀྲུང་གོའི་སློབ་ཕྲུག་ཚོ་མགྲོན་ཁང་མདུན་ངོས་ཀྱི་མི་བགྲོད་ལམ་ཆེན་སྟེང་ལངས་ཡོད་སྟབས། བོད་རང་བཙན་པ་ཚོས་སྒྲིག་བཀོད་ཉེན་རྟོག་པར་ཡར་ཞུ་བྱས་ཏེ། མགྲོན་ཁང་མདུན་སྒོ་ཚད་བཟུང་བྱས་ཏེ་མི་བགྲོད་ལམ་ཆེན་ངོ་རྒོལ་བ་ཚོར་ཆ་བགོས་བྱེད་དགོས་པར་བཤད་རྗེས་ཉེན་རྟོག་པས་འདྲ་མཉམ་རྩ་དོན་བཟུང་སྟེ་ཁོ་པ་ཚོའི་རེ་བ་མོས་མཐུན་བྱས་སོང༌། དེ་ནས་ཉེན་རྟོག་པས་ཀྲུང་གོའི་སློབ་ཕྲུག་ཚོགས་པའི་འགན་འཁུར་བ་བོས་ནས་ས་ཆ་ཕྱེད་ཀ་གློད་དགོས་པའི་སྐད་ཆ་བྱས། སློབ་ཕྲུག་ཚོགས་པའི་འགན་འཁུར་བ་དེ་ནི་བློ་ཁོག་མེད་སྟབས་གནས་ཚུལ་ལྷག་པར་ཞེད་ནས་ས་ཆ་ཕྱེད་ཀ་གློད་རྒྱུར་ཁས་བླངས་པ་མ་ཟད།  སློབ་ཕྲུག་ཚོ་གཞོགས་གཅིག་ལ་ཕྱིར་འཐེན་དགོས་པར་འབོད་སྐུལ་བཤད། སྐབས་དེར་ང་དང་རྨུས་གང་ཙམ་ལས་མེད་པའི་ས་ནས་ཁུངས་ལུང་མེད་པར་ས་ཆ་ཕྱེད་ཀ་གློད་དགོས་པའི་སྐད་ཆ་གོ་དུས་ང་ནི་རླུང་གིས་གློ་བའང་འགས་ལ་ཁད་བྱས་སྟབས། ངས་ཉེན་རྟོག་པར་སྐད་ཆ་བཤད་དོན། གྲོང་ཁྱེར་སྲིད་གཞུང་གིས་སྔོན་ཚུད་ནས་ས་ཆ་ཁག་བགོས་ཀྱི་འཆར་གཞི་ཅི་གང་མེད་པ་རེད་ལ། ང་ཚོ་སྔ་ས་ནས་འདིར་སླེབས་ཡོད་དུས་འདི་ན་ལངས་ཆོག་པའི་དབང་ཆ་ཡོད་པ་རེད་ཅེས་བཤད་པས་ཉེན་རྟོག་པའི་ངོ་གདོང་ན་ཅི་བྱེད་འདི་བྱེད་མེད་པའི་རྣམ་འགྱུར་ཁོ་ན་ལས་ཅི་ཡོད། དེ་ནི་ངས་བཤད་པའི་སྐད་ཆ་དེ་ཚོར་གནས་ལུགས་རྒྱུ་མཚན་ཡོད་པ་མཐོང་བས་རེད། ངས་དེ་ནས་མི་བགྲོད་ལམ་བུའི་ལྕགས་སྒྲོམ་ལ་དམ་འཇུ་བྱས་ནས་གོམ་པ་ཕྱེད་ཀ་ཙམ་ཡང་ཕྱིར་ནུར་བྱེད་རྒྱུའི་འདོད་པ་རྩ་ནས་མ་རྙེད། འདིའི་སྐབས་སུ་ཀྲུང་གོའི་སློབ་ཕྲུག་མང་ཆེ་བ་ས་ཕྱོགས་གཞན་ཞིག་ལ་གནས་སྤོ་བྱས་ཚར་བས། བོད་རང་བཙན་ཤོག་ཁག་པས་གོ་སྐབས་དེ་འཇུས་ནས་ས་ཆ་སྟོང་པའི་ཕྱོགས་སུ་བཀྲམས་ནས་ས་བཟུང་སོང༌།

ངའི་ཉེ་འཁྲིས་སུ་ཡོད་པའི་ཀྲུང་གོའི་སློབ་ཕྲུག་གཉིས་པོས་ཀྱང་ས་ཆ་གློད་རྒྱུ་ཁུངས་ལུང་མེད་པ་མཐོང་ལ། ངས་ཨུ་ཚུགས་བརྒྱབས་ནས་ས་སྲུང་བཞིན་ཡོད་པ་མཐོང་དུས་ངའི་སར་ཡོང་ནས་གཞོགས་གཡས་ཀྱི་ལྕགས་སྒྲོམ་ལ་ཉེ་བར་འཁྱུད། འདི་ལྟར་ང་ཚོ་གསུམ་པོ་བོད་རང་བཙན་ཤོག་ཁག་གི་མི་བཅུ་གྲངས་ཤིག་གིས་བསྐོར་བ་ལྟ་བུ་ཆགས་སོང༌། ང་ཚོས་ཧ་ཅང་ཆེ་བའི་སྐར་ལྔའི་དར་དམར་ཞིག་ཕྱར་ཡོད་ལ།  ཉེ་འཁོར་ན་གངས་སེང་དར་ཆ་ཆུང་ཆུང་བཅུ་གྲངས་ཤིག་འདུག ཉེན་རྟོག་པས་གནས་སྟངས་འདི་མཐོང་བ་དང༌། འཁྲུག་རྩོད་ཡོང་གཞི་འདུག་པ་རྟོགས་ནས་རྐང་པ་གཉིས་བགྲད་པ་དང༌། ལག་ཏུ་ཉེན་རྟོག་པའི་དབྱུག་པ་བཟུང་ནས་རྨུས་གཉིས་གསུམ་ལས་མ་འགྱངས་བའི་ས་ནས་ང་ཚོ་ལ་ཁ་གཏད་དེ་ལངས་ཡོད་ལ་གོམ་པ་གང་ཙམ་ཡང་གཞན་དུ་འགྲོ་མ་འདོད། ང་ཚོས་སྲོག་བསྡོས་ཀྱིས་ཧ་ཅང་ཆེ་བའི་སྐར་ལྔའི་དར་དམར་ཕྱོགས་གཉིས་སུ་གཡོས་ཏེ། བོད་རང་བཙན་ཤོག་ཁག་ཚོའི་མཐོང་ལམ་འགོག་པར་འདོད་ལ་ཁོ་པ་ཚོའི་སེམས་ཁམས་ལའང་གནོན་ཤུགས་སྤྲོད་པར་བསྒོམས། བོད་རང་བཙན་ཤོག་ཁག་ཚོ་ང་ཚོའི་ཆེས་ཆེ་བའི་སྐར་ལྔའི་དར་དམར་ཁོ་པ་ཚོའི་མདུན་དུ་གཡས་བསྐྱོད་གཡོན་སྐོར་བྱེད་པར་བལྟ་བས་མ་གཟོད་པར་རྒྱབ་ཕྱོགས་ནས་བུད་བྱུང༌། དེ་ནི་ཁོ་པ་ཚོ་མི་མང་ཤེད་ཆེ་བར་བརྟེན་ནས་ང་ཚོ་བཙིར་ཏེ་བསྐྲད་དགོས་བསམས་པ་རེད། ང་ཚོ་ཁ་ཕྱིར་བསྐོར་ནས་ཁོང་ཚོར་ཉེན་བརྡ་བཏང་བ་མ་ཟད་ཉེན་རྟོག་པར་ཡར་ཞུ་བྱས་ནས་གལ་ཏེ་ཁོང་ཚོས་ད་དུང་ཡང་འབུད་རྒྱག་བྱས་ཚེ་ང་ཚོས་ལག་པ་འགུལ་རྒྱུ་ཡིན་ཚུན་བཤད་སྟབས། བོད་རང་བཙན་ཤོག་ཁག་པའང་ཨོ་ཙམ་དྲང་བདེན་འདུག་པས་དེ་ནས་མུ་མཐུད་ང་ཚོ་བུས་མ་སོང༌།

ཡིན་ནའང་བོད་རང་བཙན་རྒྱབ་སྐྱོར་བྱེད་མཁན་མི་དཀར་པོ་དེ་ཚོས་མཚམས་འཇོག་བྱ་མ་འདོད་ལ་དེའི་ཁྲོད་ནས་སྐྱེས་པ་མི་དཀར་པོ་ཞིག་གིས་སྐད་ཆེན་སྒྲ་དུང་ངའི་ལྟག་རྒྱབ་གཏད་དེ་སྐད་ཤུགས་ཆེན་པོས་ “Free-Tibet”  བོད་རང་དབང (བོད་རང་བཙན་གྱི་དོན)ཞེས་བོས་མོད། ལུས་པོ་ལ་ཐུག་རེག་ཅི་གང་མེད་དུས་ངས་མི་དཀར་པོ་འདིའི་འབོད་སྐད་འགོག་ཐབས་མ་རྙེད། འོན་ཏེ་ངས་མདུང་རྩེ་ཁ་སྤྲོད་ཀྱིས་ཁོང་ཚོའི་སྐད་འབོད་གསེང་བར་ནས་ཁཱེ་པེ་ཁི་རང་བཙན “Free-Quebec” ཞེས་སྐད་ཤུགས་ཆེན་པོས་བོས། དེ་ནི་ཁེ་ན་ཌར་ཏོག་ཙམ་ཆ་རྒྱུས་ཡོད་མཁན་མི་ཚང་མས་ཤེས་གསལ་ལྟར། ཁཱེ་པེ་ཁི Quebec ཁེ་ན་ཌ་ནས་རང་བཙན་ལ་འགྲོ་རྒྱུའི་གླེང་ཕྱོགས་ཡོད་པས་ཡིན།  ཁཱེ་པེ་ཁིའི་གནད་དོན་ནི་སྔར་ནས་ཁེ་ན་ཌ་མགོ་ན་དགོས་པའི་གནད་དོན་ཞིག་རེད། དེ་འདྲ་ཞིག་ནས་ཙུང་ལི་ཀྲུའུ་རུང་ཅི་རླངས་འཁོར་ནས་འབྱོར་བ་དང་མགྲོན་ཁང་མདུན་ལ་བབས་སོང༌། ཙུང་ལི་ཀྲུའུ་རླངས་འཁོར་ནས་བབས་མ་ཐག་སྐར་ལྔའི་དར་དམར་ཕྱར་ཡོད་པའི་ཀྲུང་གོའི་སློབ་ཕྲུག་ཕྱོགས་སུ་གཏད་དེ་ལག་པ་གཡུགས་ནས་འཚམས་འདྲིའི་རྣམ་འགྱུར་བསྟན་བྱུང༌། དེ་ནས་སྐུ་སྲུང་བས་བསྐོར་ནས་མགྲོན་ཁང་དུ་ཕེབས། ཙུང་ལི་ཀྲུའུ་ཕེབས་འབྱོར་བྱུང་མ་ཐག་པའི་སྐབས་དེར་དགའ་བསུ་དང་ངོ་རྒོལ་བའི་མི་ཚོགས་སྲོག་བསྡོས་ཀྱིས་མདུང་རྩེ་ཁ་སྤྲོད་བྱས་ནས་དར་ཆ་གཡུགས་པ་དང་སྐད་འབོད་སོགས་བྱས་པའི་རྣམས་འགྱུར་དེ་ནི་ཧ་ཅང་འཁྲུག་ཆ་དོད་པོ་རེད། 

ཙུང་ལི་ཀྲུའུ་སྒུག་རིང་གི་ཆུ་ཚོད་འགའ་ཤས་ནང་ང་ཚོའི་སྐད་ཧ་ལམ་འགག་ལ་ཁད་དུ་གྱུར་ལ། ལག་གཉིས་ཀྱིས་སྐར་ལྔའི་དར་དམར་ཕྱར་དྲགས་པས་དཔུང་པ་གཉིས་པོའང་ན་ཟུག་ལངས། ཡིན་ནའང་དུས་ཚོད་དེའི་རིང་དགའ་སྤྲོའི་སྣང་བས་ཁེངས་བྱུང༌། དེ་ཅི་རེད་ཟེར་ན། ང་ཚོའི་བྱ་བྱེད་འདིས་བོད་རང་བཙན་ཤོག་ཁག་དང་ནུབ་ཕྱོགས་ཀྲུང་རྒོལ་བ་ཚོའི་སེམས་ནང་ཧང་སངས་བཅུག་པ་རེད། ང་ཚོས་ཁོ་པ་ཚོར་བསྟན་པའི་བརྡ་ནི་ཧ་ཅང་གསལ་པོ་ཡིན་པ་སྟེ། ཀྲུང་གོའི་མིས་རྒྱལ་ཁབ་གཅིག་གྱུར་དང་མི་རིགས་ལ་རྒྱ་བཅས་ཀྱི་གནད་དོན་ཆེ་རིགས་ཐད་ལ་ཀྲུང་གོའི་སྲིད་གཞུང་ལ་རྒྱབ་སྐྱོར་བྱེད་པ་རེད་ལ་ཅིས་ཀྱང་ཕྱིར་བཤོལ་བྱེད་པ་མ་རེད། གནད་དོན་འདི་ཁའོ་ཀར་རེའི་གྲོང་ཁྱེར་དང་ཐ་ན་ཁེ་ན་ཌ་རྒྱལ་ཡོངས་གསར་འགྱུར་བརྒྱུད་ལམ་ལ་ཡང་བསྟན་མྱོང་ཡོད་པ་རེད། གསར་འགྱུར་བརྒྱུད་ལམ་འདི་ཚོས་དོན་རྐྱེན་འདི་རིགས་འགོད་སྤེལ་བྱེད་པའི་སྐབས་སུ། རྩ་བའི་ཆ་ནས་བརྙན་འཕྲིན་ལས་ཁུངས་ཀྱི་ལེན་ཤེལ་(镜头)བོད་རང་བཙན་ངོ་རྒོལ་ཤོག་ཁག་ཚོར་གཏོད་པ་མ་ཟད། ངོ་རྒོལ་བའི་ཁ་གྲངས་འཕར་བརྒྱབ་ནས་ཆེན་པོ་བཟོ་བ་དང་སྦྲགས་ཀྲུང་གོའི་སྲིད་གཞུང་ལ་རྒྱབ་སྐྱོར་བྱེད་མཁན་གྱི་སློབ་ཕྲུག་གྲངས་ཀ་ཉུང་དུ་གཏོང་གི་རེད། ལྷག་པར་དུ་དགོད་སློང་བྱེད་ཅིག་ལ། གསར་འགྱུར་ནང་ཀྲུང་གོའི་སློབ་ཕྲུག་ཚོས་ཅིའི་ཕྱིར་ཀྲུང་གོའི་སྲིད་གཞུང་ལ་རྒྱབ་སྐྱོར་བྱེད་པར་བརྗོད་སྐབས། སློབ་ཕྲུག་འདི་ཚོ་ཚང་མ་རྒྱ་ནག་ནང་ཁུལ་དུ་མཐོ་རིམ་དཔོན་རིགས་དང་ཁེ་བཟང་རག་མཁན་རྐྱང་རྐྱང་གི་ཕྲུ་གུ་ཡིན་པར་ཤོད་ཀྱི་ཡོད།

ང་དང་བོད་རང་བཙན་ཤོག་ཁག་དབར་ཐེངས་གཉིས་པ་རྩོད་འགྲན་བྱེད་ས་དེ་ང་ལས་ཀ་བྱེད་སའི་སྨན་ཁང་དུ་རེད། ལས་ཀ་གྲོལ་བའི་སྐབས་སུ་ང་ཉིན་ལྟར་ས་འོག་བགྲོད་ལམ་ཧ་ཅང་རིང་པོ་ཞིག་བརྒྱུད་དགོས་ཀྱི་ཡོད། བགྲོད་ལམ་འདི་ནི་ནད་སྡོད་ཐོག་རྩེག་ཁང་ཆེན་དང་ཞིབ་བཤེར་ཐོག་ཁང་སྦྲེལ་ཡོད། བགྲོད་ལམ་འདིའི་ནང་དུ་རྟག་པར་གློག་སྣོད་རླངས་འཁོར(电瓶车)ནས་སྨན་ཁང་སྡེ་ཚན་ཁག་ལ་དགོས་མཁོའི་ཡོ་ཆས་སྐྱེལ་བསུ་བྱེད་འོང༌། བོད་རང་བཙན་ཤོག་ཁག་པ་མི་ཉུང་བ་ཞིག་ལ་རིག་གནས་ཆུ་ཚད་མཐོི་པོ་མེད་སྟབས། ཤེས་ཡོན་མི་དགོས་ལ་གླ་ཆ་ཉུང་བའི་ལས་ཀ་འདི་རིགས་མི་བྱེད་ཀ་མེད་རེད། ཉིན་ཞིག གློག་སྣོད་རླངས་འཁོར་ཞིག་གི་རྒྱབ་ལ་བོད་རང་བཙན “Free-Tibet” ཞེས་པའི་སྦྱར་ཡིག་ཅིག་གླན་ཡོད་པ་མཐོང་སོང༌། ཨ་ཅང་ཅང་རླངས་འཁོར་གཏོང་མཁན་བོད་མི་ལོས་ཡིན་ལ་གཟུགས་པོ་རིང་པོ་མེད་པར་རིད་ཅིང་ནག་པ་ཞིག་རེད། ཁོ་ནི་བོད་རང་བཙན་ཤོག་ཁག་པ་ཞིག་ཡིན་པ་གཏན་འཁེལ་རེད། སྐབས་དེར་ང་ཡར་སོང་ནས་སྦྱར་ཡིག་དེ་དབྲལ་དགོས་བསམ་མོད། ཡིན་ནའང་དེ་ལྟར་བྱས་ན་རྩོད་གླེང་འཆོར་རྒྱུ་ངེས་པ་རེད་ལ། སྨན་ཁང་ངོས་ནས་དེ་འདྲ་གཏན་ནས་ཆོག་གི་ཡང་མ་རེད། དེ་ནས་ངའི་བསམ་པར་རྗེས་སུ་མཚན་ལས་ཡོང་དུས་མི་མེད་པའི་སྐབས་དང་བསྟུན་ནས་དབྲལ་དགོས་བསམ་མོད། ཡང་གཅིག་བསམ་བློ་གཏོང་དུས་མི་བགྲོད་ལམ་བུ་འདིའི་ནང་དུ་བརྙན་མིག་མང་པོ་བསྒར་ནས་ཆུ་ཚོད་ ༢༤ རིང་བསྲུངས་ཡོད་པས་དེ་ལྟར་བྱས་ནའང་འགྲིག་གི་མེད་པ་ཤེས། མ་གཞི་ནས་ངས་དེ་ལྟར་དབྲལ་བའི་དབང་དུ་བཏང་ནའང༌། བོད་རང་བཙན་ཤོག་ཁག་པ་འདིས་ཡང་བསྐྱར་སྦྱར་རྒྱུ་ཡིན་སྟབས། མཚན་ལས་ནམ་ཡོང་ལ་སྦྱར་ཡིག་རྐྱང་རྐྱང་དབྲལ་རྒྱུའང་ཐབས་ཤེས་ཤིག་མིན་དུས། འདི་ལྟར་བསམ་བློ་ཡང་སྐོར་བསྐྱར་སྐོར་གཏོང་སྐབས་བྱ་ཐབས་ལེགས་ཤོས་ནི་སྨན་ཁང་ཚང་ལ་ཡར་ཞུ་བྱས་ཏེ་སྨན་ཁང་ངོས་ནས་ཐག་གཅོད་བྱ་རྒྱུ་དེ་ལོས་ཡིན། གང་ཞེ་ན། ནུབ་ཕྱོགས་སུ་ལས་བྱེད་ཚོས་ལས་ཁུངས་ནང་དུ་ཆོས་ལུགས་དང་ཆབ་སྲིད་ལབ་གླེང་མི་བྱེད་པ་ངས་ཤེས་ཀྱི་ཡོད་ལ། དེ་ནས་ངས་འཕྲོད་བསྟེན་ལས་ཁུངས་ཀྱི་འཛིན་སྐྱོང་སྒྲིག་གཞིའི་ལམ་ལུགས་བཙལ་བས་སྨན་ཁང་ལས་མི་ཚོས་སྨན་ཁང་སྒྲིག་ཆས་དང་འཁོར་ཡུག་སྤྱད་ནས་སྒེར་དོན་བསྒྲུབ་ཆེད་ནད་པ་དང་འབྲེལ་མེད་བྱེད་སྒོ་སྤེལ་ཆོག་གི་མེད་པ་ཤེས་ལ། དེའི་ནང་དུ་ཆབ་སྲིད་ལས་འགུལ་ཡང་ཚུད་འདུག དེ་ནས་ངས་སྦྱར་ཡིག་པར་བླངས་ནས་གློག་ཡིག་བརྒྱུད་མི་དོན་ལས་ཁུངས་ཀྱི་འབྲེལ་ཡོད་འགན་འཁུར་ལ་བསྐུར་ནས་གསལ་བཤད་བྱས་དོན། མི་ལ་ལས་སྨན་ཁང་ནང་དུ་རང་སོ་སོའི་ཆབ་སྲིད་ལྟ་བ་ཆེར་སྐྱེད་བྱེད་ཀྱི་འདུག དེ་ནི་སྨན་ཁང་གི་སྒྲིག་གཞིའི་ལམ་ལུགས་དོན་ཚན་ག་གེ་མོ་འགལ་བ་བརྗོད་ཡོད། ངའི་བསམ་ཚོད་ལོས་བདེན་ཏེ་གཟའ་འཁོར་གཅིག་སོང་རྗེས་སྦྱར་ཡིག་དབྲལ་ཚར་འདུག དེ་ནས་བཟུང་ལོ་འགའི་རིང་བོད་རང་བཙན་ཤོག་ཁག་རྒྱབ་སྐྱོར་བྱེད་པའི་སྦྱར་ཡིག་གཅིག་ཀྱང་མཐོང་མ་སོང༌། 

ཕྱི་རྒྱལ་དུ་ལོ་མང་བསྡད་པའི་ནང༌། འདི་ལྟ་བུའི་ཀྲུང་གོའི་རྒྱལ་ཁབ་ཀྱི་ལ་རྒྱ་སྲུང་བའི་བྱེད་སྒོ་གང་མང་ལ་ཞུགས་པ་ཡིན་ལ། ཀྲུང་གོའི་ལུས་རྩལ་པར་རྒྱབ་སྐྱོར་སྐད་འབོད་བྱེད་པའི་རུ་ཁག་ལའང་ཞུགས་མྱོང༌། ཕྱི་སྡོད་རྒྱ་རིགས་ལས་འགུལ་ཅུང་ཆེ་གྲས་ཤིག་ནི་ ༢༠༠༨ ལོའི་པེ་ཅིན་ཨོ་རྩེད་འགྲན་ཚོགས་སྔོན་ཚུད་དེ་རེད། འདིའི་སྐོར་ཞིབ་ཕྲའི་གནད་དོན་ཚང་མས་ཤེས་གསལ་ལྟར་རེད། ད་ཆ་ཕྱི་སྡོད་རྒྱ་རིགས་ཚོས་རྒྱལ་ཁབ་དབུ་ཁྲིད་གཟིགས་སྐོར་ལ་དགའ་བསུའི་ལས་འགུལ་དང་ཀྲུང་རྒོལ་ཕྱོགས་གཏོགས་ཁ་གཏད་གཅོག་པ་སོགས་བྱེད་ཀྱི་མེད། དེ་དང་མཉམ་དུ་བོད་རང་བཙན་ཤོག་ཁག་པའང་དཔེ་མེད་ཁུ་སིམ་དུ་སོང་ཡོད་ལ། ཐའེ་ཝན་རང་བཙན་ཤོག་ཁག་དང་ཕྱི་སྡོད་དམངས་གཙོ་ཤོག་ཁག་གི་སྐད་སྒྲ་དེ་བས་བརླགས་ཚར་བ་ལྟར་སྣང༌། (ཆོས་འཁོར་སྒོམ་སྒྲུབ་པ་གཅིག་པུས་ལོ་ཟླ་སྦྲེལ་ཏེ་ཨུ་ཚུགས་བརྒྱབས་ནས་གཞི་རྒྱ་ཆུང་བའི་ལས་འགུལ་སྤེལ་གྱིན་ཡོད) འདིའི་རྒྱུ་རྐྱེན་གཙོ་བོ་ནི་མེས་རྒྱལ་སྟོབས་ཤུགས་སྔོན་མ་ལས་ཧ་ཅང་ཆེ་རུ་ཕྱིན་ཡོད་དུས། ད་ཆ་ང་ཚོ་ཕྱི་སྡོད་རྒྱ་རིགས་མདུན་དུ་ཐོན་ནས་ང་ཚོའི་རྒྱལ་ཁབ་ཁེ་ཕན་སྲུང་དགོས་ཐུག་གི་མི་འདུག འདི་ནི་སྤོབས་པ་སྐྱེ་འོས་ཞིག་རེད།

དོན་ངོ་མས། ཅི་ཙམ་སྟོབས་ཤུགས་ལྡན་པའི་མི་རིགས་ཤིག་ཡིན་པ་དེའི་ཚོད་ཀྱིས་རང་སེམས་སྙོམ་པོས་སྐྱོན་བརྗོད་གདོང་ལེན་བྱ་དགོས་ལ་རང་གཞན་ཆུད་པ་བྱ་དགོས། བོད་རང་བཙན་ལས་འགུལ་ཤོག་ཁག་ལྟ་བུར་ཆ་བཞག་ན། དེ་ནི་ལོ་རྒྱུས་ཀྱི་རྐྱེན་ལས་བྱུང་ལ། དེའི་སྟེང་དུ་ནུབ་ཕྱོགས་སྟོབས་ཤུགས་བེད་སྤྱད་པ་རེད། མདོར་བསྡུས་ནས་བཤད་ན། བོད་མི་རིགས་ནི་ནང་ཆོས་ལ་དད་པ་ཡོད་པའི་ཞི་འཇམ་མི་རིགས་ཤིག་རེད། རྒྱ་མི་རིགས་དང་བསྡུར་ན་ཁོ་ནི་ཉམ་ཆུང་བའི་མི་རིགས་ཤིག་རེད། དོན་དམ་པས་བོད་རང་བཙན་ཤོག་ཁག་ནི་ཁྱིམ་གཞིས་བརླགས་པའི་འཁྱམ་པོ་ཁྱུ་ཅིག་རེད། ཁོང་ཚོའི་ངོ་རྒོལ་དང༌། ཡང་ན་ཡི་ཐང་ཆད་ནས་རྒྱུན་ཆད་མེད་པར་རང་སྲེག་བྱས་པའི་ཐད་ལ། ང་ཚོ་སྟོབས་ཤུགས་ཡོད་པའི་རྒྱ་མི་རིགས་འདིའི་ངོས་ནས་དོན་དམ་པས་ང་ཚོས་ཅི་ཞིག་ནོར་འཁྲུལ་བྱས་ཡོད་མེད་རང་ཉིད་ལ་དྲི་རྟགས་འགོད་དགོས། གལ་ཏེ། ང་ཚོས་འོས་འཚམ་སྒོ་ནས་རྒྱལ་ནང་གི་ཉམ་ཆུང་མི་རིགས་ཤིག་གི་འགལ་འདུའི་གནད་དོན་ཐག་གཅོད་ཐུབ་ཀྱི་མེད་ཚེ། ང་ཚོས་ཕྱི་ལོགས་ནས་ཇི་ལྟར་བོད་མི་རིགས་ལས་སྟོབས་ཤུགས་ཆེ་བའི་མི་རིགས་ཤིག་ལ་གདོང་ལེན་བྱ་དགོས། དེས་མ་ཚད་དུས་རབས་ཁ་ཤས་རིང་འཛམ་གླིང་ཡོངས་དབང་བསྒྱུར་བྱས་པའི་ནུབ་ཕྱོགས་རིག་གནས་ལ་འགྲན་རྒོལ་བྱེད་རྒྱུ་ཡིན་པ་མ་གླེང་རོགས། དར་རྒྱས་དང་དོན་ཆེན་ཟེར་བའང་ཉུག་རུམ་པ་རྣམ་པས་ཁོང་ཚོའི་རྒྱལ་སྲས་ཡིད་འགུག་པའི་སླད་དུ་མངགས་ཉོ་བྱས་པའི་གྱོན་གོས་ཙམ་དུ་ཟད་པ་མིན་ནམ། 

སྒྱུར་བ་པོའི་མཆན། རྩོམ་ཡིག་འདིའི་ནང་དུ་ཐ་སྙད་ཉུང་ཤས་ད་ཕན་བོད་ཀྱི་སྤྱི་ཚོགས་སུ་རྒྱུགས་ཆེན་པོ་མེད་པས་ཆེད་དུ་བོད་རྒྱ་ཤན་སྦྱར་བྱས་ཡོད།

མ་རྩོམ།     http://blog.sina.com.cn/s/blog_60f361d00101fg19.html