དམག་མི་ ༡༥༢ ལ་སྲོག་ཁྲིམས།

དེ་རིང་བྷང་ལཱ་ངྷེ་ཤི་རྒྱལ་སའི་ཁྲིམས་ཁང་གིས་མཐའ་མཚམས་སྲུང་སྐྱོབ་དམག་མི་ངོ་ལོག་པ་ ༡༥༢ ཙམ་ལ་སྲོག་ཁྲིམས་ཀྱི་ཁྲིམས་ཐག་བཅད་ཡོད་འདུག

དེ་རིང་སྔ་དྲོར་བྷང་ལཱ་ངྷེ་ཤིའི་རྒྱལ་སའི་གྲོང་ཁྱེར་ཁྲིམས་ཁང་གིས། ༢༠༠༩ ལོར་བྷང་ལཱ་ངྷེ་ཤི་མཐའ་མཚམས་སྲུང་སྐྱོབ་དམག་མིའི་ལྟེ་གནས་ཁང་ (BDR) ཞེས་པ་རུ་དམག་མིས་གྱེན་ལོག་བྱས་ཏེ། དམག་དཔོན་དང་ལས་བྱེད་ ༧༤ ཙམ་གྱི་རྐང་ལག་གཅོད་འབྲེག་དང་གསོན་བསྲེགས་བྱས་པའི་ཉེས་མིང་འོག་དམག་མི་༨༤༦ ཙམ་འཛིན་བཟུང་བྱས་པའི་ཁྲོད། ནག་ཉེས་ཆེ་ཤོས་ཀྱི་དམག་མི་ ༡༥༢ ལ་སྲོག་ཁྲིམས་དང་། གཞན་ ༡༩༠ ལ་ཚེ་བཙོན། དེ་མིན་གཞན་དག་ལ་ལོ་གྲངས་མི་འདྲ་བའི་ཁྲིམས་ཐག་བཅད་ཡོད་པ་གསལ་བསྒྲགས་བྱས་འདུག

༢༠༠༩ ལོར་བྷང་ལཱ་ངྷེ་ཤིའི་མཐའ་མཚམས་སྲུང་སྐྱོབ་དམག་མིའི་ལྟེ་གནས་ཀྱི་ལོ་འཁོར་དུས་དྲན་སྲུང་རྩིས་སྐབས། མཐའ་མཚམས་དམག་མི་དཀྱུས་མས་མཐོ་རིམ་དམག་དཔོན་ལ་སྐྱོན་བརྗོད་བྱས་ཏེ། མཐའ་མཚམས་སྲུང་སྐྱོབ་དམག་མིའི་སྤྱི་ཁྱབ་དམག་དཔོན་ལ་དམག་མིའི་སྤྱི་ཁྱབ་དམག་དཔོན་མི་དགོས་པར་གོ་གནས་ནས་འཕུད་བྱེད་དགོས་པ་དང་། དམག་མི་དང་མཐའ་མཚམས་སྲུང་སྐྱོབ་དམག་མི་གཉིས་བར་ཐོབ་ཐང་གཅིག་མཚུངས་དགོས་པའི་དགོས་འདུན་བཏོན་པར་མཐོ་རིམ་དམག་དཔོན་ཚོས་མོས་མཐུན་མ་བྱས་སྟབས། མཐའ་མཚམས་སྲུང་སྐྱོབ་དམག་མིས་མཐའ་མཚམས་སྲུང་སྐྱོབ་དམག་མིའི་སྤྱི་ཁྱབ་དམག་སྤྱི་ཤད་ཀེ་( Sheikh Ahmed) གཙོས་དམག་དཔོན་ ༥༧ དང་ལས་བྱེད་པ་ ༡༧ དམར་གསོད་བྱས་ཡོད་འདུག

དེ་རིང་ཨ་རིའི་གྲོང་ཁྱེར་ནེའུ་ཡོག་ནང་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྷན་ཚོགས་ཀྱིས་བྷང་ལཱ་ངྷེ་ཤི་གཞུང་གི་ཐག་གཅོད་དེར་སྐྱོན་བརྗོད་ཤུགས་ཆེན་བྱས་ཡོད་པ་མ་ཟད། ཐེངས་འདིའི་སྲོག་ཁྲིམས་བཅད་པ་ཁོ་ནས་དྲང་བདེན་རྩོད་པར་རོགས་འདེགས་གང་ཡང་བྱས་མེད་ཚུལ་བརྗོད་འདུག གཟའ་སྔོན་མའི་ནང་། འགྲོ་བ་མིའི་ཐོབ་ཐང་ལྷན་ཚོགས་ཀྱིས། བྷང་ལཱ་ངྷེ་ཤི་སྲིད་གཞུང་གིས་ཁྲིམས་རྩོད་པ་ཚོ་བཙོན་པར་ཐུག་འཕྲད་དང་ནག་ཉེས་གྱོད་དོན་སྐོར་ལ་རྒྱུས་ལོན་ཀྱི་ཡིག་ཆ་འཚོལ་བསྡུ་བྱེད་པ་བཅས་ལ་ཚོད་འཛིན་བྱས་ཡོད་པར་སྐྱོན་འཛུགས་བྱས་ཀྱང་། སྲིད་གཞུང་གིས་ངོས་ལེན་གང་ཡང་བྱས་མི་འདུག

གསར་འགོད་པ། ལྷ་སྐྱབས་རྒྱལ།