དགེ་བསྐོས་ཤིག་ལ་ཁྲིམས་ཆད།

ཉེ་ལམ་སི་ཁྲོན་ཞིང་ཆེན་རྔ་པ་ཁུལ་འཛམ་ཐང་ཇོ་ནང་དགོན་གཙང་བ་གྲྭ་ཚང་གི་དགེ་བསྐོས་ཧོར་གཙང་རྟ་མགྲིན་ལགས་སུ་རྒྱ་གཞུང་གིས་ལོ་བཞི་དང་ཟླ་དྲུག་གི་ཁྲིམས་ཐག་བཅད་ཡོད་འདུག

རྔ་པ་ཁུལ་འཛམ་ཐང་ཇོ་ནང་དགོན་གཙང་པ་གྲྭ་ཚང་གི་དགེ་བསྐོས་ཧོར་གཙང་རྟ་མགྲིན་ལགས་ཀྱིས། འཛམ་ཐང་གཙང་བ་དགོན་གྱི་སེར་སྐྱ་འདུ་འཛོམས་སར་རང་སྲེག་བྱས་པའི་དཔའ་བོ་དཔའ་མོ་རྣམས་ལ་བསྔོ་ཞུ་བྱས་པ་དང་། ས་གནས་དེ་གར་རང་ལུས་མེར་བསྲེགས་གནང་མཁན་ཚོའི་རོ་ཐོག་ནས་ཆོལ་ཁ་གསུམ་ལ་ནང་འཛིང་མི་བྱེད་པའི་དམ་བཅའ་འཇོག་མཁན་ཚོར་‘གངས་ལྗོངས་བོད་མིའི་ཕུལ་བྱུང་བུ།’ ཞེས་བསྟོད་བསྔགས་བྱས་པར། རྒྱ་གཞུང་གིས་‘རྒྱལ་ཁབ་ཁ་བྲལ་ལ་ངན་སྐུལ་དང་། བོད་རང་བཙན་གྱི་བསམ་བློ་འུད་སྒྲོག་བྱས་’ པའི་ཉེས་མིང་གཡོགས་ཏེ། ཉེ་ལམ་ལོ་ངོ་བཞི་དང་ཟླ་དྲུག་གི་བཙོན་འཇུག་ཁྲིམས་ཐག་བཅད་ཡོད་འདུག

གོང་གསལ་གནས་ཚུལ་སྐོར་ཚངས་དབྱངས་རྒྱ་མཚོ་ལགས་ཀྱིས་འདི་གར་མཁོ་སྤྲོད་གནང་བ་ལྟར་ན། དགེ་བསྐོས་ཧོར་གཙང་རྟ་མགྲིན་ལགས་འཛམ་ཐང་བར་མ་ཡུལ་ཚོ་གཙང་སྡེ་ཟེར་བ་ནས་ཡིན་ཞིང་། རྒྱ་གཞུང་གིས་ད་ལོའི་ཕྱི་ཟླ་ ༤ ཚེས་ ༢༤ ཉིན་ཇོ་ནང་འཛམ་ཐང་དགོན་གཙང་བ་གྲྭ་ཚང་གི་ནག་ཟླའི་དུས་མཆོད་ཆེན་མོ་འཚོགས་སྐབས་འཛིན་བཟུང་བྱས་ཡོད་པ་དང་། ཁོང་གིས་སྙིང་རྗེ་ཐེབས་རྩ་ཚོགས་པ་ཞིག་བཙུགས་ཡོད་ཅིང་། ཚོགས་པ་དེས་དབང་བོ་སྐྱོན་ཅན་དང་སློབ་གྲྭ། དགོན་པ། དབུལ་པོ་སོགས་ལ་རོགས་སྐྱོར་གནང་གི་ཡོད་འདུག དེ་བཞིན་ཁོང་ནི་བོད་ཀྱི་ཐང་ཀ་སྒྱུ་རྩལ་གྱི་ལྷ་བྲིས་པ་ཞིག་ཡིན་ཞིང་། གཞོན་སྐྱེས་མང་པོ་ལྷ་བྲིས་སྐོར་སློབ་ཁྲིད་ཀྱིས་རྒྱ་ནག་སོགས་སུ་བོད་ཀྱི་སྲོལ་རྒྱུན་ཐང་ཀ་འགྲེམས་སྟོན་གནང་ཡོད་འདུག  

ཡང་གནས་ཚུལ་མཁོ་སྤྲོད་པས། ད་ལྟའི་ཇོ་ནང་འཛམ་ཐང་དགོན་ཆེན་གྱི་གནས་སྟངས་ནི་ཧ་ཆང་ཉེན་ཁའི་གནས་སུ་ལྷུང་ཡོད་པ་དང་། ས་གནས་ལས་བྱེད་དང་མགོ་ཁྲིད་ཚོས་དགོན་པའི་ལས་སྣེ་དང་གྲྭ་བ། ལྷ་སྡེའི་གནད་ཡོད་མི་སྣ་ཚོར། “ཕྱི་སྡོད་བོད་གཞུང་རྫུས་མས་སྔོན་གྱི་གྲུབ་མཐའ་ཁག་གི་འཐབ་རྩོད་ཁོག་ཏུ་བཟུང་ནས། མངོན་གསུམ་འཛེམ་མེད་སྒོས་ཁྱེད་ཚོ་ཇོ་ནང་བ་ལ་གྲུབ་མཐའ་ཞིག་གི་ཐོབ་ཐང་མ་ཟད་མིང་ཙམ་ཡང་སྤྲད་མེད།  དེ་ངོས་ཟིན་ཡོད་པའི་ཐོག་ཁྱེད་ཚོར་རང་ཉིད་ལ་ལངས་ཕྱོགས་བརྟན་ཅིང་ཁ་ཕྱོགས་མ་ནོར་བ་ཡོད་དགོས་” ཞེས་དང་། ཡང་ “པན་ཆེན་སྐུ་ཕྲེང་བཅུ་བ་ནི་ཁྱེད་ཇོ་ནང་པར་མཚོན་ན་བཀའ་དྲིན་ཆེན་པོ་རེད། ཁོང་གིས་ཁྱེད་ཇོ་ནང་པར་ཆོས་བརྒྱུད་གཅིག་མཚུངས་ཀྱི་ཐོབ་ཐང་སྤྲད་པར་བརྟེན། ད་སྐབས་རྒྱལ་ནང་གི་ནང་པའི་ཆོས་ལུགས་ཀྱི་གྲས་སུ་ཇོ་ནང་པར་ཆོས་བརྒྱུད་གཅིག་མཚུངས་ཀྱི་ཐོབ་ཐང་ཡོད། དེས་ན་ཁྱེད་ཅག་གིས་ངེས་པར་དུ་པན་ཆེན་རིན་པོ་ཆེའི་ཡང་སྤྲུལ་འཛམ་ཐང་དགོན་པར་གདན་འདྲེན་ཞུ་དགོས།” ཞེས་སོགས་ཀྱི་སློབ་གསོ་གང་མང་བཏང་ཡོད་ཀྱང་།  འཛམ་ཐང་དགོན་པའི་གནད་ཡོད་མི་སྣ་ཚོས་དེ་དག་ངོས་ལེན་བྱས་མེད་སྟབས། ཇོ་ནང་འཛམ་ཐང་དགོན་པར་དམག་མི་དང་། ཉེན་རྟོག་པ་འབོར་ཆེན་འགྲེམ་འཇོག་གིས་གཙང་བ་གྲྭ་ཚང་གི་རྟེན་བཞེངས་རྣམས་འཚམས་འཇོག་བྱེད་དུ་བཅུག་པར་མ་ཟད། རྟེན་བཞེངས་གསར་བ་རྣམས་བཤིག་དགོས་པའི་བཙན་བཀའ་བཏང་འདུག འོན་ཀྱང་། དགོན་པའི་འབྲེལ་ཡོད་མི་སྣ་ཁག་གིས་རྒྱ་གཞུང་གི་དཔོན་རིགས་མང་པོར་འབྲེལ་བ་བྱས་ཏེ་ད་བར་དུ་རྟེན་བཞེངས་བྱས་པ་དག་བཤིག་དགོས་བྱུང་མེད་སྐོར་སོགས་བརྗོད་བྱུང་།

ཧོར་གཙང་རྟ་མགྲིན་ལགས་ཀྱིས་བརྩམས་པའི་༼གསུམ་བཅུའི་དུས་དྲན་ཉིན་གྱི་སེམས་ཚོར་༽ཞེས་པའི་རྩོམ་ཡིག་ནང་། དེ་རིང་གསུམ་བཅུའི་དུས་ཚིགས་ཡིན། །སྙིང་ལ་ཟུག་པའི་ནད་ཅིག་དྲན། །ཤ་ལ་གཤར་བའི་རྨ་ཞིག་དྲན། །སྤུན་ཟླ་ཤི་བའི་སྡུག་ཅིག་དྲན། །རླུང་དམར་སྤུར་བའི་སྒྲ་ཞིག་དྲན། །ལོ་ལ་བསྙལ་བའི་གྱོད་ཅིག་དྲན། ། ཞེས་སོགས་བྲིས་ཡོད་པ་དང་། དེ་བཞིན། ༼ལྷ་ས་དང་སྦྱར་བའི་སེམས་ཚོར་༽ཞེས་པའི་ནང་དུ།  ལྷ་ས་མ་ཆགས་ལྷ་ས་ཆགས། །ལྷ་ས་ཉེན་ཁའི་གནས་ན་ཆགས། །ལྷ་ས་མ་ཆགས་ལྷ་ས་ཆགས། །ལྷ་ས་གཞན་གྱི་ལག་ན་ཆགས། །ལྷ་ས་མ་ཆགས་ལྷ་ས་ཆགས། །ལྷ་ས་སེམས་ཁུར་གནས་ན་ཆགས། །ལྷ་ས་མ་ཆགས་ལྷ་ས་ཆགས། །ལྷ་ས་དྲག་ཆས་ཁྲོད་ན་ཆགས། །ལྷ་ས་མ་ཆགས་ལྷ་ས་ཆགས། །ལྷ་ས་སོ་ལྟའི་བར་ན་ཆགས། །ལྷ་ས་མ་ཆགས་ལྷ་ས་ཆགས། །ལྷ་ས་མིག་ཆུའི་ཁྲོད་ན་ཆགས། ཞེས་སོགས་བྲིས་ཡོད་འདུག