རེས་གཟའ་ཉི་མའི་ཉིན་སུད་སིའི་བོད་རིགས་མི་མང་གསར་འཕྲིན་དབུ་བརྙེས་ཏེ་ལོ་ངོ་ ༢༠ འཁོར་བའི་དུས་དྲན་སྲུང་གཙི་གནང་ཡོད་ཅིང་། དུས་དྲན་མཛད་སྒོའི་སྟེང་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་གིས་གསར་འཕྲིན་འདི་ཉིད་མ་འོངས་པར་ལོ་ངོ་ལྔ་བཅུ་འཁོར་བའི་དུས་དྲན་སྲུང་གཙི་གནང་ཐུབ་པ་བྱ་དགོས་སྐོར་གསུངས་སོང་།
ཁ་སང་ཕྱི་ཚེས་ ༢༤ ཉིན་སུད་སི་ས་གནས་ཝེ་ཌན་སི་ཝེལ་(Wädenswil )དུ། སུད་དང་ལིཀ་ཏེན་སི་ཊཡན་བོད་རིགས་མི་མང་གསར་འཕྲིན་དབུ་བརྙེས་ཏེ་ལོ་ངོ་ ༢༠ འཁོར་བའི་དུས་དྲན་མཛད་སྒོ་ཞིག་ཚོགས་ཡོད་པ་དང་། མཛད་སྒོའི་སྐུ་མགྲོན་གཙོ་བོར་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་དབུ་བཞུགས་ཐོག རི་ཀོན་ཆོས་འཁོར་དགོན་གྱི་མཁན་རིན་པོ་ཆེ་མཆོག་དང་སུད་སིའི་སྐུ་ཚབ་དོན་གཅོད། ཡུ་རོབ་སྤྱི་ཟུར་རྣམ་པ། བོད་རིགས་མི་མང་གི་ཚོགས་གཙོ་གཞོན་གཉིས། གསར་འཕྲིན་དྲ་རྒྱའི་སློབ་སྟོན་པ་རྣམ་པ། དེ་བཞིན། གཞུང་འབྲེལ་མིན་པའི་ཚོགས་པ་ཁག་གི་ཚོགས་གཙོ་དང་སྐུ་ཚབ་བཅས་མི་མང་ ༡༠༠ ལྷག་མཉམ་ཞུགས་གནས་སོང་།
མཛད་སྒོའི་ཐོག་མར་ཁྲི་ཟུར་ཟམ་གདོང་རིན་པོ་ཆེ་མཆོག་གིས་སྣང་གསལ་མར་མེ་ཞལ་འབྱེད་སོགས་གྲུབ་རྗེས། གསར་འཕྲིན་དྲ་རྒྱའི་སྤྱི་ཁྱབ་རྩོམ་སྒྲིག་པ་མགོ་སྤེ་ཡོན་ཏན་ལགས་ནས་གསར་འཕྲིན་གྱི་དམིགས་ཡུལ་ངོ་སྤྲོད་གནང་པ་དང་། སྐུ་ཚབ་དོན་གཅོད་མཆོག་དང་མི་མང་ཚོགས་གཙོ་གཉིས་ཀྱིས་གཏམ་བཤད། མཇུག་ཏུ་སྐུ་མགྲོན་གཙོ་བོ་མཆོག་གིས་བོད་པའི་སྐད་རྒྱུན་འཛིན་བྱེད་ཕྱོགས་བཅས་ཀྱི་ཐོག་བཀའ་སློབ་གནང་སོང་།
བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་ཆེ་མཆོག་གིས་གསར་འཕྲིན་ལོ་ངོ་ཉི་ཤུ་འཁོར་བའི་དུས་དྲན་དང་འབྲེལ་བའི་བཀའ་སློབ་གནང་དོན། ང་ཚོའི་སྤྱི་ཚོགས་ནང་གསར་འཕྲིན་དང་དུས་དེབ་མང་པོ་ཞིག་ཐོན་ཡོད་ཀྱང་། རྒྱུན་རིང་པོར་གནས་རྒྱུ་ཁག་པོ་ཞེ་དྲག་ཡོད་པ་རེད། ང་ཚོའི་བོད་པའི་སྤྱི་ཚོགས་ནང་གི་གསར་འཕྲིན་དེ་རིགས་ཚེ་ཐུང་ཐུང་ཙམ་མ་གཏོགས་བསྡད་ཡོད་པ་མ་རེད། སུད་སིའི་ནང་འདི་བཞིན་གསར་འཕྲིན་ལོ་ངོ་ཉི་ཤུའི་དུས་དྲན་མཛད་སྒོ་ཞིག་གནང་གི་ཡོད་པ་དེ་རིན་ཐང་ཡོད་པ་ཞིག་རེད་བསམ་གྱི་འདུག དེ་རིང་གསར་འཕྲིན་ལོ་ཉི་ཤུ་འཁོར་བའི་དུས་དྲན་འདིའི་ཐོག་ས་གནས་སྒྲིག་འཛུགས་དང་། གསར་འཕྲིན་ནང་ཕྱག་ལས་གནང་མཁན། དེ་བཞིན་མི་མང་ཚང་མས་མ་འོངས་པར་ལོ་ངོ་ ༣༠ རྗེས་སུ་གསར་འཕྲིན་ལོ་ངོ་ ༥༠ འཁོར་བའི་དུས་དྲན་མཛད་སྒོ་འདི་ལས་རྒྱས་པ་ཞིག་འཚོགས་གནང་ཐུབ་པའི་དམ་བཅའ་དང་། ཐུགས་སྨོན་གནང་དགོས་པ་དེ་གལ་ཆེན་པོ་རེད་དྲན་གྱི་འདུག གསར་འཕྲིན་ཟེར་བ་འདི་སྤྱི་ཚོགས་ཤིག་གི་ཆོས་དང་རིག་གནས། ལེགས་བྱང་། ཆབ་སྲིད། སྐད་ཡིག་སོགས་དང་འབྲེལ་བ་ཡོད་པའི་ལས་དོན་ཞིག་རེད། བོད་པའི་སྤྱི་ཚོགས་ནང་གསར་འཕྲིན་རྒྱུན་རིང་པོར་གནས་མི་ཐུབ་པ་དེ་གཙོ་བོ་ཀློག་པ་པོ་མེད་པའི་དཀའ་ངལ་རེད། ཀློག་པ་པོ་མང་པོ་མེད་པའི་དབང་གིས་དཔལ་འབྱོར་དང་སེམས་ཤུགས་ཀྱི་རྒྱབ་སྐྱོར་སོགས་ཀྱི་མ་འདང་བ་ལ་བརྟེན་ནས་རྒྱུན་ཆད་འགྲོ་བཞིན་པ་རེད། དེང་སྐབས་དྲ་རྒྱའི་ཐོག་ལ་གནས་ཚུལ་བཀོད་ཐུབ་པ་འདིས་དཀའ་ངལ་མང་པོ་ཞིག་སེལ་ཐུབ་ཀྱི་ཡོད་ཀྱང་། དྲ་རྒྱའི་ཐོག་གི་གནས་གནས་ཚུལ་འདིས་ཚགས་ཤོག་ཐོག་ཡོད་པའི་ཡིག་ཆ་ཁག་གི་ཚབ་བྱེད་ཐུབ་ཀྱིན་རེད་དམ་ཟེར་ན། དེ་ཐུབ་ཐབས་ཡོད་པ་མ་རེད། དྲ་རྒྱ་དང་གསར་ཤོག་གཉིས་ནི་བརྒྱུད་ལམ་མི་འདྲ་བ་གཉིས་རེད། ཁོ་གཉིས་ཀྱི་རྒྱུན་རིང་ལུགས་དང་ཕུགས་བརྟན་ལུགས། རིན་ཐང་ཆེ་ལུགས་སོགས་ནས་མི་འདྲ་བ་རེད། དེ་འདྲ་ཡིན་དུས་དྲ་རྒྱ་དང་གསར་འཕྲིན་གཉིས་ཆ་མཉམ་དུ་འགྲོ་ཐུབ་པ་བྱུང་ན་ཞེ་དྲག་ཡག་གི་རེད། ཅེས་གསུངས་སོང་། ཞིབ་ཕྲ་དྲ་བརྙན་བརྒྱུད་གཟིགས་འབུལ་ཞུ་འཆར་ལགས་ན་དེ་ལུགས་དགོངས་འཇགས་ཡོང་བ་རྒྱུ།
ཡུ་རོབ་སྤྱི་ཟུར་དང་སུད་སི་དོན་གཅོད་ཟུར་བ། གསར་འཕྲིན་དྲ་རྒྱའི་སློབ་སྟོན་པ་གསང་གླིང་ཚེ་རིང་རྡོ་རྗེ་ལགས་ཀྱིས། གསར་འཕྲིན་འདི་བཞིན་དང་པོ་གསར་དུ་འཛུགས་དགོས་པའི་རྒྱུ་མཚན་ནི། སུད་སིའི་བོད་པའི་སྤྱི་ཚོགས་ནང་བོད་དོན་ལས་འགུལ་སྤེལ་བ་ཁག་རྒྱ་བལ་འབྲུག་གསུམ་གཙོས་པའི་བོད་པ་འདུས་སྡོད་ཁུལ་དུ་འགྲེམ་སྤེལ་བྱ་ཆེད་དང་། འགྲེམ་སྤེལ་ཞུས་པ་ལ་བརྟེན་ནས་བོད་པའི་སྤྱི་ཚོགས་ནང་འབྲེལ་ལམ་དང་སེམས་ཤུགས། ཆིག་སྒྲིལ་བཅས་ཡོང་བར་ཕན་པ་ཡོང་ངེས་ལ་དགོངས་ནས་གསར་འཛུགས་གནང་བ་ཞིག་དང་། ད་ལྟ་གསར་འཕྲིན་ཚགས་ཤོག་ལོ་གཅིག་ལ་ཐེངས་བཞི་རེ་འགྲེམས་སྤེལ་གནང་སྟེ། བོད་པ་འདུས་སྡོད་ཁག་གི་ས་གནས་དང་ཚོགས་སྡེ་ཁག་མི་འདྲ་བ་ ༨༠ ལྷག་ལ་འགྲེམས་སྤེལ་བྱེད་ཀྱིན་ཡོད། ཅེས་དང་། ༢༠༠༢ ལོ་ནས་སུད་སི་དང་ལིཀ་ཏེན་སིཊཡན་བོད་རིགས་མི་མང་གི་གསར་འཕྲིན་དྲ་རྒྱ་སྒོ་འབྱེད་གནང་ཡོད་པ་དང་། ད་ལྟ་དྲ་རྒྱ་འདི་བཞིན་བོད་ཡིག་དང་འཇར་མན། དབྱིན་ཡིག་བཅས་སྐད་རིགས་མི་འདྲ་བ་གསུམ་ཐོག སུད་སི་ནང་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་དང་། ས་གནས་ཁག་ནས་བོད་དོན་ལས་འགུལ་ཅི་རིགས་སྤེལ་བ་དྲ་རྒྱའི་ནང་འདོན་ཐབས་བྱེད་བཞིན་ཡོད། ད་ལྟའི་གསར་འཕྲིན་དྲ་རྒྱ་འདིར་ཉིན་ལྟར་ལྟ་ཀློག་བྱེད་མཁན་ ༥༠༠ ཡན་ཟིན་གྱི་འདུག ད་ལོའི་འདས་པའི་ཟླ་བཅུ་ལྷག་ཙམ་རིང་ལ་གཟིགས་མཁན་ཆིག་འབུམ་ལྔ་སྟོང་ ༡༠༥༠༠༠ ལྷག་བྱུང་འདུག དེ་བཞིན་རྒྱལ་ཁབ་མི་འདྲ་བ་ ༥༠ ལྷག་ནང་དྲ་རྒྱ་འདིར་ལྟ་ཀློག་གནང་གི་ཡོད། ཅེས་དང་། ད་ལྟ་གསར་འཕྲིན་ནང་ཕྱག་ལས་མཁན་མི་གྲངས་ ༡༥ ཙམ་ཡོད་པ་ཚང་མས་དཀའ་ལས་སྐྱོན་བཞིན་པ་དང་། མ་འོངས་པར་སྒྲིག་འཛུགས་དང་མི་མང་གིས་མུ་མཐུད་རྒྱབ་སྐྱོར་གནང་དགོས་པ་ཧ་ཅང་གལ་ཆེན་པོ་ཡིན་ཚུལ་སོགས་གསུངས་སོང་།
ཉིན་རྒྱབ་བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་ཆེ་མཆོག་གིས་ཕྱི་ལོ་ ༡༩༠༠ ནས་ཕྱི་ལོ་ ༡༩༥༩ ལོ་བར་གྱི་བོད་ཀྱི་རྒྱལ་རབས་ལོ་རྒྱུས་སྐོར་ལ་བཀའ་སློབ་གནང་རྗེས་མི་མང་དང་དྲི་བ་དྲིས་ལན་གནང་སོང་། ཕྱི་དྲོའི་ཆུ་ཚོད་ ༥།༣༠ སྟེང་ཡུ་རོབ་སྤྱི་ཟུར་དང་གསར་འཕྲིན་སློབ་སྟོན་པ་འོར་བ་རིགས་འཛིན་རྡོ་རྗེ་ལགས་ནས་མཛད་སྒོ་མཇུག་སྡོམ་གཏམ་བཤད་དང་འབྲེལ་ལས་རིམ་མཇུག་སྒྲིལ་སོང་།
གནས་ཚུལ་གཏོང་མཁན། ཙ་ཡུས་ཕུན་ཚོགས།
གསེར་གྱི་ཟམ་ཆེན་བརྐྱངས་པའི་གཏམ་གདོང་ལྔའི་གད་རྒྱངས།
༧རྒྱལ་དབང་ཐུགས་དང་འགལ་བ་མེད།།
བླ་མའི་བཀའ་ལས་འདའ་བ་མེད།།
ཁས་བླངས་དམ་བཅར་འགྱུར་བ་མེད།།
མདོར་ན་གཤིས་ལ་གཡོ་བ་མེད།།
ཆོལ་ཁ་གསུམ་ལ་ཕྱོགས་ཞེན་མེད།།
ཆོས་བརྒྱུད་ཁག་ལ་ཆགས་སྡང་མེད།།
གཞིས་བྱེས་གཉིས་ལ་དམར་ལོད་མེད།།
མདོར་ན་འབངས་ལ་ཉེ་རིང་མེད།།
སྣ་མང་སྐད་ལ་འགགས་པ་མེད།།
ཐབས་མང་ཆོས་ལ་འཁྲུལ་བ་མེད།།
བྱུས་མང་སྲིད་ལ་ནོར་བ་མེད།།
མདོར་ན་མཁྱེན་རབ་ཐོགས་པ་མེད།།