སྐལ་བཟང་རྣམ་རྒྱལ།
བོད་མིའི་སྲོལ་རྒྱུན་ནང་ནམ་མ་ལང་གོང་ནས་བྱ་སྐད་རྒྱག་མཁན་གྱི་བྱ་ཕོ་དེ་གཏད་ངན་དུ་བརྩིས་ཏེ་སྐེ་བྲེག་རྒྱུ་རེད། གཅིག་བྱས་ན་ནམ་མ་ལང་གོང་གི་བྱ་སྐད་དེ་ཇག་རྐུན་སོགས་ལ་དགྲ་ཟོན་དགོས་པའི་བརྡ་ཡིན་སྲིད་ཀྱང་། བྱ་སྐད་དེས་རང་གི་སྐེ་ཤོར་རྒྱུ་ཡིན་པ་རྟོགས་མི་སྲིད། དེས་ན་དེ་རིང་ངའི་སྐད་ཆ་འདི་ཡང་ནམ་མ་ལང་གོང་གི་སྐད་ཆ་ཞིག་ཡིན་པ་ཙམ་དུ་མ་ཟད། སྐད་ཆ་འདིས་ཕྱི་ལོ་ཉིས་སྟོང་བཅུ་གཅིག་ལོའི་འཁྲུག་ཆ་དོད་པའི་སྤྱི་ཚོགས་འདིའི་འགྱུར་རིམ་ནང་ཕྱོགས་གཉིས་ཀྱི་མཚོན་བྱེད་འབུར་དུ་ཐོན་པའི་གལ་ཆེའི་མི་སྣ་གཉིས་ལ་ཕོག་ཐུག་འགྲོ་རྒྱུར་ཐེ་ཚོམ་མེད་པས་སོ།། དེས་ན་སྐད་ཆ་འདི་དེ་འབྲེལ་གྱི་མི་མང་པོ་ཞིག་གིས་གཏད་ངན་དུ་བརྩིས་ཏེ་ས་མཆོང་གནམ་མཆོང་བྱེད་སྲིད་ཀྱང་དེ་དག་ལ་ཇི་མི་སྙམ་པར་ལོ་རྒྱུས་ལ་འགན་འཁུར་ནས་མི་ཤོད་ཀ་མེད་རེད།
རྒྱ་ཆེའི་ཀློག་པ་པོ་རྣམ་ལ་ཞུ་རྒྱུར། ཁྱེད་རྣམ་པར་དུས་ཁོམ་འདྲ་ཡོད་ན་རྒད་གསོ་ཁང་ཞིག་ཏུ་ཕེབས་ནས་དགུང་ལོ་བདུན་ཅུ་བརྒྱད་ཅུར་ཕེབས་པའི་བགྲེས་སོང་ཁག་གཅིག་ལ་ས་དང་གནམ་མ་གཏོགས་ངོ་ཤེས་མེད་པའི་དུས་སྐབས་ཀྱི་བཙན་བྱོལ་བོད་མིའི་འབྱུང་རབས་ཁག་བཀའ་འདྲི་ཞུས་དང་། དེ་ནས་ཁྱེད་ཚོས་ལོ་ངོ་སུམ་ཅུའི་སྔོན་གྱི་བཙན་བྱོལ་བོད་མིའི་སེམས་ནང་གི་རང་ཡུལ་སླར་གསོ་དང་རང་ཡུལ་ལ་ཕྱིར་ལོག་བྱ་འདུན་གྱི་གསོན་ཉམས་ལྡན་པའི་སེམས་ཤུགས་དེ་མཐོང་གི་རེད། དེང་སྐབས་ང་ཚོས་བཙན་བྱོལ་བོད་མི་རྒན་རབས་ཚོས་བཙན་བྱོལ་ནང་ཕུགས་རྒྱང་རིང་བའི་འཆར་གཞི་བསྐྲུན་མི་འདུག་ཅེས་ཁང་པ་རྒྱག་སྟངས་སོགས་ཀྱི་འཆར་གཞི་དེ་དག་ནི་ཁོང་ཚོའི་ཀླད་པར་ཤེས་ཡོན་གྱིས་མ་ལྡང་བ་ཡིན་པའི་འཕྱ་སྨོད་དང་ཟུར་ཟའི་སྐད་ཆ་འདྲ་མིན་བཤད་མྱོང་ཡོད། ཞིབ་ཏུ་བསམ་ན་ཁོའི་བཙན་བྱོལ་སྤྱི་ཚོགས་འཛུགས་སྐྲུན་གྱི་འཆར་གཞི་ཡོངས་རྫོགས་གང་མགྱོགས་རང་ཡུལ་ལ་ཕྱིར་ལོག་དང་རང་ཡུལ་སླར་གསོར་དམིགས་པ་ཤ་སྟག་ཡིན། ཇི་ལྟར་བཀའ་གདམས་པའི་དགེ་བཤེས་ཚོས་ཉིན་མཚན་ཀུན་ཏུ་འཆི་བ་དྲན་ནས་ལྟོ་གོས་གཏམ་གསུམ་ལ་གྱོང་གུན་བཏང་བ་བཞིན་ཁོ་ཚོས་ཉིན་མཚན་ཀུན་ཏུ་རང་ཡུལ་སེམས་སུ་བཅངས་ནས་བཙན་བྱོལ་གྱི་འཚོ་གནས་ལ་སྟབས་བདེའི་བསམ་བློ་བཏང་ཡོད། ད་ལྟ་བསམ་ན་འདི་ནི་ཁོ་ཚོས་ལོ་རྒྱུས་ལ་འགན་འཁུར་བའི་སྤོབས་པ་ཞིག་རེད།
མི་ཆིག་སྟོང་ཨ་རིར་མ་བཏང་གོང་ནས་བཙན་བྱོལ་བོད་མིའི་ཁྲོད་ཀྱི་མི་དྲག་ཚོའི་ཁྱིམ་གཞིས་ནུབ་ཕྱོགས་རྒྱལ་ཁོངས་སུ་གནས་སྤོས་གནང་མཁན་ཡོད་པ་མ་ཟད། སུད་སི་སོགས་སུ་གཞི་རིམ་བོད་མི་སྐྱབས་བཅོལ་དུའང་བླངས་ཡོད། འོན་ཀྱང་དུས་ཡུན་དེའི་རིང་བཙན་བྱོལ་བོད་མིའི་སྤྱི་ཚོགས་ནང་ནུབ་བསྐྱོད་ཀྱི་ཡོ་འཁྱོམས་མེད་པར་སྔར་བཞིན་རང་ཡུལ་ལ་ཕྱིར་ལོག་དང་རང་ཡུལ་སླར་གསོའི་སེམས་ཤུགས་གསོན་ཉམས་ལྡན་པའི་ཐོག་ད་དུང་གནས་ཡོད། སྐབས་བཅུ་པའི་བཀའ་ཤག་ནས་བོད་མི་ཆིག་སྟོང་ཨ་རིར་སྐྱབས་བཅོལ་གཉིས་པར་བཏང་བ་དང་། དེའི་རྗེས་འབྲེལ་དུ་ནང་མི་ཟླ་སྒྲིལ་གྱི་བྲེལ་འཚུབ་ནས་མགོ་ཚུགས་ཏེ་བཙན་བྱོལ་བོད་མིའི་གཞི་རིམ་སྤྱི་ཚོགས་ཀྱི་བསམ་བློ་ནུབ་ཕྱོགས་ཡུལ་ཁག་ཏུ་སྣེ་ཁྲིད་བྱས་ཡོད། བཙན་བྱོལ་བོད་མིའི་ནུབ་བསྐྱོད་བསམ་བློ་དེ་ནག་ལ་མེ་ཤོར་བ་བཞིན་ཚ་ཚ་འུར་འུར་གྱིས་འབར་བར་བརྟེན་མེ་ཆེན་དེས་བཙན་བྱོལ་བོད་མིའི་རང་ཡུལ་ལ་མགྱོགས་མྱུར་ཕྱིར་ལོགས་ཀྱི་བསམ་བློ་དེ་འཚིགས་ཟིན་པས་ད་གཟོད་བཙན་བྱོལ་བོད་མིའི་རང་དབང་སླར་གསོའི་ལས་འགུལ་དེ་ཡང་གསོན་ཉམས་མེད་པ་ཞིག་ཏུ་གྱུར་བ་རེད། ཆབ་སྲིད་དཔྱད་ཞིབ་པ་ཚོས་བོད་མིའི་བདེན་པའི་འཐབ་རྩོད་ཀྱི་གསོན་ཤུགས་ཉམས་བཞིན་པ་འདིར་ཕྱོགས་མང་པོ་ནས་རྒྱུ་རྐྱེན་སྣ་ཚོགས་ཀྱི་འགྲེལ་བཤད་བྱ་རྒྱུ་ཡོད་པ་དེའི་ཁྲོད་དུ་བོད་མིའི་ནུབ་སྐྱོད་ཀྱི་ཡོ་འཁྱོམས་འདི་ཡང་རྒྱུ་རྐྱེན་གཅིག་ཡིན་པར་ཐེ་ཚོམ་སུ་ལ་ཡོད།
གལ་ཏེ་བོད་མི་རྣམས་ས་ཕྱོགས་གང་དུ་ཕྱིན་ཡང་རང་དབང་འཐབ་རྩོད་ཀྱི་བསམ་བློར་འགྱུར་བ་འགྲོ་མི་སྲིད་ཅེས་པའི་སྐད་ཆ་འདི་སེམས་གསོའི་ཚུལ་དུ་བརྒྱ་བཤད་སྟོང་བཤད་ག་ཚོད་བྱས་ཀྱང་དོན་དངོས་ཀྱི་དཔེ་མཚོན་འོས་པ་འདི་ཡིན་གཅིག་ཀྱང་སྟོན་རྒྱུ་མེད། བཙན་བྱོལ་བོད་མི་ནུབ་སྐྱོད་ཀྱི་ཡོ་འཁྱོམས་ཁྲོད་ད་བར་རྒྱལ་ཁབ་འདྲ་མིན་ནང་སྐྱབས་བཅོལ་དུ་སླེབས་ཡོད་ཀྱང་བོད་མི་རིགས་ཀྱི་མ་འོངས་པའི་ངོ་བོ་མཚོན་ཆེད་ཀྱི་འདུས་སྡོད་སྤྱི་ཚོགས་འབུར་དུ་ཐོན་པ་གཅིག་ཀྱང་བསྐྲུན་ཐུབ་མེད། བོད་རྒྱལ་ཁབ་དང་མི་རིགས་ཀྱི་འཐབ་རྩོད་ཀྱི་དོན་དུ་ལུས་སྲོག་ཀྱང་བཏང་ཕོད་པར་ངོས་འཛིན་ཆོག་པའི་ཆབ་བཙོན་དང་འབྲེལ་ཡོད་མང་དག་ཅིག་ཨོ་སི་ཊོ་ལི་ཡར་སྐྱབས་བཅོལ་དུ་བཏང་བ་དེ་དག་ཀྱང་ཐོག་མའི་ཆར་ས་གནས་ཤིག་ཏུ་གཞིས་ཆགས་མཉམ་སྟོད་ཀྱིས་བཙན་བྱོལ་བོད་མིའི་མཉམ་སྡོད་སྤྱི་ཚོགས་བསྐྲུན་རྒྱུར་རེ་བ་བྱས་ཡོད་ཀྱང་ད་བར་སྒེར་ཕན་དོན་གཉེར་གྱིས་སྤྱིའི་ངོ་བོ་སྲུང་སྐྱོབ་ཀྱི་དོན་སྙིང་ལ་རྡོག་རོལ་བཏང་བ་ཀུན་གསལ་རེད། ད་དུང་དེང་སྐབས་ཨོ་སི་ཊོ་ལི་ཡའི་ནང་གི་སྐྱབས་བཅོལ་བོད་མིའི་སྤྱི་ཚོགས་འདི་བཞིན་རྙོག་འཛིང་ཆེས་ཆེར་གྱུར་ནས་འགྲེལ་བརྗོད་དཀའ་བའི་གནས་སུ་མཆིས། བོད་མི་ཆིག་སྟོང་ཨ་རིར་བཏང་བ་ནས་ད་བར་ཨ་རི་ནི་བོད་མི་འདུས་སྡོད་ཆེ་བའི་སྤྱི་ཚོགས་ཤིག་ཡིན་ན་ཡང་། ཇི་ལྟར་རྒྱ་མིས་ཨ་རིའི་ནང་གི་ངོ་བོ་སྲུང་སྐྱོབ་ཀྱི་ཆེད་དུ་འདུས་སྡོད་སྤྱི་ཚོགས་མཉམ་བསྐྲུན་བྱས་པ་བཞིན་བོད་མི་ཚོས་ད་བར་འབད་བརྩོན་བྱས་མེད། ད་དུང་ང་ཚོས་ཨེ་རླུང་ཚང་གི་དོན་རྐྱེན་ཁྲོད་ནས་ཨ་རིའི་མི་སེར་དུ་གྱུར་ཟིན་པའི་བོད་མི་ཁག་གཅིག་གི་རྣམ་འགྱུར་མཐོང་ཐུབ་པ་བྱུང་ཡོད། གཅིག་བྱས་ན་གནད་དོན་འདི་མི་མང་པོས་ཚོར་ཡོད་ཀྱི་མ་རེད། ཨེ་རླུང་ཚང་གི་ལས་བྱེད་འགའ་ཤས་དང་འབྲེལ་ཡོད་ཨ་རིར་གནས་སྡོད་བོད་མི་འགའ་ཤས་ཀྱིས་རང་ཉིད་ཨ་རིའི་མི་སེར་དུ་གྱུར་ཟིན་པའི་བློ་ཤེད་ཀྱིས་ཨ་རིའི་གཞུང་ལ་སྙན་ཞུ་འདྲ་མིན་ཕུལ་ནས་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པར་སྡིགས་ར་སྐུལ་ཡོད་པ་འདི་དཔེ་མཚོན་ཐབས་སྡུག་ཅིག་རེད། འདི་ཚོར་དབྱེ་ཞིབ་ཞིབ་ཚགས་ཀྱིས་བྱས་ན་དེའི་རྒྱབ་ལྗོངས་མང་དག་ཅིག་མཐོང་ངེས་ཡིན།
ད་ལྟ་ཁེ་ན་ཌར་མི་ཆིག་སྟོང་སྐྱབས་བཅོལ་དུ་གཏོང་བའི་ལས་རིམ་འགྲོ་བཞིན་པ་ཡིན་ཞིང་འབྱུང་འགྱུར་ཨ་རིར་མི་ལྔ་སྟོང་སྐྱབས་བཅོལ་ལ་གཏང་རྒྱུའི་སྐད་ཅོར་བརྒྱབ་དང་རྒྱག་བཞིན་པ་ཡིན། དེ་དག་གི་ཁྲོད་ནང་མི་ཟླ་སྒྲིལ་དང་སྤུན་ཉེ་བསྐྱར་ཐེན་སོགས་ཀྱི་ཡོ་འཁྱོམས་མང་དག་ཅིག་ཡོང་རྒྱུར་ངེས་པས་རྒྱ་བལ་འབྲུག་གསུམ་གྱི་བཙན་བྱོལ་བོད་མིའི་སྤྱི་ཚོགས་ཀྱི་ལྷིང་འཇགས་ལ་གཏོར་ཤིག་ཆེན་པོ་ཞིག་ཡོང་རྒྱུ་རེད། ལྷིང་འཇགས་མེད་པའི་ཡོ་འཁྱོམས་འདི་དག་གི་ཁྲོད་དུ་བཙན་བྱོལ་བོད་མིའི་རང་ཡུལ་ཕྱིར་ལོག་གི་བསམ་བློ་རང་ཡལ་དུ་འགྲོ་རྒྱུ་ཡིན་པ་ཕྱོགས་མང་པོ་ནས་ཚོད་དཔག་བྱེད་ཐུབ། བཙན་བྱོལ་སྒྲིག་འཛུགས་ཀྱི་སྲི་ཞུ་ལས་བྱེད་པའི་ནང་སྐུ་ངོའི་གདན་ཐོབ་ཡོད་པའི་ལས་བྱེད་ཕལ་ཆེ་བའི་རྐང་པ་ཡ་གཅིག་ནུབ་ཕྱོགས་སུ་བརྐྱངས་ཡོད་པ་དེ་ཡང་ཁོང་ཚོའི་འབྱུང་འགྱུར་གྱི་ཁ་ཕྱོགས་ཤིག་ཀྱང་རེད། དེ་སྔ་ལྷ་སའི་མི་དྲག་དང་མདོ་སྨད་ཕྱོགས་ཀྱི་ལྷ་སྡོད་ཚོང་པ་མང་པོ་ཞིག་གིས་སྔོན་ཚུད་ནས་ཀ་སྦུག་ཏུ་རྐང་པ་ཡ་གཅིག་བརྐྱངས་པ་དང་སྒོ་ཀུན་ནས་མཚུངས། བསམ་བློའི་ཁ་ཕྱོགས་འདི་འདྲའི་ཁྲོད་ནས་གངས་སེང་གི་དར་ཆས་རྙོབ་སར་སྐྱབས་བཅོལ་བོད་མིའི་བསམ་བློས་མ་རྙོབ་པར་བརྟེན། རིམ་པས་བཙན་བྱོལ་བོད་མིའི་སྤྱི་ཚོགས་འདི་ནད་ཆེན་ག་གེ་མོ་ཞིག་གིས་ཟིན་ཏེ་སྨན་པ་མཁས་ཆེན་ཞིག་གིས་འཆི་རྒྱུར་ཐག་བཅད་ཟིན་པའི་ནད་པ་ཞིག་གི་མི་ཚེ་དང་འདྲ་བར་འགྱུར་མི་སྲིད་པ་ཨེ་ཡིན་སྙམ།
འདི་ལྟར་བསམ་གཞིགས་བྱེད་སྐབས་གལ་ཏེ་འདི་ལོ་རྒྱུས་ཀྱི་ནག་ཉེས་ཤིག་ཡིན་ན། དེ་སྔ་བོད་མི་ཆིག་སྟོང་ཨ་རིར་བཏང་བའི་ལོ་རྒྱུས་ཀྱི་ནག་ཉེས་དེ་བཀའ་ཤག་སྐབས་བཅུ་པས་འཁྱེར་དགོས་པ་དང་། འབྱུང་འགྱུར་བོད་མི་སྔ་སྟོང་ཨ་རིར་བཏང་བའི་ལོ་རྒྱུས་ཀྱི་ནག་ཉེས་དེ་བཀའ་ཤག་འདི་པས་འཁྱེར་དགོས་པ་གདོན་མི་ཟ་བ་ཡིན་ན་ཡང་། ངུས་པའི་ནང་ནས་མཆི་མ་དཀར་བ་གཅིག་བྱུང་ཟེར་བ་ལྟར་ཕྱི་ལོ་ ༢༠༡༡ ལོའི་བཀའ་བློན་ཁྲི་པ་མི་མང་གི་ཐད་ཀའི་འོས་འདེམས་ཀྱི་འགྲན་སྡུར་ཁྲོད་བཀའ་བློན་ཁྲི་ཟུར་བཀྲས་མཐོང་བསྟན་འཛིན་རྣམ་རྒྱལ་གྱིས་དེ་སྔ་མི་ཆིག་སྟོང་ཨ་རིར་བཏང་པ་དེ་ཁོང་རང་གི་བྱས་རྗེས་སུ་དར་འཕྱར་བྱས་ཤིང་། ཆིག་སྟོང་གྲས་ཀྱི་མི་ཚོས་ཀྱང་ཁོང་གི་བཀའ་དྲིན་དྲན་ཏེ་ཁོང་ལ་འོས་འདེམས་རྒྱབ་སྐྱོར་བྱས་པ་སོགས་ལ་བལྟས་ན་ང་ཚོས་མི་ཆིག་སྟོང་ཨ་རིར་བཏང་བའི་ལོ་རྒྱུས་ཀྱི་ནག་ཉེས་དེ་ཁོང་སྐུ་སྒེར་གྱི་དབུ་ཐོག་ཏུ་བསྐྱལ་ཡང་མི་ཆོག་པ་མེད་པ་ལྟ་བུར་འདུག དེ་བཞིན་དུ་འབྱུང་འགྱུར་མི་ལྔ་སྟོང་ཨ་རིར་གཏོང་རྒྱུ་དེ་ཡང་སྲིད་སྐྱོང་བློ་བཟང་སེང་གེ་མཆོག་ནས་ཁོང་གི་ལས་དོན་གྲུབ་འབྲས་སུ་གཡག་རྔ་གནམ་འཕྱར་གནང་དང་གནང་མུས་ལ་སོང་། ལོ་རྒྱུས་ཀྱི་ནག་ཉེས་དི་ཡང་སྔོན་མཚུངས་ལྟར་ཁོང་སྐུ་སྒེར་གྱི་ཐོག་ཏུ་འབབ་རྒྱུ་ཡིན་པ་ཞར་བས་བལྟས་ཀྱང་ཁམས་གསུམ་མ་ཡིན་ནམ། མདོར་བསྡུས་ནས་བཤད་ན་འདི་ནི་མི་རིགས་ཤིག་གི་ཕྱོགས་ཡོངས་ཀྱི་ངོ་བོ་སྲུང་སྐྱོབ་ལ་གཏོར་བཤིག་བཏང་བའི་ལོ་རྒྱུས་ཀྱི་ནག་ཉེས་ཤིག་རེད། །
རང་གི་བསམ་ཚུལ་ནི་བསམ་ཚུལ་ཞིག་ཡིན་པའི་དབང་དུ་བཏང་ན། ཁྱེད་ནི་བོད་དོན་ཐོག་ལ་ཅུང་གོ་རྟོགས་དང་སེམས་འཁུར་གང་འཚམ་ཡོད་པའི་གཞིར་བྱས། ཡིན་ཡང་ང་ཚོས་གནས་ལུགས་ལ་ནམ་ཡང་རྩིས་སྲུང་དང་དང་ལེན་དགོས་པ་ནི་གཡོལ་ཐབས་མེད་པ་ཞིག་ཡིན། དེ་བས་ན་ངས་འདིར་བརྗོད་འདོད་པ་ནི། ང་ཚོའི་རང་དབང་མ་ཤོར་པའི་ཡར་སྔོན་ན་ང་ཚོ་ནི་གཞི་གཅིག་ལ་གནས་ཏེ་གོམས་གཤིས་གཅིག་གི་འོག་ཏུ་གནས་ཡོད་ཀྱང་མཐར་ང་ཚོ་ཁ་འཐོར་དུ་སོང་བ་རེད། དེ་ཡི་རྒྱུ་རྐྱེན་དེ་ཡང་སྙིང་གང་ལ་ཐུག་ཡོད་དམ། རྒྱུ་མཚན་དེ་ཡི་སྟབས་ཅིག་ངས་ཁྱེད་ལ་འདྲི་འདོད་པ་དེ་ནི་གལ་སྲིད་ང་ཚོ་གཅིག་ཀྱང་མ་འཐོར་པར་སྔར་བཞིན་དུ་གནས་ཡོད་ན་ང་ཚོའི་འཐབ་རྩོད་དེ་ཇི་ལྟར་བགྲོད་དགོས་སམ། ལོ་ངོ་ལྔ་བཅུ་ལྷག་ལ་ཕྱི་འདང་ཞིག་བྱོས་དང་། གནས་ལུགས་དང་རྒྱུ་མཚན་དེ་ལས་བརྒལ་བ་ཞིག་དགོས།
སྒོ་ཁར་ས་ཞིང་དང་མགོ་ཐོག་ཏུ་ཁང་པ་མེད་མཁན་བོད་ནས་གསར་དུ་འབྱོར་བ་ཚོ་ཕྱི་རྒྱལ་ཁག་ཏུ་གཏོང་རྒྱུ་གལ་ཆེན་རེད། གཞིས་ཆགས་ཁག་གི་མི་ཕྱི་རྒྱལ་དུ་བཏང་བ་ཡིན་ན་གྱོངས་ཆེན་པོ་རེད། ཕྱི་རྒྱལ་ལ་གཏོང་སྟངས་དེ་ཕར་བཏང་བ་ཙམ་གྱིས་འགྲིག་གི་མེད་པར་ཕར་ནས་འགྲོ་སྟངས་འདུག་སྟངས་དང་བོད་པའི་སྤྱི་ཚོགས་སྲ་ཐག་ཐག་ཅིག་བཟོ་རྒྱུ་གལ་ཆེན་པོ་རེད། མགོ་ནས་མཇུག་བར་བདག་པོ་ཡག་པོ་ཞིག་མ་བརྒྱབ་ན་བཙན་བྱོལ་བོད་གཞུང་གིས་ཕྱི་རྒྱལ་དུ་གཏོང་བའི་སྲིད་བྱུས་འདི་ནག་ཉེས་ཆེན་པོ་ཡིན་སྲིད་པ་རེད།
སྤྱིར་རྩོམ་ཡིག་འདི་ཧ་ཅང་གི་དོན་དང་ལྡན་པ་མཐོང་སོང་ལ། མི་སྒེར་ལ་ཅུང་ཟད་ཁ་ཟེར་བའི་ཚོར་སྣང་ཐན་ཐུན་ཡང་བྱུང་། བོད་མི་ཕྱི་རྒྱལ་ཁག་ཏུ་འགྲོ་འགོ་ཚུགས་པ་འདིས། རྒྱག་གར་ནང་གི་གཞིས་ཆགས་སྲ་བརྟན་ལ་འགོག་རྐྱེན་ཤུགས་ཆེན་འཕྲད་པ་ནི་ཀུན་གྱིས་ཤེས་གསལ་རེད་ལ། དཔལ་འབྱོར་ཆ་རྐྱེན་ཐོག་ནས་ཚང་མའི་སེམས་ནང་འུར་འདྲོགས་ཆེན་པོ་བྱུང་བ་ཡང་ཁག་མེད་པ་ཞིག་རེད།
རྒྱ་གར་ནང་གི་ཟླ་རེའི་ཆ་སྙོམ་ཡོང་འབབ་སྒོར་ཁྲི་གཅིག་ཡིན་པའི་དབང་དུ་བཏང་ན། ཕྱི་རྒྱལ་ཁག་ཏུ་ཟླ་རེར་ལས་ཀ་བྱས་ན་རྒྱ་གར་སྒོར་མོ་འབུམ་གཅིག་ལྷག་གི་གཡས་གཡོན་ཡིན་པས། སུ་ཡིན་ནའང་ལོངས་སྤྱོད་ལྡན་པའི་འཚོ་བ་ཞིག་སྐྱེལ་འདོད་ལོས་ཡོད། འདི་ནི་འདོད་ཆུང་ཆོག་ཤེས་དང་སེམས་ཁམས་ཀྱི་བདེ་སྐྱིད་གཤིབ་སྡུར་བྱས་པ་ཞིག་མ་ཡིན་པར་དཔལ་འབྱོར་ཁོ་ནའི་ཆ་རྐྱེན་ཐོག་ནས་བཤད་ན་འདི་ལྟར་རེད།
ཕྱོགས་གཞན་ཞིག་ནས་བཤད་ན་རྒྱ་ནག་དམར་པོའི་འོག་གི་གཞིས་སྡོད་པ་ཚོ་ལས་བཙན་བྱོལ་བ་ཚོ་དཔལ་འབྱོར་ཆ་རྐྱེན་ཁ་ཐབས་སྐྱོ་བ་དང་། ཡ་ང་བ་བྱུང་ནའང་མ་འགྲིག་པ་ཞིག་རེད།
ངའི་ངོས་འཛིན་ལ། ༡༩༨༧ནས་བཟུང་བའི་ལོ་གསུམ་ནང་གི་ཚ་ཚ་འུར་འུར་གྱི་རྒྱ་རྒོལ་ཆེན་པོ་དེས་བོད་མི་༡༠༠༠ཨ་རིར་འགྲོ་བའི་གོ་སྐབས་ཐོབ་པ་དང་། ༢༠༠༨ལོ་ནས་བཟུང་བའི་ད་བར་རྒྱ་རྒོལ་གྱི་མཐོ་རླབས་འདིས་བོད་མི་༥༠༠༠ཨ་རིར་འགོ་བའི་སྦིར་གྲགས་འདི་བྱུང་བ་རེད། ད་དུང་ཚེ་སྲོག་སྟོང་ཕྲག་མང་པོའི་འགྲོ་སོང་དང་། དཀའ་ངལ་ཁྲི་འབུམ་སྤྱད་པའི་འབྲས་བུར། བཙན་བྱོལ་བ་ཚོ་ནུབ་ཕྱོགས་རྒྱལ་ཁབ་ཁག་ཏུ་བསྐྱོད་རྒྱུ་ཙམ་ལས་མ་བྱུང་བ་ནི་དངོས་འབྲེལ་ཡ་ང་བ་ཞྀག་ཡིན་པས། ང་ཚོས་བོད་ནང་གི་བོད་མི་ཚོའི་ཉིན་མཚན་ཀུན་གྱི་འདོད་འདུན་སྟེ། གཞིས་བྱེས་མཉམ་འཛོམས་ཡོང་ཐབས་བྱ་དགོས་པ་ནི་དོན་གྱི་དམ་པའི་དགོས་དམིགས་དེ་ཡིན་པ་རེད།
< ཇི་ལྟར་བཀའ་གདམས་པའི་དགེ་བཤེས་ཚོས་ཉིན་མཚན་ཀུན་ཏུ་འཆི་བ་དྲན་ནས་ལྟོ་གོས་གཏམ་གསུམ་ལ་གྱོང་གུན་བཏང་བ> ཞེས་་་་་་་་་་་་ཚིག་འདིས་ཁོ་རང་ནང་ཆོས་ལ་མྱོང་བ་ཙམ་ལས་གཞུང་ལུགས་ཁོང་དུ་ཆུད་པའི་མི་ཞིག་མིན་པ་གསལ།
< བཙན་བྱོལ་སྒྲིག་འཛུགས་ཀྱི་སྲི་ཞུ་ལས་བྱེད་པའི་ནང་སྐུ་ངོའི་གདན་ཐོབ་ཡོད་པའི་ལས་བྱེད་ཕལ་ཆེ་བའི་རྐང་པ་ཡ་གཅིག་ནུབ་ཕྱོགས་སུ་བརྐྱངས་ཡོད་པ་དེ་ཡང་ཁོང་ཚོའི་འབྱུང་འགྱུར་གྱི་ཁ་ཕྱོགས་ཤིག་ཀྱང་རེད> ཞེས་དམད་པ་འདིས་ཁ་རྐྱག་ལང་ལ་ཤོར་དྲགས་པ་དང་། དགྲ་ལ་ངས་མདོག་འདི་འདྲ་རེད་ཟེར།།
< སྲིད་སྐྱོང་བློ་བཟང་སེང་གེ་མཆོག་ནས་ཁོང་གི་ལས་དོན་གྲུབ་འབྲས་སུ་གཡག་རྔ་གནམ་འཕྱར་གནང་དང་གནང་མུས་ལ་སོང་། ལོ་རྒྱུས་ཀྱི་ནག་ཉེས་འདི་ཡང་སྔོན་མཚུངས་ལྟར་གོང་སྐུ་སྒེར་གྱི་ཐོག་ཏུ་འབབ་རྒྱུ་ཡིན་པ་ཞར་བས་བལྟས་ཀྱང་ཁམས་གསུམ་མ་ཡིན་ནམ། > ཞེས་པ་འདིས་རང་ཉིད་བོད་རིགས་གཅིག་ཡིན་པའི་འགན་མཁུར་ཡེ་ནས་མེད་ཅིང་ སྲིད་སྐྱོང་མཆོག་དང་ སྐུ་སྒེར་དབར་དཀྲུག་ཤིང་ཡོང་འཐབ་ཀྱི་ཁོས་བ་སྤུ་དྲི་ངད་ཅན་ཞིག་འདམ་དུ་བྱིང་སོང་ནས་ཁོ་རང་ཡལ་ལོ་་་་་་་