ཡུ་རོབ་མཐུན་ཚོགས་དང་ཨུ་རུ་སུ་གཉིས་ལས་གང་འདེམས་སྲིད།

ཡུའུ་ཁི་རཱེན་རྒྱལ་ཁབ་དེ་ཡུ་རོབ་ཐུན་ཚོགས་ནང་ཞུགས་མིན་ཐོག་རྩོད་ཉོག་ཤུགས་ཆེ་རུ་འགྲོ་བཞིན་ཡོད་པ་མ་ཟད། གནད་དོན་དེ་ཨ་རི་དང་ཨུ་རུ་སུའི་བར་གྱི་འགྲན་རྩོད་ཅིག་ཀྱང་ཆགས་ཀྱིན་ཡོད་འདུག  

ཁ་སང་ཡུའུ་ཁི་རཱེན་( Ukraine)གྱི་རྒྱལ་སའི་རང་བཙན་ཐང་ཆེན་དུ་མང་ཚོགས་སྟོང་ཕྲག་མང་པོ་འདུ་འཛོམས་ཀྱིས་གཞུང་ལ་ངོ་རྒོལ་དང་། སྲིད་འཛིན་ཡཱ་ཎོ་ཁོ་ཝེ་ཆི་ ( Yanukovich)ལགས་ཀྱིས་རྩ་དགོངས་ཞུ་དགོས་པའི་འབོད་ཚིག་བསྒྲགས་ཡོད་ཅིང་། དེ་ནི་ཕྱི་ཟླ་ ༡༡ པའི་ཚེས་ ༢༩ ཉིན་ཡུ་རོབ་མཐུན་ཚོགས་ཀྱིས་ཡུ་རོབ་ཤར་ཕྱོགས་ཀྱི་རྒྱལ་ཁབ་ཁག་ཅིག་དང་མཉམ་དུ་གཞུང་ལམ་འཛུགས་སྐྲུན་དང་ཁྲོམ་རྭ་རྒྱ་སྐྱེད་བཅས་ཀྱི་སྐོར་ལ་ཚོགས་འདུ་ཞིག་ཚོགས་ཏེ་གྲོས་ཆོད་ལ་མིང་རྟགས་བཀོད་སྐབས། ཡུའུ་ཁི་རཱེན་གྱི་སྲིད་འཛིན་གྱིས་མིང་རྟགས་བཀོད་མེད་སྟབས། ཡུའུ་ཁི་རཱེན་གྱི་མང་ཚོགས་ཚོས་གཞུང་གིས་ཡུ་རོབ་མཐུན་ཚོགས་དང་མཉམ་འབྲེལ་བྱེད་དགོས་པ་དང་། ཡུའུ་ཁི་རཱེན་གྱི་འཛིན་མཆོག་ཨུ་རུ་སུའི་སྲིད་འཛིན་པུ་ཊིན་གྱི་དབང་བསྒྱུར་བསླུ་བྲིད་འོག་ཚུད་ཀྱི་ཡོད་སྐོར་བརྗོད་དེ་ངོ་རྒོལ་བསྟུད་མར་བྱེད་བཞིན་ཡོད་འདུག

སྲིད་དོན་དཔྱད་བརྗོད་པ་ཚོས། ཐེངས་འདིར་སྲིད་འཛིན་ཡཱ་ཎོ་ཁོ་ཝེ་ཆིས་མིང་རྟགས་མི་འགོད་དོན་ནི། ལོ་རྗེས་མའི་ཡུའུ་ཁི་རཱེན་རྒྱལ་ཡོངས་འོས་བསྡུའི་ཐད། ཨུ་རུ་སུའི་སྲིད་འཛིན་པུ་ཊིན་(Putin)ཀྱིས་ཨ་སྒོར་ཐེར་འབུམ་ ༡༥ ཙམ་གྱི་བུ་ལོན་གཡར་ཡོད་པ་མ་ཟད། སོལ་རླངས་གཙོས་མང་ཚོགས་ཀྱི་ཉིན་རེའི་དགོས་མཁོ་ཁག་ལ་མཐུན་རྐྱེན་ཤུགས་ཆེན་སྦྱོར་བཞིན་ཡོད་སྟབས་ཨུ་རུ་སུའི་གནོན་ཤུགས་འོག་གྲོས་ཆོད་ལ་མིང་རྟགས་མ་བཀོད་པ་ཞིག་ཏུ་ངོས་འཛིན་བྱེད་ཀྱིན་ཡོད་འདུག  

དུས་རབས་ ༡༧ པའི་ནང་ལྟ་གྲུབ་མི་འདྲ་བའི་ཆབ་སྲིད་ལམ་ལུགས་ཏེ་དམངས་གཙོ་དང་དམར་པོའི་རིང་ལུགས་གཉིས་ཀྱི་འཛམ་གླིང་ལ་ཁ་ལོ་བསྒྱུར་བ་དང་བསྟུན་ཏེ། ཡུའུ་ཁི་རཱེན་ཨུ་རུ་སུ་སྤྱི་མཐུན་དམར་པོའི་སྲིད་གཞུང་འོག་ཚུད་ཡོད་པ་དང་། ༡༩༩༡ ལོར་ཨུ་རུ་སུར་དཔལ་འབྱོར་གསར་བརྗེ་ཆེན་མོ་བྱུང་བ་དང་བསྟུན་ཏེ། ཨུ་རུ་སུའི་སྤྱི་མཐུན་མཉམ་འབྲེལ་གཞུང་མགོ་རྟིང་སློག་སྟེ། ཡུའུ་ཁི་རཱེན་གཙོས་རྒྱལ་ཁབ་ ༡༡ ཙམ་ལ་རང་བཙན་ཐོབ་ཡོད་པ་དང་། ཡུའུ་ཁི་རཱེན་གྱི་སྲིད་འཛིན་དང་པོ་དང་གཉིས་པས་ཡུའུ་ཁི་རཱེན་རྒྱལ་ཁབ་ཡུ་རོབ་མཐུན་ཚོགས་ནང་ཞུགས་རྒྱུར་འབད་བརྩོན་ཆེན་པོ་བྱས་ཡོད་ཀྱང་། ད་ལྟའི་སྲིད་འཛིན་ཡཱ་ཎོ་ཁོ་ཝེ་ཆི་ (Yanukovich)ཡིས་ཨུ་རུ་སུའི་འོག་སྡོད་ཐབས་ལ་འབད་བརྩོན་ཆེན་པོ་བྱས་ཡོད་འདུག

ཡུའུ་ཁི་རཱེན་ཡུ་རོབ་མཐུན་ཚོགས་ནང་ཞུགས་རྒྱུར་འབད་བརྩོན་བྱེད་མཁན་དག་ལ་ཨ་རི་གཙོས་ནུབ་ཕྱོགས་རྒྱལ་ཁབ་ཁག་གིས་རྒྱབ་སྐྱོར་དང་ཡུའུ་ཁི་རཱེན་གྱི་སྲིད་འཛིན་ལ་མང་ཚོགས་ཀྱི་མངོན་འདོད་བསྒྲུབ་དགོས་པའི་འབོད་སྐུལ་ཞུ་བཞིན་ཡོད་ཀྱང་། ཨུ་རུ་སུའི་གཞུང་གིས་ཡུའུ་ཁི་རཱེན་ནི་འདས་པའི་ལོ་རྒྱུས་ཐོག་ནས་ཨུ་རུ་སུ་དང་འབྲེལ་བ་དམ་ཟབ་ཡོད་པའི་རྒྱལ་ཁབ་ཅིག་ཡིན་སྟབས། ཨུ་རུ་སུ་དང་ཞི་མཐུན་མཉམ་གནས་ཐོག་རྒྱལ་ཁབ་འཕེལ་རྒྱས་ལ་ཤུགས་སྣོན་རྒྱག་དགོས་སྐོར་རྗོད་བཞིན་ཡོད་འདུག

ཨ་རིའི་གྲོས་ཚོགས་གོང་མའི་ཕྱི་འབྲེལ་ཚོགས་ཆུང་གི་ཚོགས་གཙོ་ཇོན་མེ་ཁཱེན་ལགས་དངོས་སུ་ཡུའུ་ཁི་རཱེན་མི་མང་གི་ངོ་རྒོལ་བྱེད་ཡུལ་རྒྱལ་ས་ཁེད་ཝུའི་རང་བཙན་ཐང་ཆེན་དུ་བསྐྱོད་དེ། མང་ཚོགས་ལ་ཡུའུ་ཁི་རཱེན་རྒྱལ་ཁབ་ཀྱི་དཔལ་འབྱོར་ཡར་རྒྱས་དང་མང་ཚོགས་ལ་ཞི་བདེ་ལྷིང་འཇགས་ཡོང་དགོས་ན་ངེས་པར་དུ་ཡུ་རོབ་མཐུན་ཚོགས་ནང་ཞུགས་དགོས་སྐོར་གཏམ་བཤད་སྤེལ་ཡོད་འདུག

ཨུ་རུ་སུའི་སྲིད་འཛིན་པུ་ཊིན་ཀྱིས་ཨ་རིས་ཨུ་རུ་སུའི་ཁ་གཏད་དུ་ལངས་ཏེ་ཡུའུ་ཁི་རཱེན་ཡུ་རོབ་མཐུན་ཚོགས་ནང་བཙན་འདེད་བྱེད་ཀྱི་ཡོད་ལུགས་དང་། གལ་ཏེ་ཨ་རིས་མུ་མཐུད་ཡུའུ་ཁི་རཱེན་ནང་གི་རྙོག་དྲར་ངལ་སྐུལ་བྱས་པ་ཡིན་ན་ཨ་རི་དང་ཨུ་རུ་སུའི་འབྲེལ་ལམ་ལ་དོ་ཕོག་འགྲོ་རྒྱུ་ཡིན་པ་མ་ཟད། མ་འོངས་པར་རྒྱལ་ཁབ་གཉིས་བར་དམག་འཁྲུག་ཀྱང་འབྱུང་སྲིད་སྐོར་བརྗོད་འདུག

ཨ་རི་དང་ཨུ་རུ་སུའི་བར་གྱི་འགལ་ཟླ་དེ་ནི། ཉེ་ཆར་ཨ་རིས་གཞུང་གིས་བཏོན་པའི་སེ་རི་ཡའི་རྫས་འགྱུར་མཚོན་ཆ་རྩ་མེད་བཟོ་བའི་སྲིད་ཇུས་དང་། ཨེ་རན་རྡུལ་ཕྲན་མཚོན་ཆ་བཀག་སྡོམ་སྲིད་ཇུས་སོགས་ལ་ཨུ་རུ་སུའི་སྲིད་འཛིན་པུ་ཊིན་གྱིས་རྒྱབ་སྐྱོར་བྱས་མེད་པ། ཨ་རིའི་གསང་བ་ཕྱི་གྱར་བྱེད་མཁན་སི་ནོལ་ཌན་ཨུ་རུ་སུའི་ནང་སྡོད་ཆོག་པའི་ཆོག་མཆན་སྤྲད་པ། རྒྱ་ནག་གིས་ཞི་བདེའི་རྒྱ་མཚོའི་མཁའ་དབྱིངས་དབྱེ་མཚམས་ཐིག་ཚད་བཟོས་པར་ཨུ་རུ་སུས་གཞུང་གིས་རྒྱབ་སྐྱོར་བྱས་པ་སོགས་ལ་བརྟེན་ཏེ་བྱུང་བ་ཞིག་ཡིན་འདུག  

ཆབ་སྲིད་དབྱེ་ཞིབ་པ་ཚོས་བརྗོད་པ་ལྟར་ན། ཡུའུ་ཁེ་རཱེན་རྒྱལ་ས་ཁེད་ཝུ་ཡི་ངོ་རྒོལ་དེ་ནི། སྲིད་གཞུང་གིས་མང་ཚོགས་ཀྱི་དགོས་མཁོ་མ་བསྒྲུབས་པར་བརྟེན་ཏེ་བྱུང་བ་ཞིག་ཡིན་སྟབས། སྲིད་འཛིན་གྱིས་ཁོ་ཚོའི་དགོས་མཁོ་མ་བསྒྲུབས་བར་ངོ་རྒོལ་དེ་མུ་མཐུད་གནས་རྒྱུ་ཡིན་སྐོར་དང་། རྒྱལ་སྤྱིའི་ཐབས་ཇུས་མཁས་པ་པུ་ཌི་ཛ་ཧཱ་རེག་ལགས་ཀྱིས། ཡུའུ་ཁེ་རཱེན་ནང་གི་ངོ་རྒོལ་དེ་ནི་གཞུང་དང་མང་ཚོགས་བར་གྱི་འཐབ་རྩོད་ཅིག་ཡིན་པ་མ་ཟད། ཨ་རི་དང་ཨུ་རུ་སུའི་བར་གྱི་ལོ་རྒྱུས་ཐོག་གི་འགྲན་རྩོད་ཅིག་ཀྱང་ཆགས་ཡོད་སྟབས། ཇི་སྲིད་སྟོབས་ཆེན་རྒྱལ་ཁབ་གཉིས་ཀྱི་འགྲན་རྩོད་དེ་མཚམས་མ་བཞག་བར་དེ་སྲིད་ངོ་རྒོལ་དེ་མཚམས་འཇོགས་བྱ་མི་སྲིད་སྐོར་བརྗོད་འདུག