ཀྲུའུ་ཝའེ་ཆོན་གྱིས་གསང་གནད་ཕྱི་གྱར་བྱས་པ།

ཟླ་བ་བཀྲིས། ངྷ་ས།

ཀློག་པ་པོ་ལགས། ཁྱེད་ཚོས་ཉེ་ཆར་རྒྱ་ནག་མི་རིགས་ལས་དོན་ཨུ་ཡོན་ལྷན་ཁང་གི་འགན་འཛིན་དང་། དེ་སྔའི་འཐབ་ཕྱོགས་གཅིག་གྱུར་ཁང་གི་འགན་འཛིན་གཞོན་པ་ཀྲུའུ་ཝུའེ་ཆོན་གྱིས་ཡོ་རོབ་ཁུལ་དུ་གསར་འགོད་པའི་བཅའ་འདྲི་དང་ལེན་བྱས་པའི་གནས་ཚུལ་དེ་ཚོ་གཟིགས་ཡོད་ཤས་ཆེ། ཀྲུའུ་ཡིས་མ་ཞི་༸གོང་ས་མཆོག་གི་དབུ་མའི་ལམ་ལ་སྐྱོན་བརྗོད་དང་། ཐ་ན་ཉེ་ཆར་གསུངས་པའི་བཀའ་སློབ་འགའ་ཤས་ཀྱང་ལུང་འདྲེན་བྱས་ཏེ་བོད་རང་བཙན་རྩོད་ཀྱི་ཡོད་པའི་སྐྱོན་བརྗོད་དང་རྒོལ་གཏམ་སྤེལ་འདུག ཡིག་རྫོབ་ཆེ་ལ་སྐྱོན་བརྗོད་ཀྱི་ཚིག་རྩ་མང་བའི་ལན་འདེབས་རིང་པོ་དེའི་ནང་རྒྱ་གཞུང་གི་མཐོ་རིམ་དབང་འཛིན་པས་ངོས་འཛིན་བྱེད་པའི་གསང་གནད་ཅིག་ཁ་ནས་ཤོར་བའམ་ཡང་ན། ཆེད་མངགས་བཤད་པ་གང་ཡིན་ལ་མ་ལྟོས་པའི་གནས་ཚུལ་ཞིག་བཤད་ཡོད་པ་སྟེ། ཏཱ་ལའི་བླ་མས་གྲོས་མཐུན་དོན་ཚན་བཅུ་བདུན་བཞག་པ་དང་བོད་ཞི་བས་བཅིངས་གྲོལ་གཏོང་རྒྱུ་སོགས་རྒྱལ་ཁབ་ལ་བྱས་རྗེས་ཆེན་པོ་བཞག་ཡོད་ཅེས་བརྗོད་ཡོད།

གནད་དོན་དེའི་ཐོག་ནས་རྒྱ་ནག་གཞུང་གིས་ཕྱོགས་གཅིག་ནས་༸གོང་ས་མཆོག་ཁ་བྲལ་རིང་ལུགས་པ་ཞིག་ཡིན་པའི་སྐྱོན་བརྗོད་བྱེད་ཀྱི་ཡོད་ཀྱང་། ཕྱོགས་གཞན་ཞིག་ནས་ཁོང་ནི་རྒྱ་ནག་གཅིག་གྱུར་གྱི་དོན་དུ་བྱས་རྗེས་ཡོད་པའི་ལོ་རྒྱུས་ཀྱི་མི་སྣར་ངོས་འཛིན་བྱེད་པའི་ལྟ་སྟངས་གསར་པ་དང་། སྐད་ཆ་གསར་པ་འདིས་ཞི་ཅིན་ཕིན་གྱི་མགོ་ཁྲིད་པའི་མི་རབས་གསར་པའི་དབང་འཛིན་པ་ཚོས་བོད་དོན་ཐོག་འཛིན་པའི་སྲིད་ཇུས་གསར་པ་ཞིག་ཡིན་ནམ། ཡང་ན་པེ་ཅིན་མཐོ་རིམ་དབང་འཛིན་པས་མཐའ་མའི་ཁྲུན་ཐག་མ་ཆོད་པའི་གསང་གནད་ཅིག་ཤོར་སོང་བ་ཡིན།

གང་ལྟར་ཡང་རྒྱ་ནག་ལ་བལྟས་ཏེ་བཤད་ན། རྒྱལ་དབང་སྐུ་ཕྲེང་བཅུ་བཞི་པ་མཆོག་ནི་རྒྱལ་དབང་སྐུ་ཕྲེང་རིམ་བྱུང་གི་ཁྲོད་དུས་དཔག་བབས་སྟུན་གྱི་སྒོ་ནས་བོད་རྒྱ་ཁོངས་སུ་གནས་ཐབས་ཀྱི་ཆེད་འབད་བརྩོན་གནང་མཁན་དང་། ཆིངས་ཡིག་གི་རྣམ་པའི་ཐོག་ནས་ཐག་གཅོད་མཁན་གཅིག་པུ་དེ་ཡིན་པའི་ཆ་ནས། རྒྱ་ནག་གིས་བོད་ཐོག་དབང་སྒྱུར་བྱས་པའི་ཁྲིམས་མཐུན་རང་བཞིན་དང་། དབང་གྲགས་ལྡན་པའི་དཔྱད་གཞི་ཞིག་འཚོལ་དགོས་བྱུང་ཚེ། གྲོས་མཐུན་དོན་ཚན་བཅུ་བདུན་ཁོ་ན་ལས་དེ་མིན་གྱི་ཁྲིམས་མཐུན་གྱི་ངོ་བོ་ཡོད་པའི་ཡིག་རིགས་སྣ་གཅིག་ཀྱང་རག་མེད། རག་མེད་པ་ནི་འཚོལ་མ་ཐུབ་པ་ཞིག་མིན་པར། ལོ་རྒྱུས་ཀྱི་ཆུ་རྒྱུན་རིང་པོའི་ནང་དེ་ལྟ་བུའི་ཡིག་རིགས་ཤིག་མེད་པས་ཕྱིར།

ཐ་ན་གྲོས་མཐུན་དོན་ཚན་བཅུ་བདུན་ཡང་ཕྱི་ལོ་ ༡༩༥༩ ལོའི་ཟླ་ ༤ པའི་ནང་༸གོང་ས་མཆོག་ནས་མོས་མཐུན་མེད་པའི་གསལ་བསྒྲགས་གནང་བ་བཅས་ཀྱིས་ཁྲིམས་མཐུན་རང་བཞིན་ཞེས་པ་དེ་བས་ཀྱང་རི་བོང་གི་རྭ་ལྟར་གྱུར། ད་བར་ལག་པ་འཆང་ས་གཅིག་རང་ཡོད་པ་ནི་སོག་པོས་བོད་དུ་དབང་སྒྱུར་བྱས་པ་དེ་རེད། སོག་པོས་གང་དུ་དབང་སྒྱུར་བྱས་པ་རྒྱ་ནག་གི་མངའ་ཁོངས་སུ་རྩོད་ཐབས་བྲལ་བ་ནི། རྒྱ་ནག་ནང་ཁུལ་དུ་རྩོམ་འབྲི་བྱས་པའི་ཇིང་གེར་རྒྱལ་པོའི་འཇིག་རྟེན་གཙུག་རྒྱན་གྱི་མཛད་པ་བཅུ་གཉིས་ཞེས་པ་ལས་གསལ་པོར་རྟོགས་ཐུབ།

དཔྱད་གཏམ་དེ་ནི་ཞིབ་འཇུག་གི་རིན་ཐང་དང་། རྩོམ་རིག་གི་རིན་ཐང་། སྒྱུ་རྩལ་གྱི་རིན་ཐང་སོགས་འགྲན་ཟླ་བྲལ་བའི་བརྩམས་ཆོས་ཕུལ་དུ་བྱུང་བ་ཞིག་ཡིན་ཞིང་། ཇིང་གེར་རྒྱལ་པོའི་འཇིག་རྟེན་གཙུག་རྒྱན་གྱི་མཛད་པར་ཚན་རིག་དང་མཐུན་པའི་བརྡར་ཤ་བཅད་པ་མ་ཟད། ཇིང་གེར་རྒྱལ་པོས་མངའ་ཁོངས་ཇི་ཙམ་རྒྱ་སྐྱེད་བྱས་ཚུལ་ནི་ལོ་རྒྱུས་མཁས་པས་ད་དུང་ཡང་ཁ་ཚོན་གཅོད་དཀའ་བའི་གནད་དོན་ཞིག་ཡིན་ན། ཁོང་གི་རྟ་དམག་གང་དུ་སླེབས་པའི་ས་ཆ་ད་ལྟའི་རྒྱ་ནག་ལ་བདག་དབང་ཡོད་པའི་སྐད་ཆ་དེ་ནི་ཡར་ཐོན་གྱི་དུས་རབས་ལྟ་ཅི། བྲན་ གཡོག་སྤྱི་ཚོགས་དང་བཀས་བཀོད་རྒྱུད་འཛིན་གྱི་སྤྱི་ཚོགས་ནང་དུའང་ཡིད་བརྟན་མི་ཐུབ་པའི་སྐད་ཆ་ཡིན་པ་རྒྱ་གཞུང་རང་ཉིད་ལའང་ཚོར་སྣང་ཡོང་གི་ཡོད།

དེའི་རྐྱེན་གྱིས་ཁྲིམས་མཐུན་གྱི་ངོ་བོ་སྲུང་སྐྱོབ་དང་། གྲོས་མཐུན་དེའི་ལོ་རྒྱུས་ཀྱི་དབང་གྲགས་སླར་གསོའི་ཆེད་༸གོང་ས་མཆོག་ལ་ལག་པ་བསྲིང་རྒྱུའི་ཇུས་ཐག་བཅད་པའི་རྟགས་མཚན་ཞིག་རེད་དམ། ཡང་ན་འཐབ་ཕྱོགས་གཅིག་གྱུར་གྱི་མངར་ཆས་བཏུམས་པའི་མདེའུ་ཞིག་རང་ཕྱོགས་སུ་འཕངས་ཏེ་བོད་དོན་འཐབ་རྩོད་ཀྱི་དུས་བབ་ཟང་ཟིང་བཟོ་རྒྱུར་དམིགས་པ་ཞིག་ཡིན་ནམ། སྲིན་འབུ་མེ་འཁྱེར་ལྟ་བུའི་སྨྱུག་འཛིན་པ་ཁོ་བོས་ཁ་མཚོན་གཅོད་མི་ཐུབ་པས། མཁྱེན་རྒྱ་ཡངས་པའི་ཀློག་པ་པོ་ཁྱེད་རྣམས་ཀྱིས་ཁ་ཚོན་གཅོད་རོགས།