འབྲི་རུའི་དགེ་བཤེས་ཤིག་ལ་རྒྱ་གཞུང་གི་མནར་གཅོད་བཏང་སྟེ་བཀྲོངས་འདུག

ནག་ཆུ་འབྲི་རུ་ལྟར་མོས་དགོན་པའི་དགེ་བཤེས་ངག་དབང་འཇམ་དབྱངས་ལགས་ཟླ་སྔོན་མའི་ནང་རྒྱ་ནག་གཞུང་གིས་འཛིན་བཟུང་བྱས་ཏེ་མནར་གཅོད་ཚད་མེད་བཏང་མཐར་རྐྱེན་ལམ་དུ་བཏང་སྟེ་ཟླ་འདིའི་ཚེས་ ༡༧ ཉིན་ཁོང་གི་སྐུ་ཕུང་ནང་མིར་སྤྲད་ཡོད་འདུག

ཟླ་སྔོན་མའི་ཚེས་ ༢༣ ཉིན། རྒྱ་གཞུང་གིས་དགེ་བའི་བཤེས་མཉེན་ངག་དབང་འཇམ་དབྱངས་ལགས་དང་གྲྭ་སྐལ་བཟང་ཕྱོགས་གླང་། གཞན་པའི་གྲྭ་པ་གཅིག་བཅས་མི་གསུམ་ལྷ་ས་ནས་འཛིན་བཟུང་བྱས་ཤིང་། ལྟར་མོས་དགོན་དུ་དམག་མི་ཕོན་ཆེན་བཏང་སྟེ་དགོན་པའི་ནང་ཡོངས་རྫོགས་སྔོག་བཤེར་དང་། ལྷག་པར་དུ་ངག་དབང་འཇམ་དབྱངས་ལགས་ཀྱི་གཟིམ་ཁང་ནང་བསྔོགས་ཏེ་གློག་ཀླད་གཉིས་ཀྱང་བཙན་འཕྲོག་བྱས་ཡོད་ཅིང་། ཁོང་ཅག་འཛིན་བཟུང་བྱས་རྗེས་ཉེས་འཛུགས་ཅི་ཞིག་བྱས་ཡོད་པ་དང་ས་གནས་གང་དུ་བཀག་ཡོད་མེད་སོགས་ནང་མིར་གསལ་བཤད་མེད་པར་ཟླ་གཅིག་ལྷག་ཕྱིན་ཡོད།

རྒྱ་གཞུང་གིས་དགེ་བཤེས་ཁོང་བཀག་ཉར་རིང་གཅར་རྡུང་དང་མནར་གཅོད་ཚད་མེད་འོག་རྐྱེན་ལམ་དུ་བཏང་རྗེས། ཟླ་འདིའི་ཚེས་ ༡༧ ཉིན་ཁོང་གི་སྐུ་ཕུང་ཕྱིར་ནང་མིར་སྤྲད་ཡོད་ཅིང་། ནང་མི་ཚོས་ཁོང་གི་སྐུ་ཕུང་སེ་ར་དགོན་པའི་དུར་ཁྲོད་དུ་ཞུགས་འབུལ་བྱས་ཡོད་པ་དང་། སྐུ་ཕུང་ནང་མིར་སྤྲོད་སྐབས་རྒྱ་གཞུང་འབྲེལ་ཡོད་མི་སྣས་གལ་སྲིད་གནས་ཚུལ་དེ་ཕྱིར་བསྒྲགས་བྱས་ཚེ། གནས་ཚུལ་ཕྱིར་བསྒྲགས་བྱེད་མཁན་དམར་གསོད་གཏོང་རྒྱུ་ཡིན་པའི་འཇིགས་སྐུལ་བྱས་ཡོད་འདུག

གྲྭ་སྐལ་བཟང་ཕྱོགས་གླང་དང་གཞན་པའི་གྲྭ་དེ་གཉིས་ཀྱི་གནས་སྟངས་གང་ཡང་ཤེས་རྟོགས་མེད་པ་ཆགས་ཡོད་འདུག

གོང་གསལ་གནས་ཚུལ་སྐོར་འགྲོ་བ་མིའི་ཐོབ་ཐང་ལྟེ་གནས་ཀྱིས་གནས་ཚུལ་སྤེལ་བར། དགེ་བཤེས་ཁོང་ནི་ས་གནས་མི་མང་ཚོས་དད་གུས་ཆེན་པོ་ཞུ་ཡུལ་ཞིག་ཡིན་ཞིང་། ཁོང་གིས་ནགས་ཤོད་འབྲི་རུ་ཁུལ་གྱི་གཞོན་སྐྱེས་ཚོར་ཤོ་སྦག་རྒྱན་འཇོག་མི་བྱེད་རྒྱུ་དང་། གྲོང་སྡེ་ཕན་ཚུན་བར་འཁྲུག་རྩོད་མི་བྱེད་རྒྱུ་བཅས་ལ་དམ་བཅའ་འཇོག་བཅུག་པ་སོགས་ས་གནས་མི་མང་ལ་ཕན་པའི་མཛད་འཕྲིན་མང་པོ་བསྐྱངས་ཡོད་འདུག རྒྱ་གཞུང་གིས་སྔ་རྗེས་ཐེངས་མང་པོར་སུན་གཙེར་བཟོས་ཡོད་ཅིང་། ༢༠༠༨ ལོའི་ཞི་རྒོལ་སྐབས་ཕྱི་ཕྱོགས་ལ་འབྲེལ་བ་ཡོད་པའི་ཉེས་མིང་འོག་ལོ་ ༢ རིང་བཙོན་འཇུག་མནར་གཅོད་བཏང་ཡོད་འདུག བཙོན་གྲོལ་རྗེས་ཁོང་གིས་མུ་མཐུད་ཆོས་གླིང་དགོན་དུ་མཚན་ཉིད་རིག་གནས་ཀྱི་དགེ་རྒན་གྱི་ཕྱག་ལས་གནང་བ་དང་། ལྟར་མོས་དགོན་དུ་སྐྱ་སེར་དབྱེར་མེད་ལ་མཚན་ཉིད་བཤད་གྲྭ་བཙུགས་ཏེ། སློབ་མ་ ༣༠༠ ལྷག་ལ་ནང་ཆོས་དང་བརྡ་སྤྲོད་རིག་གནས་སློབ་ཁྲིད་གནང་ཡོད་ལ། དགོན་པ་དང་གྲོང་སྡེ་མང་པོར་ནང་ཆོས་དང་བོད་ཀྱི་རིག་གཞུང་ངོ་སྤྲོད་གནང་ཡོད་འདུག  

དགེ་བའི་བཤེས་གཉེན་དབང་པོ་ངག་དབང་འཇམ་དབྱངས་མཆོག་ནི། ཕྱི་ལོ་ ༡༩༦༨ ལོར་ནགས་ཤོད་འབྲི་རུའི་ཡུལ་ཏོ་ཐོ་གྲོང་དུ་སྐྱེས་ཤིང་། ༡༩༨༧ ལོར་ལྟར་མོས་དགོན་དུ་སྒྲིག་ཞུགས་མཛད།  ༡༩༨༩ ལོར་རྒྱ་གར་དུ་ཡོང་ནས་སེར་བྱེས་གྲྭ་ཚང་དུ་ཞུགས་ཏེ་ལོ་ ༡༩ རིང་སློབ་གཉེར་དང་། ཚན་རིག་ཟབ་སྦྱོང་ལ་ལོ་མང་རིང་མཉམ་ཞུགས་གནང་ཡོད་འདུག གྲྭ་ཚང་གི་རྒྱུགས་སྤྲོད་སྐབས་རྩེ་ཕུད་གྲས་ཡིན་ཞིང་། རང་ཤག་ཏུ་སློབ་མ་མང་པོ་ལ་དཔེ་ཁྲིད་གནང་བ་དང་། འབྲི་རུ་ཞབས་དྲུང་རིན་པོ་ཆེ་བསྟན་འཛིན་མཁས་གྲུབ་མཆོག་གི་མཚན་ཞབས་ལོ་མང་གནང་ཡོད་འདུག གྲྭ་ཚང་གི་འཛིན་གྲྭ་ཐོན་མཚམས་དགེ་ལུགས་རྒྱུགས་སྤྲོད་ལ་ཞུགས་ཏེ་ཀ་རམས་ལོ་རིམ་གཉིས་ལ་ཨང་གཉིས་པ་དང་གསུམ་པ་ཐོབ་ཡོད་ཅིང་། ༢༠༠༧ ཕྱིར་བོད་དུ་ཕེབས་ཏེ་བོད་ཀྱི་རིག་གཞུང་མི་ཉམས་རྒྱུན་འཛིན་ཐོག་ཕྱག་ལས་གནང་བཞིན་པའི་སྐབས་སུ་རྒྱ་གཞུང་གིས་རྐྱེན་ལམ་དུ་བཏང་ཡོད་འདུག