ཟླ་སྔོན་མའི་ཚེས་ ༢༨ ཉིན་རྒྱ་གར་ལྷོ་ཕྱོགས་སེ་བྱེས་ཆོས་རྭ་ཆེན་མོར། བླ་
༧གོང་ས་མཆོག་གིས་ཆོས་ཞུ་བ་ཚོར་བསྩལ་བའི་བཀའ་སློབ་བོད་མིའི་སྒྲིག་འཛུགས་ཀྱི་དྲ་བར་བཀོད་དོན། ཁ་སང་ངོས་ལ་དེབ་འདི་ཞལ་དབྱེ་བྱེད་རོགས་བརྗོད་བྱུང་། སྐབས་དེར་ངོས་ཀྱིས་བཀའ་ཆོས་སར་བྱས་ན་ཞེས་བརྗོད་པ་ཡིན། གང་ཡིན་ཞེ་ན། ངོས་ཀྱིས་འདི་ཤོད་དགོས་རྒྱུ་འདི་ད་ལྟ་ཤར་རྩེའི་མཁན་པོས་ཐོ་ འདིའི་ནང་བརྗོད་སོང་། མགོ་སྟོད་བོད་ནང་དུ་༸རྒྱལ་བ་རིན་པོ་ཆེས་དོལ་རྒྱལ་བསྟེན་བཞིན་ཡོད། འོན་ཀྱང་དོལ་རྒྱལ་བཀག་འགོག་བྱ་རྒྱུ་དེ་རྙིང་མར་ངོ་བསྟུན་བྱས་པ་རེད་མ་གཏོགས་ནང་དོན་དོལ་རྒྱལ་བསྟེན་གྱི་ཡོད་པ་བརྗོད་བཞིན་འདུག ཉེ་ཆར་ངོས་ཀྱིས་པར་ཞིག་མཐོང་བྱུང་། ངོས་ཀྱི་པར་མདུན་དང་དེའི་རྒྱབ་ཏུ་དོལ་རྒྱལ་གྱི་གོས་ཐང་གཅིག་འདུག པར་འདི་བསྟན་ནས་༸རྒྱལ་བ་རིན་པོ་ཆེས་དོལ་རྒྱལ་བསྟེན་གྱི་ཡོད་པ་རེད། ཅེས་བརྗོད་དེ་མགོ་སྐོར་གཏོང་གི་འདུག ངོས་རང་འདིར་མ་འཆི་བར་སྡོད་ཡོད་སྟབས། མ་འཆི་གསོན་པོ་སྡོད་རིང་ཁ་མ་གྲག་ན་མི་དེ་ཚོས་ཧམ་པ་དང་སྐྱག་རྫུན་ཧ་ཅང་འཁྲབ་ བཞིན་འདུག དེར་བརྟེན་དེ་རིང་འདིར་མང་ཚོགས་ཁྲོད་ངོས་ཀྱིས་བརྗོད་ན་བསམ་པ་དྲན་བྱུང་།
དེ་བཞིན་བར་སྐབས་བོད་ནང་དུ་དོལ་རྒྱལ་བསྟེན་མཁན་རིགས་འགའ་ཤས་ཀྱིས་དོལ་རྒྱལ་འདུལ་འཛིན་གྲགས་པ་རྒྱལ་མཚན་གྱི་རྣམ་སྤྲུལ་ལས་ལྷག་པ་རྗེ་རིན་པོ་ཆེའི་རྣམ་སྤྲུལ་ཡིན་པ་དང་། རྗེ་རིན་པོ་ཆེ་དྲག་པོའི་སྐུར་བཞེངས་པ་རེད། ཅེས་ཤོད་ཀྱི་འདུག ཁ་སེང་ཞུས་པ་ལྟར་འཆི་བ་འོད་གསལ་མ་བུ་སྲེས་ནས་སྒྱུ་ལུས་དྭངས་པའི་མཚམས་ལ་ སྒྱུ་མའི་ལུས་ལ་དྭངས་ནས་མཆོག་གི་དངོས་གྲུབ་རྙེད་མཁན་གྱི་བླ་མ་ཞིག་དྲེགས་པར་སྐྱེས་ཟེར་རྒྱུ་འདི་བསྟོད་ར་རེད་སྨད་ར་རེད། བསྟོད་མི་ཤེས་པ་ཞིག་གིས་བསྟོད་ན་སྨད་རར་འགྲོ་རྒྱུ་རེད། དེར་བརྟེན་ཁུངས་བཙན་གྱི་ལོ་རྒྱུས་ཡིག་ཆ་འདི་ཚོ་གལ་ཆེན་པོ་འདུག དེ་རིང་འདིར་དེབ་འདི་ཞལ་དབྱེ་བྱས་པ་རེད། ཁྱེད་ཚོས་ཀྱང་ཡང་དོལ་རྒྱལ་སྐོར་དེབ་གཅིག་འདུག་ཟེར་ནས་གཡུག་མ་བཞག་པར་སོ་སོས་ཀློག མི་ལ་སྤྲད་ནས་འདི་ལྟ་རུ་བཅུག སོ་སོས་འགྲེལ་བཤད་རྒྱག་དགོས། དེབ་འདི་ངོས་ཀྱིས་ཆ་ཚང་བ་ཞིག་ཀློག་རྒྱུ་མ་བྱུང་ཡང་དངོས་ཡོད་གནས་ཚུལ་གང་ཡིན་པ་བཀོད་ཡོད། དེར་བརྟེན་འདི་ཤེས་པ་བྱེད་དགོས། འོན་ཀྱང་ཤེས་བཞིན་ཁྱད་དུ་གསོད་བྱས་ན་སོ་སོའི་རང་དབང་རེད། སངས་རྒྱས་ཀྱི་བསྟན་པ་ལ་སྐུར་བ་བཏབ་ནའང་སོ་སོའི་འདོད་པ་རེད། དགེ་ལུགས་པའི་ཆོས་འདི་དམ་སྲི་བསྟེན་རྒྱུ་ཞིག་སྒང་ལ་ཕྱིན་པ་ཡིན་ནའང་སོ་སོའི་རང་དབང་རེད་མ་གཏོགས་ཁྱད་པར་གང་ཡང་མི་འདུག མ་ཤེས་པར་འུར་སྒྲོག་ཀྱི་རྗེས་ལ་རི་བོང་ཅལ་འདྲོག་བྱས་ནས་ཕྱིན་པ་ཡིན་ན་གྱོང་རག་གི་རེད། འདི་བསམ་བློ་ཐོངས། སྔ་མོ་ངོས་ནས་ཀྱང་རི་བོང་ཅལ་འདྲོག་སྒང་ལ་ཕྱིན་པ་རེད། ངོས་ཀྱི་ཉམས་མྱོང་ཐོག་ནས་ཧོལ་རྒྱུག་བྱས་ཏེ་འགྲོ་རྒྱུ་མི་འདུག་ཅེས་ཞུ་རྒྱུ་ཡིན། དེ་ཁྱེད་རང་ཚོས་དགོངས་པ་བཞེས་ཏེ་གཟབ་གཟབ་གནང་། ཤེས་བཞིན་ཁྱད་དུ་གསད་མཁན་དེ་རིང་ཁ་སང་ཨ་རི་དང་ཡུ་རོབ། དེ་བཞིན་རྒྱ་གར་ནང་དུའང་ཡོད། གནས་ཚུལ་དེ་ཁ་ཁ་རེད།
བར་སྐབས་ངོས་ཕྱི་རྒྱལ་ཡུལ་གྲུ་ཁག་ཏུ་འགྲོ་སྐབས་ལོ་འགའ་ཤས་གོང་ལ་རྒྱ་མི་ངོ་ རྒོལ་བྱེད་མཁན་དང་ཤུགས་ལྡན་ཚོགས་པ་ངོ་རྒོལ་བྱེད་མཁན་མཉམ་དུ་ཡོང་གི་རེད། བར་སྐབས་ལོ་གཅིག་གཉིས་ནང་རྒྱ་མི་ངོ་རྒོལ་བྱེད་མཁན་ཉུང་དུ་ཕྱིན་ནས་ད་ཆ་མི་འདུག འོན་ཀྱང་ཤུགས་ལྡན་ཚོགས་པ་ངོ་རྒོལ་བྱེད་མཁན་མང་པོ་དེ་ཙམ་མེད་ཀྱང་མ་ཆད་པ་བྱས་ནས་ཡོང་གི་འདུག ཁ་སང་ཨ་རི་དང་ཨོ་སི་ཊོ་ལི་ཡ་ལའང་འགའ་ཤས་འདུག དེ་འགྲིག་པ་རེད། གཏམ་བརྗོད་རང་དབང་རེད། གང་བྱས་ཀྱང་ཁྱད་པར་གང་ཡང་མི་འདུག རྒྱ་མིའི་དཔོན་པོ་གཅིག་གིས་ངོས་རང་བདུད་རེད་ཅེས་བརྗོད་པ་རེད། གསར་འགྱུར་འདི་ཐོག་མར་ངོས་ཀྱིས་ཐོས་སྐབས་ངོས་རང་ཨི་ཊ་ལིར་ཡོད། ཁུལ་དེའི་གྲོང་ཁྱེར་ཁག་མང་པོ་ཞིག་གི་གྲོང་ཁྱེར་སྤྱི་ཁྱབ་པ་དང་ང་ཚོ་མཉམ་དུ་ཚོགས་ནས་བསྡ་ཡོད། སྐབས་དེར་ང་ཚོ་མཉམ་དུ་གསར་འགོད་པ་དང་ཐུག་པ་རེད། གསར་འགོད་པ་ཞིག་གིས་ཉེ་ལམ་རྒྱ་མིའི་དཔོན་པོ་གཅིག་གིས་ཏཱ་ལའི་བླ་མ་བདུད་རེད་ཅེས་བརྗོད་འདུག དེར་བསམ་ཚུལ་གང་ཡོད་བརྗོད་ཀྱི་འདུག སྐབས་དེར་ངོས་རང་བདུད་ཡིན། བདུད་རྭ་ཅོ་ཡོད་པ་འདི་ཡིན་ཞེས་བརྗོད་པ་ཡིན། ངོས་རང་གད་མོ་ཤོར་རྒྱུ་མ་གཏོགས་ཁྱད་པར་གང་ཡང་མི་འདུག བར་སྐབས་རྒྱ་མི་དེ་འདྲར་ད་ཆ་བདུད་ཀྱི་རྭ་ཅོ་རིང་དུ་རིང་དུ་འགྲོ་གི་འདུག་ཅེས་བརྗོད་པ་ཡིན།
སྤྱིར་སངས་རྒྱས་ཀྱི་བསྟན་པའི་དགྲ་བོ། ཡང་སྒོས་འཇམ་མགོན་བླ་མའི་བསྟན་པའི་དགྲ་བོ་རེད། ཅེས་ཟེར་གྱི་འདུག ངོས་ལ་ཁྱད་པར་གང་ཡང་མི་འདུག ངོས་ལ་སྐྱོན་བརྗོད་བྱས་པར་ཁྱད་པར་གང་ཡང་མི་འདུག ཁྱེད་རང་ཚོ་མགོ་སྐོར་ཐེབས་ན་ཡག་པོ་མེད། ཤེས་བཞིན་དུ་ཁྱད་གསོད་བྱེད་མཁན་ཞིག་ཡིན་ན་སོ་སོའི་རང་དབང་རེད། སྔ་མོ་ནས་ངོས་ཀྱིས་བརྗོད་པ་ཡིན། ཁ་ཆེ་ཕ་ལུའི་སྙིང་གཏམ་བཤད་ཡོད་དོ། ཉན་དང་མ་ཉན་སོ་སོའི་བསམ་བློ་རེད། ཅེས་བཤད་ཡོད། ཉན་དང་མ་ཉན་སོ་སོའི་རང་དབང་རེད། ཁྱེད་རང་ཚོས་ཡིད་གཟབ་བྱེད་དགོས་པ་ཞིག་ལ་ངོས་རང་ནམ་རྒྱུན་ཨ་རིར་བསླེབས་སྐབས་སྲུང་སྐྱོབ་དེ་ཨ་རིའི་སྲུང་སྐྱོབ་སྡེ་ཚན་གྱིས་འགན་འཁྱེར་གྱི་ཡོད། དེ་བཞིན་རྒྱ་གར་གཞུང་ནས་ཀྱང་སྲུང་བྱ་བཙུགས་ནས་འགན་ཁྱེར་གྱི་ཡོད། རྒྱ་གར་སྲུང་སྐྱོབ་སྡེ་ཚན་ནས་དོལ་རྒྱལ་ཚོགས་པས་ཏཱ་ལའི་བླ་མར་ཉེན་ཁ་འདུག་བརྗོད་ནས་ངྷ་རམ་ས་ལར་ལྕགས་རི་གསར་པ་བསྐོར་དགོས་པ་ཆགས་པ་རེད། ཨ་རིའི་སྲུང་སྐྱོབ་སྡེ་ཚན་ནས་ཀྱང་ཏཱ་ལའི་བླ་མར་ཉེན་ཁ་ཡོང་ས་གཅིག་དོལ་རྒྱལ་ཚོགས་པ་ནས་ཡོང་གི་འདུག་ཅེས་ཤོད་ཀྱི་འདུག དྲེགས་པ་གདུག་རྩུབ་ཅན་ཞིག་བསྟེན་སྐབས་མིའི་གཤིས་ཀ་དེ་ཡང་ཧ་ཅང་རྩུབ་པོ་ཆགས་བཞིན་འདུག དང་པོ་མཚན་ཉིད་སློབ་དཔོན་བསད་པ་རེད། ཁོང་ངའི་སྡོད་ས་དང་ཐག་ཉེ་པོ་རེད། གཙུག་ལག་ཁང་གི་རྒྱབ་ལ་རེད། མཚན་ཉིད་སློབ་དཔོན་གཟུགས་པོ་གྲི་བཅུ་དྲུག་བཙུགས་རྗེས་སྐེ་བྲེགས་ནས་བསད་པ་རེད། མཉམ་དུ་ཡུ་ནན་ནས་ཡིན་པའི་རྒྱ་སྐད་ཧ་ཅང་བདེ་པོ་ཡོད་པའི་སྐད་སྒྱུར་གནང་མཁན་དགེ་སློང་ན་གཞོན་ཞིག་ཡོད་པ་དེ་ཡང་བསད་པ་རེད།
སྐབས་དེར་ཁོང་གིས་རྟེན་འབྲེལ་བསྟོད་པ་རྒྱ་སྐད་ནང་སྒྱུར་བཞིན་ཡོད། ཁོང་དང་ལྷན་རོགས་པ་གཞན་ཞིག་གཅིག་ཡོད་པ་དེ་ཡང་བསད་པ་རེད། གང་ལྟར་མི་གསུམ་དུས་གཅིག་ལ་བསད་པ་རེད། དེ་ནས་ལྡི་ལིའི་དོལ་རྒྱལ་ཚོགས་པའི་གྲས་ཀྱིས་མི་ཡར་འགྲོ་མར་འགྲོ་བྱེད་མཁན་གྲྭ་སའི་ནང་ནས་འགའ་ཤས་ལ་ཉེས་རྡུང་བཏང་ནས་སྲོག་ལ་ཉེན་ཁ་བཟོས་པ་བྱུང་ཡོད། གཞིས་ཆགས་ནང་དུའང་ཞེད་སྣང་སྐུལ་མཁན་འགའ་ཤས་བྱུང་ཡོད། མ་གཞི་ངོས་རང་ཕར་ཚུར་འགྲོ་སྐབས་གྲྭ་ས་གྲྭ་ཚང་སོ་སོའི་ཁུངས་ནས་དོ་སྣང་བྱེད་ ཀྱི་འདུག བཀའ་དྲིན་ཆེ་ཞུ་རྒྱུ་ཡིན། ཉེན་ཁ་མེད་པ་མ་རེད། ཉེན་ཁ་འདུག་ཅེས་རྒྱ་གར་དང་ཨ་རིའི་གཞུང་གི་འབྲེལ་ཡོད་ལས་ཁུངས་ནས་རྗོད་ཀྱི་འདུག དོན་མེད་ཉེས་རྡུང་ཟེད་ནའང་འདྲ། མེ་མདའ་སོགས་བརྒྱབ་པ་ཡིན་ན་རྡོག་གྱོང་རེད། དེར་བརྟེན་གཟབ་གཟབ་བྱེད་དགོས་པ་འདུག གཞན་ཁོང་ཚོས་གང་བྱས་ཀྱང་ངོས་ལ་ཁྱད་པར་གང་ཡང་མི་འདུག ༸གོང་ས་ལྔ་པ་ཆེན་པོའི་རྣམ་ཐར་ཡོད་ཀྱང་དེ་དག་ཅང་མི་མངོན་པ་བྱས་ཏེ་བཞུགས་ཡོད། སྔ་མོ་ངོས་ཀྱིས་དོལ་རྒྱལ་བསྟན་སྐབས་སྦག་སར་རྒན་པདྨ་རྒྱལ་མཚན་གྱིས་ཁུར་བླངས་ ཏེ་བཞུགས་པ་རེད། ངོས་རང་དང་སྐྱབས་རྗེ་རིན་པོ་ཆེ། དེ་བཞིན་སྐྱབས་རྗེ་ཟོང་རིན་པོ་ཆེས་ཧ་ཅང་བསྟེན་གྱི་ཡོད། གླིང་རིན་པོ་ཆེ་གནང་གི་མེད་ཀྱང་བཟོ་པོ་བྱས་ནས་བཞུགས་ཀྱི་ཡོད། དེ་ལྟ་བུའི་གནས་སྟངས་འོག་རྒན་པདྨ་རྒྱལ་མཚན་གྱིས་གནས་ཚུལ་དེའི་ཐོག་གདོང་ལེན་གནང་སྟེ་བཞུགས་པ་རེད་ཧ་ཅང་བཀའ་དྲིན་ཆེན་པོ་ཡིན། རྒན་པདྨ་རྒྱལ་མཚན་དང་རྒན་ཉི་མ་རྒྱལ་མཚན་རིན་པོ་ཆེའི་སྐུ་མདུན་ནས་ངོས་ཀྱིས་ཀྱང་བཀའ་ཆོས་མང་དག་ཅིག་ཞུས་ཡོད། རིན་པོ་ཆེའི་ཐུགས་གཏིང་ནས་དོལ་རྒྱལ་མ་འགྲིག་པ་ཞིག་ཡོད་པ་དེ་གསལ་པོ་རེད། ཧ་ཅང་དར་ཁྱབ་ཡོད་པའི་ནང་རྙོག་མ་གཏིང་སློང་བྱེད་མཁན་ངོས་རང་རེད།
ངོས་ཀྱིས་རྩིས་སྤྲོད་བྱེད་དགོས་བྱུང་ན་དཔལ་ལྡན་ལྷ་མོ་རེད། དཔལ་ལྡན་ལྷ་མོ་ནི་གཟུགས་མེད་ཡིན་སྟབས་ཁྱེད་ཚོར་གསུང་བྱོན་རྒྱུ་གང་ཡང་མེད། དེར་བརྟེན་དཔལ་ལྡན་ལྷ་མོའི་ཚབ་ངོས་ཀྱིས་བྱས་ཏེ་རྙོག་མ་གཏིང་སློང་བྱེད་དགོས་རྒྱུ་དེ་འབྱུང་སྟངས་དང་རྒྱུ་མཚན་ཤོད་རྒྱུ་ངོས་ཀྱི་ལས་འགན་ཆགས་ཀྱི་ཡོད། ངོས་ཀྱིས་རྙོག་མ་གཏིང་སློང་བྱས་ཟིན་རྗེས་ཁྱེད་རང་ཚོས་ལས་ཀ་ཧུར་ཐག་འབད་ཐག་ བྱས་འདུག གོང་དུ་ཁྱེད་རང་ཚོའི་འགྲེལ་བཤད་ཧ་ཅང་ཡག་པོ་བྱུང་སོང་། རྙོག་མ་གཏིང་སློང་བྱེད་མཁན་དང་པོ་ངོས་རང་ཡིན་སྟབས་ངོས་ཀྱིས་འགྲེལ་བཤད་མ་བརྒྱབ་ན་མ་འགྲིགས་པ་ལྟ་བུ་རེད། ཁྱེད་རང་ཚོ་ཚང་མས་གོ་སོང་ངམ། དགེ་འདུན་པ་ཚོས་གསན་སོང་ངམ། ཕྱི་རྒྱལ་གྱི་མི་མང་དག་ཅིག་འདུག་པ་ཁྱེད་རང་ཚོས་གོ་སོང་ངམ། གནས་ཚུལ་དེ་དག་ཤེས་སོང་ངམ། མགོ་སྐོར་མ་ཐེབས་པར་བྱས་ཏེ་གཟབ་གཟབ་བྱེད་དགོས། སོ་སོས་ཤེས་བཞིན་ཁྱད་དུ་གསད་ནས་བསྟེན་ན་འགྲོ་གི་ཡིན་ན་རང་དབང་རེད། ཅེས་སོགས་གསུངས་འདུག
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ཁྱེད་རང་ཚོས་ཡིད་གཟབ་བྱེད་དགོས་པ་ཞིག་ལ་ངོས་རང་ནམ་རྒྱུན་ཨ་རིར་བསླེབས་སྐབས་སྲུང་སྐྱོབ་དེ་ཨ་རིའི་སྲུང་སྐྱོབ་སྡེ་ཚན་གྱིས་འགན་འཁྱེར་གྱི་ཡོད། དེ་བཞིན་རྒྱ་གར་གཞུང་ནས་ཀྱང་སྲུང་བྱ་བཙུགས་ནས་འགན་ཁྱེར་གྱི་ཡོད། རྒྱ་གར་སྲུང་སྐྱོབ་སྡེ་ཚན་ནས་དོལ་རྒྱལ་ཚོགས་པས་ཏཱ་ལའི་བླ་མར་ཉེན་ཁ་འདུག་བརྗོད་ནས་ངྷ་རམ་ས་ལར་ལྕགས་རི་གསར་པ་བསྐོར་དགོས་པ་ཆགས་པ་རེད། ཨ་རིའི་སྲུང་སྐྱོབ་སྡེ་ཚན་ནས་ཀྱང་ཏཱ་ལའི་བླ་མར་ཉེན་ཁ་ཡོང་ས་གཅིག་དོལ་རྒྱལ་ཚོགས་པ་ནས་ཡོང་གི་འདུག་ཅེས་བཀའ་སློབ་གནང་འདུག་ན་་་་་་དེང་སང་རྡ་ས་ཀརྨ་པ་མཚན་སྙན་ཆེན་པོ་ཡིན་སྟབས་དོལ་རྒྱལ་བསྐོར་གསུང་པ་རྩ་བ་རང་ནས་མཇལ་མ་སོང་་་་་ང་རང་གིས་མ་མཐོང་དུས་ཞུས་པ་ཡིན་་་་་་ཏན་ཏན་ཡོད་སྲིད་གང་ཡིན་ཟེར་ན་ རྒྱལ་བ་རིན་པོ་ཆེ་དམིགས་བསལ་ཁོང་ལ་བཀྲིན་ཆེན་པོ་མ་རེད་པས་དེེ་འདྲ་ཡིན་དུས་སྤྱིར་སྟང་བླ་སྤྲུལ་དགེ་བཤེས་སོགས་་བརྒྱ་སྟོང་བཤད་པ་ལས་ཁོང་ནས་ཚིག་གཅིག་བཤད་པ་ནོན་ཆེ་། གལ་སྲིད་མེད་ཚེ་གསུང་རོགས་ཞེས གསོལ་བ་བཏབ་ན་ག་འདྲ་འདུག་་་་་་་་
དོལ་རྒྱལ་འབྱུང་གཞི་གཙོ་བོ་ཕ་བོང་ཁ་པ་དངཁྲི་བྱང་གཉིས་རེད་འདུག་ག་། ཁོང་རྣམ་གཉིས་ནས་ལྟ་སྒོམ་སྤྱོད་གསུམ་གང་ཐད་ནས་ནོར་འཕྲུལ་ཤོར་ཡིན་ན་་་་་་་ ལབ་གླིང་རྒྱུན་ཆད་མེད་པ་་་་་་་་ཡོད་དུས་སྟོད་སྨད་ཟུངས་འབྲེལ་ཚིག་སྙན་འདྲ་ཆག་པོ་དེ་འདྲ་མ་ཡིན་པར་ཐག་བཅད་ནས་རྡོག་རྡོག་ཁ་གསལ་གསུང་རྒྱུ་དེ་འདྲ་ཡོད་ན་ཅི་མ་རུང་་་་་་
ངོ་དེབ་སྟེང་འདི་འདྲ་ཞིག་བྲིས་འདུག མ་གཞི་ནས་རྒྱལ་བ་ཀརྨ་པ་གཞན་པ་དེར་མཇལ་ན་མ་འགྲིག་པ་ག་རེ་ཡོད་པ་རེད། རེད་ཝ་གྲོགས་པོ་ཚོ།
༼ https://www.facebook.com/myallbea
西藏自由
ཞབས་འདྲེན་རེད་དམ་བྱས་རྗེས་རེད།
ཡག་པོ་རེད་དམ་སྡུག་ཅག་རེད།
གོ་ཐོས་ལྟར་ན་ཤར་ཕྱོགས་ཁུག་རྟས་ཉིན་འགའི་སྔོན་རྒྱལ་བ་ཀརྨ་པ་གཞན་པ་དེ་མཐའ་ཡས་རྡོ་རྗེ་ཞུ་བར་མཇལ་ཏེ། ཆུ་ཚོད་གཉིས་མ་ཟིན་ཙམ་ལ་བཀའ་མོལ་གནང་སྟེ་བོད་ཀྱི་མ་འོངས་མདུན་ལམ་ཆེད་མཉམ་རུབ་གནང་རྒྱུའི་སྐོར་བཤད་པ་རེད་ཟེར།། ༽
བྱང་ཨ་རི་སོགས་ཀྱི་དོལ་རྒྱལ་རྗེས་འབྲང་པ་སྐོར་ཞིག་གིས་དྲ་བརྙན་འདྲ་མིན་བཟོས་ཏེ་གཞི་རྩ་མེད་པའི་ཆལ་གཏམ་མང་པོ་བཤད་བཞིན་འདུག ལྷག་པར་དུ་བོད་ནང་གི་བོད་མི་ཚོར་ཆོས་དད་རང་དབང་ཡོད་སྐོར་དང་སྐྱིད་པོ་ཡིན་སྐོར། རྒྱ་ནག་གཞུང་གིས་ཟས་འདོད་ལ་ཟས་དང་གོས་འདོད་ལ་གོས། ཆོས་འདོད་མཁན་ཚོར་ཆོས་ཀྱི་ལོངས་སྤྱོད་སྤྲོད་བཞིན་ཡོད་སྐོར་བརྗོད་ཀྱི་འདུག བཙན་བྱོལ་སྤྱི་ཚོགས་ནང་གི་༧གོང་ས་མཆོག་དང་དད་ལྡན་མང་ཚོགས་བར་དང་གཞུང་དམངས་བར། བོད་གཞིས་བྱེས་བར་བཅས་ལ་རྙོག་དྲ་དང་དཀྲུགས་ཤིང་བཟོ་བཞིན་འདུག བོད་གཞིས་བྱེས་མི་མང་མགོ་སྐོར་བསླུ་བྲིད་འོག་མ་ཚུད་པ་བྱས་ཏེ་བྱེད་གཏེ་འདི་དག་རྩ་མེད་བཟོ་དགོས་ཀྱི་འདུག
དོལ་རྒྱལ་རྗེས་འབྲངས་པར་རྒོལ་ལན་ནན་པོ་གཏོང་བའི་དུས་ལ་བབས་འདུག
ཤར་ཕྱོགས་ཁུག་རྟ།
༢༠༡༣། ༡༢། ༢༨། ཉིན་གྱི་ཞོགས་པར་གདན་ས་ཆེན་པོ་སེ་རྭར་ལམ་རིམ་བཀའ་ཆོས་སྩོལ་སའི་ཆོས་གྲྭའི་དབུས་སུ། དགེ་ལྡན་བསྟན་པའི་སྐྱབས་མགོན་དགའ་ལྡན་ཁྲི་ཆེན་རྡོ་རྗེ་འཆང་ཆེན་པོའི་དབུས་བླ་སྤྲུལ་དགེ་བཤེས། དགེ་འདུན་དམངས་ཀྱིས་ས་གཞི་ཁེབས་པའི་དབུས་སུ། སྟོན་པ་མཉམ་མེད་ཤཱཀྱའི་རྒྱལ་བོའི་རྒྱལ་ཚབ། ཁམས་གསུམ་ཆོས་ཀྱི་རྒྱལ་པོ། གཞན་ཕན་མཛད་འཕྲིན་འདས་དང་མ་འོངས་པར་གང་གིས་ཀྱང་འགྲན་ཟླ་མ་མཆིས་པ། འཇིག་རྟེན་ཞི་བདེའི་དེད་དཔོན། རང་ཅག་གངས་ཅན་པ་རྣམས་ཀྱི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་༸རྒྱལ་མཆོག་ཐམས་ཅད་མཁྱེན་བཅུ་བཞི་པ་ཆེན་པོ་གསེར་ཁྲི་ཁམས་ཟིལ་གནོན་སྟེང་ཞབས་སོར་བདེ་བར་འཁོད་མཚམས། བོད་གངས་ཅན་པའི་བསྟན་སྲིད་སྤྱི་དང། ཆོས་བརྒྱུད་ཁག་ཕན་ཚུན་བར་གྱི་དམ་ཚིག ཡང་སྒོས་རི་བོ་དགེ་ལྡན་པའི་བསྟན་པ་དྲི་མེད་རྣམ་དཔྱོད་དཔལ་གྱིས་འགྲོ་བ་སྐྱོབ་བའི་ཟས་སུ་སྨིན་ཆེད། དམ་སྲི་འབྱུང་བོ་དོལ་རྒྱལ་རྗེས་འབྲངས་དང་བཅས་པའི་ཉེས་སྤྱོད་སྤྱི་དང། བྱེ་བྲག་བར་སྐབས་༸རྒྱལ་མཆོག་ཐམས་ཅད་མཁྱེན་པའི་སྐུ་ལ་བདོ་འཆར་ཡོད་པ་རྒྱ་གར་གཞུང་དང་ཨ་རིའི་གཞུང་གི་གསང་པའི་སྡེ་ཚན་ནས་ཉེན་བརྡ་ཕུལ་བ་དང། བོད་ནང་གི་ས་ཆ་ཞིག་ནས་དམ་སྲི་འབྱུང་བོ་དེ་ཤར་རྒྱལ་པ་ཙོང་ཁ་པའི་རྣམ་སྤྲུལ་ཡིན་ཚུལ་གྱི་ཧམ་བཤད་གནམ་དུ་བསྒྲགས་བཞིན་པའི་གནས་ཚུལ་ཐེར་འདོན་དང་འབྲེལ། དམ་སྲི་འབྱུང་བོ་དེའི་བྱུང་རྐྱེན་ངོ་བོ། བྱེད་ལས་དང་བཅས་པར་ཞིབ་འཇུག་མཐིལ་ཕྱིན་བྱས་པའི་དེབ་ཅིག་དབུ་འབྱེད་བྱས་ཏེ། ༸རྒྱལ་མཆོག་གང་གིས་ཁོང་གི་སྐུ་སྲོག་ལ་བདོ་བ་དེར་གཟབ་གཟབ་བྱེད་རྒྱུའི་བཀའ་སློབ་ཕེབས་སྐབས། སྙིང་ཚལ་བ་བརྒྱད་དུ་གྱེས་པས་ན་ཟུག་ནི་བརྗོད་པའི་ཡུལ་ལས་འདས། དམ་སྲི་འབྱུང་བོའི་རྗེས་འབྲངས་དང་དམ་སྲི་ཁ་འཁྱེར་གྱིས་རྒྱ་ནག་གཞུང་གི་གཡོ་འོག་ཏུ་ཚུད་པ་དེ་རིགས་ལ་ད་ནི་ང་ཚོ་བོད་མི་ཚོས་གདོང་ལེན་མཐར་ཕྱིན་པ་ཞིག་ངེས་པར་དུ་བྱེད་དགོས་པའི་དུས་ལ་བབ་འདུག
དམ་སྲི་འབྱུང་བོའི་ངོ་བོ་དང་སྨོན་ལམ་ལོག་པར་སྐྱེ་ཚུལ། ལས་ངན་ཅི་བྱས་རྒྱལ་མཆོག་ལྔ་པ་ཆེན་པོ་དང། ཁྲི་ཆེན་ངག་དབང་མཆོག་ལྡན་སོགས་གྲུབ་མཐའ་ཁག་གི་སྐྱེས་ཆེན་དམ་པ་རྣམས་ཀྱི་བཀའ་དཔྱད་ཅི་མཛད་ཕྱོགས་སྡེབས་ཀྱིས་རང་ཅག་གི་མིག་ལམ་དུ་གྱུར་ཡོད་པས་མ་ཟད། ༸རྒྱལ་མཆོག་གང་གིས་ཐ་མལ་པའི་བསམ་ཡིད་ལས་འདས་པའི་གནད་རྣམས་ལེགས་པར་གདམས་ཤིང། དེ་རིང་དེ་བས་ཀྱང་སྲེག་བཅད་བརྡར་གསུམ་བྱས་ཚུལ་ཧ་ཅང་གསལ་བོའི་སྒོ་ནས་”དོལ་རྒྱལ་གྱིས་བོད་བསྟན་སྲིད་སྤྱི་ལ་གནོད་ཀྱི་ཡོད་པ་དང། སྨོན་ལམ་ལོག་པ་ཡིན་པ་ངོས་ཀྱིས་དཔལ་ལྡན་ལྷ་མོའི་མགྲིན་ཚབ་བྱས་ཏེ་འགན་ཡོད་པའི་ཆ་ནས་ཁྱེད་ཚོར་བཤད་ཀྱི་ཡོད། དཔལ་ལྡན་ལྷ་མོ་གཟུགས་མེད་རེད། སོང་ཙང་ངོས་ནས་ཚབ་བྱེད་དགོས་པ་དེ་འགན་འཁྲི་རེད་”ཅེས་ཕེབས། བློ་གྲོས་ལྡན་ཞིང་རིགས་པའི་རྗེས་སུ་འབྲངས་མཁན་ཞིག་ཡིན་ན། མངོན་སུམ་མིག་གྱུར་གྱི་དཔྱད་གཞིའི་ཡིག་རིགས་ཁག་དང། རྟོགས་པ་མཐོན་པོའི་གང་ཟག་ནང་ཕན་ཚུན་གྱི་སྤྱོད་བྱར་གྱུར་པའི་ཡུལ་རྣམས་ཀྱང་རིམ་བཞིན་ཐབས་མཁས་ཐུགས་རྗེ་ཆེན་པོས། རང་ཅག་ཐ་མལ་པ་རྣམས་ལ་གོ་བདེར་མཛད་དེ་འདོམས་གནང་མཛད་པ་དག་ནི་༸རྒྱལ་མཆོག་ཐམས་ཅད་མཁྱེན་པ་འདིས་བོད་བསྟན་སྲིད་ལ་ཅི་ཙམ་ཐུགས་བརྩེ་མཚུངས་ཟླ་མེད་པ་གནང་པ་མཚོན་ཞིང། ཚུལ་འདི་དག་ནི་མདོ་སྡེ་པད་མ་དཀར་པོ་སོགས་སུ་ལུང་བསྟན་པའི་འཕགས་པ་སྤྱན་རས་གཟིགས་ཀྱི་གདུལ་ཞིང་ཞེས་པ་དེང་སང་ཐ་མལ་པ་དག་ལ་ཡང་མངོན་སུམ་མཐོང་རེག་ཡོད་པར་མཛད་པ་ཉག་ཅིག་རེད་ལ། གང་གིས་བརྩེ་བས་རྗེས་སུ་འཛིན་པ་འདི་རང་ཅག་གངས་ཅན་པ་རྣམས་ཀྱི་བསོད་ནམས་ཀྱི་ཡོལ་གོར་ཤོང་དགོས་པ་དང་རྟོགས་དགོས་པ་ནི། བོད་བསྟན་སྲིད་བདེ་ཐབས་ཀྱི་ཐབས་དམ་པ་གོང་ན་མེད་པ་དེ་ཡིན་གཤིས། དམ་སྲི་འབྱུང་བོ་དོལ་རྒྱལ་རྗེས་འབྲངས་དང་བཅས་པའི་བྱེད་ཕྱོགས་ལ་དུས་ལྟར་རྒོལ་ལན་སྤྲོད་དགོས་པ་སྐབས་སུ་བབས་པའི་སེར་སྐྱ་མཆོག་དམན་ཡོངས་ཀྱི་འོས་འགན་ཉག་ཅིག་ཏུ་མཐོང་བས། བཀའ་བཞིན་སྒྲུབ་པའི་མཆོད་པའི་རབ་མཉེས་ཟེར་པའི་ཚིག་ཙམ་སྐྱོར་རྒྱུ་དང། ཡང་ན་རིགས་པས་བརྡར་ཤ་བཅད་པའི་ཚད་མའི་ལམ་བཟང་དུ་བསྐྱོད་རྒྱུར་འཇིག་ཞུམ་བྱས་ཏེ་ལྟར་སྣང་ཙམ་ལ་མགོ་འཐོམས་པ། རང་ཉིད་ཁ་ཁུ་སིམ་ཐབས་ཙམ་ཞིག་གཙོ་བོ་བྱེད་པ་སོགས་ནི། བསྟན་སྲིད་ལར་རྒྱ་ཡོད་མཁན་མིན་ཞིང། བདེན་དོན་གྱི་རྗེས་སུ་འབྲངས་པའི་མི་ཡང་མིན་སྟབས། དོལ་རྒྱལ་རྗེས་འབྲངས་པའི་གནས་དུས་ཚོད་རྩིས་ལ་རྒོལ་ལན་སྤྲོད་རྒྱུར་འབོད་སྐུལ་དང་གྲོས་མགོ་འདོན་རྒྱུ་ཡིན།
གཅིག དོལ་རྒྱལ་རྗེས་འབྲངས་དང་དོལ་རྒྱལ་ཁ་ལ་འཁྱེར་ནས་བོད་བསྟན་སྲིད་མི་རིགས་ཀྱི་ལ་རྒྱར་རྩིས་མེད་རྡོག་རུལ་བྱེད་པའི་ཚོགས་པ། མི་སྒེར། དམངས་ཁྲོད་ཁ་བརྡ་སོགས་བརྒྱུད་ལམ་སྣ་ཚོགས་ཅི་ཡོད་རང་གཞུང་བཀའ་ཤག་གིས་བོད་གཞིས་བྱེས་གཉིས་ལ་ཆད་ལྷག་མེད་པར་གསལ་བསྒྲགས་ངེས་འདྲོངས་ཐོན་པ་གནང་རྒྱུ་དང། ཨ་རི་དང་རྒྱ་གར་གཞུང་གིས་ཉེན་བརྡ་ཅི་གནང་གི་གནས་ཚུལ་ལ་བོད་མི་སེར་སྐྱ་ཚང་མས་རོགས་འདེགས་དོགས་ཟོན་ཅི་ལྟར་བྱེད་དགོས་མིན་གསལ་བསྒྲགས་ཡུན་རིང་རྒྱ་ཁྱབ་ཀྱིས་གནང་རོགས།
གཉིས། ༸གོང་ས་ཆེན་པོ་ཕྱི་རྒྱལ་ཁག་ཏུ་ཆིབས་བསྒྱུར་སྐབས་དོལ་རྒྱལ་ཚོགས་པས་ངོ་རྒོལ་བྱེད་རིགས་ས་གནས་དེ་དང་དེར་ཡོད་པའི་བོད་རིགས་ཚོགས་པ་གཙོས་བོད་ཀྱི་བདེན་དོན་ལ་རྒྱབ་སྐྱོར་བྱེད་མཁན་ཚོས་དུས་ལྟར་ངོ་རྒོལ་མཐའ་གཅིག་ཏུ་གནང་རོགས། ཁོ་པ་ཚོའི་བདེན་དོན་བྲལ་ཞིང་རྒྱ་ནག་གཞུང་གི་དངུལ་དངོས་ཀྱིས་བསླུས་པའི་ངོ་ལོག་དེ་རིགས་ལ་ངོ་རྒོལ་ཚ་ནན་བྱས་ཏེ་དེ་རིགས་མ་ཡོང་པ་བཟོ་རྒྱུ་བོད་མི་ཚོའི་འོས་འགན་ཉག་ཅིག་རེད།
གསུམ། བོད་ནང་མདོ་དབུས་ཁམས་གསུམ་གྱི་བླ་ཆེན་དགེ་བཤེས་རྣམས་ཀྱིས་མཉམ་རུབ་ཀྱིས་ ”དོལ་རྒྱལ་རྗེ་རིན་པོ་ཆེ་དྲག་པོའི་སྐུ་རུ་བཞེངས་པ་ཡིན་ཟེར་པའི་” བསྟན་པ་རྨ་འབྱིན་གྱི་ཧམ་བཤད་དེ་རིགས་ལ་དུས་ལྟར་དགག་ལན་ཚ་ནན་དང། བོད་མི་ས་ཡ་དྲུག་ཡོངས་སུ་རྫོགས་པར་དེ་རིགས་ལ་གཟབ་གཟབ་བྱེད་དགོས་ཚུལ་གྱི་བཀའ་ནན་སྤྱི་ཕེབས་སྩོལ་རོགས།
བཞི། བོད་ནང་གི་བོད་རིགས་ལས་བྱེད་པ་རྣམས་ཀྱིས་རྒྱ་ནག་གཞུང་ལ་མཉམ་རུབ་ཀྱིས་སྙན་ཞུ་ཕུལ་སྟེ་གཤམ་འོག་འཐབ་ཕྱོགས་གཅིག་གྱུར་སོགས་ཀྱིས་དོལ་རྒྱལ་བསྟེན་མཁན་ལ་འབྲེལ་བ་བྱེད་པ། ཇེ་མང་དུ་གཏོང་པ། ལས་ཀ་སྣ་ཚོགས་སྤྲད་པ་བཅས་བྱས་ཏེ་དོལ་རྒྱལ་བེད་སྤྱོད་གཏོང་པའི་བྱེད་བབ་དེ་རིགས་ཀྱིས་བོད་མི་ནང་ཁུལ་གྱི་མཐུན་ལམ་ལ་གནོད་ཀྱི་ཡོད་ཚུལ་གསལ་བཤད་དང། དེ་རིགས་མ་འོངས་པར་མི་གནང་རྒྱུའི་འབོད་སྐུལ་ཞུ་རོགས།
ལྔ། ཆོས་བརྒྱུད་ཆེན་པོ་བཞི་དང་གཡུང་དྲུང་བོན་དང་བཅས་པས་གཞུང་འབྲེལ་ཐོག་དྲ་རྒྱ་གསར་བཟོ་དང་ཚགས་པར་པར་བསྐྲུན་གྱིས། ཕྱི་རྒྱལ་ཁག་ཏུ་༸གོང་ས་མཆོག་ལ་ངོ་རྒོལ་བྱེད་རིགས་ཀྱི་གནས་ཚུལ་ཐེར་འདོན་དང། ཆོས་བརྒྱུད་ཚང་མས་རང་རང་གི་ཆོས་ཚོགས་རྣམས་ལ་འབོད་སྐུལ་གྱིས་དེ་རིགས་ལ་ངོ་རྒོལ་དུས་ལྟར་གནང་རྒྱུར་བཀོད་མངགས་བྱེད་རོགས།
དྲུག ཕྱི་རྒྱལ་སྐུ་ཚབ་དོན་གཅོད་ཁག་ནས་བདེ་སྲུང་ལས་ཁུངས་དང་བཀའ་འབྲེལ་གྱིས་སྐུ་ཕྱྭའི་དམིགས་བསལ་ཚན་པ་ཞིག་སྒོ་འབྱེད་ཀྱིས་དོལ་རྒྱལ་རྗེས་འབྲངས་པའི་ངོ་རྒོལ་གྱི་གནས་ཚུལ་དེ་རིགས་བོད་མིའི་གསར་འཕྲིན་སོ་སོར་ཆེད་གཏོང་གནང་སྟེ། ཁོང་ཚོའི་སྐོར་ཞིབ་འཇུག་གིས་ངོ་བོ་དང་བྱེད་ལས་བཅས་པ་ཐེར་འདོན་ཞིབ་ཚགས་གནང་རོགས།
བདུན། བོད་མི་མང་སྤྱི་འཐུས་ལྷན་ཚོགས་དང། གཞུང་འབྲེལ་མིན་པའི་ཚོགས་ཁག་བཅས་ཚང་མས་གྲོས་ཆོད་རྫིག་པོ་རེ་བཞག་སྟེ་གང་མིན་ཚད་བྱེད་ཀྱི་ཡིན་གནས་ཁོ་ནས་གསུངས་ཏེ་འདུག་རྒྱུ་ལས། མི་གསོད་ཁྲག་སྦྱོར་བྱས་པ་མ་ཚད། ཐ་ན་༸གོང་ས་ཆེན་པོའི་སྐུ་ལའང་བདོ་འཆར་ཡོད་པའི་དོལ་རྒྱལ་རྗེས་འབྲངས་པའི་བྱེད་ཕྱོགས་འདིར་རྣམ་འགྱུར་གསར་པ་དང། ཁ་གཏད་གཅོག་ཚུལ་གསར་པ། ཐ་ཚིག་ནན་པོ་བསྒྲགས་པ་སོགས་བྱེད་དགོས་པའི་དུས་ལ་བབས་འདུག་པས་བོད་མི་སེར་སྐྱ་ཚང་མས་དང་བས་ཀུན་ནས་བསླངས་ཏེ་ཁ་ཙམ་མིན་པའི་གདོང་ལེན་མཐར་ཕྱིན་པ་གནང་རོགས།
བརྒྱད། བལ་ཡུལ་གནས་བཞུགས་བོད་མི་ཚོས་མགོ་ཁྲིད་དེ་རྒྱ་གཞུང་གིས་བལ་ཕྲུག་སྐྱོ་བོ་ཁ་ཤས་སྒོར་མོས་བསླུས་ཏེ། གྲྭ་ཆས་བསྐོན་ཞིང་དོལ་རྒྱལ་རྗེས་འབྲངས་པ་ཇེ་མང་དུ་གཏོང་བཞིན་པའི་གནས་སྟངས་དེ་རིགས་མ་ཡོང་ཐབས་ཐབས་ཤེས་གང་ཡོད་གནང་རོགས།
སྔོན་དཔལ་ལྡན་འབྲས་དཀར་སྤུངས་པའི་ཆོས་སྡེ་ཆེན་པོར་དུས་རབས་ཉི་ཤུའི་མཇུག་དང་ཉེར་གཅིག་པའི་བོད་ཀྱི་མཁས་པ་ཐམས་ཅད་ཀྱི་གཙུག་རྒྱན་དང། ༸རྒྱལ་མཆོག་ཐམས་ཅད་མཁྱེན་པ་གང་གི་ཆོས་སྲིད་གང་ཅིར་ཐུགས་སྲས་ལྟ་བུར་བྱོན་པ། སློབ་དཔོན་ཟམ་གདོང་རིན་པོ་ཆེས་” སྐྱེ་བ་གཅིག་ལ་ཤི་ཐེངས་གཅིག དོལ་རྒྱལ་ཚོགས་པས་བསད་ན་ཤི་རྒྱུ་རེད། མ་བསད་ནའང་ཤི་རྒྱུ་རེད་”ཅེས་ཐུགས་ཐག་ཆོད་ལ། སྙིང་སྟོབས་རབ་ཏུ་ཀུན་ཏུ་འབར་པའི་ལམ་སྟོན་ལྟར་རང་ཅག་སེར་སྐྱ་ཚང་མས་དོལ་རྒྱལ་ཚོགས་པའི་བདེན་པ་མིན་པ་དང། རྒྱ་ནག་གི་བཀོད་བྱུས་འོག་ཕྱིན་པའི་བྱེད་བབ་ལ་དུས་ལྟར་གདོང་ལེན་བྱེད་དགོས་ཤིང། བོད་ཀྱི་གཏམ་དཔེར། ནང་བཀྲ་མ་ཤིས་ན། ཕྱི་དོན་མི་འགྲུབ་ཅེས་པ་ལྟར། དབུ་མའི་ལམ་ནས་བོད་ཀྱི་བདེན་མཐའ་བསལ་སྟེ་རང་སྲིད་རང་སྐྱོང་མིང་དོན་མཚུངས་པ་ཞིག་ཡོང་རྒྱུ་ལའང་བར་ཆད་འདི་ལས་ཆེ་བ་མེད་སྟབས། བོད་མི་རྣམས་རིག་པ་སྒྲིམ་པའི་དུས་ལ་སླེབས་འདུག ལོངས་ཤོག བླ་ཆེན་ཚོ་ལོངས་ཤོག དཔོན་པོ་ཚོ་ལོངས་ཤོག དགེ་བཤེས་ཚོ་ལོངས་ཤོག གཞུང་ཞབས་རྣམས་ལོངས་ཤོག མི་མང་རྣམས་ལོངས་ཤོག རྩོམ་པ་པོ་རྣམས་ལོངས་ཤོག དམ་ཚིག་ཅན་གྱི་སྲུང་མ་རྣམས་ལོངས་ཤོག
༢༠༡༣། ༡༢། ༢༨། ཉིན། བཀའ་ཆོས་སྐབས་༸གོང་ས་མཆོག་རང་གི་ཞལ་ནས་ཨ་རི་དང་རྒྱ་གར་གཞུང་གིས་དོལ་རྒྱལ་ཚོགས་པས་༸གོང་ས་མཆོག་གི་སྐུ་ཕྱྭར་གནོད་འཆར་ཡོད་པའི་ཉེན་བརྡ་བཏང་བྱུང་ཕེབས་པ་ཐོས་འཕྲལ་ཡིད་སེམས་ལང་ལོང་འཁྲུགས་བཞིན་བྲིས།།
དྲ་གྲོགས་ཚོ། གསུང་འདི་ཐེངས་གཅིག་ཀློག་དང་། སེམས་ལ་ཚོར་བ་གང་འདྲ་ཡོང་གི་འདུག ༼ ཁྱེད་རང་ཚོས་ཡིད་གཟབ་བྱེད་དགོས་པ་ཞིག་ལ་ངོས་རང་ནམ་རྒྱུན་ཨ་རིར་བསླེབས་སྐབས་སྲུང་སྐྱོབ་དེ་ཨ་རིའི་སྲུང་སྐྱོབ་སྡེ་ཚན་གྱིས་འགན་འཁྱེར་གྱི་ཡོད། དེ་བཞིན་རྒྱ་གར་གཞུང་ནས་ཀྱང་སྲུང་བྱ་བཙུགས་ནས་འགན་ཁྱེར་གྱི་ཡོད། རྒྱ་གར་སྲུང་སྐྱོབ་སྡེ་ཚན་ནས་དོལ་རྒྱལ་ཚོགས་པས་ཏཱ་ལའི་བླ་མར་ཉེན་ཁ་འདུག་བརྗོད་ནས་ངྷ་རམ་ས་ལར་ལྕགས་རི་གསར་པ་བསྐོར་དགོས་པ་ཆགས་པ་རེད། ཨ་རིའི་སྲུང་སྐྱོབ་སྡེ་ཚན་ནས་ཀྱང་ཏཱ་ལའི་བླ་མར་ཉེན་ཁ་ཡོང་ས་གཅིག་དོལ་རྒྱལ་ཚོགས་པ་ནས་ཡོང་གི་འདུག་ཅེས་ཤོད་ཀྱི་འདུག དྲེགས་པ་གདུག་རྩུབ་ཅན་ཞིག་བསྟེན་སྐབས་མིའི་གཤིས་ཀ་དེ་ཡང་ཧ་ཅང་རྩུབ་པོ་ཆགས་བཞིན་འདུག ༽
༼ མ་གཞི་ངོས་རང་ཕར་ཚུར་འགྲོ་སྐབས་གྲྭ་ས་གྲྭ་ཚང་སོ་སོའི་ཁུངས་ནས་དོ་སྣང་བྱེད་ ཀྱི་འདུག བཀའ་དྲིན་ཆེ་ཞུ་རྒྱུ་ཡིན། ཉེན་ཁ་མེད་པ་མ་རེད། ཉེན་ཁ་འདུག་ཅེས་རྒྱ་གར་དང་ཨ་རིའི་གཞུང་གི་འབྲེལ་ཡོད་ལས་ཁུངས་ནས་རྗོད་ཀྱི་འདུག དོན་མེད་ཉེས་རྡུང་ཟེད་ནའང་འདྲ། མེ་མདའ་སོགས་བརྒྱབ་པ་ཡིན་ན་རྡོག་གྱོང་རེད། དེར་བརྟེན་གཟབ་གཟབ་བྱེད་དགོས་པ་འདུག ༽
དོལ་རྒྱལ་འབྱུང་གཞི་གཙོ་བོ་ཁྲི་བྱང་རྡོ་རྗེ་འཆང་རེད་ལ། ཟམ་གདོང་བླ་མའི་རྩ་བའི་བླ་མ་རེད། ཟམ་གདོང་ལགས་དགའ་ལྡན་ཕོ་བྲང་གི་འགན་འཛིན་རེད། འགྲོ་བསྐྱོད་ཉལ་འདུག་ལག་མཐིལ་ལ་སྐྱུ་རུ་ར་རློན་པ་བཞག་པ་ནང་བཞིན་རེད། རྒྱ་གར་དང་ཨ་རིས་གནས་ཚུལ་འདི་དག་ཤེས་རྗེས་ཉེན་ཁ་སེལ་ཐུབ་སྲིད་པ་ཞིག་རེད།
དངོས་ཡོད་ཀྱི་འགྲེལ་བཤད་ཅིག་ལ་ གནས་ལུགས་ལ་ཡིད་ཆེས་བྱེད་མཁན་ཞིག་ཡིན་ན་ཁས་ལེན་དགོས་པར་མཐོང་། འོན་ཀྱང་། དོལ་རྒྱལ་ཚོགས་པས་རྒྱ་སྒོར་ཁོ་ན་བསམ་ནས་བོད་རིགས་ཀྱི་རིག་གཞུང་དང་མི་རིགས་མཐོང་ཆུང་བྱས་པ་མ་ཟད། ད་དུང་རང་རེའི་ནང་བ་ཡོངས་ཀྱི་སྐྱབས་གནས་༧གོང་ས་མཆོག་གི་སྐུའི་སྲོག་གཉེན་ལ་བར་ཆད་བྱེད་ཀྱི་ཡོད་པ་བདུད་རྭ་ཅོ་ཅན་ལས་ཁོ་བ་ལྕགས་ཀྱི་སོ་དང་བདུད་ཀྱི་རྭ་ཅོ་འབུམ་ལས་ཞེད་སྣང་ཚ་བོ་ཡིན་པར་ཤེས་དགོས།
དངོས་གནས་དྲང་གནས་ཉེན་ཁ་ཆེན་པོ་ཡོད་པ་རེད། སྒང་གི་སྐྱབས་མགོན་རིན་པོ་ཆེ་མཆོག་གི་བཀའ་སློབ་དེ་ཀློག་ཡོང་སྐབས་སེམས་ཚ་གེ་ཚིག་གིས་བཤད་མ་ཤེས་པ་ཞིག་ཆགས་སོང་། བོད་མི་ཚོ་འདི་ལྟར་སྡོད་པའི་དུས་ཚོད་ཅིག་མ་རེད་བསམ་པའི་སེམས་ཚོར་ཞིག་སྐྱེས་སོང་།