ཁ་སང་ནས་བཟུང་ཀོང་རེ་སེ་ཚོགས་པའི་སྣེ་འཁྲིད་པའི་རྒྱ་གར་གྲོས་ཚོགས་འོག་མའི་ཚོགས་དུས་མཐའ་མ་དེ་མགོ་འཛུགས་བྱས་ཡོད་ཅིང་། སྐབས་འདིའི་གྲོས་ཚོགས་ཀྱི་ལོ་ལྔའི་ལས་རྒྱུན་རིང་གྲོས་ཆོད་གྲོས་འཆར་མང་པོ་ཞིག་གཏན་འབེབས་མ་ཐུབ་པར་ལྷག་ཡོད་འདུག
ཁ་སང་རྒྱ་གར་གྲོས་ཚོགས་འོག་ཚོགས་མགོ་བཙུགས་ཡོད་ཅིང་། ཐེངས་འདི་ནི་ཀོང་རེ་སེ་ཚོགས་པས་སྣེ་ཁྲིད་པའི་རྒྱ་གར་གཞུང་གི་གྲོས་ཚོགས་འོག་མའི་ཚོགས་དུས་མཐའ་མ་དེ་ཆགས་ཡོད་ཅིང་། གྲོས་ཚོགས་སྐབས་འདིའི་ལས་རྒྱུན་རིང་གྲོས་ཆོད་གྲོས་འཆར་ ༢༣༧ ཙམ་བྱུང་ཡོད་པ་ལས་ ༡༦༥ ཙམ་གཏན་འབེབས་བྱས་ཀྱང་། གཞན་གྲོས་འཆར་ ༧༢ ཙམ་གཏན་འབེབས་མ་ཐུབ་པར་ལྷག་ཡོད་པ་དང་། དེ་དག་ལས་ཐེངས་འདིར་གྲོས་འཆར་ ༣༥ ཙམ་གཏན་འབེབས་ཐུབ་ཐབས་ལ་འབད་བརྩོན་བྱེད་འཆར་ཡོད་འདུག
གནས་ཚུལ་འདིའི་སྐོར་ལ་རྒྱ་གར་གྱི་ཆབ་སྲིད་ཚོགས་པ་ཁག་ལ་ལྟ་ཚུལ་སྣ་ཚོགས་འབྱུང་བཞིན་ཡོད་པ་དང་། ལྷག་པར་དུ་བྷེ་ཇའི་པི་དང་ཕྱོགས་འགལ་ཚོགས་པ་ཁག་གིས། ཐེངས་འདིར་ཀོང་རེ་སེ་གཞུང་གིས་མང་ཚོགས་ཀྱིས་དོ་སྣང་ཆེན་པོ་བྱེད་ཡུལ་གྲོས་འཆར་ ༣༥ ཙམ་གཏན་འབེབས་ཐུབ་ཐབས་ལ་འབད་བརྩོན་བྱེད་ཀྱི་ཡོད་པ་དེ་ནི། འབྱུང་འགྱུར་གྱི་འོས་བསྡུ་ཆེན་མོའི་སྐབས་མང་ཚོགས་ཀྱིས་རྒྱབ་སྐྱོར་ཐོབ་ཆེད་ཡིན་སྐོར་རྗོད་བཞིན་ཡོད་འདུག
ཐེངས་འདིའི་གྲོས་ཚོགས་ནང་བསྣམ་ཡོད་པའི་གྲོས་འཆར་གལ་ཆེན་ཁག་ནི། ལྐོག་ཟ་རུལ་སུངས་ལ་གདོང་ལེན་བྱེད་ཕྱོགས་སྐོར་གྱི་གྲོས་འཆར་ ༦ དང་། ཏ་ལིན་གྷ་ན་ (Telangana)གནད་དོན་དང་སྤྱི་ཚོགས་བདེ་འཇགས་སྲུང་སྐྱོང་། བུད་མེད་ནུས་ཤུགས་གོང་མཐོར་གཏོང་ཐབས་སོགས་སྤྱི་ཚོགས་དང་འབྲེལ་བའི་གྲོས་འཆར་ཁག་ཅིག མཐོ་རིམ་ཤེས་ཡོན་སློབ་གསོ་སྤྲོད་ཕྱོགས་དང་ཞིབ་འཇུག་ཐབས་ལམ་གསར་པ་འཚོལ་སྟངས། གཙུག་ལག་སློབ་གྲྭ་ཁག་ནང་གསར་གཏོད་དང་ཉམས་ཞིབ་སྡེ་ཚན་འཛུགས་སོགས་ཤེས་ཡོན་དང་འབྲེལ་བའི་གྲོས་འཆར་ཁག་ཅིག རྡུལ་ཕྲན་མཚོན་ཆའི་བདེ་འཇགས་དང་ཉེན་སྲུང་སོགས་དམག་དོན་དང་འབྲེལ་བའི་གྲོས་འཆར་ཁག་ཅིག མི་སེར་ཐོབ་ཐང་བཅའ་ཡིག་སོགས་རྩ་ཁྲིམས་བསྐྱར་བཅོས་དང་འབྲེལ་བའི་གྲོས་འཆར་ཁག་ཅིག་བཅས་ཡིན་འདུག
གནད་དོན་དབྱེ་ཞིབ་བ་ཚོས། ཀོང་རེ་སེ་ཚོགས་པས་སྣེ་ཁྲིད་པའི་སྐབས་བཅོ་ལྔ་པའི་རྒྱ་གར་གྲོས་ཚོགས་ཀྱི་དུས་ཡུན་རིང་གྲོས་འཆར་ ༡༦༤ ཙམ་གཏན་འབེབས་བྱས་ཡོད་ཀྱང་། གཞན་གྲོས་འཆར་ ༧༢ ཙམ་ཐག་གཅོད་མ་ཐུབ་པར་ལྷག་ཡོད་སྟབས། ཐེངས་འདིའི་གྲོས་ཚོགས་ནང་གྲོས་འཆར་གང་མང་ཞིག་གཏན་འབེབས་མ་ཐུབ་པར་ལྷག་པ་ཡིན་ན། རྒྱལ་ཡོངས་འོས་བསྡུའི་ཁྲོད་ཀོང་རེ་སེ་ཚོགས་པར་ཕམ་ཉེས་ཆེན་པོ་འགྲོ་རྒྱུ་ཡིན་པ་མ་ཟད། རྒྱ་གར་གཞུང་དམངས་གཙོའི་ལམ་སྲོལ་ཐོག་སྐྱོད་པའི་ཚུན་གྱི་ལོ་རྒྱུས་ཁྲོད་ཁྲིམས་ཡིག་གཏན་འབེབས་བྱས་པ་ཆེས་ཉུང་ཤོས་ཀྱི་གྲོས་ཚོགས་ཤིག་ཆགས་རྒྱུ་ཡིན་སྐོར་བསྒྲགས་འདུག
རྒྱ་གར་རྒྱལ་ཡོངས་འོས་བསྡུ་ཆེན་མོའི་ཐད་ད་ལྟ་ནས་ཆབ་སྲིད་ཚོགས་པ་ཁག་གིས་མངའ་སྡེ་སོ་སོའི་ནང་ཁྱབ་བསྒྲགས་ཤུགས་ཆེན་བྱེད་བཞིན་ཡོད་པ་དང་། ཀོང་རེ་སེ་དང་བྷེ་ཇཱའི་པི་གཉིས་གཙོས་ཆབ་སྲིད་ཚོགས་པ་ཁག་གིས་སོ་སོའི་ཚོགས་པའི་སྲིད་བློན་འོས་མི་དང་ཆབ་སྲིད་དང་སྤྱི་ཚོགས། ཤེ་ཡོན་དང་འཕྲོད་བསྟེན་བཅས་ཀྱི་སྲིད་བྱུས་ལངས་ཕྱོགས་མི་མང་ལ་ངོ་སྤྲོད་བྱེད་བཞིན་ཡོད་པ་དང་། ད་སྔ་རྒྱ་གར་གྱི་མངའ་སྡེ་ཁག་ ༦ ནང་མངའ་སྡེའི་གྲོས་ཚོགས་འཐུས་མིའི་འོས་བསྡུའི་ཁྲོད། ཀཱར་ཎ་ཀྲ་ཁཱ་དང་མི་ཛོ་རམ་མངའ་སྡེ་གཉིས་ཀོང་རེ་སེ་ཚོགས་པར་རྒྱལ་ཁ་ཐོབ་ཡོད་པ་དང་། མཱ་དྷེ་དང་ར་འཇི་སི་ཐན། གུ་ཆུ་ར་ཌི། ཆཱ་དྷེ་སི་གྷར་སོགས་མངའ་སྡེ་ ༤ ཙམ་མང་བྷེ་ཇཱའི་པི་ཚོགས་པར་རྒྱལ་ཁ་ཐོབ་ཡོད་འདུག གཞན། ལྡི་ལི་སོགས་ས་ཁུལ་ཁ་ཤས་ནང་ཨར་ཝུན་ཌི་( Arvind Kejriwal)ལགས་ཀྱིས་སྣེ་ཁྲིད་པའི་མི་སེར་དཀྱུས་མའི་ཚོགས་པར ( Aam Aadmi Party) རྒྱལ་ཁ་ཐོབ་ཡོད་འདུག
ཨན་དྷ་ར་དང་ཨ་སམ་མངའ་སྡེ་གཉིས་ནང་འོས་བསྡུ་གཞི་ནས་མགོ་འཛུགས་བྱེད་འཆར་ཡོད་པ་དང་། མངའ་སྡེ་འདི་གཉིས་ནི་ཆབ་སྲིད་ཚོགས་པ་ཁག་གིས་རྒྱབ་སྐྱོར་འཚོལ་ཡུལ་གལ་ཆེ་ཤོས་ཤིག་ཆགས་ཀྱི་ཡོད་སྟབས། ངོ་བོ་འདྲ་མིན་ཐོག་དྲིལ་བསྒྲགས་ཤུགས་ཆེན་བྱེད་བཞིན་ཡོད་འདུག
རྒྱ་གར་ནི་མི་འབོར་དུང་ཕྱུར་ ༡༢།༥ ལྷག་དང་། མངའ་སྡེ་ ༢༨། དམིགས་བསལ་ས་ཁུལ་ ༧ ཙམ་ཡོད་པའི་འཛམ་གླིང་གི་དམངས་གཙོའི་རྒྱལ་ཁབ་ཆེ་ཤོས་ཤིག་ཡིན་པ་དང་། རྒྱལ་ཁབ་འདིར་གྲོས་ཚོགས་གོང་འོག་གཉིས་ཡོད་པ་ལས་གྲོས་ཚོགས་འོག་མར་འཐུས་མི་ ༥༤༣ དང་། གྲོས་ཚོགས་གོང་མར་འཐུས་མི་ ༢༥༠ བཅས་ཡོད། གྲོས་ཚོགས་འོག་མའི་འཐུས་མི་རྣམས་ལོ་ ༥ རེའི་མཚམས་སུ་རྒྱ་གར་རྒྱལ་ཡོངས་འོས་བསྡུ་ཆེན་མོ་བརྒྱུད་འདེམས་སྒྲུག་བྱེད་ཀྱི་ཡོད་ཅིང་། ད་ལོ སྐབས་༡༦ པའི་རྒྱ་གར་གྱི་གྲོས་ཚོགས་འཐུས་མིའི་འོས་བསྡུ་ཆེན་མོ་དེ་ཟླ་ ༥ པའི་ནང་མགོ་འཛུགས་ཀྱིས་གྲོས་ཚོགས་འཐུས་མི་ཁག་གདམ་རྒྱུ་ཡིན་འདུག གྲོས་ཚོགས་གོང་མའི་འཐུས་མི་ཚོ་མངའ་སྡེའི་གྲོས་ཚོགས་དང་དབུས་གྲོས་ཚོགས་འཐུས་མིས་འོས་འདེམས་བརྒྱུད་འདེམས་སྒྲུག་བྱས་པའི་གཏན་འཇགས་གྲོས་ཚོགས་ཤིག་ཆགས་ཀྱི་ཡོད། གྲོས་ཚོགས་འདིའི་དུས་ཡུན་ལོ་ ༦ དང་ལོ་གཉིས་རེའི་མཚམས་སུ་འཐུས་མི་གསུམ་ཆ་གཉིས་རེ་འཕོ་འགྱུར་བྱེད་ཀྱི་ཡོད་འདུག
