བོད་དོན་ཐའེ་ཝན་རང་བཙན་གྱི་ལག་ཆར་སྤྱད་ན་ཕན་གནོད་ཐེ་ཚོམ་རེད།

ཐའེ་ཝན་སྐུ་ཚབ་དོན་གཅོད་ཟླ་བ་ཚེ་རིང་ལགས་སུ་ཐའེ་ཝན་ནང་གི་བོད་པ་ཚོའི་འཚོ་བའི་གནས་སྟངས་དང་ཐའེ་ཝན་གཞུང་དམངས་ཀྱིས་བོད་དོན་ལ་རྒྱབ་སྐྱོར་གནང་ཕྱོགས། དེ་བཞིན་བོད་པའི་ནང་ཆོས་དར་སྤེལ་གནང་ཕྱོགས་བཅས་ཀྱི་སྐོར་ལ་བཅར་འདྲི་ཞུས།

དྲི་བ། ཐའེ་ཝན་སྐུ་ཚབ་དོན་གཅོད་ཀྱི་ལས་འགན་གཙོ་བོ་གང་ཡིན་པ་དང་། དེ་སྔ་སྐུ་ཉིད་ཀྱིས་ལས་དོན་གཙོ་བོ་གང་དག་བསྒྲུབས་ཡོད།

ལན། ཐའེ་ཝན་སྐུ་ཚབ་དོན་གཅོད་ཀྱི་ལས་འགན་གཙོ་བོ། ཐའེ་ཝན་ནང་ཡོད་པའི་བོད་པའི་སྤྱི་ཚོགས་དང་བོད་ཀྱི་ནང་ཆོས་ལ་དོ་སྣང་བྱེད་མཁན་འབུམ་གཅིག་ལྷག་ཡོད་པ་དེ་དང་། བོད་དོན་རྒྱབ་སྐྱོར་བ་བཅས་སྡེ་ཚན་གསུམ་ལ་ལྟ་རྟོག་བྱེད་རྒྱུ་དེ་རེད། ང་ཐོག་མར་ཕར་འབྱོར་སྐབས། བོད་པ་དང་ཐའེ་ཝན་མི་ཆང་ས་རྒྱག་མཁན་ལ་ཡིག་ཆ་རག་གི་མེད་པའི་དཀའ་ངལ་ཞིག་འདུག གཙོ་བོ་ཐའེ་ཝན་གཞུང་གིས་རྒྱལ་ཁབ་ཀྱི་དབྱེ་བ་བཀར་ཏེ་དུས་ཡུན་ག་ཚོད་ནང་ཡིག་ཆ་སྤྲོད་མིན་གྱི་གཏན་འབེབས་བྱས་པ་དང་། རྒྱལ་ཁབ་མེད་པའི་མིར་དམིགས་བསལ་གཏན་འབེབས་མེད་པའི་ཁྲིམས་ཐོག་གི་དཀའ་ངལ་ཞིག་རེད། ང་མ་སོང་སྔོན་ལ་བཀའ་ཁྲི་ཟམ་གདོང་རིན་པོ་ཆེ་མཆོག་གིས་ཐའེ་ཝན་ནང་གི་བོད་པར་སྐྱབས་བཅོལ་དང་། ཆང་ས་རྒྱག་མཁན་གྱི་དཀའ་ངལ་ཁག་ལ་ཁྲིམས་མཐུན་རོགས་པ་བྱེད་དགོས་ཞེས་བཀའ་གསལ་བོ་གནང་སོང་། ངས་དོན་གཅོད་ཀྱི་ལས་ཀ་བྱས་ཏེ་བདུན་ཕྲག་གཅིག་མ་འགོར་བར་བོད་མི་ཁག་ཅིག་ཡོང་སྟེ་མིག་ཆུ་གཏོང་གི་འདུག ངས་ལས་ཀ་མགོ་འཛུགས་བྱས་པ་ནས་དེའི་ཐོག་ལ་སྐད་ཆ་བཤད་པ་དང་དྲི་བ་དྲིས་ལན་ཁག་ལ་ལན་བརྒྱབ་པ་ཡིན། རྗེས་སུ་སྐྱབས་བཅོལ་ཐོབ་ཡོད་ལ། ཆང་ས་རྒྱག་མཁན་ཚོར་ཡང་ཡིག་ཆ་རག་སྟེ་བོད་པར་ཁྲིམས་ཐོག་ནས་ཡིག་ཆ་བཟོ་ཐུབ་པ་བྱུང་བ་རེད། དེ་བཞིན། བོད་པ་ནང་ཁུལ་གཏམ་འཆལ་རིགས་ལས་ནང་ཁུལ་མ་འཆམ་པའི་གནས་ཚུལ་ཆུང་ཚགས་རེ་ཟུང་ཕན་ཚུན་གཉིས་ཀ་སྐད་བཏང་བ་དང་། ངོ་ཐུག་བཅུག་ཏེ་གཙང་མ་བཟོས་རྗེས་ད་ལྟ་ཡག་པོ་ཆགས་ཡོད།

དྲི་བ། དེང་སྐབས་ཐའེ་ཝན་ནང་ཆོས་ཚོགས་ཁག་གཙོས་བོད་པའི་ཚོགས་པ་སྐྱིད་སྡུག་ག་ཚོད་ཡོད་པ་དང་། ཁྱོན་བསྡོམས་ཐའེ་ཝན་ནང་བོད་མི་ག་ཚོད་འདུག

ལན། ཐའེ་ཝན་ནང་ད་ཆར་གཞུང་ལ་དེབ་སྐྱེལ་བྱས་ཡོད་པའི་ནང་ཆོས་ཀྱི་ཆོས་ཚོགས་ ༢༠༠ ལྷག་དང་། བོད་པའི་བླ་སྤྲུལ་དང་དགེ་བཤེས། དགེ་འདུན་པ་བཅས་ཀྱིས་བཙུགས་པའི་ཆོས་ཚོགས་ ༡༠༠ ཡས་མས་ཤིག དོན་གཅོད་ལས་ཁུངས་དང་འབྲེལ་བ་ཡོད་པའི་ཆོས་ཚོགས་ ༨༠ ལྷག་བཅས་ཡོད་པ་རེད། ཡིན་ཡང་ཁག་ཅིག་རྫུན་མ་རེད། ཆོས་ཚོགས་དེ་དག་སྔོན་མ་ཁ་འཐོར་ཡིན་ཡང་འདས་པའི་ལོ་གཉིས་གོང་ནས་བཟུང་དོན་གཅོད་ལས་ཁུངས་ཀྱི་མགོ་བཟུང་སྟེ་ཐའེ་ཝན་རང་གི་མི་ཡིན་པའི་ནང་པའི་ཆོས་ཚོགས་ཁག་མཉམ་རུབ་ཐོག་༼ནང་ཆོས་མཐུན་ཚོགས༽ ཞེས་པ་ཞིག་བཙུགས་ཡོད་པ་རེད། དེའི་ཚོགས་གཙོ་ས་དགེ་བཀའ་རྙིང་བརྗེ་བོ་བརྒྱབ་ནས་འགྲོ་བཞིན་ཡོད་ལ། ཐའེ་ཝན་གྱི་ནང་ཆོས་སློབ་གཉེར་བར་ལམ་སྟོན་དང་ཆོས་སྤེལ་ཆེད་༼ ཞིབ་འཇུག་ཚོགས་པ༽ཞེས་པ་ཞིག་བཙུགས་ཡོད། དེའི་མིང་ཐོག་ནས་དྲ་ལམ་བརྙན་འཕྲིན་ཞིག་བཙུགས་ཏེ་འགྲོ་བཞིན་པ་རེད། དེ་བཞིན་བོད་རིགས་ཚོགས་པ་དང་། ས་གནས་གཞོན་ནུ། བུད་མེད་ཚོགས་པ། ཆུ་བཞི་སྒང་དྲུག་སོགས་ཡོད་པ་རེད། བོད་སོག་ལས་ཁུངས་ཀྱི་རྒྱབ་སྐྱོར་འོག་བོད་རིགས་ཚོགས་པ་ཞེས་པ་ཞིག་བཙུགས་ཡོད་ཀྱང་། དེའི་ནང་མི་ཁ་ཤས་ལས་ཡོད་པ་མ་རེད། སྤྱིར་བཏང་ཐའེ་ཝན་ནང་བོད་མི་ཉུང་ཉུང་རེད། མི་འབོར་ཞིབ་བཤེར་སྐབས་བོད་མི་ ༡༣༠ ཡས་མས་ཤིག་རེད། སྔོན་མ་བོད་སོག་ལས་ཁུངས་ཀྱི་སློབ་གྲྭ་ཁག་ནས་ཡོང་བསྡད་པའི་བོད་མི་ཁག་ཅིག་ཡོད་ཀྱང་། དེ་དག་རྒྱ་མིའི་ནང་འཐིམ་སྟེ་རྒྱ་མི་ལྟ་བུ་ཆཊ་འདུག བོད་མི་རེ་ཟུང་ཞིག་མི་འབོར་ནང་བསླེབས་མེད་པ་སོགས་ཁྱོན་ཡོངས་ནས་བོད་མི་ ༡༥༠ ཡས་མས་ལས་མི་འདུག

དྲི་བ། ཐའེ་ཝན་ནང་སྐུ་ཚབ་དོན་གཅོད་ཀྱི་ཕྱག་ལས་གནང་བའི་བརྒྱུད་རིམ་ཁྲོད་དཀའ་ངལ་གཙོ་བོ་གང་དག་འཕྲད་ཡོད་དམ།

ལན། ང་ལ་མཚོན་ན་དཀའ་ངལ་གཙོ་བོ་ནང་པ་མིན་ཡང་ཡིན་ལབ་ཏེ་རྫུན་བཤད་མཁན་དང་། ནང་པར་མཚན་སྨད་ཞུ་མཁན་དག་ལ་ཁ་གཏད་གཅོག་དགོས་པ་དེ་དང་། ནང་ཆོས་མཐུན་ཚོགས་བར་གྱི་དཀའ་ངལ་ཆུང་ཚགས་རིཊ་སོཊ་རེད། ཐོག་མར་ང་ཕར་འགྲོ་དུས་༸གོང་ས་མཆོག་གི་སྐུ་ཚབ་རེད་ཅེས་འགྲོ་གི་ཡོད་སྟབས། བོད་ཀྱི་ནང་ཆོས་དང་འབྲེལ་བའི་དཀའ་ངལ་དང་དྲི་བ་ཁག་ཚང་མ་ང་ཚོར་བཏང་ཡོང་གི་འདུག དྲི་བ་གཏོང་མཁན་དེ་དག་ཀྱང་མཐོ་རིམ་སློབ་གྲྭའི་དགེ་རྒན་ཆེན་མོ་དང་སྨན་པ་སོཊ་ཤེས་ཚད་མཐོ་བོ་དེ་འདྲ་རེད། དཀའ་ངལ་གཉིས་པ་ཐའེ་ཝན་དང་རྒྱ་ནག་གཞུང་གཉིས་ཉེ་བོ་རེད། ང་འགྲོ་དུས་གཞུང་དེ་གོ་མིན་ཏང་གི་གཞུང་འཁེལ་ཡོད་སྟབས་བོད་སོག་ལས་ཁུངས་ཏོག་ཙམ་ཚ་བོ་ཆཊ་ཏེ་དཀའ་ངལ་མང་པོ་བཟོ་བཞིན་འདུག ཡིན་ནའང་བོད་སོག་ལས་ཁུངས་ལ་ཞེད་སྣང་གང་ཡང་སྐྱེས་མ་སོང་མོད། ནང་ཆོས་མ་ཤེས་པ་དེས་ཞབས་འདྲེན་བཞག་མི་ཡོང་ངམ་སྙམ་པའི་ཞེད་སྣང་ཏོག་ཙམ་སྐྱེས་སོང་།

དྲི་བ། ཐའེ་ཝན་བོད་སོག་ལས་ཁུངས་ཀྱི་ད་ལྟའི་གནས་སྟངས་གང་འདྲ་ཡིན་པ་དང་། དེང་སྐབས་ཁོང་ཚོས་བཙན་བྱོལ་སྤྱི་ཚོཊ་ནང་དངོས་ཤུཊ་བརྒྱུད་གསུམ་ནས་ལག་པ་རྐྱོང་གི་ཡོད་དམ།

ལན། ང་ཐའེ་ཝན་ནང་ཐོག་མར་འབྱོར་སྐབས་ཀྱི་དོན་གཅོད་ད་ལྟའི་སྐུ་སྒེར་དྲུང་ཆེ་ཚེ་རྒྱམ་ལཊ་རེད། ཁོང་ཐའེ་ཝན་གྱི་དཔོན་རིགས་ཁག་ལ་འབྲེལ་བ་ཡག་པོ་འདུག ང་ཕར་སོང་བའི་ཉིན་གཅིག་གཉིས་རྗེས་ད་ལྟའི་སྲིད་འཛིན་ལས་ཐོཊ་ལ་འགྲོ་མཁན་མཱ་ཡོན་ཅིག་ལ་ཐུག་སོང་། སྐབས་དེར་ངས་མཱ་ཡོན་ཅིག་ལ་ང་རང་༸སྐུ་མདུན་གྱིས་ཐའེ་ཝན་དོན་གཅོད་དུ་བསྐོ་བཞག་བྱས་པ་དང་མཉམ་དུ་སྲིད་འཛིན་མཱ་ཡོན་ཅིག་ལ་རྒྱལ་ཁ་ཐོབ་པར་བོད་མི་མང་གི་ཚབ་བྱས་ཏེ་བཀྲ་ཤིས་བདེ་ལེཊ་ཞུས་བ་ཡིན། དེ་དང་མཉམ་དུ་བཙན་བྱོལ་ནང་བོད་མི་དང་ཚོཊ་པ་མང་པོས་མ་འོངས་པར་ཐའེ་ཝན་དང་བོད་ཀྱི་འབྲེལ་བ་གང་འདྲ་ཆགས་མིན་དང་། བོད་སོག་ལས་ཁུངས་རོ་ལངས་རྒྱག་གི་མེད་དམ་སྙམ་པའི་སེམས་ཁྲལ་འདུག་ཅེས་ཞུས་པ་ཡིན། སྐབས་དེར་སྲིན་འཛིན་གྱིས་དེའི་ཕྱོགས་ལ་སྣང་དོགས་ཡོད་པ་མ་རེད། ང་རང་ཏཱ་ལའི་བླ་མར་གུས་ཞབས་བྱེད་མཁན་ཞིག་ཡིན། ཐའེ་ཝན་དང་བོད་གཉིས་ཀྱི་གནས་བབ་སྡུག་ཏུ་འགྲོ་བ་མ་རེད། བོད་སོག་ལས་ཁུངས་ང་ཚོས་རིམ་པས་སྒོ་རྒྱག་རྒྱུ་ཡིན་ཞེས་ལབ་སོང་། རྗེས་སུ་བོད་སོག་ལས་ཁུངས་ཀྱིས་ལས་འགུལ་མང་པོ་སྤེལ་སོང་ལ། སྔོན་མ་ཤི་བསྡད་མཁན་ཚོ་རོ་ལངས་བརྒྱབ་སྟེ་འདྲ་མི་འདྲ་བྱས་པ་རེ་རེ་བཞིན་ང་ཚོས་ཁ་གཏད་བཅག་པ་ཡིན། གཞུང་འབྲེལ་གྱི་ཚོགས་པ་དེ་འདྲས་ང་ཚོ་ཕྱོགས་གཉིས་ཀ་སྐད་བཏང་སྐབས་ཕན་ཚུན་ཁ་རྩོད་ཤོར་བ་དེ་འདྲ་ཡང་བྱུང་བ་རེད། ང་ཚོའི་ངོས་ནས་བོད་སོག་ལས་ཁུངས་ལ་འབྲེལ་བ་གཏན་ནས་བྱེད་ཀྱི་མིན་པའི་བརྡ་གསལ་བོར་བསྟན་པ་ཡིན། དེའི་རྗེས་བོད་སོག་ལས་ཁུངས་སྒོ་རྒྱག་རྒྱུ་ཁྲིམས་ཐོག་ནས་ཐག་བཅད་དེ། ད་ལྟ་ལྷག་བསྡད་པ་དེ་བོད་སོག་ལས་ཁུངས་ཕར་ལས་ཁུངས་གཞན་དང་ཟླ་སྒྲིལ་སྐབས་ས་མིག་བཟོ་བ་དང་སྒྲིག་གཞི་ཆ་ཚང་གྲོས་ཚོཊ་ཀྱི་ལས་རིམ་ནང་རྙོག་དྲ་ཆེན་པོའི་དབང་གིས་གྲོས་ཚོགས་ཀྱི་གྲོས་གཞིའི་ནང་བསླེབས་ཐུབ་ཀྱི་མེད་པ་དེ་རེད། ད་ལྟ་ཁོང་ཚོས་བཙན་བྱོལ་བོད་པའི་སྤྱི་ཚོགས་ནང་ལག་པ་བརྐྱང་རྒྱུའི་ནུས་པ་ཡོད་པ་མ་རེད། གང་ཡིན་ཟེར་ན། ད་ལོ་བོད་སོག་ལས་ཁུངས་ཀྱི་སྔོན་རྩིས་ནང་སྒོར་དུང་ཕྱུར་གཅིག་དང་བྱེ་བ་བདུན་ཞུས་ཡོད་པ་རེད། བོད་དོན་རྒྱབ་སྐྱོར་གནང་མཁན་གྱི་གྲོས་ཚོགས་འཐུས་མི་ཚོས་བྱེ་བ་ལྔ་ཙམ་བཀག་པ་རེད། དེ་འདྲའི་དབང་གིས་ད་ལོ་བོད་སོག་ལས་ཁུངས་ཀྱི་སྔོན་རྩིས་ཐའེ་སྒོར་དུང་ཕྱུར་ ༡ དང་བྱེ་བ་ ༢ ཙམ་རེད། དངུལ་དེ་དག་ལས་སྒོར་བྱེ་བ་ ༨ ལྷག་ལས་ཁུངས་དེའི་ལས་བྱེད་ ༦༠ ལྷག་གི་གླ་ཕོགས་རེད། གླ་ཕོགས་ཕུད་པའི་ལས་ཁུངས་ཀྱི་འགྲོ་སོང་ཆ་ཚང་སྒོར་བྱེ་བ་ ༣ ཙམ་ལས་ལྷག་ཡོད་པ་མ་རེད། བྱེ་བ་གསུམ་མི་དྲུག་བཅུའི་ལོ་གཅིག་གི་འགྲོ་སོང་ལ་ཡང་ཁག་པོ་ཆགས་ཡོད་སྟབས། བོད་སོག་ལས་ཁུངས་གནས་ཡོད་པ་ཙམ་ལས་བཙན་བྱོལ་སྤྱི་ཚོགས་ནང་དངོས་ཤུགས་བརྒྱུད་གསུམ་ནས་ལས་ཀ་གང་ཡང་བྱེད་ཐབས་ཡོད་པ་མ་རེད།

དྲི་བ། ཐའེ་ཝན་ནང་བོད་དོན་ལ་རྒྱབ་སྐྱོར་ཤུགས་ཆེ་ཤོས་ཚོགས་པ་དང་མི་སྒེར་གང་དག་ཡིན་པ་དང་། ཁོང་ཚོས་བོད་དོན་རྒྱབ་སྐྱོར་གནང་ཕྱོགས་གང་འདྲ་ཡོད་པ་རེད།

ལན། ཐའེ་ཝན་ནང་བོད་དོན་རྒྱབ་སྐྱོར་གནང་མཁན་ཚོགས་པ་གསུམ་ཡོད་པ་རེད། དེའི་ཁྲོད་ཀྱི་བོད་རྒྱ་ཚོགས་པར་མཚོན་ན་དབུ་མའི་ལམ་ལ་རྒྱབ་སྐྱོར་གནང་མཁན་རེད། སློབ་ཕྲུག་ཚོགས་པར་མཚོན་ན་ལངས་ཕྱོགས་རང་བཙན་ཡིན་ཡང་། བོད་མིའི་སྒྲིག་འཛུཊ་ཀྱི་སྲིད་བྱུས་དབུ་མའི་ལམ་ལ་རྒྱབ་སྐྱོར་དང་བརྩི་བཀུར་ཡོད་པ་མ་ཟད། བོད་མིའི་མངོན་འདོད་ལ་རྒྱབ་སྐྱོར་གནང་གི་ཡོད་པ་རེད། བོད་ཀྱི་གྲོགས་པོ་ཚོགས་པར་མཚོན་ན་ཐའེ་ཝན་རང་བཙན་དགོས་ཞེས་ལབ་མཁན་གྲས་རེད། དེ་བཞིན། བོད་མིའི་སྒྲིག་འཛུགས་ཀྱིས་རང་བཙན་རྩོད་དགོས་པ་རེད། རང་བཙན་ལ་རྒྱབ་སྐྱོར་གནང་མཁན་ཁོ་ན་ཙམ་མིན་པར། བོད་མིའི་སྒྲིག་འཛུགས་ཀྱི་བྱེད་སྟངས་འགྲིག་གི་མི་འདུག་ཟེར་མཁན་གྲས་རེད། ཐ་ན་ཁོང་ཚོའི་ཁྲོད་ཀྱི་ཁག་ཅིག་གིས་ཏཱ་ལའི་བླ་མའི་གནས་སྟངས་དེ་འདྲ་ཞིག་བོད་པའི་སྤྱི་ཚོགས་ནང་གནས་པ་ཡིན་ན། བོད་ལ་དམངས་གཙོ་ཚད་ལྡན་ཞིག་ཡོང་ཁག་པོ་ཡིན་པ་དང་། བོད་མིའི་སྒྲིག་འཛུཊ་ཀྱི་བྱེད་སྟངས་འགྲིག་གི་མི་འདུག་ཅེས་སྐྱོན་བརྗོད་བྱེད་ཀྱི་ཡོད་པ་མ་ཟད། ཐའེ་ཝན་གྱི་ནང་སྲིད་ལའང་ཐེ་གཏོགས་བྱས་ཏེ་ག་དུས་ཡིན་ཡང་སྐད་འབོད་སྐབས་བོད་རང་བཙན་དགོས། མཱ་ཡོན་ཅིག་མར་ཕབ་དགོས། ཞེས་སོགས་སྐད་རྒྱག་གི་རེད། མཱ་ཡོན་ཅིག་མར་འབབ་མིན་བོད་མིར་འབྲེལ་བ་ཡོད་པ་མ་རེད། གང་ལྟར། སྐབས་རེར་བོད་ཀྱི་གནས་ཚུལ་དེ་ཐའེ་ཝན་རང་བཙན་གྱི་ལག་ཆར་བེད་སྤྱོད་བྱེད་ཀྱི་ཡོད་པའི་གནས་སྟངས་ཆཊ་ཏེ། ང་ཚོར་ག་ཚོད་ཕན་གྱི་ཡོད་མེད་ཐེ་ཚོམ་སྐྱེ་དགོས་པ་ཞིག་རེད། མི་སྒེར་གྱི་ཐོག་ནས་དགེ་རྒན་ཆེན་མོ་ཙིན་ཅེན་ཡཱན་ལ་མཚོན་ན། ཐའེ་ཝན་རང་བཙན་ལ་ཤུགས་རྒྱག་མཁན་རེད། འོན་ཀྱང་། ཁོས་རྒྱ་ནག་དམངས་གཙོ་ཚོགས་པ་དང་བོད་དོན་ལ་རྒྱབ་སྐྱོར་བྱས་ཏེ། ཁོ་རང་གི་ལྟ་བ་དེ་ང་ཚོའི་སྒང་ལ་འཁུར་མི་ཡོང་བར་ལས་འགུལ་དང་བགྲོ་གླེང་། ཚོགས་འདུ་སོགས་ལ་ཞུཊ་ཀྱི་ཡོད་པ་རེད། སྔར་ལོ་ཁོང་གིས་སློབ་ཕྲུག་ ༨ ལྷག་འཁྲིད་དེ་ས་རཱ་མཐོ་སློབ་དང་མཉམ་དུ་འབྲེལ་བ་བྱས་ཡོད་པ་རེད། ཁོ་རང་སྔ་ཕྱི་བར་གསུམ་དུ་སོ་སོའི་ལྟ་བ་དང་ཁེ་ཕན་ཆེད་མིན་པར་བོད་པར་རྒྱབ་སྐྱོར་གནང་མཁན་དེ་འདྲ་རེད། དགེ་རྒན་ཆེན་མོ་སུའུ་ཅཱ་ཧོན་ལ་མཚོན་ན་༼བཙན་བྱོལ་ནང་གི་མང་གཙོ༽ཞེས་པའི་དེབ་དེ་བརྩམས་པ་རེད། ད་ལོའི་སྐུའི་འཁྲུངས་སྐར་དུས་ཆེན་ཉིན་༼བཙན་བྱོལ་ནང་གི་མང་གཙོའི་འགྱུར་འགྲོས༽ཞེས་པའི་དེབ་ཅིག་བྲིས་ཡོད་པ་རེད།

དྲི་བ། ཐའེ་ཝན་ནང་ཆོས་རྒྱུད་དང་ཆོས་ཚོགས་སོགས་ཀྱི་དཀའ་རྙོག་ཅིག་འཕྲད་ཀྱི་འདུག དཀའ་ངལ་དེ་དག་གི་འབྱུང་གཞི་གཙོ་བོ་ཅི་ཞིག་རེད་དམ།

ལན། བོད་པ་དང་རྒྱ་མིའི་བླ་མ་སྤྲུལ་སྐུ་རྫུན་མ་དེ་འདྲ་ཡོང་གི་འདུག དེ་དག་གིས་སྐབས་རེར་དཀའ་ངལ་ཆེན་པོ་བཟོ་བཞིན་འདུག དེའི་ཁྲོད་ཀྱི་གཅིག་དེ་རྒྱ་མིའི་ནང་པ་ཞིག་རྒྱའི་དགོན་པ་ཞིག་ཏུ་ལོ་ ༦ ལྷག་གྲྭ་བ་བྱས། ཕྱིས་སུ་བླ་མ་དང་མ་མཐུན་པར་ཕྱིར་ཐོན་ཏེ་རང་ཁྱིམ་དུ་ཉིན་ ༡༨ བསྡད་རྗེས་སངས་རྒྱས་རྡོ་རྗེ་གདན་དུ་ཉིན་མཚན་དྲུག་བཞུགས་ནས་སངས་རྒྱས་པ་དེར་དཔེར་བྱས་ནས། ཁོ་ཉིན་བཅོ་བརྒྱད་རིང་ནང་དུ་བསྡད་དེ་སངས་རྒྱས་པ་ཡིན་ཞེས་ཆོས་ཚོགས་ཤིག་བཙུགས་ཡོད་པ་རེད། ཁོས་བོད་ཀྱི་ནང་ཆོས་རྫུན་མ་རེད། བོད་ཀྱི་བླ་མ་ཚོས་སྐྱེས་དམན་ལོངས་སུ་སྤྱོད་ཀྱི་ཡོད་པ་རེད་ཅེས་ཡིག་ཆ་བྱེ་བ་མང་པོ་བཀྲམས། སྐུ་མདུན་ཆིབས་བསྒྱུར་སྐབས་ངོ་རྒོལ་གནང་བ་མ་ཟད། ཐའེ་ཝན་གྱི་ཚགས་པར་ཤིག་གི་མདུན་ཤོག་ཕྱེད་ཀ་ཉོས་ཏེ་ཚགས་པར་ཆེན་པོ་བཞིའི་ནང་། ༸སྐུ་མདུན་ཐའེ་ཝན་དུ་སྒོར་མོ་བཟོ་རུ་ཡོང་བ་རེད། ཐའེ་ཝན་གྱི་དངུལ་དུང་ཕྱུར་མང་པོ་བསྡུས་ཏེ་ཕྱིན་སོང་ཞེས་གསལ་བསྒྲགས་སྦེལ་བ་རེད། གནས་ཚུལ་དེ་དངོས་ཡོད་ཆགས་རྒྱུའི་ཉེན་ཁ་ཡོད་སྟབས་ཁྲིམས་གཏུག་བྱས་པ་རེད། ང་ཚོས་ཕར་ཁྲིམས་གཅིག་གཏུག་སྐབས་ཚུར་ཁྲིམས་གསུམ་བཞི་གཏུག་པ་རེད། མཐའ་མར་ང་ཚོར་རྒྱལ་ཁ་ཐོབ་པ་རེད། དེ་ཡང་གཙོ་བོ་སྐབས་དེར་སྐུ་མདུན་གྱིས་མ་འོངས་ལུང་བསྟན་རང་གི་ཐོག ཕར་ཆིབས་བསྒྱུར་སྐབས་ད་རེབ་ང་ཚོས་ཐའེ་ཝན་མི་མང་ལ་རོགས་པ་རང་ཡིན་པ་ལས། ང་ཚོས་རྒྱུ་དངོས་སྣེ་གཅིག་ཀྱང་ཚུར་ལེན་རྒྱུ་མིན། ཞེས་གསུངས་ཏེ་ཕར་འགྲོ་དུས་འགྲོ་སོང་དོན་གཅོད་ཀྱིས་གཏོང་དགོས་པ་དང་། གལ་སྲིད་འདང་གི་མེད་ཚེ་ཡིག་ཚང་རང་ནས་གཏོང་གི་ཡིན་ཞེས་བཀའ་གསལ་བོ་གནང་པ་ལྟར། འགྲོ་སོང་ཆ་ཚང་དོན་གཅོད་ལས་ཁུངས་ཀྱིས་བཏང་བ་དང་། སྐུ་མདུན་ཕར་ཕེབས་སྐབས་གནོད་འཚེ་ཕོག་ཡུལ་དུ་ཨ་སྒོར་ཁྲི་ ༥ གསོལ་རས་གནང་བ་རེད། དངུལ་དེ་ང་ཚོས་ཕྱི་རྒྱལ་བརྒྱུད་ནས་ཚུར་བཏང་བ་བཅས་ང་དཔང་པོ་བྱས་ཏེ་གནས་ཚུལ་ཆ་ཚང་དང་རྩིས་ཁྲ་ཆ་ཚང་ཕུལ་རྗེས་ཁྲིམས་ཐོག་ནས་ང་ཚོར་རྒྱལ་ཁ་ཐོབ་སྟེ། སངས་རྒྱས་ཡིན་ལབ་མཁན་ཁོ་ཉིན་ ༣༥ རིང་བཙོན་འཇུག་བྱས་པ་རེད། གཞན། ཁོ་རྡོ་རྗེ་འཆང་སྐུ་ཕྲེང་གསུམ་པ་ཡིན་ཟེར་མཁན་ཞིག་གིས། རྡོ་རྗེ་འཆང་དེ་སངས་རྒྱས་ཤཱཀྱ་ཐུབ་པའི་དབུ་བླ་ཡིན་པ་དང་། ཁོ་འཛམ་གླིང་གི་ནང་ཆོས་ཀྱི་དབུ་ཁྲིད་ཡིན་ཞེས་ཁོ་ཚོ་ཁག་ཅིག་གིས་རྡོ་རྗེ་འཆང་དང་ཡེ་ཤེས་ཡོན་ཏན་ཞེས་བོད་མིང་བཏགས་ཏེ། ཁོ་ཚོ་བོད་པའི་བླ་མ་ཡིན་ཞེས་གང་ས་གང་དུ་སྐྱག་རྫུན་བཤད་བསྡད་ཡོད་པ་མ་ཟད། ས་སྐྱ་གོང་མ་གཙོས་བླ་ཆེན་ ༦༠ ལྷག་གིས་ངོས་འཛིན་བྱས་ཡོད་ཅེས་བཤད་དེ་ཁོའི་པར་དཀྱིལ་དུ་བཞག བོད་ཀྱི་བླ་ཆེན་ཁག་གི་པར་ཆུང་ཆུང་མཐའ་རུ་བཞག་ནས་ཐའེ་སྒོར་ས་ཡ་བཞིའི་འགྲོ་སོང་བཏང་སྟེ་ཚགས་པར་གྱི་མདུན་ཤོག་ཏུ་བཞག གོང་མ་རིན་པོ་ཆེས་ང་ཚོ་ངོས་འཛིན་བྱེད་པར་ཐུགས་རྗེ་ཆེ་ཞེས་སོགས་ཡིག་ཆ་སྣ་ཚོགས་ཆོས་ཚོགས་ཁག་ལ་བཀྲམས་འདུག དངོས་ནས་ཡིག་ཆ་བཟོ་མཁན་གོང་མ་རིན་པོ་ཆེའི་འོག་གི་གྲྭ་བ་ཞིག་ལ་སྐྱག་རྫུན་བཤད་པ་དང་སྒོར་མོ་སྤྲད་དེ་ཡིག་ཆ་རྫུན་མ་བཟོ་བཅུག་འདུག ཕྱིས་སུ་ང་ཚོས་དོན་གཅོད་ཀྱི་དྲ་རྒྱའི་ཐོག་ཁོ་རྫུན་མ་ཡིན་པའི་སྐོར་སོགས་བྲིས་ཏེ་སློབ་མ་གང་འཚམ་ཉུང་དུ་ཡོད་འདུག ཐའེ་ཝན་ནང་བོད་ཀྱི་ནང་ཆོས་སྐུ་ཚབ་དོན་གཅོད་ལས་ཁུངས་བརྩི་གི་ཡོད་པ་རེད། དོན་གཅོད་ལས་ཁུངས་ཀྱི་དྲ་རྒྱའི་སྟེང་ཁོ་རྫུན་མ་རེད་ཅེས་ལབ་ཡོད་སྟབས། ཚང་མས་དོན་གཅོད་ལས་ཁུངས་ཀྱི་གནས་ཚུལ་ལུང་དྲངས་ཏེ་ཁོ་རྫུན་མ་རེད་ཅེས་བཤད་དེ་ཁྲིམས་ ༢༠༠ ལྷག་གཏུག་ཏེ་མཐའ་མར་ཁོ་ཚོ་ཕམ་ཏེ། ཁྲིམས་ཐོག་ནས་ཁོ་རང་རྫུན་མ་ཡིན་པ་དག་སེལ་བྱེད་ཐུབ་པ་བྱུང་བ་རེད།

དྲི་བ། ད་ལྟའི་ཐའེ་ཝན་གྱི་སྲིད་འཛིན་མཱ་ཡོན་ཅིག་གིས་བོད་དང་བོད་དོན་ཐོག་ལྟ་སྟངས་གང་འདྲ་ཡོད་པ་དང་། ༧གོང་ས་མཆོག་ཐའེ་ཝན་ནང་གདན་འདྲེན་ཞུ་ཐུབ་པར་རེ་བ་མཐོང་གི་འདུག་གམ།

ལན། སྲིད་འཛིན་མཱ་ཡོན་ཅིག་ལ་མཚོན་ན། ཁོང་རང་ཉིད་ཀྱི་ངོས་ནས་སྐུ་མདུན་ལ་གུས་ཞབས་བྱེད་མཁན་ཞིག་ཡིན་ཟེར་གྱི་འདུག སྔོན་མ་སྐུ་མདུན་ཐའེ་ཝན་ནང་ཆིབས་བསྒྱུར་གནང་སྐབས་ཁོང་ཐའེ་པེ་གྲོང་ཁྱེར་གྱི་སྤྱི་ཁྱབ་རེད། སྐབས་དེར་ཉིན་རྟག་པར་སྐུ་མདུན་ལ་ཤིང་ཏོག་དང་མེ་ཏོག་སྐྱེལ་མཁན་དེ་འདྲ་རེད། ད་ལྟ་ཁོ་རང་སྲིད་འཛིན་ཆགས་པ་རེད། སྲིད་འཛིན་ཆགས་རྗེས་མི་ཚང་མ་འགྱུར་འགྲོ་ཡི་ཡོད་པ་རེད་ལ། ཁོས་ཆབ་སྲིད་དང་སོ་སོའི་ཁེ་ཕན་ཨང་དང་པོར་བལྟ་དགོས་སྟབས། སྐུ་མདུན་ཆིབས་བསྒྱུར་གནང་རྒྱུ་གཙོས་པའི་ལས་དོན་ཁག་གི་ཐད་ང་ལ་དཀའ་ངལ་འདུག་རྐྱང་རྐྱང་ལབ་སྡོད་ཀྱི་འདུག དེ་མ་གཏོཊ་བོད་པར་མ་དགའ་བ་དང་སྡང་ཟུག་བྱེད་པ་དེ་འདྲ་མ་རེད། ༸གོང་ས་མཆོག་ཐའེ་ཝན་ནང་ཕེབས་རྒྱུའི་སྐོར་ལ་དཀའ་ངལ་གཙོ་བོ། ད་ལྟ་ཐའེ་ཝན་དང་རྒྱ་ནག་གཉིས་འབྲེལ་བ་ཐོག་མ་བཙུགས་ཏེ་ཚོང་འབྲེལ་སོགས་ཀྱི་གྲོས་མོལ་དེ་རྙོག་དྲའི་སྒང་བསྡད་ཡོད་པ་རེད། ཐའེ་ཝན་གཞུང་གི་ངོས་ནས་དོགས་པ་གཙོ་བོ། སྐུ་མདུན་ཆིབས་བསྒྱུར་གནང་བ་ཡིན་ན་གྲོས་མོལ་གྱི་སྒང་ནས་དཀའ་ངལ་ཞིག་འཕྲད་མི་ཡོང་ངམ་དྲན་གྱི་ཡོད་ས་རེད། ང་ཚོས་སྐུ་མདུན་ཐའེ་ཝན་ནང་གདན་ཞུའི་སྐོར་ཞུས་སྐབས། སྲིད་འཛིན་ལས་ཁུངས་ཀྱིས་ང་ཚོར་ལན་འབྱོར་ཏེ་རྒྱ་ནག་དང་འབྲེལ་བ་བྱེད་བསྡད་པ་དེའི་ཐོག་ཐའེ་ཝན་དང་གྱོང་མི་རག་ཆེད་ང་ཚོ་སྐུ་མདུན་ལ་གུས་ཞབས་དང་དགའ་བསུ་ཡོད། འོན་ཀྱང་། གནས་སྐབས་མ་ཕེབས་རོཊ་ཞེས་བཤད་བསྡད་ཡོད་པ་རེད། ད་ལྟ་ཡོད་བཞིན་པའི་རྒྱ་ནག་དང་ཐའེ་ཝན་གཉིས་ཀྱི་འབྲེལ་ལམ་དེ་ཚོང་འབྲེལ་གཅིག་པུ་མིན་པར་གནད་འགག་མང་པོ་ཞིག་ལ་ཐུག་ཡོད་པ་རེད། དེའི་ཐོག་སྐུ་མདུན་གྱི་དགོངས་པ་ཡང་ཐའེ་ཝན་མི་མང་ལ་དཀའ་ངལ་མི་བཟོ་རྒྱུའི་དགོངས་པ་ཨང་དང་པོ་བཞེས་བསྡད་ཀྱི་འདུག དེའི་དབང་གིས་ང་ཚོས་ཨུ་ཚུགས་རྒྱག་གི་ཡོད་པ་མ་རེད། ང་ཚོས་ཨུ་ཚུགས་བརྒྱབ་ཏེ་ཡིན་གཅིག་མིན་གཅིག་གདན་འདྲེན་ཞུ་དགོས་ལབ་པ་ཡིན་ན་ཐའེ་ཝན་གཞུང་གིས་འགོག་ཐབས་ཡོད་པ་མ་རེད། ཡིན་ནའང་ང་ཚོས་ཨུ་ཚུགས་རྒྱག་གི་ཡོད་པ་མ་རེད།

དྲི་བ། ཐའེ་ཝན་མི་མང་གི་ངོས་ནས་བོད་དང་བོད་དོན་ཐོག་ལྟ་སྟངས་དང་རྒྱབ་སྐྱོར་གང་འདྲ་ཡོད་དམ།

ལན། སྤྱིར་བཏང་ཐའེ་ཝན་མི་མང་དེ་ཆོས་དད་ཆེན་པོ་དང་། བོད་པའི་བླ་མ་གྲྭ་བ་དང་། ལྷག་པར་དུ་༧གོང་ས་མཆོག་ལ་དད་གུས་ཆེན་པོ་རེད། བོད་པའི་བླ་མ་གྲྭ་བ་ཚོ་ཆོས་ཀྱི་ཤེས་ཡོན་གཏིང་ཟབ་པོ་ཡོད་མཁན་དང་ཉམས་ལེན་གནང་མཁན་དེ་འདྲ་ཞིག་ལ་ངོས་འཛིན་གནང་གི་ཡོད་པ་རེད། ཡིན་ནའང་ཆབ་སྲིད་ཀྱི་ཐད་ནས་ཁོང་ཚོ་ཞེད་ཐག་ཆོད་འགྲོ་བ་རེད། ཐའེ་ཝན་སྔོན་མ་ཉི་ཧོང་སོགས་རྒྱལ་ཁབ་མང་པོས་དབང་བསྒྱུར་བྱས་བསྡད་སྟབས། སྤྱི་ཚོགས་ཀྱི་གཤིས་ཀའི་ནང་མི་མང་ཆབ་སྲིད་ནང་ཞུགས་པ་ཡིན་ན་གྱོང་རག་གི་རེད་བསམ་པ་དང་། ཆབ་སྲིད་ནང་ལག་པ་བརྐྱང་པར་སྤྱི་ཡོངས་ནས་འཚེར་སྣང་ཡོད་པ་དེ་འདྲ་རེད། ཡིན་ནའང་ཐའེ་ཝན་ནང་བོད་དོན་ལ་རྒྱབ་སྐྱོར་བྱེད་མཁན་གྱི་ཚོགས་པ་དང་མི་སྒེར་གང་འཚམ་ཡོད་པ་རེད། རྒྱ་ནག་ལ་ཞེན་ཁོག་ཡོད་མཁན་ཚོས་ཀྱང་སྐུ་མདུན་གྱི་དབུ་མའི་ལམ་ལ་ངོ་རྒོལ་གནང་མཁན་ད་བར་གཅིག་ཀྱང་མཐོང་མ་མྱོང་།

དྲི་བ། ཐའེ་ཝན་དང་རྒྱ་ནག་གི་འབྲེལ་ལམ་གང་འདྲ་ཆཊ་ཡོད་མེད་དང་། གནས་སྟངས་དེས་བོད་དོན་ལ་ཤུཊ་རྐྱེན་ཐེབས་ཀྱི་འདུག་གམ།

ལན། ཐའེ་ཝན་དང་རྒྱ་ནག་གཉིས་ཀྱི་ཚོང་ལས་ཐོག་འབྲེལ་ལམ་འགྲོ་བསྡད་ཡོད་པ་རེད་ལ། དེའི་ཐོག་མ་འོངས་པར་ཕན་ཚུན་བར་ལས་ཁུངས་འཛུགས་འཆར་རེད། འཛམ་གླིང་གི་དཔལ་འབྱོར་མུ་མཐུད་ཡར་རྒྱས་འགྲོ་མ་ཐུབ་པ་ཡིན་ན། ཐའེ་ཝན་གྱི་དཔལ་འབྱོར་མང་ཆེ་ཤོས་རྒྱ་ནག་ལ་བརྟེན་དགོས་མིན་འགྲོ་བསམ་བསམ་ཆགས་ཡོད་པ་རེད། འབྲེལ་ལམ་དེས་བོད་ལ་ཕན་གནོད་གཉིས་ཀ་ཡོད་པ་རེད། གནོད་པའི་ཕྱོགས་ནས་རྒྱ་ནག་གི་ཤུགས་རྐྱེན་ཐའེ་ཝན་ནང་ཤུགས་ཆེ་རུ་ཕྱིན་པ་ཡིན་ན། བོད་དོན་ལ་རྒྱབ་སྐྱོར་བྱེད་མཁན་ཉུང་དུ་འགྲོ་སྲིད་པ་རེད། དེའི་མངོན་རྟགས་ད་ལྟ་ནས་ཡོང་གི་འདུག ཕྱོགས་གཞན་ཞིག་ནས་ཕྱོགས་གཉིས་ཀྱི་འབྲེལ་ལམ་བཙུགས་རྗེས། ཐའེ་ཝན་ནང་ཉིན་རེར་ཆ་སྙོམས་རྒྱ་མི་ཡུལ་སྐོར་བ་ ༤༠༠༠ ལྷག་ཡོང་གི་ཡོད་པ་རེད། དེ་དག་གི་ལག་ཏུ་ཐའེ་ཝན་གྱི་དེབ་མང་པོ་འགྲོ་གི་ཡོད་པ་རེད་ལ། ང་ཚོས་གོ་སྐབས་འདི་དང་བསྟུན་ཏེ་གངས་ལྗོངས་དཔར་བསྐྲུན་ཁང་གསར་འཛུགས་ཀྱིས་དེབ་ ༡༤ ལྷག་བཏོན་ཡོད། དེབ་དང་ཡིག་ཆ་འདྲ་མིན་ཐད་ཀར་རྒྱ་ནག་ནས་ཡོང་བའི་རྒྱ་རིགས་ཚོར་འགྲེམ་སྤེལ་བྱེད་ཀྱི་ཡོད། དེའི་ཐོག་ནས་གོ་སྐབས་ཆེན་པོ་ཞིག་རག་ཡོད་པ་རེད། ཐའེ་ཝན་མི་མང་གིས་རྒྱ་ནག་ལ་འབྲེལ་བ་བྱེད་བཞིན་དུ་རྒྱ་ནག་དང་སེམས་ཐག་རིང་དུ་འགྲོ་གི་འདུག བཟང་ངན་གཉིས་ཀ་ཡོང་བའི་ནང་ནས། ང་རང་གི་བསམ་ན་བཟང་དེ་མང་བ་མིན་འགྲོ་བསམ་བསམ་འདུག

གསར་འགོད་པ། དོན་གོ

༼ བོད་ཀྱི་དུས་བབ་ཚགས་པར་ལས་འདིར་བཀོད། ༽