གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། བརྒྱད།

ང་རང་གིས་རླངས་འཁོར་དཀྲུས་ཚར་ནས་ཕྱིར་ནང་དུ་འབྱོར་དུས། མཛའ་མོས་ཐབ་ཚང་དུ་དགོང་ཟས་ཤིག་བཟོ་བཞིན་འདུག ཐར་མ་མཚོ་དང་མོ་རང་གི་མ་རྒན་མ་གཉིས་མཐོང་སར་མི་འདུག གཟོད་ནས་བུ་མོ་མོ་རང་གི་ཨ་ནེ་ཡིས་ཁྲིད་དེ་ཕྱི་ལ་སོང་བ་ཤེས་ཀྱི་འདུག ང་རང་གིས་གྲོགས་པོ་རྡོར་རྒྱལ་གྱི་གནས་ཚུལ་གང་འདྲ་ཡིན་ནམ་སྙམ་བཞིན་དུ་ཁ་པར་ཞིག་བཏང་བ་ཡིན། ད་ལྟ་ཁོ་རང་གིས་གནས་ཚུལ་འགྱུར་ལྡོག་གང་ཡང་བྱུང་མི་འདུག་པ་དང་། ཁྲིམས་རྩོད་པ་ཁ་ཤས་ཤིག་ལ་ཐུགས་འཕྲད་བྱས་ཀྱང་། སུ་གང་གིས་ཀྱང་གྲུབ་འབྲས་གང་འདྲ་བྱུང་མིན་གྱི་སྐོར་ནས་སུ་ལ་ཡང་བཤད་ཚོད་ཅིག་མི་འདུག་ཟེར། གང་ལྟར། ཁྲིམས་རྩོད་པ་ཞིག་ཁྲིད་རྩིས་འདུག

ངས་མཛའ་མོ་ལ། དེ་རིང་ནས་བཟུང་ཟླ་ངོ་གཅིག་གི་རིང་ལ་བུ་མོ་ལ་དཀར་ཟས་མ་གཏོགས་དམར་ཟས་མ་སྟེར་རོགས། ཁྱེད་རང་གི་ཟ་མིན་དེ་ནི་ཁྱེད་རང་གི་འདོད་པ་རེད། བུ་མོ་ལ་སྟེར་མིན་དེ་ཡང་ཁྱེད་རང་གིས་འདོད་པ་ཡིན་ན་ཡང་། ང་རང་གིས་འབོད་སྐུལ་ཞུས་པ་དེར་ཉན་འཇོག་བྱེད་མིན་དེ་ཡང་ཁྱེད་རང་གིས་བསམ་བློ་གཏོང་དགོས་པ་ཞིག་རེད་ཅེས་བཤད་དུས། མོ་རང་གིས་སྟོན་པའི་འཁྲུངས་རབས་ཀྱི་ཟླ་དུས་དེ་ལ་སླེབས་ཡོད་པ་རེད་དམ་ཟེར།

ངས་རེད་ཅེས་ལན་བཏབས་དུས་སུ། མོ་རང་གིས་ཀྱང་འགྲིག་གི་རེད་ཅེས་བརྡ་ལན་དུ་མགོ་བོ་ནང་དུ་ཡང་ཡང་བཀུགས། ལྷག་པར་དུ་ཟླ་ངོ་འདི་གཅིག་པོའི་རིང་དུ་ང་རང་རྒྱལ་ཁབ་འདི་ལ་སླེབས་པ་ནས་བཟུང་། ས་ག་ཟླ་བའི་ཟླ་ངོ་གཅིག་གི་རིང་དེར་མོ་དང་ལྷན་དུ་འཁྲིགས་པ་སྤྱོད་ཀྱི་མེད། དེ་ནི་མོ་རང་ལ་མཚོན་ན་ཧ་ལས་དགོས་པའི་དོན་དག་ཞིག་ཐོག་མར་ཆགས་པ་རེད། ད་ནི་རྒྱུན་ལྡན་ལྟ་བུར་གྱུར་ཡོད་ལ། ས་ག་ཟླ་བ་ལ་ངེད་གཉིས་ཀྱིས་འཁྲིག་སྤྱོད་མེད་པའི་ཟླ་ངོ་གཅིག་དེ་ཡིན་པར་མོ་རང་གི་སེམས་སུ་དྲན་ངེས་ཡིན།

ལྷག་པར་དུ། ད་སྐབས་ཡིན་ན། མོ་རང་ཡང་ཕྲུ་གུ་ལུས་ལ་ཡོད་པའི་སྤྲུམ་མ་ཞིག་ཆགས་ནས་ཟླ་ངོ་དྲུག་ལྷག་འགྲོ་བཞིན་ཡོད་དུས། དངོས་ནས་ཕར་བལྟས་ཚོད་ཀྱི་སྐྱེ་ལ་ཁད་ཅིག་ལོས་ཡིན་སྙམ་པའི་སྣང་བ་ཡང་སྟེར་ངེས་ཡིན། གང་ལྟར། ད་ལོའི་ས་ག་ཟླ་བ་ནི་མོ་རང་ལ་དེ་འདྲའི་དཀའ་ངལ་གང་ཡང་མེད་ངེས་ཡིན། དེ་མིན་ལོ་སྔོན་མའི་ནང་དུ་ངེད་གཉིས་ལྷན་དུ་མི་ཉལ་བར་བཤད་དུས་སུ། མོ་རང་གིས་སེམས་ནང་དུ་དཀའ་ངལ་ཞིག་འཕྲད་ཡོད་པ་རེད། དངོས་ནས་བཤད་ན་ངེད་གཉིས་ཀྱི་ནང་ནས་འདོད་ཆགས་ང་ཆེ་བར་བཤད་ཆོག་པ་ཡིན། འོན་ཀྱང་། ངས་རང་གི་བོད་ཀྱི་ནང་བའི་ཆོས་ལུགས་ཀྱི་གུས་སྲོལ་ཁ་ཤས་ཤིག་ལ་རང་ངོས་ནས་ཧུར་ཐག་བྱེད་ཀྱིན་པའི་ཁུལ་ཞིག་གིས། ས་ག་ཟླ་བ་ནི་འཁྲིགས་པ་མི་སྤྱོད་པའི་ཟླ་བ་གཅིག་ལ་ངེས་འཛིན་བྱེད་ཀྱི་ཡོད་ལ། གང་ཐུབ་ཅི་ཐུབ་ཀྱིས་དགེ་བའི་ལས་སུ་གཞོལ་བར་འབད་འབུངས་ཀྱང་བྱེད་ཁུལ་ཡིན། རང་གི་ནང་མི་དག་ལ་ཡང་དེ་ལྟར་དྲན་སྐུལ་བྱེད་ཀྱི་ཡོད།

གཅིག་བྱས་ན་ང་རང་གིས་གླེན་རྟགས་ཤིག་ཡིན་ཡང་སྲིད། འོན་ཀྱང་། ང་རང་ནི་སྐྱེ་བ་སྔ་ཕྱིར་ཡིད་ཆེས་ཡོད་པའི་བོད་མི་ཞིག་ཡིན་དུས། ཁྲེལ་དང་ངོ་ཚ། ཕྱི་ཐག་དང་ཡ་རབས་སྲོལ་བཟང་ལ་ཅུང་ཙམ་གུས་པར་འབད་འབུངས་བྱེད་པར་ཕྱོགས་པའི་འཁྲིས་སུ་འཚུད་ཡོད་པར་བཤད་ཆོག་པ་ཡིན། དེ་ལྟ་བུའི་བསམ་ཚུལ་དང་། མི་རིགས་ཤིག་གི་སེམས་ཚོར་འདིས་རང་ཉིད་ལ་དུས་རྟག་དུ་དཀྲུས་ཀྱང་མི་དག་པའི་འགྱོད་སེམས། བཤད་ཀྱང་མི་རྫོགས་པའི་སེམས་ཁོང་གི་ན་ཟུག་མོད་པོ་ཞིག་ཡོད། འདི་ནི་རང་གིས་དྭང་དུ་ལེན་དགོས་པ་ནི། རྒྱུ་འབྲས་ཀྱི་མི་རིགས་ཤིག་དུ་སྐྱེ་བ་དེ་ཡིས་ཡིན་སྲིད་ཀྱང་། རྒྱུ་འབྲས་ཀྱི་མི་རིགས་འདི་མུ་མཐུད་དུ་ལོག་ལམ། ཉེན་འཕྲེང་གི་ལམ། མི་རིགས་འཇིགས་པའི་གཡང་། འདི་དག་ལ་མི་ལྷུང་ཆེད་དུ། ངའི་རང་གི་ཕྱི་ནང་གསང་གསུམ་གྱི་འཚོ་བ་དང་ལས་ཀ གཞན་ཡུལ་འདི་ན་རང་རེའི་སྤུན་ཟླ་དག་གི་ག་རེ་འཚོལ་གྱི་ཡོད་མེད་དང་། ག་རེ་བྱེད་ཀྱི་ཡོད་མེད་ཁག་དྲང་མོར་སྨྲ་བར་སེམས་གཏིང་ནས་མོས་པ་ཆེན་པོ་བྱུང་བ་འདི་ཡང་། རང་ཉིད་ཀྱིས་གང་ཞིག་ལ་ནག་ཉེས་བཟོས་པ་དེར་འགྱོད་གཤེགས་ཀྱི་ཚུལ་དུ་བཤད་ཆོག་པ་ཡིན།

མི་རིགས་གང་ཞིག་གིས་རང་ཉིད་མི་རིགས་དེར་འགྱུར་བར་འབད་བརྩོད་བྱེད་དགོས་པ་ཡིན་ན་ནི། ཐོག་མར་ཕ་མ་གཉིས་ལ་རེག་ལས་པ་ཡིན་ལ། ཕ་མ་དེ་གཉིས་ཀྱང་རིགས་གཅིག་པ་ཡིན་མིན་དེ་ནི་ཧ་ཅང་གལ་ཆེ་བ་ཡིན་པ་མ་ཟད། གཞན་ཞིག་ནི་ཁོར་ཡུག་ཆགས་འདུག་པ་དེ་རེད། ཕ་མ་གཉིས་ཀ་བོད་མི་ཡིན་པ་གལ་ཆེ་བ་མ་ཟད། བོད་མི་ཡིན་པ་དེ་ཡང་བོད་སྐད་བཤད་པར་དཀའ་ངལ་མེད་པའི་བོད་མི་ཕ་མ་གཉིས་ཡིན་དགོས་པ་དེ་ཡིན། དེ་ལྟར་ཡིན་ན་ནི། བོད་མི་བོད་སྐད་ཤེས་མཁན་ཞིག་དང་བོད་མིའི་གོམ་གཤིས་ཡོད་མཁན་ཞིག་དུ་འགྱུར་བར་ཐེ་ཚོམ་མེད་པར་བཤད་ཆོག་པ་ཡིན། དེ་ནི་ང་རང་གིས་སེམས་གཏིང་གི་ཉམ་མྱོང་བསགས་པའི་འབྲས་པུ་ཡང་ཡིན། དེ་ཡིན་དུས་ང་རང་ནི་ལག་པ་ཡ་གཅིག་ལས་མེད་པའི་མི་ལྟ་བུ་ཆགས་ཡོད་པ་དེ་ཡིན། རང་ཉིད་བོད་མི་ཡིན་པ་ལས་མཛའ་མོ་བོད་མི་མིན། དེ་ནི་གལ་གནད་དུ་ཆགས་ཡོད། བོད་མི་ཞིག་བཟོ་བའི་གལ་གནད་དང་བོ་ཡིན།

ང་ནི་ནམ་རྒྱུན་དུ་ལས་ཀ་དང་འཚོ་བ་གང་ཞིག་གི་ཆེད་དུ་འདུར་བཞིན་ཡོད་ན་རེད། བོད་མི་ཞིག་གི་འདུ་ཤེས་འདི་ཟབ་དྲགས་པའི་བོད་མི་གང་ན་ཡོད་པ་དེ་དག་གིས་འདུས་བསྡོད་འགྲོ་གསུམ་གྱི་གནས་ཚུལ་ལ་བསམ་བློ་གཏོང་བ་དང་རྒྱུས་ལོན་བྱེད་པ་བཅས་ལ་གོམ་ལོབ་དུ་གྱུར་བའི་མི་ཞིག་ཆགས་ཡོད་དུས། རང་ཉིད་བོད་མི་ཡིན་ཟེར་ནས་གླེང་བར་དཀའ་ངལ་ཞིག་གང་ན་ཡོད། དགའ་སྣང་ཡོད་པར་གྱུར་ཡོད་པའི་མི་ཞིག་ཡིན། ད་ལྟའི་འཆར་བོད་མི་ཁ་ཤས་ཤིག་གིས་རང་ཉིད་བོད་མི་ཡིན་ཟེར་ནས་གླེང་བར་ཡང་སྤྲོ་སྣང་མེད་པ་དང་དཀའ་ངལ་ཡོད་པ་ཞིག་ཆགས་ཡོད་མཁན་གྱི་གྲོགས་པོ་སྤུན་ཟླ་རེ་ཟུང་དང་འཕྲད་མྱོང་ཡོད་པ་མ་ཟད། གྲོགས་པོར་གྱུར་ཡོད།

ཁོང་གི་སྐྱེ་ཡུལ་ནི་རྒྱ་གར་ཡིན། ཕ་མ་གཉིས་ཀ་བོད་མི་ཡིན། འདུས་བསྡོད་ཀྱི་གནས་དང་འཚར་ལོངས་བྱུང་ཡུལ་ཡང་བོད་མིའི་སློབ་གྲྭ་ཁག་ཡིན། འཚར་ལོངས་བྱུང་སྟངས་ཀྱི་རྒྱུད་རིམ་ལ་འགྱུར་བ་ཐེབས་ནས་བོད་ཡིག་ལས་ཧིན་ཡིག་ལ་སྤྲོ་སྣང་ཡོད་པ་དང་། བོད་གཞས་ལས་ཧིན་གཞས་ལ་སྤྲོ་སྣང་ཡོད། བོད་སྐད་ལས་ཧིན་སྐད་ལ་སྤྲོ་སྣང་ཡོད་པ། བོད་མི་ཡིན་ཟེར་བ་ལས་རྒྱ་གར་བ་ཡིན་ཟེར་བར་སྤྲོ་སྣང་ཡོད་པ་ཞིག་ཆགས་ཡོད་པ་མ་ཟད། བསམ་བློའི་ནང་དུ་ཡང་དེ་འདྲ་ཞིག་སླེབས་ཡོད་པ་རེད། ཁོང་གིས་དུས་རྒྱུན་དུ་རང་གི་ཕ་ཡུལ་རྒྱ་གར་ཡིན་པར་གླེང་གི་ཡོད། དངོས་ནས་ཁོ་རང་གི་ཕ་ཡུལ་རྒྱ་གར་ཡིན་ནམ་ཞེས་བཤད་ན། ང་རང་གིས་ཁོ་རང་གི་སྐྱེ་ཡུལ་ནི་རྒྱ་གར་ཡིན་པ་ལས། ཕ་ཡུལ་བོད་ཡིན་ཟེར་རྒྱུ་ཡིན། འོ་ན། དེ་རིང་གི་ང་དང་ངའི་བུ་མོ་གནས་ཚུལ་འདི་གང་ལ་འཇོག་དགོས་པ་རེད། སྐྱེ་ཡུལ་རྒྱལ་ཁབ་འདི་རེད། ཕ་ཡུལ་གང་ཡིན་ནམ། ཕ་མ་གཉིས་ཀྱི་གཅིག་མ་གཏོགས་བོད་མི་མིན་སྙམ་བཞིན། སང་ཉིན་གཟའ་སྤེན་པའི་ནང་མི་འདུམ་སྒྲིག་གི་འདུ་འཛོམས་དེར་ཟ་མ་གང་ཞིག་བཟོ་དགོས་མིན་སྐོར་གྱི་སྐད་ཆ་ཞིག་དྲིས་དེ་ཉལ་དུ་སོང་བ་ཡིན།

མུ་འགོད།