སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} ཉེར་བདུན།

རྒན་རྒོན་གཉིས་ལ་ཕྲུ་གུ་གསུམ་ཡོད་ལ། གཉིས་བུ་མོ་དང་གཅིག་བུ་ཡིན། བུ་མོ་ཆེ་བ་ནི་ཕྱི་རྒྱལ་དུ་བཏང་ཟིན་པ་ཞིག་དང་། བུས་ལྡི་ལུར་ཁོ་རང་གི་རེ་འདོད་ལྟར་ཆེད་ལས་ལག་རྩལ་བསྐོར་གྱི་སློབ་སྤྱོང་ཞིག་བྱེད་བཞིན་ཡོད། བུ་མོ་ཆུང་བ་བསྟན་འཛིན་འཚོ་མོས་ལྡི་ལུར་མཐོ་སློབ་འདོན་བཞིན་ཡོད་པ་རེད།

བསྟན་འཛིན་མཚོ་མོས་དགུན་ཁའི་གུང་གསེང་དུ་སླེབས་ནས་བློ་བཟང་དང་གྲོགས་པོ་ཆགས། མཚམས་རེར་ཨ་ཅག་ཚེ་འཛོམ་གྱིས་བསྟན་འཛིན་འཚོ་མོ་དང་བློ་བཟང་གཉིས་ཕྱི་རོལ་དུ་འཁྱམ་འཁྱམ་དུ་གཏོང་བཞིན་ཡོད།

བསྟན་འཛིན་འཚོ་མོ་ནི་བུ་མོ་ཁ་སངས་པོ་ཞིག་དང་བསམ་བློ་ཀུ་ཡངས་པོ་གཏོང་མཁན་ཞིག་ཡིན་པ་མ་ཟད། སེམས་པ་ཡང་བཟང་བོ་ཞིག་ཡིན་ལ། བློ་བཟང་དང་སེམས་ཐག་ཉེ་བའི་གྲོགས་པོ་ཞིག་ཆགས། བསྟན་འཛིན་འཚོ་མོའི་གུང་གསེང་རྫོགས་ནས་ཕྱིར་ལྡི་ལུར་འགྲོ་ཁར་བློ་བཟང་ལ་ཁ་པར་ཨང་གྲངས་ཀྱང་སྤྲད།

རྒན་པོ་དོན་འགྲུབ་ཀྱིས། བློ་བཟང་གི་སྔ་གཞུག་བར་གསུམ་ཚང་མ་ལ་རྒྱུས་ལོན་བྱས་རྗེས་སུ། ཁ་བརྡ་དང་རེ་སྐུལ་འདི་འདྲ་བྱས། བློ་བཟང་། ངས་བལྟས་པ་ཡིན་ན་ཁྱེད་རང་ཕྱིར་གྲྭ་སར་སོང་བ་ཡིན་ན་ཡག་པོ་འདུག ཐ་མག་དང་ཨ་རག་འཐུང་བ་ཙམ་གྱིས་སྐྱོན་ནི་མ་རེད། ང་རང་ལྟ་བུ་ཞིག་ལ་མཚོན་ན་ལྔ་བརྒྱད་ལོའི་ཟིང་འཁྲུག་བྱུང་རྗེས། རྒྱ་གར་ལ་འབྱོར་ནས་རང་གི་ལྟོ་གོས་ཆེད་དུ་ཡར་མར་མང་བོ་ལ་འགྲིམ་ནས་ཚོང་བརྒྱབ་དེ་བསྡད་མཐར། སྡོམ་མགོ་མ་ཐོན་པར་གྲྭ་བ་ལོག་པ་རེད། དངོས་ནས་བཤད་ན་ང་རང་གྲྭ་བ་ལོག་འདོད་ཡོད་པ་དེ་འདྲ་མིན་ཡང་། ལས་དབང་ཟེར་ན་འདྲ། རང་གིས་མ་འཁྱོངས་པ་ཟེར་ན་རེད། གྲྭ་བ་བྱེད་རྒྱུའི་བསོད་ནམ་མེད་སོང་བ་ཡིན་ས་རེད།

ཁྱེད་རང་ད་ལྟ་ལོ་ཡང་ཆུང་ལ་རིག་པ་རྣོ་བོ་འདུག་པ་མ་ཟད། བོད་ཡིག་ཡང་ཡག་པོ་ཤེས་ཀྱི་འདུག ཁྱེད་རང་ལྟ་བུ་ཞིག་གྲྭ་བ་མི་བྱེད་ཟེར་བ་དེ་ནི་དངོས་ནས་ཕངས་པ་ཞིག་རེད་སོགས་རང་ཉིད་ཀྱི་མི་ཚེའི་གཏམ་རྒྱུད་ཀྱི་མྱོང་བ་གཞི་ལ་བཞག་ནས་བློ་བཟང་ལ་སྐད་ཆ་མང་བོ་ཞིག་བཤད།

བློ་བཟང་གིས། རང་ཉིད་གྲྭ་ས་ནས་གྲྭ་བ་མི་བྱེད་རྒྱུའི་བློ་ཐག་བཅད་པའི་སྔ་གཞུག་དང་། ཆོས་དགེ་བ་བྱེད་པ་ལ་ཡིན་གཅིག་མིན་གཅིག་གྲྭ་ལ་གྱོན་མཁན་ཞིག་བྱེད་དགོས་དོན་མེད་པའི་བསྐོར་གྱི་གནས་ལུགས་རང་གི་གང་ཤེས་ཆེས་མི་ཉུང་བ་ཞིག་རྒན་པོ་དོན་འགྲུབ་ལ་ཞུས།

བློ་བཟང་གིས་ཟླ་ངོ་བདུན་བརྒྱད་གཅིག་གི་རིང་དུ་ཞོགས་སྔ་བླངས་དང་དགོང་ཕྱི་ཉལ་བྱས་དེ་དཀའ་ལས་མི་ཉུང་བ་ཞིག་ཉུང་མཐར་ཧིན་སྒོར་འབུམ་གཅིག་ལྷག་གསོག་ཐུབ་ཡོད་པ་རེད། སྐབས་དེ་འདྲ་ཞིག་ལ་བློ་བཟང་གི་བསམ་པར་ད་ནི་ཕྱིར་རྡ་ས་མེག་ལོར་དུ་སོང་དེ་སློབ་སྤྱོང་རེ་བྱས་པ་ཡིན་ན་ལོ་ངོ་གཅིག་ཙམ་ལ་དཀའ་ངལ་ཡོད་ས་མ་རེད་སྙམ་ནས། རང་གི་བསམ་ཚུལ་གང་ཡོད་པ་དག་རྒན་རྒོན་གཉིས་ལ་བཤད།

རྒན་པོ་དོན་འགྲུབ་ཀྱིས། ཁྱེད་རང་དངོས་ནས་གྲྭ་བ་བྱེད་འདོད་མེད་པ་ཡིན་ན། ཕྱིར་རྡ་སར་སོང་ནས་སྒོར་མོ་ཆ་བོ་ཚར་རེག་བར་དུ་སྡོད་པ་ལས། ད་ནི་རང་གི་འཚོ་བའི་ཕྱོགས་སུ་བསམ་བློ་ཞིག་བཏང་དེ་འདི་ནས་མ་མཐའ་ལོ་གཅིག་གི་རིང་དུ་སྡོད་དང་། ལོ་གཅིག་གི་རྗེས་སུ། ངས་ཁྱེད་རང་ལ་མ་རྩ་ཞིག་འཇོག་རོགས་བྱས་དེ་ཟ་ཁང་ཞིག་གཉེར་བའམ། ཡང་ན། ཕྱི་རྒྱལ་གང་རུང་ཞིག་ལ་འགྲོ་འདོད་ཡོད་ན་དེ་རུ་གཏོང་ཆོག

བློ་བཟང་ནི་རང་གིས་ཐག་བཅད་པ་དེ་ནི་སུས་ཀྱང་འགུལ་ལྕགས་མི་ཐེབས་པ་ཞིག་ཡིན་སྟབས། མཐར་ཁོ་རང་གི་འདོད་པ་ལྟར་ལམ་ལ་ཆས་རྒྱུ་བྱས་པ་དང་། འགྲོ་ཁར་རྒན་རྒོན་གཉིས་ཀྱིས་ཁོ་རང་གི་འདོད་པ་ལྟར་ལྡི་ལུར་ཁོང་གཉིས་ཀྱི་བུས་རོགས་རམ་གནང་དེ་གློག་ཀླད་ཅིག་ཉོ་འདོད་པ་དེ་ཡང་བུ་ལ་ཁ་པར་བཏང་ནས་ཏག་ཏག་བཟོས།

བློ་བཟང་གིས། རྒན་རྒོན་གཉིས་ལ་རང་གི་སེམས་ནང་གི་སྐད་ཆ་མི་ཉུང་བ་ཞིག་བཤད་མྱོང་ལ། ལམ་ལ་ཆས་ཁར་ཡང་ཁོང་གཉིས་ཀྱི་ཁ་པར་ཨང་གྲངས་འཁྱེར་ནས་འགྲོ་བཞིན་ཡོད་ལ། མ་འོངས་པར་གལ་སྲིད་ཁོང་གཉིས་ལ་ཁོ་རང་གི་ཐུབ་པའི་རོགས་རམ་འདྲ་བྱེད་དགོས་ཐུག་ཉིན་ཁོ་རང་གི་རོགས་བྱེད་རྒྱུའི་སེམས་ཐག་བཅད་པ་དེར། རྒན་རྒོན་གཉིས་ཀྱིས་ཀྱང་བློ་སེམས་བདེ་བོའི་ངང་དུ་བློ་བཟང་ལ་ལམ་མཇུག་བྱས།

བློ་བཟང་ཟླ་ངོ་བརྒྱད་ལྷག་གི་རྗེས་སུ་ཕྱིར་རྡ་ས་མེག་ལོར་དུ་འབྱོར་ན་ཡང་། སྔོན་ཆད་དང་བསྡུར་ན་གཏན་ནས་མི་འདྲ་བར་ཕར་འགྲོ་དུས་ཀྱི་རྒྱབ་ཁུག་ཆུང་ཆུང་དེ་འཁུར་མཁན་ནི་མིན་པར། ཤོག་སྒམ་ཆེན་པོ་ལྔ་དྲུག་ཞིག་དང་། རྒྱབ་ཁུག་ནག་པོ་ཆེན་པོ་གཉིས་དང་བཅས་ཅ་ལག་མི་ཉུང་བ་ཞིག་དང་ལྷན་དུ་ཕྱིར་རྡ་ས་མེག་ལོར་དུ་འབྱོར་ཡོད་པ་རེད།

ཤོག་སྒམ་དེ་དག་ནི་གློག་ཀླད་གསར་བ་ཉོས་པའི་ཅ་ལག་རྐྱང་རྐྱང་ཡིན་ལ། རྒྱབ་ཁུག་དེ་གཉིས་ཀྱི་ནང་གི་ཅ་ལག་དག་ནི་གོན་པ་དང་། ལྡི་ལུ་ནས་རྒན་རྒོན་གཉིས་ཀྱི་བུས་ཁོ་ལ་སྤྲད་པའི་ཐབ་ཆོས་རྙིང་བའི་རིགས་རྐྱང་རྐྱང་ཡིན། བློ་བཟང་ཐད་ཀར་རང་གི་སྔོན་ཆད་སྡོད་སའི་གྲོགས་པོ་དེའི་ནང་དུ་ཕྱིན། གྲོགས་པོ་ལས་ཀ་ནས་ཕྱིར་ནང་དུ་འབྱོར་དུས། བློ་བཟང་གི་འཁུར་ཡོང་བའི་ཅ་དངོས་དེ་དག་རིག་ནས་ནང་དུ་ཡང་ཡོང་མ་འཕོད་པར། བློ་བཟང་ལ་་འདི་ཚོ་ཅི་རེད་དམ། ཁྱེད་ཀྱིས་ཟླ་ངོ་འདི་དག་གི་རིང་དུ་ག་རེ་བྱས་པ་ཡིན་ནམ།

བློ་བཟང་གིས་རང་ཉིད་ཀྱིས་ཟླ་ངོ་བརྒྱད་ལྷག་རིང་གི་དཀའ་ལས་ཇི་ལྟར་བརྒྱབ་མིན་དང་། སྤྱིན་བདག་བཟང་བོ་ཞིག་ལ་འཕྲད་སྟངས། སྒོར་མོ་དེ་དག་རང་གིས་དཀའ་ལས་བརྒྱབ་པའི་གྲུབ་འབྲས་ལས་རེག་པ་སོགས་ཞིབ་དུ་གླེང་མཐར། ཁོ་གཉིས་ཀྱིས་གློག་ཀླད་ཀྱི་ཅ་དངོས་དག་ཤོག་སྒམ་ལས་ཕྱི་རུ་བཏོན།

བློ་བཟང་གིས་དགོང་མོ་དེར་གྲོགས་པོ་དེའི་ཁ་ནས་ནོར་བུ་བཟང་མོ། ཕྱི་རྒྱལ་བ་ཞིག་དང་གཉེན་སྒྲིག་རྒྱུའི་དུས་ཚོད་གཏན་འཁེལ་བྱས་ཡོད་པ་ཐོས་པ་རེད།