་་་་་་་་་དངོས་སྒྲུང་འདི་བདག་ལ་རྒྱུས་མངའ་ཡོད་མཁན་གྱི་གྲྭ་བ་ཞིག་གི་ལོ་རྒྱུས་ཡིན།
བློ་བཟང་རྡ་སར་འབྱོར་ནས་ཕྱིར་ཉིན་སྲང་དུ་ཡང་མ་སོང་བར་ནང་དུ་གློག་ཀླད་ནང་དུ་ཡི་གེ་འབྲི་སྟངས་ཤིག་སྤྱོང་བཞིན་པའི་སྐབས་སུ། སྒོ་བརྡུང་བའི་སྒྲ་ཞིག་ཐོས་དེ། ཡར་བླངས་དེ་སྒོ་ཕྱེ་དུ་སོང་། སྒོ་འགྲམ་དུ་འབྱོར་བའི་མི་དེ་ནི་ནོར་བུ་བཟང་མོ་ཡིན་ལ། སྒོ་ཕྱེ་མ་ཐག་ནོར་བུ་བཟང་མོས་མིག་ཆུ་དང་བཅས་དེ་བློ་བཟང་གི་སྐེ་རུ་འཐམ་ནས། ངས་ཉིན་མཚན་མེད་པར་ཁྱེད་རང་དྲན་པ་མ་ཟད། རྨི་ལམ་ཡང་མང་བོ་ཞིག་རྨིས་སོང་། དེ་རིང་མེག་ལོར་གྱི་སྲང་དུ་སྔོ་ཚལ་ཞིག་ཉོ་རུ་ཡོང་སྐབས། ཁྱེད་ཀྱི་རོགས་པ་དང་འཕྲད། ཁོ་རང་ལ་རྒྱུན་ལྡན་ལྟར་ཁྱེད་རང་གི་བསྐོར་ཞིག་དྲིས་དུས། ཁྱེད་རང་སླེབས་ཡོད་པ་ཤེས་ནས་འདིར་ཡོང་བ་ཡིན།
བློ་བཟང་གིས་སྐབས་དེར་སྐད་ཆ་གང་ཞིག་ནས་བཤད་དགོས་མིན་ཀྱང་མི་ཤེས་པའི་མཚམས་སུ་བསྐྱལ་ན་ཡང་། ད་མ་ངུ། ངུས་དེ་གང་བྱེད། ནང་དུ་ཤོག ཁ་བརྡ་ལྷོད་ལྷོད་ཅིག་བྱེད་ཆོག་གི་རེད།
བློ་བཟང་གིས་ནོར་བུ་བཟང་མོའི་སྐད་ཆ་དག་ལ་ཞིབ་དུ་ཉན་ནས། མོ་རང་གིས་འདོད་ནས་འདམ་ག་བྱས་དེ་ཕྱི་རྒྱལ་བ་དེ་ལ་ཆང་ས་རྒྱག་རྒྱུ་བྱས་པ་ཞིག་གཏན་ནས་མ་ཡིན་པར། མོ་རང་གི་ཨ་ཅེ་དང་བདེ་གྲོལ་གཉིས་ཀྱིས་རེ་སྐུལ་བྱས་ལུགས། ཁོ་གཉིས་ཀྱི་གྲོགས་པོ་ཞིག་བརྒྱུད་དེ་ངོ་སྤྲོད་བྱས་ཚུལ། གོ་སྐབས་དེ་བརྒྱུད་ནས་བདེ་གྲོལ་ཕྱི་རྒྱལ་དུ་འགྲོ་རྒྱུར་མི་དེས་རོགས་པ་བྱེད་ཀྱི་ཡོད་པ་སོགས་ཀྱི་གནས་ཚུལ་ཚང་མ་མིག་ཆུ་དང་ལྷན་དུ་བཤད་པ་དང་། ད་ནི་ཁྱེད་རང་ཕྱིར་ཡོང་བའི་རང་གི་གཉེན་སྒྲིག་བྱེད་རྒྱུ་མིན་ཚུལ་སོགས་མང་བོ་ཞིག་ཉན་རྗེས། དེས་ན་ཁྱེད་རང་གི་ང་ལ་འབྲེལ་བ་ཞིག་གནང་མ་ཐུབ་པ་གང་རེད་དམ།
ནོར་བུ་བཟང་མོས། ངས་ཁྱེད་རང་གང་དུ་ཡོད་མེད་ཀྱི་ཁ་བྱང་ཡང་མི་ཤེས་པ་མ་ཟད། ཁྱེད་རང་ཕྱོགས་སུ་བྲོས་དེ་ཡོང་དགོས་བསམ་ཡང་སྒོར་མོ་མེད་པ་དང་། སྒོར་མོ་ཁ་ཤས་ཤིག་ཐབས་ཤེས་འགྲིག་སྲིད་ཀྱང་། རྒྱ་གར་སྐད་ཚིག་གཅིག་མི་ཤེས་པའི་སླེབས་དགོས་སར་མ་སླེབས་གོང་དུ་བོར་བརླག་འགྲོ་རྒྱུར་སྐྲག དེ་ནས་བདེ་གྲོལ་གྱིས་ཁྱེད་རང་གི་གྲོགས་པོའི་ལག་དུ་ཁ་བྱང་ཡོད་རབས་ཟེར་སྟབས། ངས་ཡི་གེ་ཞིག་བྲིས་དེ་བདེ་གྲོལ་ལ་ཁྱེད་རང་ལ་སྐུར་རོགས་ཟེར་ནས་ཟླ་འགའི་སྔོན་དུ་ཁོའི་ལག་དུ་བཞག་པ་ཡིན། ཁྱེད་རང་ལ་་ཡི་གེ་འབྱོར་མ་སོང་ངམ།
བློ་བཟང་གིས་ད་གཟོད་དོན་དག་འདིའི་སྔ་གཞུག་ཚང་མར། བསམ་གཞིག་ནན་ཏན་བྱེད་དགོས་པའི་དོན་གནད་ཅིག་ཡོད་ཁོ་ཐག་རེད་སྙམ་ཞོར། ང་རང་ལ་ཁྱེད་ཀྱི་ཡི་གེ་ཞིག་གཏན་ནས་འབྱོར་མ་སོང་། གལ་ཏེ། འབྱོར་བ་ཡིན་ན། ངས་ཁྱེད་རང་གི་དཀའ་ངལ་དེ་དག་གི་ཟུར་ཙམ་ཞིག་ལོས་ཤེས།
སྐབས་དེ་འདྲ་ཞིག་ལ། བློ་བཟང་གི་གྲོགས་པོ་འགའ་ཁོ་རང་ཕྱིར་མེག་ལོར་དུ་འབྱོར་ཡོད་པ་གོ་ནས་སླེབས། ངོ་ཤེས་དེ་དག་གིས་ནོར་བུ་བཟང་མོའི་གདོང་གི་མིག་ཆུ་སྐམ་མེད་པའི་ངང་ཚུལ་དེ་མཐོང་ནས་ཕྱིར་འགྲོ་རྩིས་བྱས་ཀྱང་། བློ་བཟང་གིས་རེ་སྐུལ་ལྟར་བསྡད་ནས་ཁོང་ཚོས་སྐད་ཆ་གཞན་ཞིག་གི་ཁྲོད་དུ་གླེང་མོལ་བྱེད་མགོ་བཙུགས།
ནོར་བུ་བཟང་མོས་བློ་བཟང་ལ་ཉིན་གོང་ཁ་ལག་བཟོ་རོགས་བྱས་པ་དང་། བློ་བཟང་གི་གྲོགས་པོ་ཚོས་ལྷན་དུ་ཉིན་གོང་གི་ཁ་ལག་ཟ་ཞོར་དུ། ནོར་བུ་བཟང་མོ་ལ་ཀུ་རེ་མི་ཉུང་བ་ཞིག་རྩེད་ཀྱིན་ཞོར་དུ་བློ་བཟང་ལ་ཚིག་གི་མདའ་མོ་མང་བོ་ཞིག་འཕངས་ཀྱང་། བློ་བཟང་གི་འཛུམ་རེ་སྟོན་པ་ལས་ལན་གང་ཡང་མ་ལོག
བློ་བཟང་གིས། རང་ཉིད་རྡ་སར་སླེབས་ཡོད་པ་དང་ཉིན་མ་དེ་དག་གི་རིང་དུ་རང་གི་གྲོགས་པོ་འགའ་དང་འཕྲད་ཚུལ། མི་རིང་བར་དབྱིན་ཡིག་ཟུར་སྤྱོང་འཛིན་གྲྭ་སོགས་ལ་འགྲོ་འདོད་ཡོད་རབས། གལ་སྲིད། དོན་དག་གལ་ཆེན་རེ་དང་འཕྲད་དེ་ཁོ་རང་གི་རོགས་བྱེད་ཐུབ་པ་འདྲ་ཡིན་ན། གྲོགས་པོའི་ཁ་པར་ཨང་གྲངས་སྟེང་དུ་བརྡ་རེ་བཞག་ན། ཁོས་ཕར་ལ་ཁ་པར་གཏོང་ཚུལ་སོགས་རང་གི་བསམ་པ་ལྟར་རྒན་རྒོན་གཉིས་ལ་ཁ་པར་ཁྲོད་ནས་བཤད།
ཉིན་དེ་དག་གི་རིང་དུ། ཉིན་ལྟར་ནོར་བུ་བཟང་མོ་བློ་བཟང་ཡོད་སར་ཡོང་བཞིན་ཡོད་ལ། གོ་སྐབས་ཡོད་ཚད་དུ་མོ་རང་གི་སྐྱིད་སྡུག་འདྲ་མིན་སྣ་ཚོགས་ཤིག་བློ་བཟང་དང་ལྷན་དུ་བཤད་ཀྱི་ཡོད། དེ་དག་གི་ཁྲོད་ནས་ཆེས་གནད་འགག་གི་སྐད་ཆ་ནི། ནོར་བུ་བཟང་མོས་ཕྱི་རྒྱལ་བ་སྐུ་ཞབས་ཨེས་ལ་དང་གཉེན་སྒྲིག་བྱེད་རྒྱུ་མིན། ད་ནི་ཁྱེད་རང་ཕྱིར་སླེབས་ཡོད་ཟེར་བ་དེ་ཡིན།
བློ་བཟང་གིས་སྐད་ཆ་དེར་བསམ་བློ་ཆེས་མི་ཉུང་བ་ཞིག་བཏང་ནས་ནོར་བུ་བཟང་མོ་ལ། ཁྱེད་ཀྱིས་དེ་ལྟར་བྱེད་མི་ཉན། གལ་སྲིད། ཁྱེད་ཀྱིས་དེ་འདྲ་བྱེད་རྒྱུ་ཡིན་ན་ནི། ང་རང་སང་ཉིན་རྡ་ས་དང་ཁ་གྱེས་ནས་འགྲོ་རྒྱུ་ཡིན། ཁྱེད་རང་གི་ཨ་ཅེ་དང་བདེ་གྲོལ་གཉིས་ནི་ང་རང་ལ་བཀའ་དྲིན་ཆེན་པོ་ཡིན་པ་མ་ཟད། ཁོ་གཉིས་ཀྱི་རེ་བ་ཡོད་ཚད་ཁྱེད་ལ་བཅོལ་ཡོད་པ་འདི། ང་རང་སླེབས་ནས་མེད་པར་ཆགས་པ་ཡིན་ན། ངས་རང་གི་གྲོགས་པོ་བདེ་གྲོལ་གྱི་གདོང་ལ་ལྟ་སྲོལ་མེད། ཁྱེད་ཀྱིས་ཨ་ཅེ་ཡི་སེམས་ལ་ཡང་སྡུག་བཞག་པ་རེད། ང་རང་འདི་ནས་ཡུན་རིང་མི་བསྡོད་པར་ཕྱོགས་གཞན་ཞིག་ལ་བུད་འགྲོ ང་རང་ཁྱེད་ཀྱི་ཆང་སའི་རྟེན་འབྲེལ་ལ་ཡང་མི་ཡོང་ཞེས་བཤད།
ནོར་བུ་བཟང་མོས། དེས་ན་ང་རང་གི་ཁྱེད་ཀྱིས་ཁ་ལ་ཉན་ཆོག ཨ་ཅེ་དང་བདེ་གྲོལ་གཉིས་ཀྱིས་འདོད་ཐོག་ལ་བཞག་ཆོག ཡིན་ཡང་། ཁྱེད་རང་ཆང་སའི་རྟེན་འབྲེལ་ཉིན་ཡིན་གཅིག་མིན་གཅིག་ལ་ཡོང་དགོས། དེ་ལྟར་མི་ཡོང་ཟེར་ན་ནི། ང་རང་ཆང་སའི་ཉིན་མོ་དེར་ཁྱེད་རང་བཙལ་དུ་ཡོང་རྒྱུ་ཡིན་ལ། ཁྱེད་ཀྱི་ཁ་ལ་མི་ཉན། ད་དུང་། ངས་གནས་ཚུལ་འདིའི་མགོ་གཞུག་ཚང་མ་སྐུ་ཞབས་ཨེས་ལར་གསལ་བཤད་ཞུ་རྒྱུ་ཡིན། དེ་ནས་དོན་དག་ཚང་མ་ཐག་བཅོད་འགྲོ་ངེས་རེད།
བློ་བཟང་གིས། ནོར་བུ་བཟང་མོའི་སྐད་ཆ་དེ་དག་ལ་ཁས་ལེན་བྱས་དེ་ཆང་སའི་རྟེན་འབྲེལ་གྱི་སྔ་གཞུག་ཀུན་ལ་བདེ་གྲོལ་དང་ལྷན་དུ་རང་གི་ཐུབ་ཚོད་ཀྱིས་རོགས་རམ་བྱས། ཆང་སའི་རྟེན་འབྲེལ་གྱི་བདུན་ཕྲག་གཅིག་གི་རྒྱབ་དུ། ནོར་བུ་བཟང་མོ་བཟའ་མིི་གཉིས་ཀྱིས་བདེ་གྲོལ་བཟའ་མི་གཉིས་དང་བློ་བཟང་། དེང་ཐོག་སྐུ་ཞབས་ཨེས་ལ་དང་ཁོ་མོ་གཉིས་ངོ་སྤྲོད་བྱེད་མཁན་གྱི་ཕོ་གསར་དོན་གོ་བཅས་ལ་དམིགས་བསལ་གྱིས་ཁ་ལག་ཞིག་བཟོས་དེ་སྐད་བཏང་། དགོང་མོ་དེར་བློ་བཟང་ར་བཟི་ནས་ནོར་བུ་བཟང་མོའི་ཁྱོ་ག་གསར་བ་སྐུ་ཞབས་ཨེས་ལ་ཡི་སྟེང་དུ་སྐྱུག་པ་སྐྱུག་ཡང་། སྐུ་ཞབས་ཨེས་ལ་ནི་མི་བཟང་བོ་གསེར་འདྲ་ཞིག་ཡིན་སྟབས། བློ་བཟང་ལ་བདག་པོ་རྒྱག་པ་ལས་རྣམ་འགྱུར་མི་ལེགས་པ་ཞིག་ཀྱང་མ་བསྟན། བདེ་གྲོལ་གྱིས་བྱེད་སྟངས་དེ་དག་ལ་འཚེར་སྣང་དང་བཅས་དེ་བློ་བཟང་ཕྱིར་ནང་དུ་བསྐྱལ།
ཕྱིར་ཉིན་བདེ་གྲོལ་གྱིས། བློ་བཟང་འདང་དགོང་ཆང་གི་བཟི་ནས་ཁྱེད་ཀྱིས་ང་རང་ལ་སྐད་ཆ་འདྲ་མི་འདྲ་མང་བོ་ཞིག་བཤད་པ་དག་དྲན་གསོས་ཀྱི་འདུག་གམ། ད་དུང་། སྐུ་ཞབས་ཨེས་ལ་ཡི་སྟེང་དུ་སྐྱུག་པ་སྐྱུག་ནོ་དྲན་གྱི་འདུག་གམ།
བློ་བཟང་གིས། རང་ཉིད་ར་བཟི་བའི་རྗེས་སུ་སྐུ་ཞབས་ཨེས་ལ་ཡི་སྟེང་དུ་སྐྱུག་པ་སྐྱུག་པ་དང་བདེ་གྲོལ་གྱིས་རང་ཉིད་ནང་དུ་བསྐྱལ་བའི་ལམ་ཁར་ཁོ་ལ་སྐད་ཆ་གང་ཞིག་བཤད་མིན་སོགས་གཏན་ནས་ཡིད་ལ་མ་དྲན་སྟབས། བདེ་གྲོལ། ང་ལ་ཀུ་རེ་མ་རྩེད། འདང་ནུབ་ངས་ཁྱེད་རང་ལ་ག་རེ་བཤད་སོང་ངམ།
བདེ་གྲོལ་གྱིས། ཞིབ་དུ་བློ་བཟང་གི་གདོང་དུ་ལྟ་བཞིན། དངོས་ནས་མི་དྲན་ནམ། ངས་ཁྱེད་རང་ལ་བཤད་ཆོག ཁྱེད་ཀྱིས་ངས་ནོར་བུ་བཟང་མོ་སྐུ་ཞབས་ཨེས་ལར་སྤྲད་ཚུལ། ཁྱེད་རང་གི་ལག་ནས་འཕྲོག་རབས། མོ་རང་དོན་དངོས་དག་ང་རང་ལ་དགའ་ཚུལ་སོགས་མང་བོ་ཞིག་བཤད་སོང་། དོན་དངོས་ཐོག ཁྱེད་རང་གིས་དངོས་ནས་དེ་འདྲ་བསམ་བཞིན་ཡོད་དམ།
བློ་བཟང་གིས་ངོ་མདོག་ཅུང་ཙམ་དམར་པོ་ཆགས་ནས། ག་བ་ག་བ། དཔེ་ཡོད་ནས། ངས་ངོ་མ་ཁྱེད་རང་ལ་སྐད་ཆ་དེ་འདྲ་ཞིག་བཤད་པ་དྲན་གྱི་མི་འདུག ནོར་བུ་བཟང་མོ་ལ་སྐུ་ཞབས་ཨེས་ལ་ལྟ་བུ་རྒན་པོ་བཟང་བོ་ཞིག་རེག་པ་དེ་ནི་ཁྱེད་བཟའ་མི་གཉིས་ཀྱིས་བཀའ་དྲིན་རེད།
བདེ་གྲོལ་གྱིས། རེད། དངོས་ནས་སྐུ་ཞབས་ཨེས་ལ་ཁོང་ནི་བོད་ཀྱི་བུ་མོ་མང་བོ་ཞིག་གི་རེ་བ་བྱེད་མྱོང་ཡོད་ས་ཞིག་རེད་ལ། མི་ཡང་གསེར་འདྲ་བ་ཞིག་ཡིན། ཁོ་མོ་བསྡོད་ཤེས་པ་ཡིན་ན་རྒན་པོ་འདི་ལས་དགའ་ཞིག་རེག་གི་མ་རེད།
བདེན་པ་རེད། བདེན་པ་རེད།
ཆང་ས་རྒྱབ་རྗེས་སུ། ནོར་བུ་བཟང་མོ་ལ་འགྱུར་བ་གང་ཡང་མེད་པར་སྔར་བཞིན་བློ་བཟང་གི་ནང་དུ་ཡོང་བཞིན་ཡོད་ལ། བློ་བཟང་དང་ལྷན་དུ་སྐད་ཆ་འདྲ་མིན་གླེང་དེ་སྡོད་པ་ནི་མོ་རང་གི་བདེ་སྐྱིད་ཆེ་ཤོས་རུ་ཆགས་ཡོད། དེ་ལ་བློ་བཟང་གིས་ཀྱང་གང་ཡང་བཤད་ཐུབ་ཀྱི་མེད་ལ། མོ་དང་གི་ཁམས་དང་བསྟུན་ནས་ཁོ་གཉིས་ཕལ་ཆེ་བ་ལ་རོགས་པ་རེ་ཟུང་དང་ལྷན་དུ་ཡོད།
ཉིན་ཞིག་བློ་བཟང་དང་ནོར་བུ་བཟང་མོ་གཉིས་ཀྱིས་བློ་བཟང་གི་ནང་དུ་བོད་ནང་གི་གླུ་དབྱངས་བརྙན་འཁོར། མོ་རང་ཆེས་དགའ་སའི་གངས་བཞུགས་ཀྱི་གླུ་དབྱངས་གློག་ཀླད་ནང་དུ་བལྟ་ཉན་བྱེད་བཞིན་བསྡད་ཡོད་པའི་སྐབས་སུ། གློ་བར་དུ་བདེ་གྲོལ་ནང་དུ་སླེབས།
མུ་འགོད།
ཡོང་མཁན་དང་ཀློག་མཁན། བསམ་ཚུལ་འབྲི་མཁན་ཚང་མར་དགའ་ནས་བལྟས་ཡོད། བསམ་ནས་འཚམ་འདྲི་ཡོད། དྲན་ནས་སྙིང་གཏམ་ཡོད།
ཡོང་ཡོད།
ཨ་རོབ།་་་་སྐུ་བདེ་འམ།
སྐུ་ཉིད་ཀྱི་དངོས་སྒྲུང་ཉེར་བརྒྱད་པ་བཀླཊ་ཟིན།
ད་དུང་མུ་མཐུད་འབྲི་འམ།་་་་ངལ་ཅུང་ཙམ་གསོ་མི་དགོས་སམ།
ཧཧཧ་་་་་ཀུ་རེ་དང་བཅས།
ཀློག་གིན་ཡོད།
དྲ་གྲོགས་ལགས། སྒྲུང་སྙན་མོ་ཞིག་བཤད་འདུག་ཏེ་དངོས་གནས་ཡིན་མིན་ཚིག་ཐག་བཅད་དེ་ཞུ་ཐུབ་པ་མི་འདུག བློ་བཟང་ཕ་ཡུལ་གང་ནས་རེད་ཅེས་དྲིས་ཚེ་ཁྱེད་རང་གིས་ལན་ཁ་གསལ་ཞིག་རྒྱག་ཐུབ་བམ། གང་ལྟར་ཀྱང་དེ་འདྲ་བྱུང་མི་སྲིད་པ་ཞིག་ག་ལ་ཡིན།
ད་ཐེངས་བློ་བཟང་ལམ་འགྲོ་རྒྱུག་སོང་ཞིག མི་དྲང་མོ་དེ་ཚོ་ལན་རེར་གྱོང་རེག་གི་ཡོད་པ་འདྲ་བོ་མཐོང་ཡང་། དྲང་བདེན་ལ་ཚད་མ་རྒྱབ་སྐྱོར་ཡོད་པས། ལས་རྒྱུ་འབྲས་ཞིག་ཕར་ལྟས་ན་མེད་པ་འདྲ་མོད། དོན་ངོ་མ་ཡོད་ནི་རེད་བློ་བཟང་ལྟ་བུ་མི་ཡ་རབས་ཞིག་ལ་བདེ་གྲོལ་བཟའ་མི་དང་ནོར་བུ་མཚོ་ལྟ་བུའི་གཡོ་འོག་ཏུ་ཚུད་མི་འདུག་ག ནོར་བུ་མཚོ་དང་འཆང་ས་རྒྱག་མ་ཐུབ་པ་དེ་བར་ཆད་མ་རེད། ལམ་འགྲོ་རེད།