་་་་་་་་་དངོས་སྒྲུང་འདི་བདག་ལ་རྒྱུས་མངའ་ཡོད་མཁན་གྱི་གྲྭ་བ་ཞིག་གི་ལོ་རྒྱུས་ཡིན།
ཉིན་མཚན་ཁ་ཤས་ཀྱི་འགྲུལ་བཞུད་ལ་བརྟེན་ནས་བློ་བཟང་བདེ་བར་ཁོང་རྒན་རྒོན་གཉིས་ཀྱི་གམ་དུ་འབྱོར། ཨ་ཅག་ཚེ་འཛོམ་གྱིས་བློ་བཟང་ལ། ཁྱེད་རང་གིས་ཟ་ཁང་གོང་མའི་ནང་གི་འགན་འཛིན་གྱིས་ལས་འཁུར་བྱེད་རྒྱུ་དང་། གནས་སྐབས་རིང་ཁྱེད་རང་ལ་རོགས་བྱེད་མཁན་ནི་རྒན་པོ་སངས་རྒྱས་ལགས་ཡོད་པ་རེད། ངས་བལྟས་པ་ཡིན་ན་རྡ་ས་ནས་རང་གི་གྲོགས་པོ་ཞིག་སྐད་བཏང་ནས་རང་ལ་རོགས་བྱེད་དུ་བཅུགས་པ་ཡིན་ན་ཁྱེད་རང་ལ་ཡང་སྟབས་བདེ་བོ་ཡོད་ངེས་ཡིན།
བློ་བཟང་གིས་རང་གི་གྲོགས་པོ་མགོན་སྐྱབས་ཤེས་རབ་དགའ་ཚལ་སློབ་གླིང་ནས་ཐར་ཕྱིན་ལ་ཉེ་བ་དེར་རོགས་པ་ཞིག་བརྒྱུད་དེ་ཁ་པར་ཁྲོད་ནས་ཐར་ཕྱིན་མ་ཐག་རང་ཉིད་ལ་རོགས་བྱེད་དུ་ཡོང་རྒྱུར་སྐད་བཞག
རྒན་རྒོན་གཉིས་གནས་བསྐོར་ལ་ཕྱིན་སོང་བ་དང་བློ་བཟང་གི་གྲོགས་པོ་མགོན་སྐྱབས་ཀྱང་ཁོ་རང་ཡོད་སའི་ས་ཁུལ་དེར་འབྱོར་ནས་ཉིན་ཁ་ཤས་ཤིག་སོང་ཡོད། ཁོ་གཉིས་ལ་དུས་རྒྱུན་དུ་རང་རང་གི་དམིགས་ཡུལ་སོགས་འདྲ་མིན་གླེང་རྒྱུར་དགའ་བོ་ཡོད་པ་རེད།
བློ་བཟང་གིས་རང་གི་དུས་རྒྱུན་གྱི་རྨི་ལམ་ཞིག་ཡོད་པ་དེ་ནི་རང་གི་མི་ཚེ་ནང་དུ་བོད་དོན་རླབས་ཆེན་ཞིག་བྱེད་འདོད་ཡོད་པ་དེ་ཡིན་པ་དང་། དུས་ཚོད་གང་ཡོད་ལ་དེའི་བསྐོར་གྲོགས་པོ་མགོན་སྐྱབས་ལ་ཁོ་གཉིས་བོད་མི་ཞིག་གི་དངོས་ནས་བོད་དོན་སྒྲུབ་ཕྱོགས་ཐད་ཀྱི་བྱེད་ཐབས་མི་ཉུང་བ་ཞིག་བཤད།
བར་སྐབས་ཤིག་ལ་བློ་བཟང་གིས་རང་ཉིད་སྔོན་ཆད་གྲྭ་སར་ཡོད་དུས་ཤིག རང་གི་གྲོགས་པོ་ཆེས་སེམས་ཐག་ཉེ་བོ་ཞིག་དང་ལྷན་དུ་བོད་དོན་ཞིག་སྒྲུབ་རྒྱུའི་གྲོས་མོལ་བྱས་མྱོང་བ་དང་རྗེས་སུ་དོན་དག་དངོས་སུ་མགོ་རྩོམ་རྒྱུར་ཉེ་དུས་གྲོགས་པོ་དེ་ནི་ཕྱི་བཤོལ་བྱས་རབས་སོགས། ད་དུང་། ཡིན་ན་ཡང་། བློ་བཟང་ཁོ་རང་ལ་གྲོགས་པོ་ཡག་པོ་ཞིག་རེག་ན་བོད་ནང་དུ་སོང་དེ་བོད་དོན་ཐད་དུ་རང་གི་འཇོན་ཚད་ཀྱི་ལས་ཀ་ཞིག་བྱེད་འདོད་ཡོད་རབས་གྲོགས་པོ་མགོན་སྐྱབས་ལ་གླེང་།
གྲོགས་པོ་མགོན་སྐྱབས་ཀྱིས་ཀྱང་། བློ་བཟང་ལ་བདེན་ཁ་སྤྲད་པ་དང་ཁོ་རང་ལ་ཡང་བོད་དོན་ཞིག་བྱེད་རྒྱུར་སྤྲོ་བ་ཡོད་ཚུལ་གླེང་མོལ་སྣ་ཚོགས་ཤིག་བྱས་པའི་མཇུག་དུ། བོད་ནང་ནས་བོད་དོན་གང་ཞིག་བྱས་པ་ཡིན་ན་བཟང་རབས་དྲིས།
བློ་བཟང་སེམས་བསམ་པའི་གཏིང་ནས་དགའ་སྣང་དང་བཅས་དེ། པོ་ཏྰ་ལའི་སྟེང་དུ་སོང་དེ་རང་ལུས་སུ་བོད་ཀྱི་རྒྱལ་དར་གྱོན་ནས། ཡུལ་བསྐོར་སྤྲོ་འཁྱམས་པ་མང་བའི་སྐབས་ཤིག་དང་བསྟུན་ནས་སྐད་འབོད་བྱེད་རྒྱུ་དང་། མཐར་གཉེན་རྟོག་པ་སླེབས་དུས་རང་ཉིད་པོ་ཏྰ་ལའི་ཡང་རྩེ་ནས་མཆོང་རྒྱུ་དང་། མགོན་སྐྱབས་ཀྱིས་ཉིན་དེར་གཙུག་ལག་ཁང་གི་འགྲམ་ནས་དུས་ཚོད་དེར་གཙུག་ལག་ཁང་གི་འགྲམ་ནས་སྐད་འབོད་ཤུགས་ཆེན་པོ་བྱེད་རྒྱུ་དེ་ཡིན། གལ་སྲིད། དེ་ལྟར་བྱེད་ཐུབ་ཀྱི་མེད་པ་ཡིན་ནའང་འགྲིག པོ་ཏྰ་ལའི་མདུན་ཐང་ནས་དཔར་ཆས་ཤིག་བཟུང་དེ་འདྲ་དཔར་བརྒྱབ་ན་འགྲིག་གི་རེད་སོགས་རང་གི་རྨི་ལམ་ཁྲོད་ཀྱི་རེ་བ་དེ་དག་གཅིག་རྗེས་གཉིས་མཐུད་དུ་བཤད།
ཉིན་མ་ཁ་ཤས་ཀྱི་རིང་དུ་ཁོ་གཉིས་ཀྱིས་བོད་དོན་སྒྲུབ་ཕྱོགས་བསྐོར་རྐྱང་རྐྱང་བཤད་དེ། དེང་ཐོག་མགོན་སྐྱབས་ཀྱིས་ཀྱང་དེར་རྒྱབ་སྐྱོར་བྱས་པ་དང་མོས་མཐུན་མི་ཉུང་བ་ཞིག་བྱས་ཀྱང་། མཐར་བློ་བཟང་གིས་རྒན་རྒོན་གཉིས་སླེབས་ནས་ཟླ་ངོ་ཁ་ཤས་རིང་དུ་ས་གནས་དེར་སྒོར་མོ་འགའ་གསོག་རྗེས་སུ་ཁོ་གཉིས་ས་ཁུལ་དེ་བརྒྱུད་ནས་ཐད་ཀར་བོད་ནང་དུ་འགྲོ་རྒྱུ་བྱས་ཀྱང་། ཉིན་མ་རིམ་གྱིས་སོང་བ་དང་གྲོགས་པོ་མགོན་སྐྱབས་ཀྱིས་བློ་ཁ་འགྱུར་བ་ཐེབས།
ཟླ་ངོ་གཅིག་ལྷག་གི་རྗེས་སུ་རྒན་རྒོན་གཉིས་ཀྱང་གནས་བསྐོར་ནས་ཕྱིར་སླེབས་པ་དང་། གནས་བསྐོར་གྱི་ལམ་བར་དུ་མེ་འཁོར་ནང་ནས་རྒན་རྒོན་གཉིས་ཀྱིས་ཅ་དངོས་མི་ཉུང་བ་ཞིག་བོར་བརླག་སོང་བའི་ཁྲོད་དུ། རྒན་པོ་དོན་འགྲུབ་ལགས་ཀྱིས་མི་ཚེ་བཀང་བོར་མ་ཎི་བསགས་པའི་གྲངས་ཐོའི་འབྲི་དེབ་ཀྱང་བོར་བརླག་སོང་བ་དེར་ལྟས་ངན་ལྟ་བུ་ཡང་བསམ་བཞིན་ཡོད་བསྐོར་སོགས་བློ་བཟང་ལ་ཨ་ཅག་ཚེ་འཛོམ་གྱིས་བཤད།
དངོས་ནས་ལྟས་ངན་ནི་ལྟས་ངན་རང་རེད། མི་རིང་བར་རྒན་པོ་དོན་འགྲུབ་ལ་ནད་ཚ་ཞིག་བྱུང་། རིམ་གྱིས་མལ་སར་ལྷུང་དེ་ཟ་མ་ཡང་ཟ་མ་ཐུབ་པར་ཉིན་མ་ཁ་ཤས་ཤིག་སོང་། སྐབས་དེར་བློ་བཟང་དང་མགོན་སྐྱབས་ཡོད་སའི་ཟ་ཁང་ནས་སྨན་ཁང་ཆེན་པོ་ཞིག་ལ་ཐག་ཉེ་ཡིན་སྟབས། རྒན་རྒོན་གཉིས་ཀྱང་དེ་རུ་གནས་སྤོས། བློ་བཟང་གིས་རྒན་པོ་དོན་འགྲུབ་ལགས་ལ་རང་གི་ཕ་རྒན་བཞིན་དུ་ཞབས་ཞུ་བྱས་པ་དང་རྐུབ་ཀྱི་བཙོག་པ་ལ་སོགས་གཙང་མ་བཟོས། བློ་བཟང་གིས་རྒན་པོ་དོན་འགྲུབ་ཀྱི་གནས་སྟངས་སྐྱོ་རུ་སོང་བ་དང་སེམས་མ་བདེ་བར་རང་གི་ཕྲེང་བ་བླངས་དེ་མོ་ཞིག་བཏབ།
མོ་ནང་དུ་འབབ་པ་ནི་རྒན་པོ་དོན་འགྲུབ་ཚེ་འདི་དང་བྲལ་རྒྱུ་ཡིན་པ་དེ་ཡིན་སྟབས། བློ་བཟང་གིས་ནང་མི་གཅིག་ལ་ཡང་དེའི་བསྐོར་བཤད་རོགས་མ་ཆོད་པར་རང་གི་གྲོགས་པོ་མགོན་སྐྱབས་ལ་གསང་བའི་སྒོ་ནས་རྒན་པོ་དོན་འགྲུབ་ད་རེབས་གསོན་ཐུབ་ཀྱི་མི་འདུག་ཚུལ་རང་གི་མོ་ལ་བབས་ཚུལ་བཤད།
རྒན་པོ་དོན་འགྲུབ་ནས་ཉིན་རེ་ནས་ཉིན་རེར་ཇེ་སྡུག་དུ་ཕྱིན་སྟབས། བློ་བཟང་གིས་ཨ་ཅག་ཚེ་འཛོམ་ལ་སྐད་ཆ་གསལ་བོ་ཞིག་མ་བཤད་ཀྱང་། ད་ནི། བུ་མོ་གཉིས་ལ་སྐད་བཏང་ན་ཡག་ས་རེད། དེ་མིན་སང་ཉིན་ནངས་ཉིན་ཞིག་ལ་པ་ལགས་དོན་འགྲུབ་གློ་བུར་དུ་རྐྱེན་འདས་སུ་སོང་བ་ཡིན་ན། བུ་ཕྲུག་དག་གི་ཚེ་བཀང་བོར་ཁྱེད་རང་གི་སྟེང་ལ་ཁོང་ཁྲོ་སྐྱེ་ངེས་ཡིན་པ་སོགས་གནས་ལུགས་མང་བོ་ཞིག་བཤད་མཐར། ཨ་ཅག་ཚེ་འཛོམ་ཁ་པར་ཁང་ཞིག་དུ་རང་གི་བུ་མོ་གཉིས་ལ་ཁ་པར་གཏོང་དུ་འགྲོ་ཞོར་ལ་བློ་བཟང་ཁྱེད་རང་གི་བལྟས་པ་ཡིན་ན་བུ་མོ་ཆེ་བ་ཕྱི་རྒྱལ་དུ་ཡོད་པ་དེར་ཡིན་གཅིག་མིན་གཅིག་ཡོང་དགོས་པར་བཤད་དགོས་ཀྱི་འདུག་གམ།
བློ་བཟང་གིས་ང་རང་གི་ལྟ་ཚུལ་ཡིན་ན་ད་ལྟ་རང་སོང་ནས་ཁ་པར་བརྒྱབ་དེ་གང་མགྱོགས་ཇི་མགྱོགས་ངང་དུ་སླེབས་ཐུབ་པ་བྱས་ན་མ་གཏོགས་གནས་ཚུལ་ཡག་པོ་མི་འདུག་ཟེར་ནས་བཤད་ན་ཡག་གི
བུ་མོ་གཉིས་ཀྱི་ནང་ནས་ཆུང་བ་བསྟན་འཛིན་ཚེ་འཚོ་ནི་ལྡི་ལུ་ནས་གནམ་གྲུར་བསྡད་དེ་ཕྱིར་ཉིན་ཞོགས་པ་སྔ་བོ་བློ་བཟང་གི་ཟ་ཁང་ནང་དུ་སླེབས་པ་དང་། པ་ལགས་ག་འདྲའི་འདུག་ཟེར་ནས་གདོང་ལ་སྐྱོ་ཉམས་ཤིག་དང་བཅས་བློ་བཟང་ལ་དྲིས།
ཉིན་གཉིས་ཀྱི་རྗེས་སུ་བུ་མོ་ཆེ་བ་ཕྱི་རྒྱལ་དུ་ཡོད་པ་དེ་ཡང་འབྱོར་ནས་བདུན་ཕྲག་གཅིག་ལྷག་གི་རིང་དུ་ཟས་ཁམ་བཀང་ཀྱང་ཟ་མ་ཐུབ་པའི་རྒན་པོ་དོན་འགྲུབ་ཡོད་སའི་སྨན་ཁང་དུ་བཟའ་མི་འཁོར་དང་བཅས་འཛོམ་ན་ཡང་། ཕ་རྒན་ཡོད་སའི་སྨན་ཁང་ནི་ཆེས་དམིགས་གསལ་གྱི་སྨན་ཁང་ཞིག་ཡིན་སྟབས། མི་གཅིག་རེ་མ་གཏོགས་ནང་དུ་སོང་མི་ཆོག་ལ། ནང་དུ་སོང་ཡང་། ཕ་རྒན་གྱི་གདོང་ལ་བལྟ་བ་ལས་ཕ་རྒན་གྱིས་ཁོང་ཚོ་སུ་ལ་ཡང་ཁ་བརྡ་བྱེད་མི་ཐུབ། རྒན་པོ་དོན་འགྲུབ་ཀྱི་ལུས་ཡོངས་སུ་འགྱིག་ཁབ་མི་ཉུང་བ་ཞིག་བཙུགས་ཡོད་པ་དེ་དག་ཁ་ཤས་ཤིག་ནི་བཙོག་ཆུ་འཐེན་བྱེད་དང་། ཁ་ཤས་ནི་ཟ་མའི་ཚབ་དུ་ཕུང་བོའི་ནུས་པ་གསོ་བྱེད་ཡིན་པ་རེད།
བློ་བཟང་གིས་རང་གི་གྲོགས་པོ་མགོན་སྐྱབས་ལ་དེ་རིང་ཟ་ཁང་གི་སྒོ་ཕྱི་དྲོ་ཆུ་ཚོད་ལྔ་བ་མ་གཏོགས་ཕྱེ་ཆོག་གི་མི་འདུག དེའི་བར་དུ་ང་རང་རྒན་པོ་དོན་འགྲུབ་ཡོད་སར་སོང་ནས་གཅིག་བལྟས་དེ་ཡོང་ཞེས་བཤད་དེ་གླ་བྱེད་རླངས་འཁོར་ཆུང་ཆུང་ཞིག་བཀག་ནས་རྒན་པོ་དོན་འགྲུབ་དང་བཟའ་མི་ཚང་མ་ཡོད་སའི་སྨན་ཁང་གི་ཕྱོགས་སུ་ཕྱིན།
བློ་བཟང་སྨན་ཁང་དུ་སླེབས་དུས། གསར་དུ་འབྱོར་མ་ཐག་པའི་བུ་མོ་ཆེ་བ་དང་ནང་མི་ཚང་མ་སྨན་ཁང་གི་ཞབས་དུ་སྐུ་མགྲོན་འདུག་ས་དེར་བསྡད་ནས་ཁོ་མོ་ཡུན་རིང་ལ་མ་ཐུག་པའི་གནས་ཚུལ་བསྐོར་དང་། ཕྱི་རྒྱལ་གྱི་གནས་ཚུལ་བསྐོར་སོགས་གླེང་དེ་བསྡད་ཡོད་པ་དེར་བློ་བཟང་གིས་མཐོང་མ་ཐག འདི་ཚོ་ལ་སྡུག་བསྔལ་ཞིག་ཆེ་ཡོད་འདོད་པའི་ངང་ཚུལ་ཞིག་དང་བཅས། ཨ་ཅག་ཚེ་འཛོམ་ལ་རྒན་པོ་དོན་འགྲུབ་ཀྱི་གམ་དུ་སུ་ཡོད་ཅེས་དྲིས།
ཨ་ཅག་ཚེ་འཛོམ་གྱིས་ད་ལྟ་ནང་དུ་འགྲོ་ཆོག་གི་མི་འདུག སྒོ་འགྲམ་དུ་རྒན་པོ་སངས་རྒྱས་ཀྱི་སྲུང་དེ་བསྡད་ཡོད་པ་རེད། ང་རང་ལ་ད་ལྟ་རང་རྡ་རམ་ས་ལ་ནས་མོ་བཟང་གི་ཞབས་བརྟན་མང་བོ་ཞིག་འདུག དེ་ཚོ་ཚང་མ་ད་ལྟ་རང་ཁ་པར་བཏང་ནས་འབྲས་སྤུངས་ལ་བཅོལ་ཚར། པ་ལགས་ཀྱི་ཚེ་སྲོག་ལ་སྐྱོན་ཡོད་ས་མ་རེད། དོ་ནུབ་འདི་ནས་བརྟག་དཔྱད་ཀྱི་འབྲས་པུ་བཟང་བོ་ཞིག་མ་ཐོན་ན། མྱུར་སྐྱོབས་གཅེན་འཕུར་གནམ་གྲུ་ཞིག་དུ་བཞན་ནས་མངའ་སྡེ་ཆེ་ས་ཞིག་ལ་འཁྱེར་རྩིས་ཡོད་སོགས་མང་བོ་ཞིག་བཤད་པ་དེར་ཉན་རྗེས། བློ་བཟང་སྐེས་འཛེགས་རྒྱུད་དེ་རྒན་པོ་དོན་འགྲུབ་ཡོད་སའི་ཁང་མིག་ནང་དུ་འཛུལ།
བློ་བཟང་གིས་རྒན་པོ་དོན་འགྲུབ་ཀྱི་ངང་ཚུལ་དེ་དག་རིག་ནས་སེམས་གཏིང་ནས་སྐྱོ་བ་ཚད་མེད་ཅིག་སྐྱེ་ཞོར་དུ། མི་ཟེར་བ་འདི་ལ་ཡོང་རྒྱུ་འདི་ལས་འགྲོ་ས་འདི་ལས་གང་ཡོད། ཟླ་གཅིག་གི་ཡར་སྔོན་དུ་རང་གི་བཟའ་མི་བཀང་བོའི་ཆེད་དུ་ཚེ་མཇུག་ལ་ངལ་གསོ་ཞིག་ཀྱང་བྱེད་མ་ཐུབ་པར་དགུང་ལོ་དོན་གཉིས་ལ་སོན་ཡང་འདུག་ཁོམ་མེད་པར་སྒོར་མོའི་ཆེད་དུ་རྒྱུགས་པ་རེད། དེ་རིང་འདི་ན་འཇིག་རྟེན་འདི་དང་གྱེས་ཕྱག་འབུལ་རྒྱུར་སྒུག་ནས་རང་གི་སྡུག་བསྔལ་ཡོད་ཚད་རང་ཉིད་གཅིག་བུའི་མྱོང་དེ་བསྡད་ཡོད་པ་རེད་སྙམ་ཞོར་དུ། རྒན་པོ་དོན་འགྲུབ་ཀྱི་རྣ་བའི་གམ་དུ་རང་གི་ཁ་སྤྱར་ནས།
ཨ་ཁུ་དོན་འགྲུབ་ལགས། ད་ནི་འཇིག་རྟེན་འདི་ལ་ཞེན་ཆགས་མ་བྱེད། ངེད་ཅག་བོད་པ་ཚང་ལ་འདི་ཕྱིའི་གཉིས་ཀྱི་མགོན་སྐྱབས་ཤིག་ཡོད་པ་ནི་༧རྒྱལ་བ་བསྟན་འཛིན་རྒྱ་མཚོ་ཡིན་པ་རེད། ཁྱེད་རང་གི་སེམས་གནད་དུ་བཞོག་དང་། ངས་ཁྱེད་རང་ལ་༧རྒྱལ་བ་རིན་པོ་ཆེ་ཚང་གི་སྐུ་བསྟོད་ཚིག་བཞི་ཞིག་འདོན་ཟེར་ནས། འཇམ་དཔལ་རྡོ་རྗེའི་ངག་ལ་དབང་སྤྱོར་ཞིང་།། བློ་གྲོས་བུམ་བཟང་ཡེ་ཤེས་བདུད་རྩིའི་བལྟམ།། བསྟན་འཛིན་རྒྱ་ཆེན་རོལ་མཚོ་མཛེས་པའི་རྒྱན།། འཕགས་མཆོག་ཕྱག་ན་པདྨོར་གསོལ་བ་འདེབས་ཅེས་སྤྱོར་ཚར་མ་ཐག རྒན་པོ་དོན་འགྲུབ་ཀྱིས་སྐད་ཆ་ཚིག་གཅིག་ཀྱང་བཤད་མི་ཐུབ་མོད། མིག་ཟུང་གཉིས་ལས་མིག་ཆུ་ཆུ་བཞུར་བཞུར་ངང་མགོ་བོ་བློ་བཟང་གི་ཕྱོགས་སུ་གཡུགས་གཡུགས་བྱས།
མུ་འགོད།
བློ་བཟང་ལས་ངན་པོ་འདི་ཕྱི་ནུར་མེད་པར་འགྲོ་བཞིན་འདུག་ལ། ངས་ཀྱང་ཤུ་རེ་བྱོས་དེ་ཁོང་གི་གཏམ་རྒྱུད་སྤུན་ཟླ་དག་ལ་གླེང་བཞིན་ཡོད། ག་ལེར་ཀློག་དང་ངས་ཀྱང་ག་ལེར་འབྲི།
བཀླགས་ཟིན་རྒད་པོ་དུ་བདེ་བ་ཅན་ན་སྐྱེ་བར་ཤིག
ཁྱེད་ཀྱི་དངོས་སྒྲུང་འདི་ངོ་མ་དགའ་བོ་འདུག
ད་ཆ་སྒྲུང་རིང་ཞིག་གི་ངོ་བོར་བསླངས་སོང་།
ཡིད་རངས་ཆེན་པོ་ཡོད།
ད་ཆ་ཞིབ་ཀློག་བྱེད་པའི་དུས་ཁོམས་མི་འདུག
ཡིན་ནའང་ཁྱེད་ཀྱིས་འདི་ད་རུང་མཇུག་སྐྱོང་ནས་འགྲོ་རོགས་ཞུ་རྒྱུ་ཡིན།
ངོ་མ་ཁྱེད་ཀྱི་འདིའི་ཐཽག་འགན་ཞིག་ཁྱེར་ཀྱིན་འདུག་བསམ་པའི་ཡིད་སྨོན་དང་དགའ་བ་ཡོད།
ཧཧཧ
གྲྭ་བ་མིན་སྦྱིན་བདག་དགོས་
འདི་ནི་དེང་སང་བཙན་བྱོལ་སྤྱི་ཚཽགས་ནང་གི་གསང་གཏམ་ཞིག་གམ་
འགྲོ་བཞིན་པའི་འཚོ་བ་ཞིག་མ་རེད་དམ།
ཧཧཧ
བཟང་གི་མུ་མཐུད་དུ་ཕྲིས་ཡག་པོ་འདུག་ བློ་བཟང་ནི་ངོ་མ་བུ་རབས་ཞིག་རེད་ འོན་ཀྱང་མགོན་སྐྱབས་ རེད་རེད་འཇིག་རྟེན་ན་མི་འདི་འདྲའི་མང་རྒྱུ་རེད་།
གལ་སྲིད་བློ་བཟང་ལྟ་བུ་བཙན་བྱོལ་སྤྱི་ཚོགས་ཡོད་དོ་ཅོག་༸གོང་ས་མཆོག་གི་འབངས་མི་ཚད་ལྡན་ཞིག་བཟོ་ཐུབ་ན་མ་འོངས་བར་ཕྱི་ཕྱོགས་བོད་པ་འཛང་གླིང་མི་མང་གི་གཅེས་ཕྲུག་ཏུ་འགྱུར་ངེས་པས། ང་ཚོའི་སྟོབས་ཤུགས་ལ་སུ་ཞིག་གིས་འགྲན་ཟླ་ཐུབ་ཀྱི་མ་རེད་འདོད་བྱུང་། བློ་བཟང་ལྟ་བུ་དྲང་བདེན་ཅན་སྤྱི་ཚོགས་ཆུང་ངུ་འདིའི་ནང་ན་ག་ཚོད་ཡོད་ན གལ་སྲིད་ཁོ་པོ་་བོད་ནང་དུ་ཕྱིར་ལོག་ན་བོད་པའི་ནོར་བུ་ཞིག་འཕྲོ་བརླགས་སུ་འགྲོ་བའི་ཉེན་ཁ་འདུག