་་་་་་་་་དངོས་སྒྲུང་འདི་བདག་ལ་རྒྱུས་མངའ་ཡོད་མཁན་གྱི་གྲྭ་བ་ཞིག་གི་ལོ་རྒྱུས་ཡིན།
ཨ་ཅག་ཚེ་འཛོམ་གྱིས་རང་གི་བུ་མོ་བསྟན་འཛིན་ཚེ་འཚོ་ཁྲིད་ནས་བློ་བཟང་གི་སར་འབྱོར་ནས། ངེད་གཉིས་བསྟན་འཛིན་ཚེ་འཚོ་ལ་ཉིན་གྲངས་བཅུ་ལྷག་ཞིག་ལ་གུང་གསེང་ཡོད་པ་དང་བསྟུན་ནས་འདིར་ཁྱེད་རང་ལ་ལྟ་རུ་ཡོང་བ་ཡིན། ཁྱེད་རང་གི་དཀའ་ལས་ཁག་མ་སོང་ངམ། འདི་ཁྱེད་རང་གི་ལག་སྐྱེས་ཤིག་ཡིན་ཟེར་ནས་བློ་བཟང་ལ་སྟོད་ཐུང་གསར་བ་ཞིག་བསྟན་འཛིན་ཚེ་འཚོ་ཡིས་རྒྱབ་ཁུག་ལས་བཏོན་ནས་བློ་བཟང་ལ་སྤྲད།
བློ་བཟང་གིས་རང་གི་ཨ་མའི་བཤད་པའི་སྐད་ཆ་དེ་དག་ལ་བསམ་བློ་གཏོང་ཞོར་དུ་ལས་ཀ་བྱེད་ཀྱི་ཡོད་ལ། ཉིན་མོ་དེ་དག་གི་རིང་དུ་བློ་བཟང་ལ་གཏན་ནས་སུན་སྣང་ཞིག་ཡོང་གི་མེད། བསྟན་འཛིན་ཚེ་འཚོ་ཉིན་ལྟར་ཡོང་ནས་ཁོ་རང་ལ་ཟ་ཁང་ནང་ནས་རོགས་རམ་བྱེད་ཀྱི་ཡོད་ལ། བསྟན་འཛིན་ཚེ་འཚོ་ཡང་བློ་བཟང་དང་དངོས་ནས་འདྲིས་པོ་ཆགས་ཀྱི་ཡོད་པ་དེར་རྒྱུ་མཚན་ཞིག་ཡོད་པ་ནི། བློ་བཟང་གིས་བསྟན་འཛིན་ཚེ་འཚོ་ལ་བསྟུན་ཤེས་ཀྱི་ཡོད་པ་མ་ཟད། ཁོ་གཉིས་ཀྱི་ལྷན་དུ་ཁ་རོག་གེར་ཐ་མག་ལྷན་དུ་འཐེན་བཞིན་ཡོད་པ་དེ་ནི་ཁོ་གཉིས་ལ་མཚོན་ན་རྒྱུན་ལྡན་ལྟ་བུ་ཞིག་ཡིན་ཡང་། བསྟན་འཛིན་ཚེ་འཚོ་ཡིས་ཨ་མའི་རང་གི་བུ་མོས་ཐ་མག་འཐེན་གྱི་ཡོད་པ་གཏན་ནས་མི་ཤེས།
ཟ་མ་ཟ་དུས་ཀྱང་། བསྟན་འཛིན་ཚེ་འཚོས་བློ་བཟང་གི་ལྷན་དུ་སྡེར་མ་གཅིག་གི་ནང་དུ་ཟ་རྒྱུར་དགའ་བོ་བྱེད་ཀྱི་ཡོད་པ་དེས། གྲྭ་ལོག་བློ་བཟང་གི་སེམས་པ་འཁྲུལ་དུ་བཅུགས་ཡོད་ཀྱང་། བསྟན་འཛིན་ཚེ་འཚོ་ལ་མཚོན་ན་དེ་ནི་རྒྱུན་ལྡན་གྱི་རང་གི་གྲོགས་པོ་དག་ལ་བྱེད་སྲོལ་ཞིག་ཡིན་པ་རེད།
བློ་བཟང་གིས་རང་གི་ཕ་ཡུལ་ལ་ཁ་པར་བཏང་བ་དང་། རང་གི་ཨ་མ་ངུས་དེ་ཕྱིར་ཕ་ཡུལ་དུ་ཡོང་རྒྱུར་རེ་སྐུལ་བྱས་པ་སོགས་ཨ་ཅག་ཚེ་འཛོམ་ལ་ཞིབ་དུ་བཤད། ཨ་ཅག་ཚེ་འཛོམ་གྱིས་བློ་བཟང་ལ་རང་གིས་ག་རེ་བསམ་བཞིན་ཡོད་ཅེས་དྲིས།
བློ་བཟང་གིས་རང་ཉིད་ནི་ཕ་ཡུལ་དུ་ལས་སླ་བོ་ཞིག་ལོག་འདོད་མེད་པ་མ་ཟད། ལོག་བསམ་ཡང་དེ་འདྲའི་ལས་སླ་བོ་ཞིག་མིན་པའི་རྒྱུ་མཚན་དག་གསལ་བོ་བཤད་པ་དང་། རང་ཉིད་མུ་མཐུད་དུ་རྒྱ་གར་དུ་འདུག་རྩིས་ཡོད་བསྐོར་སོགས་རང་གི་སེམས་ལ་གང་ཤར་དག་ནས་ཟུར་ཆ་གཅིག་ཨ་ཅག་ཚེ་འཛོམ་ལ་བཤད།
ཨ་ཅག་ཚེ་འཛོམ་གྱིས་བློ་བཟང་གི་སྐད་ཆ་དག་ཞིབ་དུ་ཉན་རྗེས་སུ་མོ་རང་གིས་བློ་བཟང་ལ་དང་བླང་གིས་རྒྱ་གར་མི་སེར་ལག་ཁྱེར་བཟོ་རྒྱུ་བྱས་པ་དང་། མི་སེར་ལག་ཁྱེར་ཡོད་ན་ཉིན་ཞིག་ཕྱི་རྒྱལ་གང་རུང་དུ་འགྲོ་ན་སྟབས་བདེ་ཡིན་རབས། རང་ཉིད་ཀྱི་ནང་མི་ཡོངས་ལ་རྒྱ་གར་མི་སེར་གྱི་ལག་ཁྱེར་བཟོས་ཡོད་བསྐོར། ཁྱེད་རང་གིས་ཀྱང་འདྲ་དཔར་ཞིག་སང་ཉིན་རྒྱག་དུ་སོང་དང་། ངས་ངོ་ཤེས་རྒྱ་གར་ལག་ཁྱེར་ལས་ཁུང་ནང་གི་དེར་བཤད་ཆོག བཟོ་ཐུབ་ངེས་རེད།
སྟོང་ཕྲག་བཅོ་ལྔ་ཞིག་གནས་ངེས། དེ་ངས་སྤྲོད་ཆོག
དེ་འདྲའི་གོང་ཆེན་པོ་སྤྲོད་དགོས་པ་རེད་དམ།
དེ་ནི་གོང་ཆུང་ཆུང་བྱས་པ་རེད། ང་ཚོ་ངོ་ཤེས་ཡིན་པས།
དེས་ན་ས་ཆ་གཞན་ནས་བཟོས་པ་ཡིན་ན་གོང་དེ་འདྲ་སྤྲོད་དགོས་པ་རེད་དམ།
ས་ཆ་གཞན་ནས་དེ་ལས་ཀྱང་གོང་ཆེན་པོ་རེད་ལ། བཟོ་དགོས་ན་ལས་སླ་བོ་མེད།
བློ་བཟང་གིས་དེ་འདྲ་ཞིག་ཡིན་ན་རང་ཉིད་ལ་རྒྱ་གར་མི་སེར་ལག་ཁྱེར་མ་བཟོས་ན་འགྲིག་ཚུལ་དང་། དེང་སང་ཁང་བ་གསར་བཟོ་བྱེད་ཀྱི་ཡོད་པའི་ཁྱེད་རང་ལ་དཀའ་ངལ་ཡོད་ངེས་རེད་ཅེས་བཤད་ཀྱང་། དེ་ཙམ་གྱིས་སྐྱོན་ནི་མ་རེད་བཅས་ལག་ཁྱེར་བཟོ་རྒྱུ་བྱས་པ་དང་ཕྱིར་ཉིན་རྒྱ་གར་བ་ཞིག་ལ་ཁོ་རང་གི་འདྲ་དཔར་དང་ཧིན་སྒོར་གཅིག་སྟོང་སྔོན་དུ་སྤྲད་པ་རེད།
བློ་བཟང་དང་བསྟན་འཛིན་ཚེ་འཚོ་། ཨ་ཅག་ཚེ་འཛོམ་ཁོ་གསུམ་གྱིས་ཁ་ལག་ཟ་བཞིན་པའི་སྐབས་ཤིག་ལ། ཨ་ཅག་ཚེ་འཛོམ་གྱིས། བསྟན་འཛིན་ཚེ་འཚོ་ལ་རྒན་པོ་ཞིག་དགོས་ཟེར་གྱི་འདུག ངས་བལྟས་ན་རྒན་པོ་འདི་ན་འདུག་ཟེར་ནས་བློ་བཟང་ལ་ལྟ་ཞོར་དུ་བཤད་དུས། བློ་བཟང་གིས་སྐད་ཆ་ཚིག་གཅིག་ཀྱང་མ་བཤད་པར་ཁ་རོག་གེར་སྒོ་ཕྱི་ལ་བུད།
དེ་རིང་ཁྱེད་གཉིས་ཕྱི་རུ་འཁྱམ་དུ་སོང་། བསྟན་འཛིན་ཚེ་འཚོས་བཤད་ན་གློག་བརྙན་ཡག་པོ་ཞིག་གསར་དུ་སླེབས་ཡོད་རབས་འདུག ང་དེ་རིང་ཟ་ཁང་ནས་བསྡད་ཆོག ཁྱེད་གཉིས་ལྷོད་ལྷོད་ཅིག་འཁྱམ་ནས་ཤོག་ཟེར་ཞོར་དུ། བློ་བཟང་གི་ལག་དུ་ཧིན་སྒོར་ལྔ་བརྒྱ་ཞིག་བཞག
ཨ་ཅག་ཚེ་འཛོམ་གྱིས་དངོས་ནས་བློ་བཟང་ཁོ་ཚང་གི་བུ་མོ་ཆུང་བ་དང་འགྲིག་སོང་ན་འདོད་ཀྱི་ཡོད་པའི་བསྐོར་ཡང་མི་ཉུང་བ་ཞིག་བློ་བཟང་ལ་བཤད་ཀྱང་། བློ་བཟང་གིས་དེང་སང་གི་ཕོ་གསར་མོ་གསར་དག་ལ་རང་རང་གི་བསམ་ཕྱོགས་དང་དགའ་ཕྱོགས་འཐད་ཕྱོགས་རེ་ཡོད་པས་ཁྱེད་རང་གི་སེམས་འཁྲལ་བྱེད་མི་དགོས་པ་དང་། ཉིན་ཞིག་བསྟན་འཛིན་ཚེ་འཚོ་ཡིས་རང་ཉིད་ཀྱི་འདོད་ས་དང་འཐད་ས་ཞིག་འཁྲིད་དེ་ཡོང་ངེས་ཟེར་ནས་ལན་རྐྱང་རྐྱང་འདེབས་ཀྱི་ཡོད་པ་རེད།
བསྟན་འཛིན་ཚེ་འཚོ་ཡང་རང་གི་ཨ་མ་དང་འགྲོག་ནས་ཕྱིར་ལྡི་ལུར་འགྲོ་ཁར། ཁྱེད་རང་ལྡི་ལུར་ཡོང་དུས་ཡིན་གཅིག་མིན་གཅིག་ང་རང་ལ་ཁ་པར་རྒྱོབས་ཤོག ངས་ཁྱེད་རང་ལ་མཚན་ཚོགས་ཞབས་བྲོ་ཞིག་ལ་འཁྲིད་ཆོག་ཟེར་ནས་བཤད་པ་ལྟར་བློ་བཟང་གིས་ཀྱང་ཁས་ལེན་བྱས།
ཨ་ཅག་ཚེ་འཛོམ་གྱིས་མི་རིང་བར་རྒྱ་གར་བ་དེ་ཡོང་ངེས་ཡིན། དེ་དུས་ཁྱེད་རང་གི་འདི་ནས་ཧིན་སྒོར་གཅིག་ཁྲི་བཞི་སྟོང་དེ་སྤྲོད། ཡིན་ཡང་། ལག་ཁྱེར་ཚུར་མ་སྤྲད་བར་དུ་སྒོར་མོ་གཅིག་ཀྱང་མ་སྟེར་ཟེར་ནས་ཁ་བརྡ་བྱས་དེ་ཁོ་གཉིས་ཕྱིར་ལྡི་ལུར་བུད་སོང་།
བློ་བཟང་གིས་སེམས་པ་དངོས་ནས་ཉིན་རེ་ལས་ཉིན་རེ་མི་སྐྱིད་པ་ཞིག་ཆགས་ཀྱི་ཡོད་པ་རེད། གང་ཡིན་ཟེར་ན། ཟ་ཁང་དེ་ནས་སྔོན་ཆད་དང་མི་འདྲ་བར་ཆང་དེ་ཡང་གཙང་མ་མི་ཚོང་བར་རྒྱ་གར་ལས་ཀ་བ་ཞིག་ལ་ནང་དུ་ལྐོག་ནས་རྫུན་མ་བཟོ་རུ་འཇུག་པ་ཡོད་པ་རེད། བློ་བཟང་གིས་ད་ནི་ཨ་ཅག་ཚེ་འཛོམ་ལ་འདིའི་བསྐོར་ཞིབ་དུ་བཤད་ནས་ཁོང་ཚོས་སྔར་རྒྱུན་ལྟར་ཆང་གཙང་མ་ཞིག་བཙོང་བ་ཡིན་ན་རང་ཉིད་མུ་མཐུད་དུ་དེ་ནས་བསྡོད་རྒྱུ་དང་། དེ་མིན་རང་ཉིད་ཀྱིས་ད་ནི་མུ་མཐུད་དུ་ནག་ཉེས་ཀྱི་སྟེང་ལ་ཉེས་པ་ལྕི་མོ་དེ་འདྲ་གཏན་ནས་མི་གསོག་པའི་དམ་བཅའ་བཞག
ཨ་ཅག་ཚེ་འཛོམ་ལ་ཅི་ལྟར་གནས་ལུགས་བཤད་ཀྱང་། ཁོ་མོས་དེང་སང་ས་ཁུལ་དེ་ནས་ཆང་བཙོང་མཁན་ཚང་མས་དེ་ལྟར་བྱེད་ཀྱི་ཡོད་པ་ལྟར། ཁོང་ཚོས་ཀྱང་དེ་ལྟར་མ་བྱས་པ་ཡིན་ན་ཁེ་བཟང་ཡག་པོ་ཟ་མི་ཐུབ་རབས་བཤད་དེ་བློ་བཟང་གི་རེ་སྐུལ་ལ་དང་ལེན་མ་བྱས་པ་དང་། ཁྱེད་རང་དངོས་ནས་བུ་ཡག་པོ་ཞིག་རེད། ངས་ཁྱེད་རང་ལ་ཁག་པོ་ཡོད་པ་ཤེས་ཀི ཁྱེད་རང་གི་སེམས་འཁྲལ་མ་བྱེད། མི་རིང་བར་བུ་དང་མནའ་མ་གཉིས་ཁྱེད་རང་སར་ཡོང་དུ་འཇུག དེ་དུས་ཁྱེད་རང་གི་ལས་མཚམས་འཇོག་འདོད་ཡོད་པ་ལྟར་བྱས་ན་འགྲིག་གི་རེད། ཨོ་ཁྱེད་རང་གི་ལག་ཁྱེར་རེག་སོང་ངམ།
བློ་བཟང་གིས་ད་དུང་རེག་མ་སོང་། ད་ནི་ང་རང་གི་བསམ་བློ་མང་བོ་བཏང་བ་ཡིན། ང་རང་ལ་དངོས་ནས་རྒྱ་གར་གྱི་མི་སེར་ལག་ཁྱེར་དེ་དགོས་དོན་མི་འདུག་ལ། དེང་སང་ཁྱེད་ཚང་ལ་སྒོར་མོའི་དཀའ་ངལ་ཡོད་ངེས་རེད། ང་རང་རྗེས་ཕྱོགས་ཕྱི་རྒྱལ་གང་རུང་ཞིག་དུ་འགྲོ་སྲིད་ཀྱང་། སྐྱབས་བཅོལ་བའི་ཕྱི་བསྐྱོད་ལག་ཁྱེར་བེད་སྤྱོད་བྱས་པ་ཡིན་ན་འགྲིག་གི་རེད། ད་ནི་ཁྱེད་རང་གིས་རྒྱ་གར་བ་དེར་ཤོད་ལ། བཟོ་མི་དགོས་པར་ཞུ་རོགས་གནོང་། གཅིག་བྱས་ན་ཁྱེད་རང་ལ་ཧིན་སྒོར་གཅིག་སྟོང་དེ་ཕྱིར་མི་སྤྲོད་ན་ཐང་།
ཨ་ཅག་ཚེ་འཛོམ་གྱིས། རེད་རེད། དངོས་ནས་ཁྱེད་རང་གིས་དུས་རྟག་དུ་མི་གཞན་ལ་བསམ་བློ་རྐྱང་རྐྱང་གཏོང་གི་འདུག དངོས་ནས་དེང་སང་སྒོར་མོའི་དཀའ་ངལ་ཡང་ཡོད་པ་རེད། ཁྱེད་རང་ལ་དངོས་ནས་མི་དགོས་ན་ངས་རྒྱ་གར་བ་དེར་བཤད་ཆོག་གི་རེད། གལ་སྲིད། རྗེས་ཕྱོགས་དགོས་མཁོ་བྱུང་ན་དེ་དུས་བཟོ་ཆོག་གི་རེད་ཅེས་བཤད།
བློ་བཟང་གིས་ཨ་ཅག་ཚེ་འཛོམ་གྱིས་ལན་དེ་དག་ལ་ཉན་རྗེས་ཀྱི་ཉིན་མ་དེ་དག་གི་རྗེས་སུ་རང་གི་ཕ་ཡུལ་དུ་ཁ་པར་ཡང་མི་ཉུང་བ་ཞིག་བཏང་བ་མ་ཟད། རང་གི་ཕ་རྒན་དང་ལྷན་དུ་ཡང་རང་གི་དམིགས་ཡུལ་སོགས་མི་ཉུང་བ་ཞིག་ཁ་པར་བརྒྱུད་དེ་ཕ་རྒན་ལ་ཞིབ་དུ་བཤད་པ་ལྟར། ཕ་རྒན་གྱིས་ཀྱང་བློ་བཟང་ལ་རྒྱབ་སྐྱོར་བྱེད་ལུགས་སོགས་ཞིབ་དུ་བཤད་སྟབས། བློ་བཟང་གི་སེམས་པ་ལྷོད་དུ་འབབ་ནས་ཨ་ཅག་ཚེ་འཛོམ་གྱི་བུ་དང་མནའ་མ་གཉིས་ཁོ་རང་གི་སར་ཡོང་རྒྱུར་སྒུག་ནས་བསྡད་ཡོད་པ་རེད།
མུ་འགོད།
སྤུན་ཟླ་དག་གི་འདི་ལྟར་གཟིགས་སྐྱོང་གནང་བཞིན་འཁྱམས་པོ་གནས་མེད་འདིས་ཁ་ཕྱོགས་ཤིག་མེད་པར་གྲྭ་ལོག་བྱས་པའི་གྲུབ་འབྲས་སོགས་གང་ཡང་མེད་གླེང་མཁན་ཡང་བྱུང་མོད། རེད་དེ། ལས་ངན་འཁྱམས་པོ་འདིས་གང་ཞིག་རྙེད་འདོད་ཀྱི་གླེན་རྟགས་ཀྱི་སེམས་གཤིས་ཤིག་ཁོ་རང་གི་སེམས་ཁོང་དུ་ཡོད་ཁོ་ཐག་རེད་འདུག འགྲོ་ཞོར་དུ་ལམ་ནོར་དུ་འགྲོ་བཞིན་པ་དང་། བསམ་ཞོར་དུ་ནོར་འཁྲུལ་གྱི་གཞིགས་སོགས་རེ་ཟུང་གིས་ཁོ་རང་གང་དུ་འདེད་མིན་འདི་ཉིད་དངོས་ནས་དཀའ་བ་ལའང་།
བློ་བཟང་ལ་ཤོད་ལ གདམ་ཤེས་ན་གདམ་པོའི་དགའ་མེད། གདམ་མ་ཤེས་གདམ་པོའི་སྡུག་མེད།
ཉིན་རྟག་པར་ཡར་ལངས་དུས་ནས་བློ་བཟང་གི་ག་རེ་བྱ་བཞིན་བསམ་ནས་སེམས་འཁྲལ་འདུག བུ་མོ་བསྟན་འཛིན་དང་སྒྲིགས་དང་ཨ་རོ་བཟང་ན་ཐང་ཤོད། མོ་གསར་མ་ཆུང་མར་མི་ལེན་ནས་ནོར་བུ་མཚོ་མ་རྒན་མ་ཞིག་གིས་ཅི་ཞིག་དགོས་རེད།
རེ་སྐུལ་ཡང་ཐོན་འདུག ཐེ་ཚོམ་གྱི་སྐད་བརྡ་ཡང་སླེབས་འདུག ད་ཡིན་ན་དངོས་སྒུང་འདིས་རྒྱུན་ཡང་ཆུ་བོ་བཞིན་བཞུར་རྒྱུན་རིང་བའི་ཀློགས་པ་པོའི་དུས་ཚོད་འདི་ཇི་ལྟར་ཨ་ཧཧ།
བོད།་་་་ཤ་ཁྲག་རུས་གསུམ་ལ་ཐུགས་རྗེ་ཆེ་ཞུས་ཡོད།
སྒྲུང་ནང་གི་མི་སྣ་བསྟན་འཛིན་ཚེ་འཚོ་དེ་ངའི་སྙིང་ཉེ་བའི་དྲ་གྲོགས་དེ་མ་ཡིན་ནམ། ང་ཡང་གྱ་ཚོམ་དུ་གྱུར།
བཀླགས་ཟིན།
དྲྭ་གྲོགས་ལགས། ཕྲན་གྱིས་འདི་ནས་ཉིད་ཀྱི་ཟིན་བྲིས་དང་འབྲེལ་མེད་ཅིག་གླེང་དགོས་བྱུང་སོང་ན་དེ་ལ་དགོངས་འགལ་མེད་པར་ཞུ།
སྐུ་ཉིད་ལ་རེ་བསྐུལ་ཞུ་རྒྱུ་ཞིག་ལ་ངེས་པར་སྐུ་ཉིད་གཡུ་མཚོན་གྱི་སྨྱུག་ལམ་ཞེས་པའི་ཟིན་བྲིས་དེའི་ནང་ལ་ཐེངས་གཅིག་ཕེབས་རོགས། དེའི་ནང་དུ་ཁ་བྱང་འཚོལ་བ་ཞེས་པའི་རེ་བསྐུལ་ཞིག་བཞག་ཡོད། རེ་བསྐུལ་དེར་མཐུན་འགྱུར་རོགས་རེམ་གང་ཡོང་ཞིག་གནང་རོགས་ཞུ། ཕྲན་གྱི་མྱུར་འཕྲིན་ཁ་བྱང་། yonbay@yahoo.comའདི་ཡིན། ཐུགས་རྗེ་ཆེ།