སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} ང་བརྒྱད།

བློ་བཟང་གིས་རང་གི་དྲིན་ཆེན་མ་ལོ་ལ། དོན་དག་གཞན་ག་རེ་ཡིན་ཡང་ངས་ཁས་ལེན་བྱས་པ་ཡིན་ན་འགྲིག་གི་ཡོད། དོན་དག་འདི་དངོས་ནས་ཨ་མ་ལོ་ལོ། ང་རང་ལ་ཨུ་ཚུགས་མ་བྱེད། ངས་དངོས་ནས་མི་ཟ་ཟེར་ནས་ལན་བཏབ་དུས། ཇ་མགོ་ནས་ཨ་མྱེ་བདེ་ཆེན་གྱིས། སྒྲོལ་མ་འཚོ། ཁོས་དངོས་ནས་དེ་འདྲ་ཞིག་བསམ་བསྡད་ཡོད་ན། ད་ཨུ་ཚུགས་མ་བྱེད། སྐྱུར་ར་ཐོངས་ཟེར་ནས་བཤད་དུས་སུ། ཨ་མ་སྒྲོལ་འཚོས། ཨ་མས་མ་ཁོ། དེས་ན་ཅུང་ཙམ་སྒུག འདི་ན་ཤ་མོག་དང་སྔོ་ཚལ་སྤུན་བཅས་ཡོད་པ་འདིས་ཁྱེད་རང་ལ་ཁ་ལག་ཞིག་བཟོ་ཟེར་ནས་ཨ་མ་སྒྲོལ་མ་འཚོ་བྲེལ་འཚུབ་དང་བཅས་དེ་རས་གུར་འོག་མའི་ནང་དུ་སྲི་མོ་ཡོད་སར་རྒྱུགས།

མཚན་མོར་དེར་བློ་བཟང་དངོས་ནས་བཤད་ན། ཕ་ཡུལ་དང་ཁ་བྲལ་ནས་ལོ་ངོ་མང་བོ་ཞིག་འགྲོ་བཞིན་ཡོད་ལ། དབྱར་སྐྱིད་འདི་གཏོང་མ་ཐུབ་པར་མི་ལོ་དུ་མ་ཞིག་འགོར་ཡོད་པ་ལྟར། རས་གུར་ནང་ནས་ཉལ་འདོད་ཡོད་པ་དེ་ནི་བཤད་མ་དགོས་པ་ཞིག་ཡིན་མོད། བན་སྡེ་འཚོས་ཁོ་རང་ལ་སང་དགོང་ཁ་པར་ཡོང་ཟེར་བ་དེ་དྲན་ནས། ཕ་མ་ཚོ། ཁོ་རང་རས་གུར་ནང་དུ་ཉལ་བ་ཡིན་ན་དངོས་ནས་གྲང་མོ་འདུག དེ་ལས་ཁང་བའི་ནང་དུ་ཉལ་དུ་འགྲོ་རྒྱུ་ཡིན་ཟེར་ནས་བཤད་དུས། ཚང་མས་ཁོ་རང་གི་བཤད་པ་དེར་ཁས་ལེན་བྱས་པ་ལྟར། བློ་བཟང་གིས་ཁོ་རང་གི་ནུ་བོའི་སྤག་སྤག་བཏང་ནས་ཨ་མྱེ་བདེ་ཆེན་རྒྱབ་དུ་གྱོན་ནས་ས་རུབ་ཁར་སྡེ་བའི་ཕྱོགས་སུ་ཆས།

དངོས་ནས་བཤད་པ་ཡིན་ན། བློ་བཟང་གིས་སྤག་སྤག་ཡག་པོ་ཞིག་གཏན་ནས་གཏོང་ཤེས་ཀྱི་མེད་པ་རེད། འོན་ཀྱང་། ཁོ་རང་གིས་ཤེས་ཀྱི་ཡོད་ཟེར་བ་དེར་ནང་མི་དག་གི་ཡིད་ཆེས་བྱས་དེ་ནུ་བོ་ཀླུ་འབུམ་རྒྱལ་གྱི་སྤག་སྤག་བརྫིག་པོ་དེ་ཡི་སྟེང་ནས་ཨ་མྱེ་བདེ་ཆེན་རྒྱབ་དུ་བཞག་ནས་སྡེ་བའི་ནང་དུ་དགོང་མོར་དེར་བདེ་བོར་འབྱོར་ན་ཡང་། ཕྱིར་ཉིན་ཞོགས་པ་སྔ་བོ་ཕྱིར་དབྱར་སྐྱིད་གཏོང་སའི་རྩྭ་ཐང་གི་གླིང་ཁ་དེར་འབྱོར་གྲབས་ཡོད་དུས། འཁྱོག་མཚམས་ཤིག་དུ་ས་དོང་ཞིག་ཡོད་པ་དེ་ནས་སྣུམ་དལ་ལྷོད་ཤོར་ནས་ས་ལ་བརྡབས་དེ་སྤག་སྤག་བརྫིག་པོ་དེ་ཡི་མདུན་གྱི་ཤེལ་སྒོ་ཡོངས་སུ་རྫོགས་པ་ཆག་པ་དང་། ཨ་མྱེ་བདེ་ཆེན་ཡང་ས་དོང་དེ་ཡི་འགྲམ་དུ་གཡུགས། ས་དོང་དེ་ནས་སྣུམ་དལ་ལྷོད་ཤོར་གྲབས་ཡོད་པའི་སྐབས་དེར། རྒྱབ་ལོག་ནས་ཨ་མྱེ་བདེ་ཆེན་གྱིས་་་་ ཨ་རོགས་ ཨ་རོགས་ཟེར་བཞིན་པའི་སྐད་ཆ་དེ་ཡི་མཇུག་མ་བསྡུས་གོང་དུ་ས་ལ་བརྡབས་པ་རེད།

ངང་ཚུལ་དེ། བློ་བཟང་གི་ཕ་རྒན་འཇིགས་གྲོལ་གྱིས་རས་གུར་གྱི་འདབས་ནས་སྒུག་ཡོད་པ་དེ་ནས་མཐོང་མ་ཐག རྒྱུགས་ནས་འོང་དེ་རང་གི་ཕ་རྒན་ཡར་ལ་སྐྱོར་བཞིན། ཨ་ཕ་ཁྱེད་རང་ལ་སྐྱོན་འདྲ་མ་བྱུང་ངམ་ཟེར་ཞོར། བློ་བཟང་ལ་ཅུང་བྱས་མེད་དམ།

བློ་བཟང་གིས་དགོད་ཞོར་དུ། ང་ལ་གང་ཡང་བྱས་མ་སོང་། ཨ་མྱེ་ཁྱེད་རང་ལ་སྐྱོན་འདྲ་བྱས་མ་སོང་ངམ་ཟེར་ནས་རང་གི་ཕ་རྒན་གྱི་ལག་ནས་ཚུར་བླངས་དེ་ཨ་མྱེ་ལ་དྲིས་དུས། ཨ་མྱེ་བདེ་ཆེན་ཡང་སྟབས་ལེགས་ནས་གང་ཡང་བྱུང་མེད་པ་རེད། སྐབས་དེར་བློ་བཟང་གི་ཕ་རྒན་འཇིགས་གྲོལ་གྱིས་སྤག་སྤག་ཡར་བསླེང་ནས་མེ་ཁ་གསོས་དེ་སྡུར་སྒྲ་དང་བཅས་དེ་རས་གུར་གྱི་འདབས་ལ་ཕྱིན།

ཉིན་མ་དེ་ཡི་ཕྱི་དྲོར། བློ་བཟང་གིས་ཨ་མས་ད་ཁྱེད་རང་གིས་གཏན་ནས་སྤག་སྤག་མ་ཞོན། དངོས་ནས་ཉེན་ཁ་ཆེན་པོ་འདུག དེ་ལས་རྐང་འཁོར་ཞོན་ནས་ནང་དུ་སོང་ནས་ཕྱིར་ཡོང་ན་འགྲིག་གི་རེད། དེ་མིན་ན་ཀླུ་འབུམ་རྒྱལ་གྱིས་ཁྱེད་རང་ནང་དུ་བསྐྱེལ་ངེས་ཡིན་ཞེས་བཤད་པ་ལྟར། ནུ་བོ་ཀླུ་འབུམ་རྒྱལ་ཡང་དགའ་བཞིན་སྤྲོ་བཞིན། ཨ་མྱེ་བདེ་ཆེན་དང་ཕུ་བོ་བློ་བཟང་གཉིས་སྤག་སྤག་གི་རྒྱབ་དུ་གྱོན་ནས་སྡེ་བུའི་ནང་དུ་ཤུར་སེ་བཏང་།

བན་སྡེ་འཚོས། དངོས་ནས་དུས་ཚོད་ཏག་ཏག་གི་སྟེང་ལ་བློ་བཟང་ལ་ཁ་པར་སླེབས་པ་མ་ཟད། མགྲོན་ཁང་དེ་ནས་བཤད་པ་ལྟར། ཁོ་མོ་ཕྱིར་ཉིན་རང་གི་ཨ་ཅེ་ཞིག་དང་འགྲོག་ནས་བླ་བྲང་གི་རི་ཁྲོད་དེར་གཞབ་དཀྲུས་བྱེད་དུ་ཡོང་གི་ཡོད་པ་མ་ཟད། བློ་བཟང་ཁོ་རང་ལ་ཡང་ཐུག་འདོད་ཡོད་རབས་སོགས་མི་ཉུང་བ་ཞིག་བཤད་པ་ལྟར། བློ་བཟང་གིས་ཀྱང་སང་ཉིན་ང་རང་ཡོང་ཁོ་ཐག་ཡིན་ཟེར་ནས་ཁ་པར་ལས་སྐད་ཆ་བཤད་མཚམས་བཞག

མཚན་མོ་དེར། བློ་བཟང་གིས་རང་ཉིད་ལ་ཁ་པར་སླེབས་མཁན་དེ་ནི་བན་སྡེ་འཚོ་ཟེར་བའི་བུ་མོ་ཞིག་ཡིན་པ་དང་། ཁོ་གཉིས་ཇི་ལྟར་ཐུག་པ་ཡིན་མིན་སོགས་ཞིབ་དུ་རང་གི་ནུ་བོ་ཀླུ་འབུམ་རྒྱལ་ལ་བཤད་པ་དང་། སང་ཉིན་ཡང་ཁོ་རང་ལ་ནུ་བོ་ཁྱེད་རང་གིས་རོགས་པ་བྱེད་དགོས་ཀྱི་ཡོད་ཅེས་བཤད།

ནུ་བོ་ཀླུ་འབུམ་རྒྱལ་གྱིས། ཡིན་དང་ཡིན། ཁྱེད་རང་གིས་སང་ཉིན་ཨ་མར་ཤོད། དེ་ནས་འུ་གཉིས་རྫོང་ཐོག་དུ་སོང་ན་འགྲིག་གི་རེད་ཟེར་ན་ངས་ཁྱེད་རང་ལ་རོགས་ལོས་བྱེད་ཅེས། ལོ་ངོ་ཁ་ཤས་རིང་དུ་མ་ཐུག་པའི་སྐོར་སོགས་གླེང་དེ་མཚན་དཀྱིལ་བར་དུ་ལུས་པ་རེད།