བོད་ཀྱི་རིག་གཞུང་གང་རེད་དམ།

གཅིག་ནོར་སོང་། ག་རེ་ཀེ ལོ་འདིའི་བོད་ཀྱི་མཛངས་མ་དྲགས་འདེམས་ནང་དུ་ང་རང་གི་ཨ་ཅག་གཏོང་དགོས་པ་རེད་འདུག་ག ག་རེ་བྱས་ནས། བོད་ཀྱི་མཛངས་མའི་བྱ་དགའ་དེ་ལེན་སར། ཁྱོད་རང་གི་ཨ་ཅག་ལ་སློབ་སྦྱོང་མེད་པ། ངའི་ཨ་ཅག་གིས་བོད་སྐད་དང་བོད་ཡིག་ཐོགས་པ་མེད་པར་འབྲི་བཤད་ཐུབ་ཀྱི་ཡོད་རེད་ད། སྐྱེས་གཟུགས་ཀྱིས་གཉོབ་ཀྱི་མ་རེད་གོ། དབྱངས་ཅན་མེ་ཏོག་ཕ་བཞགས་ལ་གཞན་པ་ཚོར་སྐྱེ་གཟུགས་གེ་མི་འདུག་ག ཨ་ལེ་དངོས་གནས་རེད་བདེན་པ་རེད་འདུག ད་ལོ་རྗེས་མ་ཁྱོད་རང་གི་ཨ་ཅག་དེ་ཉིས་སྟོང་བཅུ་གཅིག་ལོའི་བོད་ཀྱི་མཛངས་མའི་འགྲན་བསྡུར་ནང་གཏོང་དགོས་རེད་ད། རེད་གྲོགས་པོ་ངས་ཀྱང་དེ་འདྲ་ཞིག་བསམ་བསྡད་ཡོད་ད། གང་ལྟར་ངའི་ཨ་ཅག་ལ་ཧམ་པ་ཚ་བོ་ཡོད་རེད་གསེར་གྱི་དབུ་བརྒྱན་ཐོབ་རྒྱུ་རེད་ཡ། ཧ་ཧ་ཧ་ཧ།

སྤུན་ཟླ་ཚོ། བོད་ཀྱི་རིག་གཞུང་ཟེར་བ་ནི་གདོད་མ་ནས་ཡོད་པ་ཞིག་ལ་ངེས་འཛིན་བྱེད་དགོས་སམ། ཡང་ན། བོད་ཀྱི་སྐད་དང་ཡི་གེ་དར་བ་ནས་བཟུང་དེ་འགོ་འཛུགས་དགོས་ཀྱི་ཡོད་དམ། དེ་མིན་ན། རིག་གནས་དང་རིག་གཞུང་གི་གོ་བ་མི་འདྲ་བ་ཞིག་ལ་ངེས་འཛིན་བྱེད་དགོས་པ་ཡིན་ནམ། ད་དུང་། གོམ་གཤིས་དང་སྲོལ་རྒྱུན། བག་ཆགས་སོགས་ལ་མིང་ཚིག་རེ་རེ་ལ་གོ་བ་ལེན་སྟངས་ག་འདྲ་ཞིག་་བྱེད་དགོས་ཀྱི་ཡོད་པ་ཡིན་ནམ། ལྷག་པར་དུ་བོད་ཀྱི་སྐད་དང་ཡི་གེ་བོར་སོང་བ་ཡིན་ན། བོད་མི་རིགས་འདི་ཤི་ཟིན་པར་ངེས་འཛིན་བྱས་པ་ཡིན་ན་འགྲིག་གི་རེད་དམ། དེ་ལ་ཞིབ་དུ་བསམ་གཞིགས་གནང་དེ་རང་རང་བསམ་ཚུལ་ལྷུག་པོར་གསུང་རོགས་ཞུ།

བོད་ཀྱི་རིག་གཞུང་ཟེར་བ་འདི་བོད་ཀྱི་ཐུན་མིན་གྱི་བསམ་བློའི་ཁྱེར་སོ་ཞིག་ལ་ངོས་འཛིན་དགོས་པ་འདྲ།
ཁྱོད་རང་བོད་རིགས་ཡིན་མིན་ལྟ་བ་ལ་ཁྱོད་ཀྱི་ཕ་དེ་སུ་རེད་ལྟ་རྒྱུ་རེད། ཁྱོད་ཀྱི་ཕ་དེ་བོད་རིགས་ཡིན་ན་ཁྱོད་ཉིད་བོད་རིགས་རེད། ཁྱོད་ཀྱིས་བོད་སྐད་ཤེས་མིན་ལྟ་རྒྱུ་མེད། ཁྱོད་རང་ལུས་ཐོག་ནས་བོད་ཀྱི་རིག་གཞུང་བོར་བརླག་ཏུ་འགྲོ་རྒྱུ་ཡོད་ཀྱང་ཁྱོད་ཉིད་བོད་རིགས་ཡིན་པ་དེ་སྐྱེ་བ་དེ་ལ་བོར་བརླག་འགྲོ་རྒྱུ་མེད།

ཁྱེད་ཀྱི་གྲོགས་པོས་གསུངས་པ་དེར་རྒྱབ་སྐྱོར་གཅིག་དང་ཕྱེད་ཀ་ཡོད། རྒྱུ་མཚན་ནི་ང་ཚོའི་རྒྱུད་ཀྱི་ང་བོད་རིགས་ཡིན་ཞེས་པའི་བསམ་བློ་དེ་ནི་བོད་པའི་རིག་གཞུང་ལྷན་སྐྱེས་པ་དེ་རེད། སྐད་དང་ཡི་གེ་ཆོས་ལུགས་གྱོན་ཆས་བཟའ་སྟངས་གཉེན་སྒྲིག་སྟངས་སོགས་ནི་བོད་ཀྱི་རིག་གཞུང་བཏགས་པ་བ་རེད། རྒྱུ་མཚན་ནི་རྒྱ་རིགས་ཤིག་གིས་བོད་པའི་རིག་གཞུང་བཏགས་པ་བ་འདི་ཚོའི་ལད་ཟློས་བྱེད་ཐུབ་པ་སྟེ། གལ་སྲིད་སྦྱངས་པ་ཡིན་ན་བོད་སྐད་བཤད་ཐུབ་པ་དང་འདོད་པ་ཡོད་ན་བོད་ལྭ་གྱོན་ཐུབ་པ་ང་ཚོས་ཤེས་གསལ་རེད། ཡིན་ན་ཡང་དེ་ཙམ་གྱིས་ཁོང་རང་བོད་པ་བཏགས་པ་བར་འཇོག་གི་རེད་མ་གཏོགས་མི་སུ་ཞིག་གིས་ཀྱང་ཁོ་རང་བོད་པ་དངོས་གནས་པར་ངོས་ལེན་བྱེད་ཀྱི་མ་རེད། རྒྱུ་མཚན་ནི་ཁོ་ལ་ནང་སྙིང་ལྟ་བུའི་བོད་པའི་ལྷན་སྐྱེས་ཀྱི་རིག་གཞུང་སྟེ་ང་རང་བོད་པ་ཡིན་ཞེས་པའི་བསམ་བློ་དེ་མེད་པས་སོ།།

དྲ་གྲོགས་ལགས། སྐུ་ཉིད་ཀྱིས་རྒྱུན་མཐུད་ནས་འདི་ལྟར་ཟིན་བྲིས་སྤེལ་པར་རྗེས་སུ་ཡི་རངས་ཞུ།

ཁྱེད་ཀྱི་གྲོགས་པོ་དེའི་འདོད་པའི་མི་རིགས་ཀྱི་རིག་གཞུང་ཞེས་པ་དེ་ནི་ཕྱི་རོལ་བའི་འདོད་པའི་བདག་གམ་འཇིག་རྟེན་བྱེད་པ་པོ་དང་འདྲ་བོ་འདུག འདི་ལ་ཁྱེད་ཀྱིས་དྲི་བ་འདི་འདྲ་ཞིག་འདོན་རོགས།
དྲི་བ་དང་པོ་། མི་རིགས་ཀྱི་རིག་གཞུང་ལ་ཐོག་མ་ཡོད་པ་རེད་དམ།
དྲི་བ་གཉིས་པ། མི་རིགས་ཀྱི་རིག་གཞུང་ཞེས་པ་ལྷན་སྐྱེས་ཤིག་རེད་དམ།
དྲི་བ་གསུམ་པ། མི་རིགས་ཀྱི་རིག་གཞུང་ཞེས་པ་གྲུབ་ཆ་སྣ་མང་གི་འདུས་དོན་ཞིག་རེད་དམ། ཡང་ན་རྒྱུ་གཅིག་རྐྱེན་གཅིག་གི་དངོས་པོ་རང་རྐྱ་བ་ཞིག་རེད། འདི་དག་ནི་དྲི་བ་རང་ཡིན།

ངས་བསམ་ན་མི་རིགས་ཀྱི་རིག་གཞུང་ཞེས་པ་དེ་ཕྱོགས་སྣ་མང་ནང་བསམ་བློ་གཏོང་དགོས་པ་དང་། འཚོལ་ཞིབ་བྱེད་དགོས་པ། ཕྱོགས་བསྡོམས་བྱེད་དགོས་པ་ཞིག་ཡིན་རུང་། གཞི་རྩ་གཙོ་བོ་ནི་མི་རིགས་དེའི་ལུས་ངག་ཡིད་གསུམ་དང་འབྲེལ་ནས་བསམ་བློ་གཏོང་དགོས་པར་འདོད།
དང་པོ་མི་རིགས་ཀྱི་ལུས་ཞེས་པ་དེ་ག་འདྲ་ཞིག་རེད་དམ། རིགས་རྒྱུན་ཚན་རིག་གི་ངོས་ནས་བཤད་ན་སའི་གོ་ལའི་སྟེང་གི་སྐྱེ་ལྡན་མཐའ་དག་མེས་པོ་གཅིག་གི་རྒྱུད་པ་ལས་མཆེད་པ་ཞིག་ཡིན་པས། ཐོག་མ་ནས་གྲུབ་པའི་མི་རིགས་ཀྱི་ལུས་ཤིག་མེད་པར་འདོད། དེ་བས་ནང་དེང་སྐབས་ཀྱི་སྐྲ་ནག་པོ་དང་སྣ་ལེབ་ལེབ། ལུས་ལ་བ་སྤུ་ཉུང་བ་འདི་ཚོ་བོད་ཀྱི་ལུས་རེད་དམ། སྤྱིར་བོད་ཀྱི་ལུས་ཞེས་པ་ཞིག་འཇོག་རྒྱུ་ཡོད་དམ། ཤ་མར་ཟོས་ལུས་ཤེས་རྒྱས་ཤིང་གྲང་སར་བསྡད་པས་ངོ་གདོང་སྨུག་པ། གཙང་ཆུ་དང་བསིལ་རླུང་གི་ནུས་པས་འགྲམ་པ་དམར་པ་སོགས་བོད་ཀྱི་ལུས་རེད་དམ། འོ་ན་རྡ་ལུ་འཐུང་ནས་ངོ་གདོང་སྐྱ་རིལ་རིལ་ཅན་དག་བོད་ཀྱི་ལུས་མ་རེད་དམ། དེ་བས་ནས་ལུས་རང་སྟེང་ནས་བཤད་ན་འཛམ་གླིང་གི་མི་རིགས་ཐམས་ཅད་ལུས་ཀྱི་རྣམ་པ་གཙོ་བོ་གཉིས་སུ་བགོས་འགྲོ་བའི་བོད་པའི་ལུས་ཞེས་པ་ཞིག་འཇོག་རྒྱུ་ཡོད་དམ། འདི་ནི་དྲི་བ་ཞིག་རེད།་
གནད་དོན་གཞན་ཞིག་ནི་ལུས་ཟོ་དབྱིབས་དང་ཁ་དོག་གི་ཆ་མ་ཡིན་པར་རྣམ་འགྱུར་དང་ཆ་བཤད་ཀྱི་ཆ་རེད། འདིའི་ཐད་ནས་བོད་ལ་རིག་གཞུང་ཞིག་ཡོད་དགོས་ཤིང་། བོད་ཀྱི་ལུས་དང་འབྲེལ་བའི་རིག་གཞུང་ཞིག་ཀྱང་ཡོད་དགོས། འོ་ན་རྣམ་འགྱུར་དག་ཆ་བྱད་དག་གང་ལ་བརྟེན་ནས་བྱུང་བ་རེད་དམ། གང་ལ་ལྟོས་ནས་གྲུབ་པ་རེད་དམ། དཔྱད་པ་འདི་ལྟར་བྱས་ནས་ལྟོས་གྲུབ་ཀྱི་འཇིག་རྟེན་འདི་མཐའ་མེད་ཀྱི་འབྲེལ་བ་རྙོག་འཛིང་ཞིག་གི་ནང་དུ་ལྷུང་འགྲོ་སྲིད་མོད། གང་ལྟར་བོད་ལ་ལུས་དང་འབྲེལ་བའི་རིག་གཞུང་ཞིག་ཡོད་ངེས་པ་རེད། འདི་ངའི་བསམ་ཚུལ་གཅིག་ཡིན།

གཉིས་པ་ངག་དང་འབྲེལ་བའི་རིག་གཞུང་རེད། བོད་མི་རིགས་ཀྱི་ངག་རིག་འདི་བོད་མི་རིགས་ཀྱི་རིག་གཞུང་གི་རྨང་གཞི་དང་། མི་རིགས་ཀྱི་ངོ་རྟགས་རེད། གང་ཡིན་ཞེ་ན་འགྲོ་བ་མིའི་ངག་ནི་འགྲོ་བ་མིའི་ལུས་སེམས་གཉིས་འབྲེལ་ལས་གྲུབ་པའི་ཐུན་མོང་མ་ཡིན་པའི་དངོས་པོ་ཞིག་རེད་ལ། འགྲོ་བ་མིའི་ངག་གིས་འགྲོ་བ་མིའི་སེམས་ཀྱི་འཇོན་ཐང་དང་ལུས་ཀྱི་ཁྱད་ཆོས་གཉིས་ཀ་ཚད་མཐོ་བོའོ་བེད་སྤྱོད་གཏོང་བར་ནུས་པ་ཆེན་པོ་ཐོན་པའི་འགྲོ་བ་མིའི་གཞི་རིམ་གྱི་ཡོན་ཏན་དང་ནུས་པ་ཆེན་པོ་ཞིག་རེད། དེ་ལྟ་བུའི་ངག་ལ་དབྱེ་ན་གདོད་མའི་མི་རྣམས་ཀྱི་ལབ་ལོབ་ཀྱི་སྐད་ཆ་དང་། ཀི་སྐྲ་ཧི་སྒྲ་ནས་བརྩམས་ཏེ་ད་ལྟའི་སྒྱུ་རྩལ་དང་ནང་དོན་གྱིས་བཅུད་འདུས་པའི་བསྟན་བཅོས་རིག་རིག་གནས་མཐའ་དག་དང། ཉན་བཤད་ཀྱི་ཁྱབ་ཁོངས་ཐམས་ཅད་ལ་ཁྱབ་པའི་སྐྱེས་པའི་བྱེད་པ་ལྕེ་རྐན་ལ་བརྟེན་བའི་ངག་གི་རིག་པ་ཐམས་ཀྱི་ངོས་སུ་མིའི་རིགས་ཀྱི་ཐུན་མོང་གི་ཆ་དང་། མི་རིགས་ཀྱི་ཐུན་མོང་མ་ཡིན་པའི་ཆ་དག་འདུས་ཡོད་པས་འདི་དག་ཐམས་ཅད་མིའི་རིག་གཞུང་དང་མི་རིགས་ཀྱི་རིག་གཞུང་ཅི་ལ་མིན།

དེ་མིན་བོད་མིའི་བསམ་བློ་དང་འབྲེལ་བའི་རིག་གཞུང་རེད། འགྲོ་བ་མིའི་ལོ་རྒྱུས་ཀྱི་འཕེལ་རིམ་དེ་འགྲོ་བ་མིའི་བསམ་བློ་འགྱུར་ལྡོག་གི་འཕེལ་རིམ་ཞིག་ཏུ་ངེས་ཤིང་། བྱེ་བྲག་བོད་ཀྱི་བསམ་བློ་ཞེས་པ་དེ་ཡང་མི་རིགས་འདིའི་བྱུང་འཕེལ་གྱི་ལོ་རྒྱུས་ཧྲིལ་པོ་དང་འབྲེལ་བ་ཞིག་རེད་སྙམ། དེ་བས་ནས་བོད་མིའི་ལོ་རྒྱུས་ཀྱི་གཞུང་ངོས་ནས་བལྟས་ཏེ་ལོ་རྒྱུས་ཐོག་གི་བསམ་བློའི་གྲུབ་ཆ་མཐའ་དག་དང་། བོད་པའི་སྤྱི་ཚོགས་ཀྱི་འཕྲེད་ངོས་ནས་བལྟས་ཏེ་བོད་མའི་བསམ་བློའི་གྲུབ་ཆ་མཐའ་དག་ལས་གང་ཞིག་བོད་ཀྱི་རིག་གཞུང་དངོས་ཀྱི་བསམ་བློ་ཡིན་པ་དེ་ཡིན་མིན་ནི་རྩོད་གཞི་ཆེ་མོད། གང་ལྟར་ཡུལ་དུས་ལས་འདས་པའི་བསམ་བློ་དང་དང། ཡུལ་དུས་གནས་སྐབས་ལ་གཞིགས་པའི་བསམ་བློ་སོགས་བློ་ཡི་ངོ་བོ་སྣ་ཚོགས་དང་། བློ་ཡི་ལྟ་སྟངས་སྣ་ཚོགས། དེ་དག་གི་རྣམ་གཞག་དང་ཤུལ་རྒྱུན་གསལ་བར་སྟོན་པའི་བསྟན་བཅོས་དང་བརྩམས་ཆོས་མཐའ་དག་བོད་ཀྱི་རིག་གཞུང་ཡིན་ངེས་པ་མ་ཡིན་ནམ།

གང་ལྟར་མི་རིགས་ཀྱི་ལུས་ངག་ཡིད་གསུམ་ལ་བརྟེན་པའི་ཐུན་མོང་དང་ཐུན་མོང་མ་ཡིན་པའི་བྱུང་བ་དང་ཁྱད་ཆོས་སྣ་ཚོགས་དང།
མི་རིགས་ཀྱི་ཟས་གོས་གནས་མལ་སོགས་ལུས་ཀྱི་དགོས་མཁོ་བསྒྲུབ་པའི་ཆ་དག་དང། མི་རིགས་ཀྱི་སྒྱུ་རྩལ་དང་ཆོས་ལུགས་སེམས་ཀྱི་དགོས་མཁོ་སྣ་ཚོགས་སྤྱི་འདུས་ཀྱི་གོང་བུ་དང། མཉམ་བསྲེས་ཀྱི་ཉིང་ཁུ། ཕྱོགས་བསྡུས་ཀྱི་སྟོབས་ཤུགས་མཐའ་དག་བོད་ཀྱི་རིག་གཞུང་མ་རེད་དམ།

གནས་ཆུལ་འདི་ཤར་མར་བྲིས་པས་ནོར་སྐྱོན་མང་ངེས་ཀྱང་། དྲ་གྲོགས་ཀྱི་ཟིན་བྲིས་་མཐོང་ཆེན་གྱི་ཚུལ་བྲིས་ཀྱང་མཇུག་ལ་ཐོན་དུས་ཉོག་བཤད་མང་འདུག་པས་དགོངས་དག