བཅུ་གཉིས།
ངས་བདེ་སྐྱིད་འཚོའི་སྐོར་གྱི་སྐད་ཆ་ཆེས་མི་ཉུང་བ་ཞིག་གཟའ་མཇུག་དུ་གྲོགས་པོ་དག་གི་ཁ་ནས་མི་དགོས་ཟེར་ས་མེད་པར་གཅིག་རྗེས་གཉིས་མཐུད་དུ་གོ་བྱུང་། གྲོགས་པོ་དག་ང་ལས་གཅིག་ལ་བལྟས་ན་གཅིག་བདེ་སྐྱིད་འཚོའི་སྐོར་མང་བོ་ཞིག་ཤེས་ཀྱི་འདུག་ལ། ཁོང་ཚོས་གོ་བ་དེ་དག་ནི། བདེ་སྐྱིད་འཚོའི་མི་ཚེ་ནང་གི་ཆེས་སྐྱོ་བའི་སྐབས་ཀྱི་འཚོ་བ་དང་། བུད་མེད་ཅིག་གི་མི་ཚེ་ནང་དུ་འགྲིམ་འདོད་མེད་པའི་གོ་རིམ་ཞིག་ཀྱང་རེད།
ང་ཚོས་གླེང་གཞི་ནི་བདེ་སྐྱིད་འཚོ་ཆགས་སོང་བ་མ་ཟད། ཁོང་ཚོ་ཚང་མས་ང་ལ་ཀུ་རེ་བྱེད་པའི་གཞི་མ་ཡང་བདེ་སྐྱིད་འཚོའི་སྐོར་གྱི་གཏམ་རྒྱུད་ངས་ཕྱོགས་བསྡུས་བྱེད་ཀྱིན་པ་དེ་ལ་ཁོང་ཚོ་ཚང་མ་ཧང་སངས་འདུག བུད་མེད་དེ་འདྲ་ཞིག་གི་ལོ་རྒྱུས་འབྲི་རན་ཡོད་པ་ཞིག་ཡིན་ན། ང་ཚོ་ཚང་མས་ལོ་རྒྱུས་ཀྱང་དངོས་ནས་བྲིས་ན་མ་ཆོག་པ་མེད་པ་རྐྱང་རྐྱང་རེད་འདུག་ཟེར་ནས་ཞོར་དུ་ང་ལ་་ཟུར་ཟ་ཡང་མང་བོ་ཞིག་བྱས། ངས་གྲོགས་པོ་ཚོ་ལ། ཁྱེད་ཅག་ལ་དངོས་ནས་ཧ་ལས་ཤིང་། ཡ་མཚར་བ། ཡང་ན་ཡ་ང་བ། མིན་ན་ཡིད་སྐྱོ་བ། དེ་མིན་བསམ་ཡུལ་ལས་འདས་པའི་མི་ཚེ་ཁྲོད་ཀྱི་བྱུང་རིམ་གང་ཞིག་ཡོད་ཅེས་དྲིས་པ་ཡིན།
ཁོང་ཚོ་དགོད་ཀྱིན་དགོད་ཀྱིན། གྲོགས་པོ་རེ་ཟུང་ཞིག་གིས་སྨད་བཙོང་མ་ཞིག་གི་ལོ་རྒྱུས་ལ་དེ་འདྲའི་རིན་ཐང་ཞིག་ཡོད་ཚེ། ང་ཚོའི་ལོ་རྒྱུས་ལ་་རིན་ཐང་ལོས་ཡིན། ཡུལ་ཕ་མ་རྒྱང་དུ་བཞག ཤ་ཉེ་རིང་རྒྱབ་ལ་སྐྱུར། ཕ་ས་ཕ་ཡུལ་རིང་དུ་བོར་ནས། ས་འདི་འདྲ་ཞིག་སླེབས་དོན་ཞིག་མེད་ཀ དེ་ཡི་ལོ་རྒྱུས་་་་
ངས་ད་ཆོག་གི ཆོག་གི ངས་འབྲི་བཞིན་པ་དེ་དག་ནི་བུད་མེད་ཅིག་གི་མི་ཚེ་ནང་དུ་མི་འདོད་ཀྱང་ལྡོག་དུ་མེད་པའི་ལས་དབང་གི་སྐྱོ་གར་ཞིག་གི་སྐོར་ཡིན་མ་གཏོགས། ཁྱེད་ཚོ་ལྟར་བུ་དབའ་བོ་རང་ཡུལ་སྐྱུར་ནས་བྲོས་བྱོལ་དུ་ཡོང་མཁན་དག་དག་གི་ལོ་རྒྱུས་མིན། ངས་འབྲི་བཞིན་པ་དེ་ནི་བུད་མེད་ཅིག་གི་མི་ཚེ་ནང་དུ་ཅི་ཙམ་བཙལ་ཡང་། ག་ཚོད་སྩོལ་བ་བྱས་ཀྱང་འབྲས་པུ་སྨིན་མ་ཐུབ་པའི་གཏམ་རྒྱུད་ཅིག་གི་མཇུག་འབྲས་ཡིན། ད་དུང་་་་ ད་མི་བཤད། མང་བོ་བཤད་ན། ཁྱེད་ཅག་གི་སེམས་པ་ལྕགས་ཀྱི་བཟོས་ཡོད་ཀྱང་། འགུལ་བསྐྱོད་ཅིག་རྒྱགས་མི་སྲིད་པ་མིན། དེ་ལས་ཁྱེད་ཅག་གི་ཁྲོད་དུ་ཁོ་མོ་དང་འདྲིས་གཤིབ་བྱེད་མྱོང་མཁན་ཡོད་དམ།
ཚང་མ་ཁ་གྲགས་རྒྱུར་མེད་པར། གཅིག་གཅིག་གི་ངོ་ལ་བལྟས་དེ་བསྡད། ཅུང་ཙམ་རྗེས་སུ་རེ་རེ་བཞིན། མེད་ཟེར།
འོ་ན། ཁྱེད་ཅག་གིས་ཁོ་མོའི་སྐོར་གྱི་ལོ་རྒྱུས་དེ་དག་ཇི་ལྟར་ཐོས་པ་ཡིན། དེ་ལ་ཁུངས་ལུང་ཅི་ཡོད་དམ། རེད་རེད། མྱི་ཁ་ནི་བུད་མེད་ཅིག་ལ་མཚོན་ན་དེ་བས་ཀྱང་འཁུར་འདོད་མེད་ཀྱང་བཙན་གྱིས་བཀྱགས་པ་ཞིག་ཡིན་དུས། ཁོ་མོ་དང་འདྲ་བའི་བུད་མེད་རེ་ཟུང་གིས་འཁུར་ནས་འགྲོ་དགོས་པ་དེ་ཡང་བཟོ་མཁན་ཡང་། མྱི་ཁ་གཏོང་ལ་དགའ་མཁན་དང་མྱི་ཁ་སྒྲོགས་ལ་དགའ་བའི་འུ་ཚོའི་རིགས་ཀྱི་བཞག་པ་རེད། དངོས་ནས་ཡ་རེ་ང་་་་་
ང་ཚོས་གཟའ་མཇུག་གི་ཉིན་གཉིས་ཀྱི་སྐད་ཆ་མང་ཤོས་ཤིག་བདེ་སྐྱིད་འཚོའི་སྐོར་ནས་ཡིན་ཡང་། ཐ་མ་དེར་གྲོགས་པོ་དག་གིས་ཀྱང་རང་རང་གི་མྱི་ཁ་ལས་འཐུས་པའི་གཏམ་དེ་དག་གིས་དོན་མེད་དུ་ཁོ་མོ་ནག་ཉེས་བཙུགས་པ་དེར་ངེས་པ་སྐྱེ་ནས་ང་ལ་གདུང་སེམས་མཉམ་བསྐྱེད་དང་བཅས། རྗེས་སུ་ཁྱེད་རང་གིས་ཁོ་མོའི་ལོ་རྒྱུས་ཆ་ཚང་ཡིག་ཐོག་དུ་ཕབ་རྗེས་སུ། ང་ཚོས་ཁྱེད་རང་ལ་དཔར་སྐྲུན་བྱེད་པའི་ཐད་དུ་མ་དངུལ་གྱི་ཞབས་འདེབས་རྒྱགས་ཁོ་ཐག་ཡིན་ཟེར་ནས་ཚང་མ་གཟའ་མཇུག་དུ་འཛོམས་པའི་གྲུབ་འབྲས་ཀྱང་བྱུང་སོང་།
ངས་གཏམ་བཟང་དེ་ཡི་སྐོར་བདེ་སྐྱིད་འཚོ་ལ། ང་རང་ཕྱིར་ནང་དུ་ཡོང་བའི་ལམ་ཁ་ནས་འཕྲིན་ཐུང་ཞིག་སྐུར་བ་ཡིན།
བདེ་སྐྱིད་འཚོ། ཁྱེད་རང་ལ་གཏམ་བཟང་ཞིག་ཡོད། ངའི་གྲོགས་པོ་ཚོས་ཁྱེད་རང་གི་ལོ་རྒྱུས་བྲིས་ཚར་སོང་ན། ཁོང་ཚོས་དཔར་བསྐྲུན་མ་དངུལ་གྱི་ཞབས་འདེབས་རྒྱགས་ཀྱི་ཡིན་ཟེར་གྱི་འདུག
བདེ་སྐྱིད་འཚོས། དེ་མ་ཐག ང་རང་ལ་འཕྲིན་ཐུང་འདི་ལན་དུ་འབྱོར། ཁྱེད་དང་ཁྱེད་ཀྱི་གྲོགས་པོ་ཚོ་ལ། ཁོ་མོའི་སེམས་ཁོང་རུས་པའི་གཏིང་ནས་བཀའ་དྲིན་ཆེ་ཞུ། གཟའ་འཁོར་རྗེས་མ་ཁྱེད་རང་ཁོམ་པ་ཡོད་ན་ང་ཡོད་སར་ཕེབས་རོགས།
མུ་འགོད།
ཁྱེད་ཅག་ཕེབས་པ་དགའ་ཡོད། བསམ་ཚུལ་གསུངས་པ་ཐུགས་རྗེ་ཆེ།
I have already read it.love sometimes make us crazy but we should face it rationally rather than be a crazy.my computer has not got Tibetan software, that’s why i have to use English.
བཀླགས་ཡོད་སྐད་ཆ་སྣང་བ་འགྲོ་བོ་ཁ་ཤས་ཤིག་བཤད་འདུག དེ་ཙམ་བྱ།
རས་པ་ལགས། ཉིད་ནས་བསམ་ཚུལ་གསུངས་པ་དེར་བཀའ་དྲིན་ཆེ་ལགས།
རྒན་པོ་ཚོས་འཕྲིན་འབྲི་བ་འདྲ་བ་འདི་དག་ལ་ལེགས་བཅོས་གནང་རོགས་ཞུ།