དྲན་དུས་ཀྱི་ཁྱེད་རང་། བཞི།

དགུན་ཁ་ཞིག་ལ་ལྷག་དུ་དྲན་ནས་འོང་བའི་ཁྱེད་ཀྱི་ཞལ་རས་ནི། ནམ་ཡང་་གསུབ་དུ་དཀའ་བའི་ཆེས་མཛེས་སྡུག་གི་བྲིས་པའི་གནའ་བོའི་གྲགས་ཅན་རི་མོ་བཞིན། དེང་དུས་སུ་ཧ་ཅང་རྩ་ཆེན་དུ་བརྩི་བ་ལྟར། ནམ་ཟླ་ཇི་འདྲ་འཁྱག་ན་ཡང་། ངས་ཕྱི་རོལ་གྱི་ཁ་བའི་ཀློང་ནས། ཁྱེད་རང་ཁོ་ནའི་ཕྱོགས་སུ་བསམ་བློ་བཏང་།

བསམ་བློ་གཏོང་ལུགས་དེ་ཡང་གོ་རིམ་ལྡན་ལ། སྐྱིད་སྣང་ལྡན་པ་ཞིག  ཐོབ་སྲིད་པ་ཞིག་ཡིན་པའི་དབང་དུ་བཏང་ན། དེ་རིང་ཁྱེད་རང་ང་ལ་ཐོབ་ཡོད་ཚེ། ངས་ཁྱེད་དང་མཉམ་དུ་སྐད་ཆ་ལྷོད་ལྷོད་ཅིག་བཤད་དེ། ངའི་སེམས་གཏིང་དུ་ཡུན་རིང་ཡུན་རིང་ཞིག་ལ་སྤས་པའི་སྙིང་གཏམ་རེ་རེ། འཚིག་ཇ་ཕོར་བཀང་འདི། འོ་ཇ་ཕོར་བཀང་གི་ཚབ་བྱས། ཁང་བའི་བར་ཁྱམས་ཤིག་ནས། ཕན་ཚུན་གྱི་གདོང་ལ་ལྟ་ཞོར། ཡུན་རིང་ཡུན་རིང་གི་རིང་དུ་ཕན་ཚུན་གྱི་ངག་ན་ལུས་པའི་སྐད་ཆ་དག་བཤད་འདོད།

ཁྱེད་རང་དྲན་ཚུལ་འདིའི་སྔ་གཞུག་དུ། ང་ནི་ས་སྒང་འདི་ན་མི་འདུག་ལ། ས་སྒང་གཞན་ཞིག་གི་གནས་ཤིག་ན། འཁྲིག་རྩོད་མེད། རྒྱལ་ཕམ་མེད། ཡག་ཉེས་མེད། གཙང་བཙོག་མེད། དབྱེ་འབྱེད་མེད། མཐོ་དམན་མེད། དེ་འདྲའི་ཀུ་ཡངས་པོ་ཞིག དེ་འདྲའི་བཤད་མི་ཤེས་པའི་གླིང་ཕྲན་དེར་སླེབས་ཐེངས་རེར། ངའི་འགྲམ་དུ་སུ་ཡང་མི་འདུག ཐ་ན་དབུགས་ལེན་མཁན་གྱི་སྐྱེ་འགྲོ་དབུགས་ཐོག་སུ་ཡང་་་

གང་ལྟར། ཁྱེད་རང་གིས་ངས་ཁྱེད་རང་དྲན་ཚུལ་གྱི་སྐོར་ལ་བསམ་བློ་གཏོང་ཨེ་མྱོང་། དངོས་ནས་བཤད་ན། ཡོད་ཚད་ང་རང་ཁོ་ན་ལན་པའི་ནོར་འཁྲུལ་ཞིག་རེད་འདུག་ལ། ནམ་ཡང་། ཕན་ཚུན་གྱི་སེམས་ངོགས་སུ་དྲན་གདུང་གི་རྨ་ཁ། སུན་སྣང་གི་ལོ་ཟླ། བློ་འགྱོད་ཀྱི་དབུགས་རིང་། འཕྲད་འདོད་ཀྱི་རེ་བ། ཆེས་མང་བོ་མང་བོ་ཞིག ངས་གང་ཞིག་འཐུས་དེ། གང་ཞིག་ནས་འུ་གཉིས་ཀྱི་བར་ཐག་ལ་བཞག་པ་དེར། སེམས་གཏིང་ནས་དགོངས་དག་ཞིག་ཞུ་འདོད་ཀྱང་། ཁྱེད་རང་གང་དུ་ཡོད་མེད་ཀྱང་མི་ཤེས་པའི་དུས་འདི་ལ་་་་་