མི་ཤེས་ས་ཞིག་ནས། རང་ཉིད་གཅིག་བུར་སྐོང་དུས་ཀྱི་མི་དེ་ཡི། དུག་འདི་འཐུང་བར་གོམ་ཡོད་ལ། དེ་མ་འཐུང་ན་ད་གཟོད་སེམས་པ་བདེ་ལ་མི་འབབ་པ་ཡིན། དེ་ནི་དུག་འཐུང་མཁན་གྱི་ཁྱེད་རང་རེད། ཁྱེད་རང་གིས་སྐད་ཅིག་སྔ་ཕྱིའི་བར་གྱི་ཚོར་བ་ཐན་ཐུན་དེ་ལ་དབང་ཤུགས་སྤྲད་དེ། རང་གི་ཁོར་ཡུག་གི་མཛེས་པ་དང་། ཉེ་དུའི་བར་གྱི་བརྩེ་བ། ཁྱིམ་དང་ཆུང་མའི་བདེ་སྐྱིད་སོགས་བརྗེད་དུས་ཀྱི་དུག་དེ་ཡིན།
དུག་དེ་ནི་མི་སུ་ལ་ཡང་འཕོག་སྲིད་ན་ཡང་། ཁྱེད་རང་ནི་དུག་འཕོག་མཁན་ལས་བརྒལ་བའི་འཐུང་མཁན་དེ་ཡིན་དུས། ཁྱེད་རང་ནི་ཤི་ཟིན་པའི་བེམ་པོ་ཞིག་ལས་གང་ཡང་མིན། བེམ་པོ་དེ་ལ་ད་དུང་ཞེན་ཆགས་ཀྱི་བཅིངས་པའི་རྒྱང་རིང་གི་ཉེ་དུ་དང་སྤུན་མཆེད། ཆུང་ནས་གཅེས་པའི་དྲིན་ཕ་མ། འདྲིས་ཤིང་གཤིབ་པའི་དགའ་མ། སྙིང་དུ་སྡུག་པའི་བུ་དང་བུ་མོ། བློ་སེམས་མཐུན་པའི་བརྩེ་ལྡན་གྱི་སྤུན་ཟླ་ཕོ་མོ། དེ་དག་གིས་མ་མཐོང་བའི་བེམ་པོ་ཁྱེད་རང་ནི། བརྩེ་བ་བོར་ཞིང་། ཕྱི་ཐག་མེད་པའི་དུག་གི་བདག་པོ་ཡིན།
དུག་འདི་ལ་མིང་གཞན་པ་ཞིག་ཡོད་སྲིད་ཀྱང་། གནས་སྐབས་འདི་ལ་ཁྱེད་རང་ནི་དུག་གི་བདག་པོ་སྟེ། སྐད་ཅིག་སྔ་ཕྱིའི་བར་གྱི་མི་ཚེ་བ་ཞིག་ཞེས་བོས་ཀྱང་མ་འཚམ་པ་མེད། ལས་དབང་ཟེར་བའི་སྐྲག་ས་ཞིག་ཁྱེད་ཀྱིས་མ་ཤེས་ཤིང་། རྒྱུ་འབྲས་ཟེར་བའི་འགྲོ་ལུགས་ཤིག་ཁྱེད་ཀྱི་མ་སྒྲུབ། དུངས་པ་ཟེར་བའི་ཞེན་ཆགས་ལྕི་མོ་ཞིག་ཁྱེད་ལ་མེད། ངོ་ཚ་ཟེར་བའི་སྲུང་ཐག་ཞིག་ཁྱེད་ཀྱི་སྐེ་རུ་མ་དཔྱངས་པར། ཁྲེལ་གཞུང་ཟེར་བའི་གནས་ལུགས་དེ་ཡང་ཁྱེད་ཀྱིས་མ་རྟོགས། བྱམས་བརྩེ་ཟེར་བའི་ཀུན་གྲོལ་གྱི་ལྟ་བ་ཞིག་ནི་དེ་བས་ཀྱང་གོ་མ་མྱོང་། ཁྱེད་རང་གིས་གང་ཤེས་པ་དང་གང་སྒྲུབ་པ་དེ་ནི། བདེ་སྡུག་གི་མཉམ་གནས་ལ་འགན་མེད་པའི་ལས་དེ་ཡིན།
དུག་བཏང་བའི་སྔ་རྗེས་ཀྱི་ཁྱེད་ཀྱི་གཟུགས་བརྙན་ནི། མི་བུ་དག་གིས་ནམ་ཡང་མཐོང་མི་ཐུབ་ལ། མི་བུ་དག་གིས་དེ་ལ་ཚོད་དཔག་ཙམ་ཡང་བྱེད་མི་འཕོད་པ་ཡིན། རྒྱུ་མཚན་ནི་ཁྱེད་རང་གི་ཕྱི་སྤྱོད་ལས་ནང་གི་ཀུན་སྤྱོད་ནི་རི་བོང་གི་རྭ་དང་། མོ་གཤམ་གྱི་བུ་ལྟ་བུར་གྱུར་བས་ལོས་ཡིན།
