གྲིབ་མ་ལ་འཁེན་པའི་མྱི།

སོང་ས་བསྡད་ས་ན། ལྐོག་གྱུར་ལ་བྱང་བའི་ཁྱོད་རང་ནི། ཕར་བལྟས་ཚོད་ཀྱིས་གཤིས་ཀ་འཇམ་ཞིང་ངང་རྒྱུད་བཟང་བ་ཞིག་དུ་མཐོང་ན་ཡང་། མི་ཤེས་ས་དང་མི་མི་རིག་ས་ནས་ཁྱོད་རང་ནི་འདྲེ་ལས་ཀྱང་བྱེད་རྒྱུ་རྒོད་པ་དང་། གདོན་ལས་ཀྱང་དྲན་རྒྱུ་རྒོད་པའི་མྱི་དེ་རེད། མཚམས་རེར་ཅི་ཞིག་ཤེས་ཁུལ་གྱིས་སྨྱུག་ཐོག་པའི་གྲལ་དུ་འཚང་བ་དང་། ལན་རེར་གང་ཞིག་ལ་ངེས་འབྱུང་སྐྱེ་ཁུལ་གྱིས་མི་རྟག་དྲན་གླུ་རེ་ལེན། དོན་དངོས་སུ་ཁྱོད་རང་ནི་ཉིན་དཀར་གྱི་ལྷ་དང་དགོང་མོའི་འདྲེ་རེད། སེམས་པ་ནས་ཆགས་སྲེད་ཀྱི་རི་གྲོང་ནས་ཐར་མྱོང་མེད་ལ། མིག་ཟུང་ནི་བུད་མེད་དག་གི་རྐུབ་དང་སྔུན། གདོང་དང་རྣམ་འགྱུར་བཅས་ལ་འཐིམ་ནས་ཤི་གྲབས་བྱས་ཀྱང་། ད་དུང་། རང་ཉིད་ནི་སྐྱེ་བ་སྔ་ཕྱི་དང་ལས་འབྲས་ལ་སྲོག་བཞིན་ལྟ་བུའི་ནང་བའི་རྗེས་མཇུག་པ་ཞིག་ཡིན་པར་རློམ་གྱི་ཡོད། རྒྱུ་མཚན་དེ་ལ་བརྟེན་ནས་ཁྱོད་ཀྱི་རང་ཉིད་ཆེས་དགའ་སའི་སྙིང་ཉེ་རེག་མེད་ལ། སེམས་གཏམ་དང་སྐྱིད་སྡུག་མཉམ་གནས་བྱེད་ཐུབ་པའི་ཆུང་མ་ཡང་རེག་མེད། ཁྱོད་ཀྱི་འདི་ལྟར་མྱི་ཚོགས་མང་བོ་ཞིག་དེད་ནས། མྱི་དག་གི་གྲལ་ནས་ལས་ཀ་ཙག་ཙག་རེ་བྱེད་པར་དཀའ་ཚེགས་ལ་གདོང་ལེན་བྱེད་ཐུབ་ཀྱི་ཡོད་ཀྱང་། ཁྱོད་རང་ནི་ལྐོག་གྱུར་ལ་བྱང་བའི་ཆགས་སྲེད་ཀྱི་བཟི་ཟིན་པའི་སྐྱེ་བུ་ཐ་ཤལ་བ་ཞིག་ཡིན་པ་ང་ཁོ་ནའི་མ་གཏོགས་སུས་ཀྱང་ཤེས་མེད། མཇུག་མཐར་ངས་ཁྱོད་རང་ལ་སྨོན་འདུན་ཞིག་ཞུ། གནམ་འོག་འདིར་སྐྱེ་བ་བུད་མེད་ལ་དགའ་བ་དང་། བུད་མེད་སྐྱེ་བ་ལ་དགའ་བ་ནི་ཆོས་ཉིད་ཡིན་དུས། ཁྱོད་ཀྱིས་རང་ཉིད་ཀྱི་སེམས་ཀྱི་ཚོར་འདུ་དང་ཆགས་པའི་མེ་ཁ་གསོ་བའི་བུད་མེད་རེ་བཙལ་ཐུབ་པར་ཤོག