སེམས་དང་ལུས་པོས་དབུ་མ་མ་ཐེགས་པར།།
ཁ་དང་ལག་པའི་རང་བཙན་མ་བརྩད་པར།།
སྤྱིར་ན་རིགས་ཀྱི་ཆེད་དུ་མ་འབུངས་པར།།
སྒེར་དོན་ཕྲ་མོ་ཙམ་གྱིས་མི་ཚེ་བསྐྱལ།།
འུ་ཅག་ཁ་བ་བོད་ཀྱི་རྗེས་རབས་དག།
ནང་ལ་བསྐོར་ན་དབའ་དང་སྤོབས་པ་ཡོད།།
ཕྱི་ལ་དེད་ན་སྙིང་ཆུང་སྡར་མའི་བུ།།
བཙན་པོ་རྗེས་ཀྱི་ཁྱི་ཕྲུག་ལྡོམ་པོ་འདྲ།།
གར་བདེ་གར་སྐྱིད་ས་ནས་མི་ཚེ་རོལ།།
རང་གི་ཁེ་ལས་སྤྱི་དོན་མ་སྒྲུབ་པར།།
རིགས་ཀྱི་གྱོང་རྒུད་ནམ་ཡང་གསུབ་ཐབས་མེད།།
འདི་ལྟར་ཞིབ་མོ་བློ་ཡིས་རང་ལ་བལྟས།།
བལྟ་བཞིན་བལྟ་བཞིན་འགྲམ་གྱི་མི་ཚོགས་ཏེ།།
རང་དང་འདྲ་བའི་རིགས་གཅིག་སྤུན་ཟླ་ཚོ།།
བཤད་ལ་དགའ་བའི་ངང་ཚུལ་འདི་ཉིད་ལས།།
དོན་ལ་འཁྱོངས་པའི་ལས་ཤིག་མེད་པ་འདིས།།
ཡར་རྒྱས་ཞེས་པའི་གོམ་བཀང་མ་སྤོས་པར།།
རྒུད་པའི་གཡབ་མོ་ཐོད་དུ་བསུས་པ་དེར།།
བསམ་ཞིང་བསམ་ན་སྐྱོ་བ་དྲགས་དུ་བཞུར།།
དབའ་རྒོད་འགའ་རེ་སྒྲོན་མེ་བཞིན་དུ་འབར།།
སྡར་མ་ང་ཚོ་ཕྱི་རོལ་ཀློང་དུ་འཁྱམ།།
བོད་ཡུལ་ཁ་བའི་ལྗོངས་སུ་རྒྱ་འདྲེ་བཀང་།།
བོད་ཀྱི་གནམ་ས་བོད་ལ་མ་དབང་བར།།
ཐ་ན་བོད་སྐད་བཤད་པའི་ཉེས་མེད་ཚོ།།
དོན་མེད་བརྡུང་འཕྲོག་བཅོམ་གསུམ་བྱས་པ་འདི།།
དམྱལ་བ་མི་ཡུལ་ཁམས་ན་ཡོད་དུས་རེད།།
བོད་ལ་སྐྱེ་བའི་བཙན་པོའི་རྒྱུད་ཡིན་ན།།
རིགས་མཐུན་ལག་བརྡང་སྤྲེལ་བའི་བརྡ་རྟགས་ཤིག།
དོན་མཐུན་སྙིང་དང་རུས་པའི་གསེང་ནས་དཀྲུགས།།
ད་ལྟའི་བོད་ལ་དགོས་པ་དེ་ཉིད་ཡིན།།
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།
རྣམ་པ་གཉིས་ཀ་ཕེབས་པ་དགའ་ཡོད། ལི་ཐང་དབྱིག་གཉེན་ལགས། ཉིད་ནས་རྡོར་གདན་ནས་དུས་དེབ་ག་རེ་བཙོང་བ་ཡིན་ནམ་ལགས། བོད་ནས་སླེབས་པ་དང་རེད་དམ། ཕྱི་ནས་དཔར་བསྐྲུན་བྱས་པ་ཁག་རེད། ངའི་ཕ་ལོ་ནི་ཁ་ཁོག་དྲང་མོ་ཞིག་ཡིན་ལགས།
གྲོགས་ལགས་མ་མཇལ་ཡུན་རིང་། ད་ལོ་རྡོར་གདན་དུ་ཉིད་ཀྱི་ཨ་ཕ་ཐུག་སོང་བས་སྐད་ཆ་འདྲ་མིན་བཤད་བཞིན་ཉིན་ཕྱེད་ཙམ་འགོར་སོང་། ཁོས་ཉིད་ཀྱིས་བྲིས་པའི་སྒྲུང་དེབ་བཙོང་བཞིན་འདུག་ཅིང་ངས་ཀྱང་དུས་དེབ་འགའ་ཤས་ཁྱེར་ཡོད་པས་མཉམ་དུ་བཙོང་པ་ཡིན། ཕ་ལོ་དེ་གཤིས་ཀ་འཇམ་པོ་འདྲ་ཡིན་པའི་ཚོར་སྣང་བྱུང་། དེ་འདྲ་ཡིན་ནམ།
ཐེངས་གཉིས་ལ་བཀླགས་པ་ཡིན། ཡག་གི་ཟེར་རྒྱུ་ལས་བཤད་རྒྱུ་ཅང་མེད། ཁྱེད་ཀྱི་མཚོ་སྔོན་པོ་ཟིན་བྲིས་ནང་སྐད་ཆ་ཞིག་བཞག་ཡོད།