ངའི་རིན་གོང་འཕར་བཞིན་ཡོད།

ང་རང་བལ་ཡུལ་དམག་གིས་འཇུ་བཟུང་བྱས་ཏེ། ཆུ་ཚོད་ཉེར་དྲུག་གི་རྗེས། བལ་ཡུལ་ལག་ཁྱེར་ཞིབ་གཤེར་ཁང་དུ་རྩིས་སྤྲོད་བྱས་ནས་ཉིན་འགའི་རྗེས་སུ། ལག་ཁྱེར་ཞིབ་གཤེར་ཁང་གིས་ང་རང་གིས་བལ་སྒོར་བརྒྱད་སྟོང་སྤྲད་དེ་ངའི་ས་ཡིག་བརྒྱབས་པའམ། ངའི་ཆེད་དུ་གནད་ཡོད་མི་སྣ་ཞིག་གིས་ས་ཡིག་བརྒྱབས་ཚེ། ང་རང་བཀག་གཉེར་འཛིན་བཟུང་ལས་གློད་རྒྱུ་བྱས་ཀྱང་། ངས་ས་ཡིག་རྒྱག་རྒྱུར་མོས་མཐུན་བྱས་མེད་ལ། སུས་ཀྱང་ངའི་ཚབ་ཏུ་ས་ཡིག་བརྒྱབས་ན་མི་འགྲིག་པར་ཞུས་པ་ཡིན། ཉིན་ཉེར་ལྔའི་རིང་དུ་བལ་ཡུལ་ལག་ཁྱེར་ཞིབ་གཤེར་ཁང་དུ་བཀག་གཉེར་བྱས་རིང་། ཁྲིམས་ཁང་དུ་ཁྲིམས་དཔོན་གྱི་སར་ཐེངས་གསུམ་ཁྲིད་མྱོང་བ་དང་། རྗེས་སུ་བལ་ཡུལ་ལག་ཁྱེར་ཞིབ་གཤེར་ལས་ཁུངས་རང་གིས་ཐག་བཅད་དེ། བལ་སྒོར་སྟོང་ཕྲག་ལྔ་བཅུ་སྤྲད་པ་དང་འགྲོ་ལུགས་བསྒྲུབ་ན། ང་རང་གློད་ཆོག་ཅེས་བཤད་དུས། ཁྲིམས་ཁང་གི་ཐག་གཅོད་མིན་པ་དང་གནས་ལུགས་རྒྱུ་མཚན་མེད་པའི་ཐག་གཅོད་དེར་ངས་གཏན་ནས་དང་ལེན་མ་བྱས་སྟབས། ང་རང་ལོ་ལྔ་ལྷག་གི་བཙོན་ཐག་བཅད་དེ་བཙོན་ཁང་དུ་བཅུགས་པ་རེད། བཙོན་ཁང་དུ་བཅུགས་ཏེ་ཉིན་གསུམ་གྱི་རྗེས་སུ། ང་ལ་ཡི་གེ་གཞན་ཞིག་སྤྲད་པའི་སྒང་ལ་ང་རང་གི་ནག་ཉེས་ནི། ལག་ཁྱེར་མེད་པར་བལ་ཡུལ་ནང་དུ་འཛུལ་བ་ཞེས་པ་དང་ཉེས་ཆད་བལ་སྒོར་སྟོང་ཕྲག་ལྔ་བཅུ་ག་དུས་སྤྲོད་ཐུབ་ན་དེ་དུས་ཕྱི་ལ་ཐོན་ཆོག་ཅེས་བྲིས་ཡོད་པ་རེད། ངས་ཁྲིམས་མཐུན་མིན་པའི་ཐག་གཅོད་དེར་གཏན་ནས་དང་ལེན་མ་བྱས་པ་དང་། བལ་ཡུལ་གནས་བཞུགས་བོད་མི་གཙོ་བའི་ཞི་བའི་འཐབ་རྩོད་ལ་རྒྱབ་སྐྱོར་གནང་མཁན་ཚོགས་སྡེ་ཁག་གིས་ཁོང་ཚོའི་རེ་འདོད་ངོས་ལེན་གནོང་རོགས་ཞེས་གསུངས་ཀྱང་། ངས་དེར་དང་ལེན་བྱས་ན་འགྲིག་གི་མེད་པའི་སྐོར་རབ་དང་རིམ་པ། ང་རང་ལ་ཐུག་འཕྲད་ཕེབས་མཁན་སུ་ཡོང་ཚང་མར་འགྲེལ་བཤད་བརྒྱབས་ཏེ། བཙོན་ཁང་ནང་གི་ཟླ་ངོ་གསུམ་ལྷག་གི་རིང་དུ། ཉིན་མཚན་མེད་པར་དུས་ཚོད་དམ་འཛིན་གྱིས་ཞི་བའི་འཐབ་རྩོད་ཁྲོད་ཀྱི་ཞི་བའི་གོམ་བགྲོད་འགོ་བཙུགས་པ་ནས་བར་ཆད་ཇི་ལྟར་འཕྲད་པའི་སྐོར་གྱི་དེབ་གཅིག་དཀའ་ལས་རྒྱབ་ཏེ་འབྲི་ཁུལ་བྱས་ཚར་བ་མ་ཟད། ངས་ཕྱི་ལོགས་ལ་རེ་བ་ཆེན་པོ་བྱས་པ་ལྟར་ཕྱི་ནས་གྲགས་འགུལ་མེད་པར། ང་ལ་ཐུག་འཕྲད་བྱེད་དུ་ཡོང་བ་རྣམས་ཀྱིས་བཀའ་འདྲི་རབ་དང་རིམ་པ་གནང་བ་དང་བསམ་ཚུལ་རྐྱང་གསུང་བ་ལས། ཁོང་ཚོས་ཐག་བཅད་དེ་བོད་ཀྱི་ཞི་བའི་འཐབ་རྩོད་པ་ང་གློད་གྲོལ་ཡོང་བའི་ནུས་པ་ཁྱད་འཕགས་དང་ཁྱབ་བསྒྲགས་སོགས། ངའི་ཡིད་ཚིམ་པ་དང་བོད་ཀྱི་ཞི་བའི་འཐབ་རྩོད་ངར་ཤུགས་ཆེ་རུ་འགྲོ་བར་ཕན་ནུས་ཐོན་པའི་བྱེད་སྟངས་སོགས་མཐོང་རྒྱུ་དང་ཐོས་རྒྱུ་ཡོད་པ་ནས་ནུས་པ་ཐོན་པ་ཆེས་དཀོན་པོ་རེད་འདུག ཉེ་དུས་སུ་འགྲོ་བ་མིའི་ཐོབ་ཐང་ལྷན་ཚོགས་ཀྱི་མི་སྣ་བལ་ཡུལ་གནས་བཞུགས་ཀྱི་བོད་མི་འགའ་ང་ལ་ཐུག་འཕྲད་བྱེད་དུ་འོང་ནས། ཁོང་ཚོས་ང་རང་བཙོན་ལས་བཏོན་ན་འགྲིག་མིན་དང་འགྲིག་ན་འདོན་ཐུབ་ཀྱི་ཡོད་ཅེས་དང་། ངའི་ས་ཡིག་དང་ཁས་ལེན་གང་ཡང་བྱེད་མི་དགོས་པར་སྒོར་མོའི་ཉེས་ཆད་འཁུར་ན་འགྲིག་རབས། ཁྲིམས་དང་འགྲོ་བ་མིའི་རིན་ཐང་ལ་བརྩི་སྲུང་མི་བྱེད་པའི་བལ་ཡུལ་ལག་ཁྱེར་ཞིབ་གཤེར་ཁང་ལས་འཕྲོས་པའི་བལ་ཡུལ་ཁྲིམས་ཀྱི་འགྲོ་ལུགས་འགྲོ་སྟངས་ཆེས་མི་ཉུང་བ་ཞིག་ང་ལ་འགྲེལ་བཤད་དང་སློབ་གསོ་རྒྱག་མཁན་གྱི་བོད་མི་དེར་ངས་ཨུ་ཚུགས་མ་བྱས་པར། ཤོག་སྟེང་དུ་ཕབ་པའི་ཁྲིམས་ཡོད་ཀྱང་ཁྲིམས་ལག་ལེན་དང་བརྩི་སྲུང་མི་བྱེད་པའི་རུལ་སུངས་ཀྱི་གཞུང་རྒྱུ་ཟོས་ཏེ། གཞུང་དོན་མི་བྱེད་པའི་མི་དེ་ཡི་རིགས་ཀྱི་ཁ་ལ་བལྟ་གསོ་མེད་པ་བཤད་ཀྱང་། ང་ལ་དེ་འདྲ་མ་ཡིན་པར། ཆོག་མཆན་ཐོབ་ན། ག་དུས་ཕྱི་ལ་བུད་ན་འགྲིག་རབས་ཅེས་ཨུ་ཚུགས་གནང་གི་འདུག ངས་ཀྱང་བཙོན་ཁང་ནས་བསམ་བློ་བཏང་བ་གཅིག་པུ་མ་ཡིན་པར། བཙོན་ལ་བསྡད་པ་ལས་ལྷག་ཞིག ང་ཕྱི་ལ་ཐོན་ན། བོད་ཀྱི་བདེན་དོན་ཆེད་དུ་ལས་ཀ་བྱེད་ཐུབ་ཀྱི་ཡོད་པ་ང་ལ་ཚུར་འགྲེལ་བཤད་མ་རྒྱབ་ཀྱང་། ངས་གསལ་བོ་ཤེས་ཀྱི་ཡོད་སྟབས། ངས་ས་ཡིག་རྒྱག་མ་དགོས་པར་ང་རང་ཕྱི་ལ་བཏོན་ཐུབ་ཀྱི་ཡོད་ཚེ་འགྲིག་གི་རེད་ཅེས་ཞུས་པ་ཡིན། ཉིན་ཁ་ཤས་ཀྱི་རྗེས་སུ་ཐུག་འཕྲད་དུ་ཡོང་མཁན་གྱི་མི་ཞིག་གིས་ངའི་གོང་ཚད་ནི་བལ་སྒོར་སྟོང་ཕྲག་བདུན་བཅུ་ནས་བརྒྱད་བཅུའི་བར་རེད་འདུག་ལ། གནས་སྐབས་རིང་བལ་ཡུལ་ལག་ཁྱེར་ཞིབ་གཤེར་ཁང་གི་འགན་འཛིན་མེད་སྟབས་བདུན་ཕྲག་རེ་གཉིས་ཤིག་འགོར་ཚུལ་གསུངས་སོང་ལ། འགྲོ་སོང་གང་ལ་ཐུག་ཀྱང་ཁོང་ཚོའི་འགན་འཁུར་གྱི་ཡིན་གསུངས་སོང་། དེ་རིང་བོད་ཀྱི་ཚོགས་པ་གཞན་ཞིག་གི་མིང་ཐོག་ནས་ཕོ་གསར་ཞིག་དང་བུད་མེད་ཅིག་ང་ལ་ཐུག་འཕྲད་ཐེངས་བཞི་བ་བཅར་བ་དང་། ཁོང་ཚོས་ཀྱང་ང་རང་ཕྱི་ལ་འདོན་ཐུབ་ལ་འབད་ཀྱི་ཡོད་ཀྱང་། ད་ལྟ་ངའི་གོང་ཚད་ནི་བལ་སྒོར་འབུམ་གཅིག་དང་ཁྲི་ལྔ་ལ་འཕར་འདུག་ལ། དེ་ཡི་སྟེང་ལ་ང་རང་གི་ས་ཡིག་མི་ཉུང་བ་ཞིག་རྒྱག་དགོས་ཀྱི་འདུག་གསུངས་སོང་། འདི་ནི་ངའི་གོང་ཚད་འཕར་སྟངས་རེད་ལ། ཕྱི་ལོགས་ཀྱི་བོད་མིའི་ཚོགས་སྡེ་ཁག་སོ་སོ་ནས་ང་རང་བཙོན་གྲོལ་བྱེད་ཕྱོགས་ལ་འབད་བཞིན་པའི་བོད་མིའི་སྤྱི་དོན་ལ་སེམས་ཁུར་བྱེད་པའི་རྣམ་འགྱུར་རེད། ངས༌དེ་རིང་ཁོང་རྣམ་པ་གཉིས་ལ། ཕྱི་ལོགས་ནས་ཁྱེད་ཅག་གིས་ཕན་ཚུན་ལ་འབྲེལ་བ་གནང་སྟེ་མཉམ་འབྲེལ་བྱེད་དགོས་པ་དང་ཚོགས་པ་མི་ཉུང་བ་ཞིག་གཅིག་རྗེས་གཉིས་མཐུད་དུ་ངའི་ཆེད་དུ་ལག་ཁྱེར་ཞིབ་གཤེར་ཁང་ལ་བཅར་ན་ཡག་པོ་མེད་ཚུལ་ཞུས་ཏེ་བཏང་བ་ཡིན། དངོས་གནས་ཐད་ཀར་ཞུས་ན། ཁྲིམས་མེད་ལུགས་མེད་ཀྱི་ལས་ཁུངས་འདིའི་རིགས་ལ་སྒོར་མོ་ག་ཚོད་དགོས་ཟེར་བ་སྤྲོད་པ་ལས། ཉུང་མཐའ་ལ་བོད་མི་བརྒྱ་སྐོར་ཞིག་བལ་ཡུལ་ལག་ཁྱེར་ཞིབ་གཤེར་ཁང་གི་སྒོ་འགྲམ་དུ་སོང་ནས། ‘ང་ཚོའི་མི་འདི་ལ་ནག་ཉེས་གང་ཡང་མེད་པར་བཙོན་འཇུག་བྱས་པ་དེར་གློད་གྲོལ་གཏོང་དགོས’ཞེས་སྐད་རྒྱག་ཐུབ་པ་ཡིན་ན། བལ་ཡུལ་ལག་ཁྱེར་ཞིབ་གཤེར་ཁང་གི་གཙོས་པའི་བལ་ཡུལ་གཞུང་གིས་བོད་དོན་འཐབ་རྩོད་ཀྱི་སྟེང་ལ་འཛིན་པའི་རྣམ་འགྱུར་དེ་ག་འདྲ་ཞིག་ལ་སླེབས་ཡོད་མེད། འཛམ་གླིང་མི་མང་དང་བལ་ཡུལ་མི་མང་ལ་ར་སྤྲོད་གསལ་བོ་བྱེད་ཐུབ་ངེས་ཡིན་ལ། བོད་མི་སུ་ཡིན་ཡང་རྗེས་ཕྱོགས་བལ་ཡུལ་ནས་བོད་དོན་འཐབ་རྩོད་བྱེད་རྒྱུར་སྤོབས་པ་སླེབས་ངེས་ཡིན། བལ་ཡུལ་གནས་བཞུགས་བོད་མི་རྣམས་ངའི་རྒྱབ་ཏུ་ཡོད་སྙམ་བཞིན་སེམས་ཤུགས་དང་ལ་རྒྱ་ཆེ་བའི་བོད་མི་མི་ཉུང་བ་རེ་མདུན་དུ་ཐོན་ཡོང་རྒྱུར་ཐེ་ཚོམ་མེད་པ་ཡིན། བོད་མིའི་ཐོག་ལ་སྐྱག་ལང་དུ་ཤོར་བའི་ལས་ཁུངས་འདིའི་རིགས་ཀྱིས་བོད་མི་རིག་ཚད་ཀྱི་ལག་ནས་ཆད་པ་གང་འདོད་དུ་ལེན་པའི་གོམ་གཤིས་ངན་པ་དེར་འགྱུར་བ་འགྲོ་ངེས་ཡིན་ལ། བདེན་དོན་གྱི་དྲུང་དུ། བོད་མི་ཟེར་བ་འདིའི་ཆིག་སྒྲིལ་དང་འགན་ཞིག་འཁུར་གྱི་ཡོད་བ་དེར་ངེས་པ་རྙེད་ངེས་ཡིན། སྒེར་སེམས་ལས་སྤྱི་སེམས་བྲལ་བའི་གཞུང་ཞབས་དེ་ཡི་རིགས་ནི་འགྲོ་བ་མིའི་ཐོབ་ཐང་གི་སྤྱི་དགྲ་དང་བལ་ཡུལ་མི་མང་གི་གཉའ་གནོན་བྱེད་མཁན། བོད་མི་རིགས་ལ་མཐོང་ཆུང་བྱེད་མཁན་དུ་གྱུར་བ་རེད། བོད་མིའི་རྩ་དོན་དང་འཐབ་རྩོད། ལས་འགུལ་གང་ཞིག་སྤེལ་ཡང་མཉམ་འབྲེལ་གྱི་ནུས་པའི་འདང་གི་མེད་པ་དང་། ཆིག་སྒྲིལ་གྱི་དཔུང་རོགས་བྱེད་པའི་ཐབས་ཇུས་ཀྱི་མ་འདང་བ་འདིས། འདས་མ་ད་གསུམ་ལ་ང་ཚོ་གང་དུ་བསྡད་ན་ཡང་གྱོང་ལས་འདྲ་མཉམ་མེད་པར་གྱུར་ཡོད་པ་ཐུགས་སུ་འཇགས་རྒྱུ་དང་། ང་རང་གི་གོང་ཚད་ད་དུང་སྤར་སྲིད་ལ། ངའི་སྒང་ལ་ཆ་རྐྱེན་གཞན་ཡང་འདོན་སྲིད་པ་ཡིན། དེ་ལས་ད་ལྟའི་བར་དུ་ངའི་ཞི་བའི་འཐབ་རྩོད་ལ་རྒྱབ་སྐྱོར་དང་ཐུགས་ཁུར་ཚད་མེད་གནང་མཁན་རྣམས་མཉམ་འཛོམས་གནང་སྟེ། བགྲོ་གླེང་དང་གྲོས་མོལ་ཡག་པོ་བྱེད་ཐུབ་ན་ཡག དེ་མིན་བོད་མི་ས་ཡ་དྲུག་གི་སྤྱི་དོན་དང་འགྲོ་བ་མིའི་ཐོབ་ཐང་རྩོད་ལེན་བྱེད་མཁན་གྱི་བོད་མི། བལ་ཡུལ་ས་ཐོག་ནས་མང་བོ་བྱུང་སྲིད་པ་ལས། ང་གཅིག་པུ་གོང་ཆེན་པོ་ཞིག་སྤྲད་དེ་བཙོན་ལས་བཏོན་ན་ཡང་། བོད་མི་བློ་གྲོས་དང་ལྷག་བསམ་ལྡན་པ། ཤེས་རབ་དང་སྙིང་སྟོབས་ཀྱི་ཕྱུག་པ་ཆེས་མི་ཉུང་བ་ཞིག་བོད་དོན་བདེན་པ་རྩོད་ལེན་བྱེད་པར་གྲལ་བསྒྲིགས་ནས་ཡོང་ངེས་ཡིན། དེ་དག་རེ་རེ་བཞིན་ཕེབས་ཡོང་དུས། ཁྱེད་ཅག་གིས་རང་དང་མི་མང་གི་རྡུལ་ཁྲག་བཙག་ནས་བསགས་པའི་ཐིགས་པ། སྒོར་མོའི་ཁ་གྲངས་མི་ཉུང་བ་ཞིག་འཁུར་ནས་མི་ངན་དེ་དག་གི་ཆེད་དུ་ཞལ་འདེབས་བསྡུས་ཏེ། ལག་ཁྱེར་ཞིབ་གཤེར་ཁང་གི་གཡོ་སྒྱུ་ཁྲམ་གསུམ་ལ་བྱང་བའི་མི་དེ་ཡི་རིགས་ལ། མི་ཡི་སེམས་ལ་སྤྱང་ལྟོགས་ཀྱི་རྣམ་ཤེས་ཞུགས་པ་དེ་ཚོར་སྤྲད་དེ། དུས་ག་ཚོད་བར་ལ་དོན་མེད་དུ་མི་ལ་མགོ་སྒུར་ནས་སྡོད་པའི་ལུགས་སྲོལ་འདི་སྐྱོང་རྒྱུ་ཡིན་ནམ་སྙམ་པ་དང་ཞོར་དུ། གཡོ་སྒྱུ་དང་ཁྲིམས་མེད་ལུགས་མེད་ལ་མགོ་བོ་སྒུར་བ་ལས་དྲང་བདེན་གྱི་ཆེད་དུ་བཙོན་ལས་རྐྱེན་གྲོངས་བྱུང་ཡང་བློ་འགྱོད་མེད། ཁོང་ཚོའི་ང་ལ་སྒོར་ཆད་ཡིག་ཐོག་ཏུ་ཡོད་པ་དེར་ཁུར་ཆོག་ཀྱང་། ཁོང་ཚོའི་ང་དང་འབྲེལ་བའི་བོད་མིའི་བདེན་དོན་རྩོད་ལེན་བྱེད་པའི་འགྲོ་བ་མིའི་ཐོབ་ཐང་གི་དབང་ཆ་འཕྲོག་པའི་ཐོབ་ཐང་དེ་ཁོང་ཚོར་མེད་ཅེས་གླིང་ཚ་ཚེ་བརྟན་རྡོ་རྗེས་བལ་ཡུལ་བཙོན་ཁང་ནས།                                དྲུང་ཡིག་དོན་ལྡན་ནས།