ཨུ་རུ་སུ་ཁེར་རྐྱང་གི་རྒྱལ་ཁབ་ཆཊ་རྒྱུ་རེད།

འཛམ་གླིང་བཟོ་ལས་ཡར་ཐོན་ཅན་གྱི་རྒྱལ་ཁབ་ཚོས་ཨུ་རུ་སུར་དཔལ་འབྱོར་གྱི་གནོན་ཤུགས་སྤྲད་དེ་ཁེར་རྐྱང་གི་རྒྱལ་ཁབ་ཅིག་བཟོ་བར་འབད་བརྩོན་བྱེད་བཞིན་ཡོད་འདུག

ཟླ་འདིའི་ཚེས་ ༢༤ ནས་ ༢༥ བར་གྱི་ཉིན་གཉིས་རིང་ཧོ་ལན་ཌིའི་གྲོང་ཁྱེར་ཧེད་གྷེ་ (Hugue) རུ་འཛམ་གླིང་གི་རྒྱལ་ཁབ་ ༥༣  གྱི་མགོ་ཁྲིད་གཙོས། མཉམ་འབྲེལ་རྒྱལ་ཚོགས་དང་ཡུ་རོབ་མཐུན་ཚོགས། རྒྱལ་སྤྱིའི་ཉེས་ཅན་ཉེན་རྟོག་ཚོགས་པ། རྒྱལ་སྤྱིའི་རྡུལ་ཕྲན་གློག་རྡུལ་ལྷན་ཚོགས་བཅས་ཀྱི་ཚོགས་གཙོ་དང་དྲུང་ཆེ་མཉམ་འཛོམས་ཀྱི་རྡུལ་ཕྲན་བདེ་འཇགས་ཚོགས་འདུ་ཞེས་པ་ཞིག་ཚོགས་ཏེ། འཛམ་གླིང་ནང་རྡུལ་ཕྲན་གྱི་འཇིགས་སྐུལ་སྔོན་འགོག་བྱེད་ཆེད་ཉེན་ཁ་ཆེ་བའི་རྡུལ་ཕྲན་རྒྱུ་ཆ་ཉུང་འཕྲི་དང་། རྡུལ་ཕྲན་གྱི་བདེ་འཇགས། རྒྱལ་སྤྱིའི་འབྲེལ་ལམ་ཡར་རྒྱས་གཏོང་ཐབས་ཐོག་གྲོས་མོལ་གནང་འདུག

ཚོགས་འདུ་དེ་དང་སྟབས་བསྟུན་ཏེ་བཟོ་ལས་ཡར་ཐོན་ཅན་གྱི་རྒྱལ་ཁབ་ཨ་རི་དང་དབྱིན་ཡུལ། འཇར་མན། ཁེ་ཎ་ཌ། ཧྥ་རན་སི། ཉི་ཧོང་། ཨི་ཊ་ལི་བཅས་ཀྱི་སྲིད་འཛིན་དང་སྲིད་བློན་བཅས་ཀྱིས་ཨུ་རུ་སུས་ཡུའུ་ཁུ་རེན་གྱི་རང་སྐྱོང་མངའ་ཁོངས་ཁུ་རེ་མྰེ་བཙན་བཟུང་གིས། ཡུའུ་ཁུ་རེན་ས་མཚམས་སུ་དམག་དཔུང་འགྲེམས་འཇོག་བྱས་པའི་ཐད་དཔལ་འབྱོར་གྱི་ཉེས་ཆད་གཏོང་དགོས་པ་དང་། ཨུ་རུ་སུ་བཟོ་ལས་ཡར་ཐོན་ཅན་གྱི་རྒྱལ་ཁབ་བརྒྱད་ཀྱི་ཁོངས་ནས་གནས་སྐབས་ཕྱིར་འབུད་བྱས་པའི་ “ཧེད་གྷེ་བསྒྲགས་གཏམ་”ཞེས་པ་ཞིག་སྤེལ་ཡོད་འདུག

ཧེད་གྷེ་བསྒྲགས་གཏམ་ནང་། ནུབ་ཕྱོགས་རྒྱལ་ཁབ་ཁག་གིས་ཡུའུ་ཁུ་རེན་གྱི་བདག་དབང་དང་རང་བཙན་ལ་སྔར་བཞིན་རྒྱབ་སྐྱོར་བྱེད་ཀྱི་ཡིན་པ་མ་ཟད། ཡུའུ་ཁུ་རེན་ནང་མང་གཙོ་དང་ཆབ་སྲིད་བརྟན་བརླིང་། དཔལ་འབྱོར་འཛུགས་སྐྲུན། འགྲོ་བ་མིའི་ཐོབ་ཐང་གོང་འཕེལ་གཏོང་བར་རོགས་སྐྱོར་བྱ་རྒྱུ་དང་། དེ་མིན། འདི་ལོའི་ལོའི་ཟླ་ ༦ པའི་ནང་བཟོ་ལས་ཡར་ཐོན་ཅན་གྱི་རྒྱལ་ཁབ་བརྒྱད་ཀྱི་ཚོགས་འདུ་ཨུ་རུ་སུའི་གྲོང་ཁྱེར་སུའུ་ཆེ་ (Sochi) ནང་འཚོགས་འཆར་ཡོད་པ་ཕྱིར་འཐེན་བྱས་ཏེ་སྦེལ་ཇམ་གྱི་རྒྱལ་སར་འཚོགས་རྒྱུ་དང་། ཟླ་ ༤ ནང་མོ་སུ་ཁོར་ (Moscow) འཚོགས་འཆར་ཡོད་པའི་ཚོགས་འདུར་ངོ་རྒོལ་ཆེད་ཚོགས་ཞུགས་བྱེད་རྒྱུ་མིན་ཚུལ། ཁུ་རེ་མྰེས་ཨུ་རུ་སུ་རྒྱལ་ཁོངས་སུ་འཛུལ་བའི་མང་མོས་ཐག་གཅོད་བྱས་པ་ཁྲིམས་འགལ་ཡིན་ཚུལ་སོགས་བཀོད་ཡོད་འདུག

ཐེངས་འདིའི་རྡུལ་ཕྲན་བདེ་འཇགས་ཚོགས་འདུར་ཨུ་རུ་སུའི་སྲིད་འཛིན་པུ་ཊིན་ཞུགས་མེད་པར་ཁོའི་ཚབ་ཏུ་ཕྱི་སྲིད་བློན་ཆེན་ལྰ་བེ་རོབ་བེ་(Sergei Lavrov) ཚོགས་ཞུགས་བྱས་ཡོད་འདུག་ལ། ཚོགས་འདུའི་སྐབས་ཕྱི་སྲིད་བློན་ཆེན་ཡུའུ་ཁུ་རེན་བར་བརྒལ་སྲིད་གཞུང་གི་ཕྱི་སྲིད་བློན་ཆེན་ཨན་ཌི་རེ་(Andrii Deshchytsia) ལ་གཞུང་འབྲེལ་ཐོག་ཐུག་འཕྲད་ཐོག་མ་གནང་འདུག འོན་ཀྱང་། ཟླ་སྔོན་མའི་ཚེས་ ༢༢ ཉིན་ཡུའུ་ཁུ་རེན་གྲོས་ཚོགས་ཀྱིས་སྲིད་འཛིན་ཡྰ་ཎོ་ཁོ་བེ་ཆི་ (Viktor Yanukovych) ཕྱིར་འབུད་བཏང་བ་ནས་བཟུང་། ཨུ་རུ་སུས་བར་བརྒལ་སྲིད་གཞུང་གི་མི་མང་གི་ངོ་ཚབ་མཚོན་ཐུབ་ཀྱི་མེད་སྟབས། ཁྲིམས་མཐུན་གྱི་གཞུང་ལ་ངོས་འཛིན་བྱས་ཡོད་མི་འདུག

ཧེད་གྷེར་རྟེན་གཞི་བྱས་པའི་ཡུའུ་ཁུ་རེན་གཞུང་ཚབ་ཁང་གིས། “ ཕྱི་སྲིད་བློན་ཆེན་ལྰ་བེ་རོབ་བེ་ཡིས་ཨུ་རུ་སུས་ཡུའུ་ཁུ་རེན་གྱི་ཤར་ལྷོ་ས་ཁུལ་དུ་དམག་ཤུགས་བེད་སྤྱོད་གཏོང་རྒྱུའི་བསམ་བློ་མེད་པ་ནན་བརྗོད་དང་། གང་མགྱོགས་རྒྱལ་ཁབ་གཉིས་ཀྱི་ཕྱི་སྲིད་དང་བདེ་སྲུང་རིམ་པ་ཛ་དྲག་ཐུག་འཕྲད་བྱེད་པར་མོས་མཐུན་བྱུང་ཡོད། ” ཅེས་བརྗོད་འདུག

ཨུ་རུ་སུ་བཟོ་ལས་ཡར་ཐོན་ཅན་གྱི་རྒྱལ་ཁོངས་ནས་ཕྱིར་འབུད་བྱས་པའི་སྐོར་ལ། ཨུ་རུ་སུའི་ཕྱི་སྲིད་བློན་ཆེན་ལྰ་བེ་རོབ་བེ་ཡིས་གསར་འགོད་པར། བཟོ་ལས་ཡར་ཐོན་ཅན་གྱི་རྒྱལ་ཁབ་བརྒྱད་གཞུང་འབྲེལ་མིན་སྟབས། སུ་གང་ཡང་ཕྱིར་འབུད་བྱེད་མི་ཐུབ་པ་དང་། གལ་སྲིད། ཨུ་རུ་སའི་ནུབ་ཕྱོཊ་མཛའ་མཐུན་རྒྱལ་ཁབ་ཚོས་བཟོ་ལས་ཡར་ཐོན་ཅན་གྱི་ཚོགས་པ་དེ་མི་དགོས་པར་མཐོང་ཚེ། ཨུ་རུ་སུའི་དཀའ་ངལ་གང་ཡང་མཐོང་གི་མེད་སྐོར་བརྗོད་འདུག

ཐེངས་འདིའི་ཚོགས་འདུ་སྐབས་ཨ་རིའི་སྲིད་འཛིན་ཨོ་བྷ་མ་དང་རྒྱ་ནག་གི་སྲིད་འཛིན་ཞི་ཅིན་ཕིན་གཉིས་ཐུག་འཕྲད་གནང་སྟེ། སྲིད་འཛིན་ཨོ་བྷ་མས་རྒྱ་ནག་གིས་ཨུ་རུ་སུ་ཁེར་རྐྱང་རྒྱལ་ཁབ་དུ་འཇོག་པར་རེ་སྐུལ་བྱས་ཡོད་པ་མ་ཟད། གལ་ཏེ། རྒྱ་ནག་གིས་དེ་ལྟར་བྱེད་མི་ཐུབ་ཚེ་བར་གནས་བྱས་ཏེ་རྒྱལ་སྤྱིའི་རྩ་ཁྲིམས་ལ་བརྩི་མཐོང་དང་རྒྱལ་ཁབ་གཞན་ལ་ཐེ་གཏོགས་མི་བྱེད་པའི་སྐུལ་མ་བཏང་འདུག འོན་ཀྱང་། རྒྱ་ནག་ཞིན་ཧྭ་གསར་ཁང་གིས། སྲིད་འཛིན་ཞི་ཅིན་ཕིན་གྱིས་ཨ་རིའི་སྲིད་འཛིན་ཨོ་བྷ་མར་ཨ་རིས་ངེས་པར་དུ་ཤར་ལྷོ་རྒྱ་ནག་རྒྱ་མཚོའི་རྩོད་རྙོག་ཁག་ལ་དྲང་བདེན་གྱི་ལངས་ཕྱོཊ་འཛིན་དགོས་ལན་འདེབས་བྱས་ཡོད་ཚུལ་བཀོད་འདུག

གསར་འགོད་པ། ལྷ་སྐྱབས་རྒྱལ།