མཉམ་འབྲེལ་རྒྱལ་ཚོགས་ཀྱི་དཔལ་འབྱོར་དང་སྤྱི་ཚོགས་ལྷན་ཚོགས་ཁྱབ་ཁོངས་ཀྱི་ལས་ཁུངས་མང་པོ་ཞིག་གི་རྐུབ་སྟེགས་རྒྱ་གར་ལ་ཐོབ་ཡོད་འདུག
ཁ་སང་མཉམ་འབྲེལ་རྒྱལ་ཚོགས་ཀྱི་དཔལ་འབྱོར་དང་སྤྱི་ཚོགས་ལྷན་ཚོགས་ཁྱབ་ཁོངས་ཀྱི་རྒྱལ་སྤྱིའི་མྱོས་རྫས་བཀག་སྡོམ་ཚན་པའི་རྒྱུན་ལས་རྒྱལ་ཁབ་ཨུ་རུ་སུ་དང་ཧྥ་རན་སི། ལྷོ་ཨ་ཧྥི་རི་ཀ ཐེ་ལན་ཌི ཀོ་ལོམ་བྷི་ཡ་བཅས་ཀྱི་ལོ་ལྔའི་དུས་ཡུན་རྫོགས་བཞིན་ཡོད་སྟབས། ལྷན་ཚོགས་རྒྱལ་ཁབ་ ༥༤ ཡིས་རྒྱལ་ཁབ་འདྲ་མིན་གྱི་འོས་མི་ཁག་ ༡༥ ཙམ་ལ་འོས་ཤོག་འཕངས་པ་བརྒྱུད། རྒྱ་གར་གྱི་འོས་མི་ཇག་ཇེ་ཌི་པཱ་ཝུ་ཌི་ཡཱ་(Jagjit Pavadia)ལགས་ལ་འོས་ཤོག་ ༣༤ ཐོབ་སྟེ། ༢༠༡༥ ནས་ ༢༠༢༠ བར་གྱི་རྒྱལ་སྤྱིའི་མྱོས་རྫས་བཀག་སྡོམ་ཚན་པའི་རྒྱུན་ལས་ཚོགས་མིར་བདམས་ཐོན་བྱུང་ཡོད་འདུག
འདིའི་ཐད་རྒྱ་གར་གཞུང་གིས། “ཇག་ཇེ་ཌི་པཱ་ཝུ་ཌི་ཡཱ་ལགས་ནི་ཁྲིམས་སྒྲིག་དོན་འཁྱོལ་གནང་མཁན་གྱི་ཕུལ་བྱུང་ལས་བྱེད་ཅིག་ཡིན་སྟབས། རྒྱལ་སྤྱིའི་མྱོས་རྫས་བཀག་སྡོམ་ཚན་པའི་ལས་དོན་བྱེད་ཕྱོགས་ཐད་གཟེངས་སུ་ཐོན་པའི་ཕྱག་ལས་གནང་ངེས་ཡིན།”ཞེས་བརྗོད་འདུག
རྒྱལ་སྤྱིའི་མྱོས་རྫས་བཀག་སྡོམ་ཚན་པ་ནི་མིའི་འཕྲོད་བསྟེན་ཐད་ཀྱི་ཆེད་ལས་མི་སྣས་གྲུབ་པའི་རང་དབང་ཅན་གྱི་ཚན་པ་ཞིག་ཡིན་ཞིང་། ཚོགས་པ་འདིར་ཚོགས་མི་ ༡༣ ཡོད་པ་དང་། དེ་དག་མཉམ་འབྲེལ་རྒྱལ་ཚོགས་ཀྱི་དཔལ་འབྱོར་དང་སྤྱི་ཚོགས་ལྷན་ཚོགས་ཀྱིས་ལོ་ ༥ རེའི་མཚམས་སུ་འོས་འདེམས་བྱེད་བཞིན་ཡོད་འདུག་ལ། ཚོགས་མི་ ༡༠ རྒྱལ་ཁབ་ཁག་གིས་ཐད་བསྐོས་བྱེད་བཞིན་ཡོད་པ་དང་། ཚོགས་མི་ ༣ རྒྱལ་སྤྱིའི་འཕྲོད་བསྟེན་ལས་ཁུངས་ཀྱི་གསོ་རིག་ཆེད་མཁས་བ་བསྐོ་བཞག་བྱེད་བཞིན་ཡོད་འདུག
རྒྱ་གར་ ༢༠༡༥ ནས་ ༢༠༡༧ བར་མཉམ་འབྲེལ་རྒྱལ་ཚོགས་ཀྱི་ཡར་རྒྱས་ཐེབས་རྩ་ཚོགས་ཆུང་གི་ཚོགས་མིའི་ཁོངས་སུ་ཚུད་ཡོད་པ་མ་ཟད། ༢༠༡༥ ནས་ ༢༠༡༨ བར་མཉམ་འབྲེལ་རྒྱལ་ཚོགས་ཀྱི་གཞུང་འབྲེལ་མིན་པའི་ཚོགས་ཆུང་གི་ཚོགས་མི་དང་། ༢༠༡༥ ནས་ ༢༠༡༨ བར་ཚན་རིག་དང་འཕྲུལ་ལས་ཚན་རྩལ་ཡར་རྒྱས་ཚོགས་ཆུང་གི་ཚོགས་མི་བཅས་སུ་བདམས་ཡོད་འདུག རྒྱ་གར་གྱི་འོས་མི་ཅན་ཌར་ཤེ་ཁར་ཌ་སེ་གུབ་ཌ་(Chandrasekhar Dasgupta) ལགས་ ༢༠༡༥ ནས་ ༢༠༡༧ བར་མཉམ་འབྲེལ་རྒྱལ་ཚོགས་ཀྱི་དཔལ་འབྱོར་དང་སྤྱི་ཚོགས། རིག་གཞུང་བཀོལ་སྤྱོད་ཐོབ་ཐང་ཚོགས་ཆུང་གི་ཚོགས་མི་བཅས་སུ་བདམས་ཡོད་འདུག
ལྕམ་ཇག་ཇེ་ཌི་པཱ་ཝུ་ཌི་ཡཱ་(Jagjit Pavadia)ལགས་ནི་རྒྱ་གར་གཞུང་གི་ལས་བྱེད་རྒན་གྲས་ཤིག་ཡིན་པ་མ་ཟད། ནག་པུར་དཔྱ་ཁྲལ་ལས་ཁུངས་ཀྱི་མགོ་འཛིན་གནང་མྱོང་ཡོད་ལ། རྒྱ་གར་གྱི་མྱོས་རྫས་དོ་དམ་ཚོགས་ཆུང་གི་འགན་འཛིན་དང་། ལྐོག་ཟ་རུལ་སུངས་རྟོག་ཞིབ་ཚོགས་ཆུང་གི་ཚོགས་གཙོ་བཅས་གནང་མྱོང་ཡོད་འདུག
གསར་འགོད་པ། དོན་གྲུབ།
