རང་ཐག་རང་གཅོད་བྱ་རྒྱུ་ཡིན།

ཡུའུ་ཁུ་རེན་གྱི་སྲིད་འཛིན་འོས་བསྡུ་བསླེབ་ལ་ཉེ་སྐབས་གྱེན་ལོག་པ་ཚོས་ཡུའུ་ཁུ་རེན་ཤར་ཕྱོགས་གྲོང་ཁྱེར་ཁག་ནང་ཟིང་འཁྲུག་མུ་མཐུད་སློང་བཞིན་ཡོད་འདུག

ཟླ་འདིའི་ཚེས་ ༢ ཉིན་ཡུའུ་ཁུ་རེན་ལྷོ་ཕྱོགས་གྲོང་ཁྱེར་ཨོ་ཊེ་སཱ་ (Odessa) རུ་ཨུ་རུ་སུར་དགའ་མོས་བྱེད་མཁན་དང་ཡུའུ་ཁུ་རེན་བར་བརྒལ་གཞུང་ལ་རྒྱབ་སྐྱོར་བྱེད་མཁན་མང་ཚོགས་བར་འཁྲུག་འཛིང་ཤོར་ཏེ་མི་ ༤༢ བསད་ཡོད་པ་དང་། ཉི་ཤུ་ཙམ་ལ་རྨས་སྐྱོན་བཟོས་རྗེས། ཉེན་རྟོག་པས་ངོ་རྒོལ་བ་ ༦༨ ཙམ་འཛིན་བཟུང་བྱས་ཡོད་པ་དང་། དེའི་རྗེས་གྱེན་ལོག་པ་ཚོས་ཉེན་རྟོག་ལས་ཁུངས་གཙོས་སྲིད་གཞུང་གི་ལས་ཁུངས་ཁག་ལ་གཏོར་སྐྱོན་ཚབས་ཆེན་བཏང་སྟེ་གནས་ཚུལ་ཛ་དྲག་ཆེ་རུ་འགྲོ་བཞིན་ཡོད་སྟབས། ཁ་སང་གཞུང་གིས་ཟིང་འཁྲུག་ཞི་འཇགས་ཡོང་ཆེད་ཁོ་ཚོར་ཀློད་གྲོལ་བཏང་ཡོད་འདུག

དོན་རྐྱེན་འདིའི་ཐད་ཡུའུ་ཁུ་རེན་གྱི་སྲིད་བློན་ཡཱ་ཌི་སིན་ཡོ་ཁུ་ (Arseniy Yatsenyuk) ལགས་ཀྱིས་བྷེ་བྷེ་སེའི་གསར་འགོད་པར། ཐེངས་འདིའི་ཨོ་ཊེ་སཱའི་དོན་རྐྱེན་དེའི་རྒྱབ་ཏུ་ཨུ་རུ་སུས་ངན་སྐུལ་བྱས་ཡོད་སྐོར་དང་། ས་གནས་ཉེན་རྟོག་པ་ཚོས་རྒྱལ་ཁབ་དང་མི་མང་གི་བདེ་འཇགས་ལ་སྲུང་སྐྱོང་བྱེད་པ་ལས་གཞུང་དངུལ་ལྐོག་ཟ་བྱེད་པར་ངན་གོམས་སུ་སོང་ཡོད་སྟབས། སྲིད་གཞུང་གིས་ཁོ་ཚོར་རྟོག་ཞིབ་མཐིལ་ཕྱིན་བྱ་རྒྱུ་ཡིན་ཚུལ་བརྗོད་འདུག

ཡུའུ་ཁུ་རེན་ཤར་ཕྱོགས་གྲོང་ཁྱེར་ཁག་ནང་གྱེན་ལོག་པ་ཚོས་གཞུང་གི་ལས་ཁུངས་དང་ས་ཁུལ་མང་པོ་མུ་མཐུད་བཙན་བཟུང་བྱེད་ཀྱིན་ཡོད་པར་ཡུའུ་ཁུ་རེན་བར་བརྒལ་སྲིད་གཞུང་གིས་དྲག་པོའི་གདོང་ལེན་བྱེད་པ་སོགས་གནས་ཚུལ་ཉིན་རེ་བཞིན་ཛ་དྲག་ཆགས་བཞིན་ཡོད་སྟབས། མཉམ་འབྲེལ་རྒྱལ་ཚོགས་བདེ་འཇགས་ལྷན་ཁང་གིས་དམིགས་བསལ་ཚོགས་འདུ་ཞིག་བསྐོངས་ཡོད་ཀྱང་། ནུབ་ཕྱོགས་རྒྱལ་ཁབ་ཁག་དང་ཨུ་རུ་སུའི་བར་ལྟ་བ་མ་མཐུན་པའི་དབང་གིས་དོན་ཕན་ལྡན་པའི་གྲུབ་འབྲས་བྱུང་མེད།

ཉིན་དེར་ཨ་རིའི་ཕོ་བྲང་དཀར་པོ་རུ་ཨ་རིའི་སྲིད་འཛིན་ཨོ་བྷ་མ་དང་འཇར་མན་གྱི་སྲིད་བློན་ལྕམ་ཨན་རྗི་ལྰ་ (Angela Merkel) གཉིས་ཐུག་འཕྲད་གནང་སྟེ། བར་ལམ་རྒྱལ་ཁབ་གཉིས་ཀྱི་འབྲེལ་ལམ་ཇེ་སྡུག་ཏུ་སོང་བར་བསྐྱར་གསོ་དང་། ཟླ་འདིའི་ཚེས་ ༢༥ ཉིན་ཡུའུ་ཁུ་རེན་གྱི་སྲིད་འཛིན་འོས་བསྡུ་བྱེད་ཀྱི་ཡོད་སྟབས། དེ་སྔོན་ཨུ་རུ་སུས་ཡུའུ་ཁུ་རེན་གྱི་དཀའ་རྙོག་སེལ་བར་མཐུན་སྦྱོར་མ་བྱས་ཚེ། ཨ་རི་དང་འཇར་མན་གཉིས་ཀྱིས་ཨུ་རུ་སུར་དཔལ་འབྱོར་ཉེས་ཆད་ཐེངས་གསུམ་པ་གཏོང་རྒྱུ་ཡིན་སྐོར་སོགས་བསྒྲགས་ཡོད་འདུག

ཟླ་འདིའི་ཚེས་ ༣ ཉིན། གྱེན་ལོག་པ་ཚོས་ཟླ་སྔོན་མའི་ཟླ་མཇུག་ཏུ་ཡུ་རོབ་མཐུན་ཚོགས་ཀྱི་བདེ་འཇགས་དང་མཉམ་འབྲེལ་ཚོགས་པའི་མི་ ༡༣ ཡུའུ་ཁུ་རེན་གྱི་ཤར་ཕྱོགས་གྲོང་ཁྱེར་སི་ལྰ་བེ་ཡན་སི་ཁུ་ནང་རྟོག་ཞིབ་བྱེད་པར་བསྐྱོད་སྐབས་བཙན་ཁྲིད་བྱས་ཡོད་པ་དག་ཀློད་གྲོལ་བཏང་ཡོད་འདུག

ད་ལྟའི་ཆར་གྱེན་ལོག་པ་ཚོས་ཡུའུ་ཁུ་རེན་གྱི་ཤར་ཕྱོགས་གྲོང་ཁྱེར་ཊོབ་ནེ་ཌི་སི་ཁུ་ (Donetsk) དང་ཁ་ར་མཱ་ཊོར་སི་ཁུ་(Kramatorsk)་གཙོས་གྲོང་ཁྱེར་དང་གཞུང་གི་ལས་ཁུངས་མང་པོ་བཙན་བཟུང་བྱས་ཡོད་པ་དང་། ལྷག་པར་དུ་ ཟླ་འདིའི་ཚེས་ ༡༡ ཉིན། གྲོང་ཁྱེར་ཊོབ་ནེ་ཌི་སི་ཁུའི་མང་ཚོགས་ཡུའུ་ཁུ་རེན་དང་ཨུ་རུ་སུ་གཉིས་ཀྱི་རྒྱལ་ཁོངས་གང་དུ་འགྲོ་དགོས་མིན་ཐད། འོས་ཤོག་བླུགས་ཏེ་རང་ཐག་རང་གཅོད་བྱ་རྒྱུ་ཡིན་འདུག

གནད་དོན་དབྱེ་ཞིབ་པ་ཚོས། ཡུའུ་ཁུ་རེན་ཤར་ཕྱོགས་གྲོང་ཁྱེར་ཁག་ནང་ཡོད་པའི་ཨུ་རུ་སུའི་སྐད་ཤོད་མཁན་མི་ རིགས་ལ་ཨུ་རུ་སུས་སྲུང་སྐྱོབ་བྱེད་པར་བདག་དབང་ཡོད་པའི་སྐད་ཆ་དང་།  ནུབ་ཕྱོགས་རྒྱལ་ཁབ་ཚོས་ཡུའུ་ཁུ་རེན་གྱི་དཀའ་རྙོག་སྲིད་དོན་འབྲེལ་མོལ་བརྒྱུད་ནས་སེལ་བའི་འབད་བརྩོན་བྱེད་ཀྱི་ཡོད་སྟབས། ཡུའུ་ཁུ་རེན་བར་བརྒལ་སྲིད་གཞུང་གིས་གྱེན་ལོག་པ་ཚོར་དམག་རྒྱག་པར་ཚོད་འཛིན་བྱས་ཡོད། གལ་སྲིད། ཨུ་རུ་སུས་མོས་མཐུན་བྱུང་ན་ནུབ་ཕྱོགས་རྒྱལ་ཁབ་ཚོས་ཐེ་གཏོགས་བྱེད་མི་དགོས་པར་ཡུའུ་ཁུ་རེན་གྱི་དཀའ་རྙོག་ལས་སླ་བོར་སེལ་ཐུབ་པའི་ཚོད་དཔག་བྱེད་བཞིན་ཡོད་འདུག