༧གོང་ས་མཆོག་གིས་འཇར་མན་གནས་སྡོད་བོད་མི་ཚོར་བཀའ་སློབ་གནང་སྐབས། ངོས་རང་འཆི་ཡང་འོས་བསྡུའི་ལམ་ནས་འདེམས་ཐོན་བྱུང་བའི་མགོ་ཁྲིད་མུ་མཐུད་གནས་ཀྱི་ཡོད་སྟབས། ང་ཚོས་འཇོན་ན་ང་ཚོའི་འགྲོ་སྟངས་ཧ་ཅང་བརྟན་པོ་ཆགས་ཡོད་པ་དང་། ཆབ་སྲིད་ཀྱི་ཐོག་ནས་རྒྱ་ནག་གཅིག་བསྡུ་རིང་ལུཊ་ཡིན་སྟབས། ང་ཚོ་མང་གཙོའི་ལམ་དུ་བསྐྱོད་ཀྱིན་པ་དེ་གཟི་བརྗིད་ཡིན་སྐོར་གསུངས་འདུག
ཟླ་འདིའི་ཚེས་ ༡༣ ཉིན་ནས་བཟུང་༸གོང་ས་མཆོག་གིས་འཇར་མན་དུ་ཆོས་ཕྱོཊ་ཀྱི་མཛད་འཕྲིན་སྐྱོང་བཞིན་པ་ལྟར། དེ་རིང་ཚེས་ ༡༦ ཉིན་༸གོང་ས་མཆོག་གིས་འཇར་མན་གྱི་ཚོགས་པ་ (German Speakers Association) ཞེས་པས་ ༢༠༡༤ ལོའི་ལོ་འཁོར་གཟེངས་རྟགས་འབུལ་བཞེས་དང་འབྲེལ་བའི་མཛད་འཕྲིན་ཁག་སྐྱོང་བཞིན་ཡོད་པ་དང་། ཁ་སང་ཚེས་ ༡༥ ཉིན་གྱི་སྔ་དྲོ་༸གོང་ས་མཆོག་འཇར་མན་གྲོང་ཁྱེར་ཧྥི་རན་ཁི་ཧྥོར་ཌི་ (Frankfurt) ཡོད་པའི་ཕོབ་སི་ཀིར་ཆི་ཡི་ཤུའི་ལྷ་ཁང་དུ་ཆིབས་བསྒྱུར་གྱིས། ཕེ་རིང་ཕོ་ཊི་གྲོང་ཁྱེར་གྱི་སྤྱི་ཁྱབ་སྐུ་ཞབས་ཕི་ཊར་ཕིལ་ཌི་མན་གཙོས་སློབ་ཕྲུག་བཅས་ལ་མཇལ་འཕྲད་དང་བཀའ་སློབ་དང་སློབ་ཕྲུག་ཚོའི་དྲི་བར་བཀའ་ལན་བཅས་གནང་ཡོད་པར་མ་ཟད། འཇར་མན་གནས་སྡོད་བོད་མི་ ༣༠༠ ལྷག་ལ་མཇལ་ཁ་དང་བཀའ་སློབ་གནང་སྐབས། བོད་མི་རིགས་དང་རྒྱལ་ཁབ་ཀྱི་བླ་སྲོག་ལྟ་བུར་གྱུར་བའི་བོད་མི་རིགས་ཀྱི་སྐད་ཡིག་སྲུང་སྐྱོབ་བྱ་རྒྱུ་དང་མང་གཙོའི་ལམ་དུ་བསྐྱོད་རྒྱུ་གལ་འགངས་ཆེན་པོ་ཆགས་ཡོད་སྟབས། གཞོན་སྐྱེས་ཚོ་ཕྱི་རྒྱལ་ལུང་པར་འཚར་བྱུང་ཡོད་ཀྱང་། བོད་པའི་སྐད་ཡིག་ཤེས་ཐུབ་པ་བྱེད་དགོས་པ་དང་མ་བརྗེད་པ་བྱ་དགོས་སྐོར་སོགས་གསུངས་ཡོད།
སྐུ་དབང་རྩིས་སྤྲོད་ཐད་༧གོང་ས་མཆོག་གིས། ངོས་ཆབ་སྲིད་ཀྱི་ལས་འགན་ཡོངས་རྫོགས་མཚམས་འཇོག་བྱས་པ་ཡིན། དེ་ངོས་རང་སེམས་ཤུགས་ཆག་པ་དང་བོད་སྤྱི་པའི་དོན་ལ་རེ་བ་མེད་པར་ཆབ་སྲིད་ཀྱི་འགན་འཁུར་བཞག་པ་མིན། གང་ལྟར། ང་ཚོ་མང་གཙོའི་ལམ་དུ་འགྲོ་རྒྱུ་ཧ་ཅང་གལ་ཆེན་པོ་རེད། ངོས་རང་ཆུང་དུས་ནས་མང་གཙོའི་ལམ་ལུགས་ལ་དགའ་ཞེན་ཆེན་པོ་ཡོད། ང་ཚོ་རྒྱ་གར་ལ་སྐྱབས་བཅོལ་དུ་བསླེབས་རྗེས་མང་གཙོའི་ལམ་ནས་སྤྱི་འཐུས་བསྐོ་གཞག་བྱས་པ་རེད། ༢༠༠༡ ལོར་བཀའ་བློན་ཁྲི་པ་མི་མང་གིས་འོས་བསྡུ་བྱས་ཏེ་བསྐོ་གཞག་བྱས་པ་ཞིག་ཆགས་ཡོད། ཆབ་སྲིད་ཀྱི་འགན་དབང་གཙོ་བོ་བཀའ་བློན་ཁྲི་པས་ཁུར་ཏེ་ངོས་རང་ཕྱེད་རྒན་ཡོལ་གྱི་གནས་སྟངས་ཐོག་བསྡད་པ་ཡིན། ༢༠༡༡ ནས་ངོས་རང་རྒན་ཡོལ་ཆ་ཚང་ཞུས་པ་ཡིན། དེ་བཞིན་བཀའ་བློན་ཁྲི་པའི་མིང་ཡང་སྲིད་སྐྱོང་ལ་བསྒྱུར་བ་རེད། ཅེས་གསུངས་འདུག
ཡང་༧གོང་ས་མཆོག་གིས་མུ་མཐུད། ངོས་ཀྱིས་ལོ་བཅུ་དྲུག་སྐབས་སྲིད་སྐྱོང་སྟག་བྲག་རིན་པོ་ཆེའི་དྲུང་ནས་ཆབ་སྲིད་ཀྱི་འགན་དབང་ཞུས་པ་ཡིན། ངོས་རང་ལོ་བདུན་ཅུ་དོན་དྲུག་ལ་བསླེབས་སྐབས་མང་གཙོའི་ལམ་ནས་འོས་བསྡུ་བྱས་ཏེ་བསླེབས་པའི་སྲིད་སྐྱོང་ལ་འགན་དབང་ཕུལ་བ་ཡིན། དེ་ནི་རླབས་ཆེན་ཞིག་རེད་ཅེས་སྐབས་དེའི་མཛད་སྒོར་ངོས་བཤད་པ་ཡིན། ཆབ་སྲིད་ཀྱི་ལས་འགན་འོས་བསྡུའི་ལམ་ནས་ཕེབས་པའི་མགོ་ཁྲིད་ཀྱིས་གཙང་མ་འཁྱེར་སྐབས། རྒྱ་མི་མཁྲེགས་བཟུང་བྱེད་མཁན་ཚོས་བོད་པའི་གནད་དོན་དེ་ཏཱ་ལའི་བླ་མར་ཐུག་ཡོད་པར་བརྟེན། ཏཱ་ལའི་བླ་མ་འཆི་སོང་ན་བོད་པའི་གནས་ཚུལ་མེད་པ་ཆགས་ཀྱི་རེད་ཅེས་སྔོན་
མ་ནས་ཤོད་ཀྱི་འདུག ད་ཆ་དེ་ལྟར་ཤོད་རྒྱུ་ལྷག་མེད། ངོས་འཆི་ཡང་མི་མང་གིས་ལོ་ལྔ་རེའི་མཚམས་སུ་འོས་བསྡུའི་ལམ་ནས་འདེམས་ཐོན་བྱུང་བའི་མགོ་ཁྲིད་མུ་མཐུད་གནས་ཀྱི་རེད། དེར་བརྟེན་ང་ཚོས་འཇོན་ན་ང་ཚོའི་འགྲོ་སྟངས་ཧ་ཅང་བརྟན་པོ་ཆགས་ཡོད། ཆབ་སྲིད་ཀྱི་ངོ་བོའི་ཐོག་ནས་བརྩིས་ཀྱང་ཕར་ཕྱོགས་དེར་རྒྱ་མི་སྟོབས་ཤུགས་ཆེན་པོ་ཡོད་ཀྱང་གཅིག་བསྡུས་རིང་ལུགས་རེད། འཛམ་གླིང་གི་ཁྲོམ་རྭའི་ནང་གཅིག་བསྡུ་རིང་ལུགས་ཀྱི་ལམ་ལུགས་དེ་དུས་ཚོད་ཡོལ་ཟིན་པ་ཆགས་ཡོད། ང་ཚོ་ཆུང་ཆུང་ཡིན་རུང་མང་གཙོའི་ལམ་ཐོག་བརྒྱ་ཆ་བརྒྱ་ཐམ་པ་སྐྱོད་ཀྱི་ཡོད་སྟབས། དེ་ང་ཚོའི་གཟི་བརྗིད་རེད། ཅེས་བཀའ་སློབ་གནང་འདུག
ཉིན་རྒྱབ་ཡི་ཤུའི་བླ་ཆེན་བྷི་ཤོབ་དང་ནུབ་ཕྱོགས་ལྟ་གྲུབ་སྨྲ་བ་རྣམས་དང་ལྷན་ཆོས་ལུགས་ཀྱི་རྒྱ་ལས་བརྒལ་བའི་བཟང་སྤྱོད་སྐོར་གྱི་བགྲོ་གླེང་ཐོག་ཆིབས་བསྒྱུར་ཀྱིས་བཀའ་སློབ་དང་སློབ་མ་ཚོའི་དྲི་བར་ལན་འདེབས་བཅས་གནང་ཡོད་པ་དང་། བགྲོ་གླེང་ཐོག་ཆོས་ལུཊ་རིས་མེད་སྐོར་ལ་བཀའ་སློབ་གནང་སྐབས་༧གོང་ས་མཆོག་གིས། ངོས་རང་རྒྱ་གར་ནང་ལོ་ ༥༥ བསྡད་པའི་ཉམས་མྱོང་ལ་གཞི་བཅོལ་ནས་ཞུས་ན། འཛམ་གླིང་གི་མི་འབོར་མང་ཤོས་རྒྱ་གར་ནང་ཆོས་ལུགས་དང་སྐད་ཡིག རིག་གཞུང་སོགས་འདྲ་མིན་སྣ་ཚོགས་ཡོད་ཀྱང་། རང་བཙན་ཐོབ་པ་ནས་ད་བར་སྤྱི་ཚོགས་ཁྱོན་ཡོངས་བརྟན་ལྷིང་ངང་གནས་ཐུབ་ཡོད། གཙོ་བོ་རྒྱ་གར་གྱི་རྩ་ཁྲིམས་ནང་སྲོལ་རྒྱུན་ནས་དར་བའི་ཆོས་ལུགས་རིས་མེད་ལ་བརྩི་བཀུར་ཞུ་རྒྱུའི་སྲོལ་བཟང་ཞིག་ཡོད་པ་དེ་ལས་བྱུང་བ་ཞིག་ཡིན། རྒྱ་གར་གྱི་རྩ་ཁྲིམས་ནང་འཁོད་པའི་ཆོས་ལུགས་རིས་མེད་འདི་ཆོས་ལུགས་ལ་དགག་པ་བརྒྱབ་པའི་ལྟ་གྲུབ་ཅིག་རེད་ཅེས་སུས་ཀྱང་བརྗོད་མི་ཐུབ། ངོས་ཀྱིས་ཆོས་ལུགས་རིས་མེད་ལ་ལྟ་སྐབས་གཙོ་བོ་ཚན་རིག་དང་དངོས་ཡོད་གནས་ཚུལ་ལ་གཞི་བཅོལ་ནས་ལྟ་བཞིན་ཡོད། རང་གཞན་གཉིས་
ལ་ཕན་པའི་ལས་དེ་བཟང་པོ་དང་། རང་གཞན་གཉིས་ལ་གནོད་པའི་ལས་དེ་ངན་པར་བརྩི་དགོས། དེར་བརྟེན། གཞན་གྱི་བདེ་དོན་ལ་བསམ་བློ་གཏོང་རྒྱུ་དེ་ཆོས་ལུགས་རིས་མེད་བཟང་སྤྱོད་ཀྱི་གཞི་རྩ་ལྟ་བུ་ཡིན། ཞེས་གསུངས་ཡོད་འདུག
ཚེས་ ༡༤ ཉིན་གྱི་སྔ་དྲོ་༸གོང་ས་མཆོག་གིས་གསར་འགོད་པ་ཁག་ཅིག་དང་མཇལ་འཕྲད་ཀྱི་དྲི་བར་ལན་འདེབས་དང་འཇར་མན་བོད་ཁང་གི་ཚོགས་མི་རྣམས་ལ་མཇལ་ཁ་དང་བཀའ་སློབ་བཅས་གནང་ཡོད་པ་དང་། ཉིན་རྒྱབ་ཧྥི་རར་ཕོ་ཌི་ (Fraport Arena) རྩེད་ཐང་དུ་མི་མང་ ༤༨༠༠ བརྒལ་བར་མི་ཚེ་བདེ་སྐྱིད་ལྡན་པ་ཞིག་ཡོང་བར་ནང་སེམས་ཀྱི་རིན་ཐང་ཉམས་ལེན་བྱ་ཕྱོཊ་ཐོག་བཀའ་སློབ་གནང་ཡོད་འདུག ཚེས་ ༡༣ ཉིན་༧གོང་ས་མཆོག་གིས་གསར་འགོད་པར་ཐུག་འཕྲད་ཀྱིས་དྲི་བར་ལན་འདེབས་དང་། ཧེ་སེའི་མངའ་སྡེའི་བློན་ཆེན་སྐུ་ཞབས་ཝོལ་ཀར་བྷུ་ཕི་ཡར་མཆོག་དང་མཇལ་འཕྲད་བཅས་མཛད་འཕྲིན་ཁག་བསྐྱངས་ཡོད་འདུག
གསར་འགོད་པ། དོན་གོ
