རྒྱ་ནག་གི་ཕྱི་སྲིད་བློན་ཆེན་རྒྱ་གར་ནང་སྐོར་སྐྱོད།

རྒྱ་ནག་གི་ཕྱི་སྲིད་བློན་ཆེན་རྒྱ་གར་ནང་སྐོར་སྐྱོད་བྱས་ཏེ་རྒྱ་གར་ནག་གི་ས་མཚམས་སྲུང་སྐྱོབ་སྐོར་ལ་གྲོས་མོལ་དང་། རྒྱལ་ཁབ་གཉིས་བར་གྱི་མཉམ་ལས་འཛུགས་སྐྲུན་དང་ཚོང་དོན་ཁག་ཅིག་ལ་མིང་རྟགས་བཀོད་ཡོད་འདུག

ཁ་སང་དང་དེ་རིང་ཉིན་གཉིས་རིང་རྒྱ་ནག་གི་ཕྱི་སྲིད་བློན་ཆེན་ཝང་ཡི་རྒྱ་གར་ནང་སྐོར་སྐྱོད་བྱེད་བཞིན་ཡོད་ཅིང་། ཁ་སང་ཚེས་༨ ཉིན་རྒྱ་གར་གྱི་ཕྱི་སྲིད་བློན་ཆེན་ལྕམ་སོ་ཞི་མཱ་ (Sushma Swaraj) ལགས་དང་ཆུ་ཚོད་ ༣ ཙམ་རིང་ཐུག་འཕྲད་བྱས་ཏེ། རྒྱལ་ཁབ་གཉིས་ཀྱི་ས་མཚམས་སྲུང་སྐྱོབ་དང་། རྒྱ་ནག་གིས་ཡར་ཀླུང་གཙང་པོའི་ཐོག་ཆུ་རགས་རྒྱག་འཆར་ཡོད་པ། ཨ་རུ་ན་ཅལ་དང་ཇམ་མུ་ཀ་ཤི་མེར་ཀྱི་མི་རིགས་ཚོར་དམིགས་བསལ་མཐོང་ཆེན་སྤྲོད་རྒྱུ་མཚམས་འཇོག་བྱ་ཕྱོགས། དེ་སྔོན་རྒྱ་དཀར་ནག་གི་ཚོང་འབྲེལ་ནང་རྒྱ་གར་ལ་ཨ་སྒོར་ཐེར་འབུམ་ ༣༡ ལྷག་གི་གྱོང་གུད་རག་གི་ཡོད་པ་དེ་བསྐྱར་གསོ། རྒྱལ་ཁབ་གཉིས་ཀྱི་དམིགས་བསལ་སྐུ་ཚབ་བར་གྲོས་མོལ་ཡོང་ཐབས་དང་། ལྷོ་རྒྱ་ནག་རྒྱ་མཚོའི་གནད་དོན། རྒྱ་ནག་གི་ཁེ་ལས་རྒྱ་གར་ནང་འཛུགས་ཕྱོགས་སོགས་ལ་གྲོས་བསྡུར་བྱས་ཡོད་འདུག

རྒྱ་ནག་ཕྱི་སྲིད་བློན་ཆེན་རྒྱ་གར་ནང་སྐོར་སྐྱོད་དང་བསྟུན་ཏེ་བོད་ཀྱི་གཞོན་ནུ་ལྷན་ཚོགས་དང་ལྡི་ལི་ཁུལ་གྱི་བོད་མི་ཚོས་ངོ་རྒོལ་སྐད་འབོད་ཤུགས་ཆེན་བྱེད་བཞིན་ཡོད་པ་དང་། རྒྱ་གར་གྱི་སྐོར་སྲུང་བ་དང་དམག་མི་ཕོན་ཆེན་འགྲེམ་འཇོག་གིས་བོད་མི་ངོ་རྒོལ་བ་ཚོ་བཀག་འགོག་བྱས་ཡོད་པ་མ་ཟད་རེ་ཟུང་འཛིན་བཟུང་ཡང་བྱས་ཡོད་འདུག

རྒྱལ་ཁབ་གཉིས་བར་གྱི་འགྲོ་འོང་འདིའི་ཐད་རྒྱ་གར་ཕྱི་སྲིད་ལྷན་ཁང་གི་མགྲིན་ཚབ་པ་སཱ་ཡེ་ཌི་ (Syed Akbaruddin) ལགས་ཀྱིས། “ ཐེངས་འདིའི་གྲོས་མོལ་བརྒྱུད་རྒྱ་ནག་གི་མགོ་ཁྲིད་དང་། རྒྱ་དཀར་ནག་གཉིས་བར་གྱི་དཀའ་རྙོག་མང་པོ་ཞིག་གི་ཐོག་ལྷག་བསམ་རྣམ་དག་གིས་གོ་བསྡུར་བྱེད་ཐུབ་པ་བྱུང་ཡོད་སྟབས། མ་འོངས་པར་རྒྱལ་ཁབ་གཉིས་བར་སྔར་ལྷག་འབྲེལ་ལམ་ཡག་ཏུ་འགྲོ་རྒྱུ་མ་ཟད། ཨེ་ཤ་ཡའི་མཐུན་གྲོགས་རྒྱལ་ཁབ་ཡག་ཤོས་ཤིག་ཏུ་འགྱུར་རྒྱུའི་རེ་བ་ཆེན་པོ་སླེབས་ཡོད། ” ཞེས་དང་། ད་དུང་ཁོང་གིས་ད་ཐེངས་ཀྱི་གྲོས་མོལ་འདི་དོན་སྙིང་ལྡན་ལ་ཕན་ཐོགས་ཡོད་པའི་རྒྱལ་ཁབ་གཉིས་ཀྱི་གྲོས་མོལ་ཞིག་ཆགས་ཡོད་སྟབས། དེ་རིང་སྐུ་ཞབས་ནཱ་རེན་ཌ་མུ་དྷེ་མཆོག་གིས་སྣེ་ཁྲིད་པའི་རྒྱ་གར་གཞུང་དང་། རྒྱ་ནག་བར་གྱི་འབྲེལ་ལམ་འདི་སྔར་ལྷག་འཕེལ་རྒྱས་གཏོང་རྒྱུ་ཡིན་སྐོར་སོགས་བརྗོད་འདུག

རྒྱ་ནག་ཕྱི་སྲིད་བློན་ཆེན་ཝང་ཡིས། “རྒྱ་གར་འཕེལ་རྒྱས་ཡོང་ཐབས་ལ་རྒྱ་ནག་གཞུང་གིས་དུས་དང་རྣམ་པ་ཀུན་ཏུ་རྒྱབ་སྐྱོར་བྱེད་བཞིན་ཡོད་སྟབས། མ་འོངས་པར་རྒྱལ་ཁབ་གཉིས་བར་འཕྱར་གྲུ་མཉམ་འདེགས་བྱས་ཏེ། རྒྱལ་ཁབ་འཛུགས་སྐྲུན་དང་དཔལ་འབྱོར་འཕེལ་རྒྱས་གཏོང་རྒྱུ་ཡིན།” ཞེས་དང་། ད་དུང་ཁོས་རྒྱལ་སྤྱིའི་སྒྲིག་འཛུགས་ཀྱིས་རྒྱ་གར་གྱི་འཕེལ་རྒྱས་ལ་རྟོག་ཞིབ་བྱེད་བཞིན་ཡོད་སྟབས། རྒྱ་གར་དང་རྒྱ་ནག་མཉམ་ལས་བྱས་ཏེ་རྒྱལ་ཁབ་འཕེལ་རྒྱས་གཏོང་དགོས་སྐོར་དང་། དེ་བཞིན་རྒྱ་གར་དང་རྒྱ་ནག་ནི་ཁྱིམ་མཚེས་རྒྱལ་ཁབ་ཅིག་ཡིན་པར་བརྟེན་གཉིས་ཕན་ མཉམ་ལས་བྱ་རྒྱུ་གལ་ཆེན་ཆགས་ཡོད་སྐོར་སོགས་བརྗོད་འདུག

རྒྱ་གར་ ( RSS) ཚོགས་པའི་མགོ་ཁྲིད་རམ་ (Ram Madhav) ལགས་ཀྱིས། “ སྐུ་ཞབས་ནཱ་རེན་ཌ་མུ་དྷེའི་གཞུང་གིས་རྒྱ་གར་གྱི་ཕྱི་སྲིད་ཐོག་དཀའ་ངལ་བཟོ་མཁན་གཙོ་བོ་རྒྱ་ནག་ཡིན་པ་ལས་པ་ཀི་སི་ཐན་མིན་པ་མ་བརྗེད་པའི་ཐོག་ནས་རྒྱལ་ཁབ་གཉིས་བར་གྲོས་མོལ་བྱེད་སྐབས་གཟབ་གཟབ་བྱེད་དགོས།”ཅེས་བརྗོད་འདུག

༢༠༠༢ ལོར་རྒྱ་གར་དང་རྒྱ་ནག་བར་ཨ་སྒོར་ཐེར་འབུམ་ ༤།༨།

༢༠༠༤ ལོར་ཨ་སྒོར་ཐེར་འབུམ་ ༡༣།༦།

༢༠༠༥ ལོར་ཨ་སྒོར་ཐེར་འབུམ་ ༡༨།༧།

༢༠༠༨ ལོར་ཨ་སྒོར་ཐེར་འབུམ་ ༢༠།༥༦།

༢༠༡༠ ལོར་ཨ་སྒོར་ཐེར་འབུམ་ ༣༠།༣༤།

༢༠༡༡ ལོར་ཨ་སྒོར་ཐེར་འབུམ་ ༣༦།༣།

༢༠༡༢ ལོར་ཨ་སྒོར་ཐེར་འབུམ་ ༤༠།༦༨

༢༠༡༣ ལོར་ཨ་སྒོར་ཐེར་འབུམ་ ༥༦།༩༢ བཅས་ཀྱི་ཚོང་འབྲེལ་བྱས་པའི་ཁྲོད་རྒྱ་གར་ལ་ཨ་སྒོར་ཐེར་འབུམ་ ༣༡ ལྷག་གིས་གྱོང་གུད་རག་བཞིན་ཡོད་འདུག

ད་ལོའི་ཕྱི་ཟླ་ ༣ པའི་ནང་རྒྱ་གར་གྱི་རྒྱལ་སྲུང་སློབ་སྟོན་པ་རྒྱ་ནག་ནང་སྐོར་སྐྱོད་དང་འབྲེལ། ༡༩༥༤ ལོར་རྒྱ་གར་གྱི་སྲིད་བློན་ནེ་རུ་དང་རྒྱ་ནག་གི་སྲིད་བློན་ཀྲའུ་ཨིན་ལེ་གཉིས་བར། རྒྱ་དཀར་ནག་གཉིས་ཀྱི་སྐོར་ལ་གྲོས་མཐུན་དོན་ཚན་ལྔ་བཞག་སྟེ་ལོ་ ༦༠ འཁོར་བའི་དུས་དྲན་སྲུང་བརྩི་ཞུ་ཕྱོགས་དང་། ས་མཚམས་སྐོར་ལ་གྲོས་མོལ་གནང་ཡོད་ཅིང་། ཟླ་འདིའི་ཚེས་ ༢༦ ཉིན་སྐུ་ཞབས་ནཱ་རེན་ཌ་མུ་དྷེ་མཆོག་རྒྱ་གར་གྱི་སྲིད་བློན་ལ་བསྐོ་བཞག་གནང་བར། རྒྱ་ནག་གི་སྲིད་བློན་ལི་ཁེ་ཆང་གི་འཚམས་འདྲི་དང་འབྲེལ། རྒྱལ་ཁབ་གཉིས་བར་མཉམ་ལས་བྱེད་ཤུགས་ཆེ་རུ་གཏོང་རྒྱུ་ཡིན་སྐོར་བརྗོད་ཡོད།

ཆབ་སྲིད་དབྱེ་ཞིབ་པ་ཚོས། རྒྱ་དཀར་ནག་གཉིས་བར་ས་མཚམས་སོགས་ཚོང་དོན་གྲོས་མཐུན་ཁག་ཅིག་ལ་མིང་རྟགས་བཀོད་ཡོད་ཀྱང་རྒྱ་གར་དང་རྒྱ་ནག་གི་ས་མཚམས་ཀྱི་དཀའ་རྙོག་དེ་མུ་མཐུད་གནས་རྒྱུ་ཡིན་སྐོར་བརྗོད་འདུག དེ་རིང་ཉིན་རྒྱབ་རྒྱ་ནག་ཕྱི་སྲིད་བློན་ཆེན་ཝང་ཡིས། རྒྱ་གར་གྱི་སྲིད་འཛིན་དང་སྲིད་བློན། རྒྱལ་སྲུང་སློབ་སྟོན་པ་བཅས་ཐུག་འཕྲད་གནང་རྒྱུ་ཡིན་འདུག

གསར་འགོད་པ། དོན་གྲུབ།