རྒྱ་གཞུང་གིས་མཚོ་ལྷོ་ཁུལ་སྐ་གསར་སྡེ་བའི་བོད་མི་ ༢༧ འཛིན་བཟུང་བྱས་པ་ལས་ཁག་ཅིག་ཀློད་གྲོལ་བཏང་ཡོད་ཀྱང་། བོད་མི་གསུམ་མུ་མཐུད་བཀར་ཉར་བྱས་ཡོད་འདུག
འདི་ལོའི་ཕྱི་ཟླ་ ༦ ཚེས་ ༧ ཉིན་རྒྱ་གཞུང་གིས་མཚོ་ལྷོ་བོད་རིགས་རང་སྐྱོང་ཁུལ་གསེར་ཆེན་རྫོང་ཆབ་ཆ་གྲོང་རྡལ་སྐ་གསར་སྡེ་བའི་སྡེ་མི་ཚོས་རྡོ་ཀ་མ་རུའི་གཏེར་ཁ་སྔོག་འདོན་བྱེད་བཞིན་པའི་ལས་གཞི་བཀག་འགོག་བྱས་པའི་ནག་ཉེས་འོག སྐ་གསར་སྡེ་བའི་སྡེ་དཔོན་ཁྲོ་མཐར་དང་པདྨ་གཙོས་པའི་བོད་མི་ ༢༧ འཛིན་བཟུང་བྱས་ཡོད་པ་ལྟར། ཉེ་ལམ་ཁོང་ཚོའི་ཁྲོད་ཀྱི་བོད་མི་ ༢༤ ཀློད་གྲོལ་བཏང་ཡོད་ཀྱང་། རང་ལོ་ ༣༤ ཙམ་ཡིན་པའི་འབྲུག་སྐྱིད་དང་། རང་ལོ་ ༥༠ ཙམ་ཡིན་པའི་དོན་ཁོ། རང་ལོ་ ༢༤ ཙམ་ཡིན་པའི་གཡང་མཚོ་སྐྱིད་བཅས་མི་གསུམ་ད་དུང་ཡང་མཚོ་ལྷོ་ཁུལ་གྱི་བཙོན་ཁང་དུ་བཀག་ཉར་བྱས་ཡོད་འདུག
ས་གནས་བོད་མི་ཚོས་གཞུང་ཕྱོགས་ནས་བཀག་ཉར་འོག་ཡོད་པའི་བོད་མི་ཁོང་གསུམ་ལ་དྲང་བདེན་གྱི་ཐག་གཅོད་ཅིག་མ་བྱུང་ཚེ། ཁྲིམས་ཐག་གཅོད་རྒྱུའི་ཉེན་ཁ་ཡོད་ཚུལ་བརྗོད་ཀྱི་ཡོད་འདུག
མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་གསེར་ཆེན་རྫོང་ཆབ་ཆ་གྲོང་རྡལ་སྐ་གསར་སྡེ་བའི་རྡོ་ཀ་མ་རུའི་གཏེར་ཁ་སྔོག་འདོན་གྱི་ལས་གཞི་དེ་ནི། ལོ་མང་པོའི་ཡར་སྔོན་ནས་བཟུང་རྒྱ་ནག་གཞུང་ཕྱོགས་ཀྱི་མཐུན་འགྱུར་རྒྱབ་སྐྱོར་གནང་བཞིན་པའི་གཏེར་སྔོག་གི་ལས་གཞི་ཞིག་ཡིན་འདུག འདི་ལོའི་ཕྱི་ཟླ་ ༦ ཟླ་མགོར་དེ་སྔོན་གྱི་དུས་བཅད་ལྟར་གཏེར་སྔོག་གི་དུས་ཚོད་རྫོགས་ཡོད་ཀྱང་། གཞུང་ཕྱོགས་ནས་མི་མང་གི་རེ་སྐུལ་ལ་ཡ་ལན་མ་བྱས་པར་མུ་མཐུད་སྔོག་འདོན་བྱས་ཏེ། སྐ་གསར་སྡེ་བའི་གནས་རི་བཀྲ་ཤིས་ལྷ་རི་དང་དུར་ཁྲོད། རྒྱ་རགས་ས་གནས་ཀྱི་ཁོར་ཡུག་བཅས་ལ་གཏོར་སྐྱོན་ཚབས་ཆེན་བཟོས་སྟབས། ས་གནས་བོད་མི་ཚོས་ལས་གཞི་དེར་ངོ་རྒོལ་བྱས་ཡོད་ལ། སྐབས་དེར་རྒྱ་གཞུང་གིས་ས་གནས་ཀྱི་མི་སྐྱ་ཕོ་མོ་ ༢༧ འཛིན་བཟུང་བཀག་ཉར་བྱས་ཡོད།
གསར་འགོད་པ། དོན་གོ
