ཁ་སང་རྒྱ་ནག་གཞུང་གིས་ཀོ་མེ་མེ་བཀག་ཉར་འོག་ཡོད་སྐོར་བསྒྲཊ་ཡོད་པ་དང་། གནད་དོན་དབྱེ་ཞིབ་པ་ཚོས་ཀོ་མེ་མེ་ཡི་རྒྱབ་ལོཊ་ན་རྒྱ་ནག་དབུས་ཆབ་སྲིད་ལྷན་ཁང་གི་རྒྱུན་ལས་ལོའུ་ཡེན་ཧྲན་སོགས་ཡོད་སྐོར་རྗོད་ཀྱིན་ཡོད་འདུག
ཕྱི་ལོ་ ༢༠༡༡ ལོར་ཝེ་པོ་གནས་འཕྲིན་ཐོག ཀོ་མེ་མེ་ཡིས་ཁོ་མོ་རྒྱ་ནག་རྒྱ་གྲམ་དམར་པོ་ཚོགས་པའི་ཁེ་ལས་སྤྱི་ཁྱབ་པ་ཡིན་ལུགས་བརྗོད་ཡོད་པ་མ་ཟད། ཁོ་མོའི་རྒྱ་སྒོར་ཁྲི་ ༢༤༠ ཡི་མཱ་སི་ར་ཊི་(Maserati)རླངས་འཁོར་དང་ཚོང་རྟགས་གྲགས་ཅན་གྱི་ཁུག་མའི་འདྲ་པར་སོགས་བརྒྱུད་བསྒྲགས་བྱས་རྐྱེན། སྤྱི་ཚོགས་ཐོག་རྒྱ་གྲམ་དམར་པོ་ཚོགས་པར་དོགས་ཡོད་ཀྱི་གླེང་གཞི་སྣ་ཚོགས་བྱུང་སྟེ། ཚོགས་པ་དེའི་ཆེ་མཐོང་ལ་གནོད་སྐྱོན་ཆེན་པོ་ཐེབས་ཡོད།
ད་དུང་། ཀོ་མེ་མེ་ཡིས་པེ་ཅིན་དུ་རྒྱ་སྒོར་ཁྲི་བརྒྱ་ཡན་གྱི་རྒྱན་ཁང་བཙུགས་ཡོད་པ་དང་། ད་ལོའི་ཕྱི་ཟླ་ ༦ པའི་ནང་ཨའོ་མིན་དུ་ཁོ་མོར་རྒྱ་སྒོར་དུང་ཕྱུར་ ༢ ལྷག་གི་བུ་ལོན་ཡོད་པའི་གནས་ཚུལ་སོགས་ཐོན་ཡོད་ཀྱང་མི་ཞིག་གིས་ཁོ་མོའི་བུ་ལོན་གྱི་ཕྱེད་ཀ་ཙམ་སྤྲད་ཟིན་ཞིང་། མི་དེ་རྒྱ་ནག་དབུས་ཆབ་སྲིད་ལྷན་ཁང་གི་རྒྱུན་ལས་ལོའུ་ཡེན་ཧྲན་ཡིན་པའི་གནས་ཚུལ་ཞིག་ཁྱབ་ཡོད་པ་མ་ཟད། ཀོ་མེ་མེ་ལོའུ་ཡེན་ཧྲན་གྱི་བྱི་ཕྲུག་ཡིན་པའི་གནས་ཚུལ་ཡང་ཐོན་ཡོད། འོན་ཀྱང་རྒྱ་ནག་གཞུང་ཕྱོགས་ནས་ཁོ་མོ་དང་འབྲེལ་བའི་གནས་ཚུལ་ཚང་མ་དྲ་ལམ་ནས་ནག་གསུབ་བཏང་ཡོད་འདུག
ཉེ་ལམ་བྷར་ཛིལ་ནང་གི་འཛམ་གླིང་རྐང་རྩེད་སྤོ་ལོའི་འགྲན་སྡུར་སྐབས། ཀོ་མེ་མེ་ཡིས་རྐང་རྩེད་སྤོ་ལོའི་ཐོག་རྒྱན་བཞག་པའི་ཉེས་མིང་འོག ཟླ་སྔོན་མའི་ཚེས་ ༡༤ ཉིན་པེ་ཅིན་ཉེན་རྟོག་ཁང་གིས་ཁོ་མོའི་གཙོས་རྒྱན་འཛུགས་མཁན་ཁག་ཅིག་འཛིན་བཟུང་བྱས་ཡོད་པ་དང་། འཆར་གཞི་ལྟར་ན་ཟླ་དེའི་ཕྱི་ཚེས་ ༢༤ ཉིན་གྱི་མཚན་མོའི་ཆུ་ཚོད་ ༨ པའི་ཐོག་ཁོ་མོ་ཀློད་གྲོལ་གཏོང་རྒྱུ་ཡིན་ཡང་། ཁ་སང་ཕྱི་ཚེས་ ༤ ཉིན་གྱི་ཞོགས་པར་རྒྱ་ནག་དབུས་བརྙན་འཕྲིན་ཁང་གིས་གློ་བུར་དུ་ཁོ་མོ་བཀག་ཉར་འོག་ཡོད་པ་མ་ཟད། བཙོན་པའི་ལྭ་བ་གྱོན་ཏེ་མཛེས་བཟོ་སོགས་ཅི་ཡང་བྱས་མེད་པའི་བརྙན་པར་ཞིག་བསྟན་ཡོད་འདུག
གནས་ཚུལ་དེ་ཕྱིར་བསྒྲགས་བྱས་རྗེས། རྒྱ་ནག་ཧང་ཀྲུའུ་ཡི་སྐབས་དོན་དཔྱད་གཞི་འཚོལ་ཞིབ་པ་ཀྲན་ཨེ་ཀྲུང་གིས། རྒྱ་ནག་དབུས་དྲིལ་བསྒྲགས་ལྷན་ཁང་གིས་ཞིན་ཧྭ་གསར་ཁང་དང་མི་དམངས་ཉིན་རེའི་ཚགས་པར། དབུས་བརྙན་འཕྲིན་ཁང་བཅས་སུ་བཀའ་རྒྱ་བཏང་སྟེ། སྐབས་འདིར་ཆེད་དམིགས་ཀྱིས་ཀོ་མེ་མེ་ཡི་གནས་ཚུལ་ཕྱིར་བསྒྲགས་བྱས་པ་ཞིག་ཏུ་ ངོས་འཛིན་བྱས་ཡོད་ལ། རྒྱ་ནག་རྒྱ་གྲམ་དམར་པོ་ཚོགས་པའི་དེ་སྔའི་རྙོག་གླེང་མི་མང་གི་ལག་ནས་བཙན་གྱིས་ཞལ་འདེབས་བསྡུ་བ་དང་ལྐོག་ཟ་རུལ་སུངས། འཛིན་སྐྱོང་གི་ནོར་འཁྲུལ་སོགས་ལ་ཐད་ཀར་ངོ་རྒོལ་བྱས་མེད་ཀྱང་། རྒྱ་གཞུང་གིས་སྐབས་འདིར་ཀོ་ཡི་གནས་ཚུལ་གློ་བུར་དུ་ཕྱི་བསྒྲགས་བྱས་པ་དེས། གནད་དོན་དེ་རྒྱ་གྲམ་དམར་པོ་ཚོགས་པ་དང་སྲིད་གཞུང་ལ་འབྲེལ་བ་མེད་པར་ཁོ་མོ་གཅིག་པུའི་གནད་དོན་ཞིག་ཡིན་པའི་རྣམ་པ་སྟོན་ཐབས་དང་། དེ་བཞིན། རྒྱ་ནག་ཁུན་ཧྲན་དུ་འབར་གས་དོན་རྐྱེན་འོག་མི་མང་པོ་ཤི་རྨས་བྱུང་བའི་གནད་དོན་གྱི་མགོ་མཇུག་བར་གསུམ་ས་གནས་སྲིད་གཞུང་དང་ཐད་ཀར་འབྲེལ་བ་ཡོད་ཀྱང་། སྲིད་གཞུང་གིས་གནད་དོན་དེར་རྟོག་ཞིབ་བྱས་མེད་པ་མ་ཟད། རྐྱེན་འདས་ཀྱི་གནས་ཚུལ་ཁ་གསལ་མ་བཟོས་པར་སྐབས་འདིར་ཀོ་མེ་མེ་ཡི་གནས་ཚུལ་ཆེན་པོ་བཟོས་ཡོང་བ་དེ། སྤྱི་ཚོགས་ཀྱི་གླེང་གཞིའི་ཁ་ཕྱོགས་བསྒྱུར་ཐབས་བྱས་པ་ཞིག་ཡིན་སྐོར་བརྗོད་འདུག
ཡང་གནད་དོན་དཔྱད་ཞིབ་པ་ཚོས་ཀོ་ཡི་གནད་དོན་དེ་རྒྱ་ནག་དབུས་ཆབ་སྲིད་ལྷན་ཁང་གི་ལོའུ་ཡེན་ཧྲན་སོགས་ལ་འབྲེལ་བ་ཡོད་པའི་སྐོར་ལ། ཀོ་མེ་མེ་ལོའུ་ཡེན་ཧྲན་དང་ལོའུ་ཡི་བུ་ལོའུ་ལི་ཧྥེ་གཉིས་དང་འབྲེལ་བ་ཟབ་མོ་ཡོད་པ་མ་ཟད། རྒྱ་ནག་གཞུང་གི་མཐོ་རིམ་དཔོན་རིགས་མང་པོར་ངན་འབྲེལ་ཡོད་སྟབས། རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་གི་མགོ་ཁྲིད་ཝང་ཅི་ཧྲན་གྱིས་སྣེ་ཁྲིད་དེ་རྟོག་ཞིབ་བྱས་པ་བརྒྱུད། མ་འོངས་པར་མཐོ་རིམ་དཔོན་རིགས་དེ་ཚོའི་གསང་བ་བསྔོག་སྲིད་སྐོར་དང་། དེ་སྔོན་ཀོ་མེ་མེ་ཡིས་ཁོ་མོའི་ལག་ཏུ་གསང་བའི་བརྙན་པར་(༡༧ G)ཅན་ཞིག་ཡོད་ལུགས་བརྗོད་ཡོད་པ་དང་། བརྙན་པར་དེའི་ནང་ག་རེ་ཡོད་མེད་དང་སུ་ཞིག་ཡོད་མེད་བཤད་ཚོད་མི་ཐུག་ལ། འདི་ལོའི་ཕྱི་ཟླ་ ༤ པའི་ནང་ཕྱི་ཕྱོགས་ཀྱི་གསར་ཁང་ཞིག་གིས་ཀོ་མེ་མེ་ཡི་གསང་བའི་བརྙན་པར་སྐོར་གྱི་གནས་ཚུལ་ཞིག་སྤེལ་བའི་ནང་། ཁོ་མོ་དང་མཉམ་དུ་གྲོད་ཁོག་ཆེན་པོ་འབུར་དུ་ཐོན་པའི་སྐྱེས་པ་ཞིག་ཡོད་ཀྱང་། སྐྱེས་པ་དེའི་ངོ་གདོང་མཐོང་མི་ཐུབ་པ་དང་། གསར་ཁང་དེས་ད་ལྟ་བརྙན་པར་དེ་ཚོ་ཡོངས་བསྒྲགས་བྱ་རྒྱུ་ཡིན་མིན་ཐད་ཕྱི་ཕྱོགས་ ཀྱི་མི་སྣར་གྲོས་བསྡུར་བྱེད་བཞིན་ཡོད་སྐོར་བརྗོད་ཡོད་འདུག
ཀོ་མེ་མེ་ཡིས་དེ་སྔོན་བཅར་འདྲི་ཞིག་གི་སྐབས་སུ། ཁོ་མོའི་མཱ་སི་ར་ཊི་རླངས་འཁོར་དེ་རྒྱ་ནག་རྒྱ་གྲམ་དམར་པོ་ཚོགས་པའི་རྒྱུ་ནོར་དོ་དམ་ཁང་གི་འགན་འཛིན་ཝང་ཅིན་གྱིས་ལེགས་སྐྱེས་སུ་སྤྲད་པ་དང་། ཝང་ཅིན་ནི་ཁོ་མོའི་ཕ་ཚབ་ཡིན་ལུགས་བརྗོད་ཡོད་ཀྱང་། འདི་ལོའི་ཕྱི་ཟླ་ ༧ ཚེས་ ༢༤ ཉིན་ཝང་ཅིན་པེ་ཅིན་ཉེན་རྟོག་ཁང་གིས་འཛིན་བཟུང་བྱས་ཏེ་འདྲི་གཅོད་བྱེད་སྐབས། ཝང་ཅིན་གྱིས་ ༢༠༡༠ ལོའི་ཟླ་ ༨ པའི་ནང་ངའི་གྲོགས་པོ་ཞིག་གིས། ང་ལ་བུ་མོ་ཞིག་ངོ་སྤྲོད་བྱེད་དགོས་ཟེར་ནས་ཀོ་མེ་མེ་ངོ་སྤྲོད་བྱས་སོང་། ཕྱིས་སུ་ཀོ་མེ་མེ་པེ་ཅིན་ནས་ཧྲིན་ཀྲུའུ་རུ་བསླེབས་པ་དང་། ངས་ཁོ་མོར་མགྲོན་ཁང་སོགས་གོ་སྒྲིག་བྱས་པ་མ་ཟད། ཁོ་མོ་ཧྲིན་ཀྲུའུ་དུ་བསླེབས་པའི་ཕྱི་ཉིན་དེར་ངེད་གཉིས་བར་འབྲེལ་བ་བྱུང་སོང་། སྐབས་དེར་ཁོ་མོའི་བཤད་པ་ལྟར་ངས་རྒྱ་སྒོར་ཁྲི་ ༣ སྤྲད་པ་ཡིན། ཕྱིས་སུ་སྒོར་མོ་མཁོ་སྐབས་ཁོ་མོ་ཧྲིན་ཀྲུའུ་རུ་ཡོང་སྟེ་སྒོར་མོ་དགོས་ཟེར་གྱི་འདུག་སྟབས། ཡོང་ཐེངས་རེར་ངས་ཁོ་མོར་མགྲོན་ཁང་དང་ཟ་མ། ད་རུང་རྒྱ་སྒོར་ཁྲི་ ༥ རེ་གླ་དོད་དུ་སྤྲད་པ་ཡིན། ཕྱི་ལོ་ ༢༠༡༡ ལོའི་ཁོ་མོའི་སྐྱེས་སྐར་སྐབས། སྐྱེས་སྐར་གྱི་ལེགས་སྐྱེས་སུ་མཱ་སི་ར་ཊི་རླངས་འཁོར་ཞིག་ཉོ་དགོས་ཚུལ་བཤད་པ་མ་ཟད། གལ་སྲིད་རླངས་འཁོར་དེ་མ་ཉོས་ཚེ་འབྲེལ་བ་གཅོད་རྒྱུ་ཡིན་ལུགས་ལབ་སོང་བས། ངས་རྒྱ་སྒོར་ཁྲི་ ༢༤༠ སྤྲད་ནས་རླངས་འཁོར་དེ་ཉོ་རུ་བཅུག་པ་ཡིན། ཞེས་བརྗོད་ཡོད་པ་མ་ཟད། སྐབས་དེར་ཀོ་མེ་མེ་ལོ་ན་ ༡༩ ལས་སོན་མེད་པ་དང་ཁོ་བོ་ལོ་ ༤༠ བརྒལ་ཡོད་སྟབས། གསར་ལམ་དུ་ཁོ་མོའི་དགའ་རོགས་ཡིན་ལུགས་བརྗོད་རྒྱུར་ངོ་ཚ་བ་ཡིན་སྐོར་དང་། སྐབས་དེར་ཁོ་བོར་བཟའ་ཟླ་ཡོད་པའང་ཀོ་མེ་མེ་ཡིས་ཤེས་ཀྱི་ཡོད་ལུགས་སོགས་བརྗོད་འདུག
ད་ལོའི་ཕྱི་ཟླ་ ༧ ནང་ཞིན་ཧྭ་གསར་ཁང་གི་དྲ་བའི་ཐོག བྷི་ཧན་ཧྥོང་ཟེར་བ་ཞིག་གིས་ཀོ་མེ་མེ་ཡི་སྐོར་ལ་དཔྱད་རྩོམ་ཞིག་སྤེལ་བའི་ནང་། ཀོ་ཡི་རྒྱབ་ལོགས་ན་གསང་བའི་སྟོབས་ཤུགས་ཤིག་ཡོད་པ་དང་། སྟོབས་ཤུགས་དེ་སུ་ཡིན་མིན་མི་མང་དང་གསར་འགྱུར་བརྒྱུད་ལམ་ཁག་ནས་དོ་སྣང་བྱེད་རྒྱུ་གལ་ཆེན་ཡིན་སྐོར། ཀྲུའུ་ཡཱོང་ཁང་གི་རྗེས་སུ་རྒྱ་ནག་དབུས་གཞུང་གི་མཐོ་རིམ་དཔོན་རིགས་སུ་ཞིག་ཐེར་འདོན་བྱ་རྒྱུ་ཡིན་ནམ་ཞེས་སོགས་བརྗོད་འདུག
གསར་འགོད་པ། པདྨ་མཚོ།
གསར་འགྱུར་སྤྲོ་ཉམས་དོད་པོ་ཞིག་བྲིས་འདུག དབྱེ་ཞིབ་རང་བཞིན་གྱི་གསར་འགྱུར་འདི་རིགས་ང་རང་ཀློག་པར་ཧ་ཅང་དགའ་བོ་ཡོད། གསར་འགྱུར་རང་ངོས་ནས་བཤད་ནའང་ཚད་གཞི་མཐོ་བའི་གྲས་རེད། བོད་ཀྱི་དུས་བབ་ནི་རྒྱལ་ཁབ་ཅིག་གི་སྤྱི་ལ་ཁྱབ་པ་དང་ངོས་འཛིན་ཡོད་པའི་གསར་ཁང་ཞིག་ཆགས་ཡོད་པའི་རྒྱུ་མཚན་གྱིས་གསར་འགྱུར་འདི་དང་འདི་ལྟ་བུ་འབྲི་སྤེལ་ཐོག་བཅོས་བསྒྱུར་མདུན་སྐྱོད་བྱེད་ཐུབ་ན་ཧ་ཅང་ཡག་པོར་མཐོང་སོང་།