བོད་ཀྱི་བུད་མེད་ལྷན་ཚོགས་ཀྱིས་ཟབ་སྦྱོང་གི་ཉིན་གཉིས་པའི་ཐོག་སྲིད་སྐྱོང་མཆོག་གིས་ད་ལྟ་བོད་མིའི་སྒྲིག་འཛུགས་ཀྱི་སྲི་ཞུ་ལས་བྱེད་ཀྱི་ཁོངས་དང་། མཐོ་སློབ་སོགས་སུ་བུད་མེད་ཚོས་ཆ་ཤས་ལེན་སྟངས་སྔོན་མ་ལས་གང་འཚམ་ཡར་རྒྱས་ཕྱིན་ཡོད་སྐོར་གསུངས་སོང་།
ཁ་སང་ཕྱི་ཚེས་ ༦ ཉིན་གྱི་ཕྱི་དྲོའི་ཆུ་ཚོད་ ༤ པའི་སྟེང་། གངས་སྐྱིད་ལྷག་པ་ཚེ་རིང་དྲན་རྟེན་ཚོགས་ཁང་དུ། བོད་ཀྱི་བུད་མེད་ལྷན་ཚོགས་ཀྱི་གོ་སྒྲིག་འོག་༼བཙན་བྱོལ་བོད་ཀྱི་བུད་མེད་ལ་ཁྲིམས་དོན་གྱི་ནུས་སྟོབས་གོང་འཕེལ་༽ཞེས་པའི་ཟབ་སྦྱོང་གི་ཉིན་གཉིས་པར། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བུད་མེད་ཀྱི་ཐོབ་ཐང་དང་ཤེས་ཡོན། ནུས་སྟོབས་གོང་འཕེལ་སྐོར་ལ་གསུང་བཤད་གནང་ཡོད་ཅིང་། སྐབས་དེར་བུད་མེད་ལྷན་ཚོགས་ཀྱི་ས་གནས་ཁག་ ༡༣ དང་ལྡི་ལི་མཐོ་སློབ་གཙོས་མཐོ་སློབ་ཁག་ཅིག་ནས་ཕེབས་པའི་སློབ་མ་བཅས་ཁྱོན་མི་ ༦༠ ལྷག་འཛོམས་འདུག
སྐབས་དེར་སྲིད་སྐྱོང་མཆོག་གིས། བཀའ་ཤག་གི་ལྟ་གྲུབ་གསུམ་སྟེ་ཆིག་སྒྲིལ་དང་གསར་གཏོད། རང་ཁ་རང་གསོ་ཞེས་ཞུ་བཞིན་ཡོད། ཆིག་སྒྲིལ་ཟེར་དུས་ཆོལ་ཁ་དབྱེ་མེད། ཆོས་ལུགས་རིས་མེད། ཕོ་མོ་འདྲ་མཉམ་ཞེས་པར་ང་རང་གིས་ངོས་འཛིན་བྱེད་སྟངས་དེ་འདྲ་ཡིན། སྔོན་མ་འོས་བསྡུའི་སྐབས་ནས་ཞུས་ཏེ་བཀའ་ཤག་གི་ལྟ་གྲུབ་ཆགས་པ་རེད། ང་རང་ལ་འགན་དབང་ཡོད་པ་བཀའ་བློན་བསྐོ་བཞག་དེ་རེད། བཀའ་བློན་སྐོ་སྐབས་བུད་མེད་བཀའ་བློན་གཉིས་ཆགས་པ་ལོ་རྒྱུས་ནང་གཟིགས་ན་མང་ཤོས་མིན་ན་མང་བའི་གྲས་རེད། དེ་ཡང་ནང་སྲིད་དང་ཕྱི་དྲིལ་བཀའ་བློན་ཡིན་དུས་ནང་གི་ཨ་མ་བུད་མེད་དང་ཕྱིའི་ཞལ་ཡང་བུད་མེད་ཆགས་ཡོད་པ་མ་ཟད། ལས་བྱེད་དང་འགྲོ་སོང་གཉིས་ཐོག་ནས་ལྷན་ཁང་ཆེ་ཤོས་གཉིས་རེད། ད་ལྟའི་བར་དུ་ཁོང་རྣམ་པ་གཉིས་ཀྱིས་བོད་མི་ས་ཡ་དྲུག་གི་སྐུ་ཚབ་གནང་གི་ཡོད། ཅེས་གསུངས་སོང་།
བོད་མིའི་སྒྲིག་འཛུགས་ཀྱི་གནས་རིམ་འཕར་སྟངས་སྐོར་གསུངས་དོན། མཚམས་རེར་རྩོམ་དེ་འདྲའི་ནང་བུད་མེད་དྲུང་ཆེ་ག་རེ་བྱས་ནས་ཡོད་པ་མ་རེད་ཅེས་ཡོང་གི་འདུག སྒྲིག་འཛུགས་འགྲོ་སྟངས་ག་རེ་རེད་ཟེར་ན། ལས་བྱེད་ནང་འཛུལ་ནས་ཉུང་མཐར་ཡང་ལོ་ ༢༠ ཙམ་བསྡད་ན་མ་གཏོགས་དྲུང་ཆེ་ཆགས་རྒྱུ་ཁག་པོ་ཞེ་དྲག་རེད། ད་ལྟའི་འཆར་ཟུང་དྲུང་གི་གནས་རིམ་ནང་ཕལ་ཆེར་བུད་མེད་བརྒྱ་ཆ་ ༢༤ འདུག ང་ཚོར་བུད་མེད་དྲུང་ཆེ་གཅིག་ཡོད། ཁོ་མོ་རྒས་ཡོལ་དུ་ཕེབས་ཁར་བཀའ་ཤག་གིས་དོན་གཅོད་ནང་བུད་མེད་དགོས་ཀྱི་འདུག་ཟེར་ནས་ཁོང་ལྷོ་ཨ་ཧྥི་རི་ཁའི་དོན་གཅོད་ལ་བཏང་བ་རེད། དྲུང་འཕར་གཉིས་ཡོད་པའི་ཁྲོད་གཅིག་བོད་ཀྱི་ཟློས་གར་འགན་འཛིན་དང་གཅིག་ཕྱི་འདྲིལ་དྲུང་འཕར་རེད། ཟུང་དྲུང་ནང་ནས་དྲུང་འཕར་ཆགས་པ་རིམ་བཞིན་ཡོང་གི་ཡོད། འདི་ཞུ་དགོས་དོན་ང་རང་ལ་སྒྲིག་འཛུགས་ཀྱི་འགན་ཞིག་ཡོད་སྟབས་རྣམ་པ་ཚོའི་ནང་སྒྲིག་འཛུགས་ནང་འགན་འཁུར་རྒྱུའི་འདོད་པ་ཡོད་ན་ཕེབས་རོགས་ཞུ་རྒྱུ་ཡིན། ཞེས་དང་། ཁོང་གིས་མུ་མཐད་དུ་ས་གནས་མགོ་འཛིན་སྐོར་ལ་ཁོང་གིས། ས་གནས་མགོ་འཛིན་དེ་ཁག་པོ་ཞེ་དྲག་རེད། ས་གནས་ལ་གནས་སྤོར་གཏོང་རྒྱུ་ཟེར་དུས་ཕེབས་མཁན་ཁག་པོ་རེད། དེ་བུད་མེད་གཅིག་པུ་མ་མིན་པར་སྤྱི་ཡོངས་ནས་ཁག་པོ་འདྲ་བོ་ཞིག་ཡོད་པ་རེད། དེའི་ནང་ནས་ང་དང་པོ་དྷ་རམ་ས་ལར་ཡོང་དུས་བུད་མེད་བཞི་ལྔ་ཡོད་པ་ལས་ད་ལྟ་གཅིག་ཆགས་ཡོད། བུད་མེད་ས་གནས་མགོ་འཛིན་ཚོར་ངས་བསྔགས་བརྗོད་ཞུ་རྒྱུ་ཡིན། ཞེས་གསུངས་སོང་།
སྲིད་སྐྱོང་མཆོག་གིས་བཙན་བྱོལ་ནང་གི་བུད་མེད་ཚོའི་ཤེས་ཡོན་གནས་སྟངས་སྐོར་གསུངས་དོན། ང་རང་ལ་ཤེས་རིག་བཀའ་བློན་གྱི་འགན་ཡོད་སྟབས། ཤེས་རིག་ཐོག་ནས་བུད་མེད་ཀྱི་ནུས་སྟོབས་སྤེལ་བར་སྔོན་མ་ནས་གང་ལ་གང་འཚམ་ཡར་རྒྱས་ཕྱིན་ཡོད་པ་དང་། ད་ལྟའང་ཡར་རྒྱས་འགྲོ་བཞིན་པ་རེད། དཔེར་ན། ཕལ་ཆེར་ལོ་བཅུ་དང་བཅོ་ལྔའི་སྔོན་འཛིན་རིམ་བཅུ་གཉིས་འཐོན་མཁན་བུ་མོ་ཉུང་བ་དང་ཕྱིས་སུ་མང་བ་ཆགས་འདུག ཡིན་ནའང་མཐོ་སློབ་ཏུ་སྐྱོད་མཁན་ཉུང་ཉུང་ཡིན་ཡང་ད་ལྟ་མང་བ་ཆགས་ཡོང་གི་ཡོད་པ་མ་ཟད། གཙུག་ལག་རབ་འབྱམས་པ་དང་འབུམ་རམས་པ་སློབ་སྦྱོང་བྱེད་མཁན་བུད་མེད་མང་བ་འདུག ཤེས་རིག་ལས་ཁུངས་ཀྱི་སློབ་ཡོན་ལེན་མཁན་བུ་དང་བུ་མོ་བསྡུར་ན། ན་ནིང་ལོར་བུ་མོ་བརྒྱ་ཆ་ ༥༤ དང་བུ་བརྒྱ་ཆ་ ༤༦ རེད་འདུག དེ་ནི་ང་ཚོའི་སྤྱི་ཚོགས་དང་ཕ་མ་ཚོས་འགན་འཁུར་བའི་ཐོག་ནས་སྔོན་མ་བུད་མེད་ཟེར་དུས་ནང་ལ་བསྡད་ནས་ལས་ཀ་བྱེད་དགོས་ཟེར་བའི་བསམ་བློ་ལ་འགྱུར་བ་ཕྱིན་པ་ཞིག་རེད། སྐབས་འདིའི་བཀའ་ཤག་གིས་ཤེས་ཡོན་གལ་ཆེ་ཤོས་སུ་རྩི་བཞིན་ཡོད། ཤེས་ཡོན་ལག་འཁྱེར་ག་ཚོད་ཡག་པོ་ཡོད་ན་དེའི་ཚོད་ཀྱིས་ལས་ཀ་དང་གླ་ཕོགས་ཡག་པོ་རག་རྒྱུ་ཡིན་པ་རྩོད་མེད་རེད། དཔེར་ན། ཇེའུ་མི་རིགས་ལ་མི་འབོར་ས་ཡ་བཅུ་གཅིག་བཅུ་གཉིས་ཙམ་ཡོད། འཛམ་གླིང་གི་མི་འབོར་གྱི་བརྒྱ་ཆ་རྩིས་ན་ཀླད་ཀོར་ཚེག་གཉིས་རེད། ཡིན་ནའང་ནོ་བྷེལ་གཟེངས་རྟགས་བཞེས་མཁན་ན་ནིང་བར་ ༨༥༠ ལྷག་བྱུང་བའི་ཁྲོད། ཇེའུ་མི་རིགས་ ༡༦༠ ལྷག་ཡོད། དེས་ག་རེ་སྟོན་གྱི་ཡོད་པ་རེད་ཟེར་ན། ཇེའུ་མི་རིགས་ཀྱི་སྤྱི་ཚོགས་ནང་ཤེས་ཡོན་གལ་ཆེན་ཡིན་ཟེར་བ་ལྟར་སྤྱི་ཚོགས་དང་ཕ་མ་ གཉིས་ཀྱིས་འགན་འཁུར་གནང་བར་བརྟེན་ཏེ་ནོ་བྷེལ་གཟེངས་རྟགས་བཞེས་མཁན་འདི་འདྲ་བྱུང་བ་རེད། དེས་སྤྱི་ཚོགས་ནང་ནུས་པ་དང་འབད་བརྩོན་བྱས་ན་གྲུབ་འབྲས་སྨིན་ཐུབ་པ་ཞིག་སྟོན་གྱི་ཡོད། ཅེས་གསུངས་སོང་།
སྐབས་བཅུ་བཞི་པའི་བཀའ་ཤག་གི་ལོ་གསུམ་ལྷིང་འཇགས་ཡིན་པའི་སྐོར་ལ། ད་ལྟའི་བཀའ་ཤག་གི་ལོ་གསུམ་རིང་སྤྱི་ཚོགས་ཁྱོན་ཡོངས་ལྷིང་འཇགས་པོ་བྱུང་སོང་། གང་ཡིན་ཟེར་ན། ༧གོང་ས་མཆོག་གིས་ཆབ་སྲིད་ཀྱི་སྐུ་དབང་གནང་ཚར་རྗེས་སྤྱི་ཚོགས་ཁྱོན་ཡོངས་ག་འདྲ་ཆགས་ན་སྙམ་པའི་སེམས་འཚབ་ཅིག་བོད་ཕྱི་ནང་ཚང་མར་ཡོད་པ་རེད། ལྷིང་འཇགས་པོ་འགྲོ་བའི་རྩ་བ་མི་མང་གིས་རྒྱབ་སྐྱོར་བྱས་པའི་བཀའ་དྲིན་ལ་བརྟེན་བྱུང་བ་རེད། ཕྱི་རྒྱལ་དང་གཞིས་ཆགས་ཁག་གང་དུ་བཅར་བ་ཡིན་ན་སྲིད་སྐྱོང་དང་བཀའ་བློན་རྣམ་པ་ཡོང་གི་ཡོད་པ་རེད་ཅེས་ཟེར་དུས་འདུ་འཛོམས་དང་དོ་སྣང་སྔར་ལས་ལྷག་པ་དང་ཡག་པོ་འདུག་ཅེས་ས་གནས་ས་ཐོག་ནས་གསུང་གི་འདུག ༧གོང་ས་མཆོག་གིས་ཆབ་སྲིད་ཀྱི་སྐུ་དབང་མཚམས་འཇོག་གནང་སྐབས། ད་ནི་མི་མང་གིས་འགན་འཁུར་ཆེ་ཙམ་བཞེས་དགོས་གསུངས་པ་ལྟར་མི་མང་གིས་འགན་འཁུར་གནང་བ་གསལ་བོ་རེད། དེ་མ་འོངས་པར་རྒྱུན་གནས་བྱ་རྒྱུ་གལ་ཆེན་པོ་རེད། གཞན། ང་རང་ལོ་གསུམ་རིང་འབྲས་ལྗོངས་ཕུད་པའི་གཞིས་ཆགས་ཁག་ཡོངས་ལ་སྐོར་སྐྱོད་ཕྱིན་ཚར་བ་དང་། སློབ་གྲྭ་ཁག་ཕལ་ཆེ་བར་སྐོར་བ་བརྒྱབ་ཚར་ཡིན། རྒན་གསོ་ཁང་དང་དགོན་པ། བྱང་ཨ་རི་དང་ཡུ་རོབ་ཁུལ་དུ་ཡོད་པའི་བོད་རིགས་གནས་སྡོད་ཀྱི་ས་གནས་བརྒྱ་ཆ་ ༧༠ ལྷག་ལ་སྐོར་བ་བརྒྱབ་ཚར་ཡིན། སྙིང་བསྡུས་ཞུས་ན་བཀའ་ཤག་སྐབས་ ༡༤ པས་འགན་འཁུར་ནས་ལྷིང་འཇགས་པོ་ཡོང་བ་མི་མང་གི་རྒྱབ་སྐྱོར་ལ་བརྟེན་ནས་བྱུང་བ་ཞིག་རེད། ཅེས་སོགས་གསུངས་སོང་ལ། མཇུག་ཏུ་དྲི་བ་དྲིའི་ལན་ཡང་གནང་སོང་།
གསར་འགོད་པ། ལྷ་སྐྱབས་རྒྱལ།
ཟབ་སྦྱོང་དེའི་ཟབ་སྦྱོང་ཐོག་སྲིད་སྐྱོང་སྐད་བཏང་བ་དེ། སྲིད་སྐྱོང་དེ་སྔོན་ཧཱ་ཝར་ཌི་གཙིག་ལག་སློབ་གྲྭ་ནས་ཁྲིམས་ཐོག་སློབ་བྱོང་བྱས་ཡོད་སྟབས། ད་རེས་གོ་སྒྲིག་པའི་ངོས་ནས་སྲིད་སྐྱོང་བློ་བཟང་སེང་གེ་ཡིས་བུད་མེད་ཚོར་ཁྲིམས་ལུགས་རང་བཞིན་གྱི་ཐོབ་ཐང་དང་འགན་དབང་སྐོར་ལ་སྐད་ཆ་ཞིག་བཤད་ན་བསམ་པ་ཡིན་རྒྱུ་རེད་དེ་སྲིད་སྐྱོང་གིས་བཀའ་ཤག་གི་ལས་དོན་ལེགས་འགྲུབ་བྱུང་སྐོར་མང་པོ་ཞིག་བགྲང་འདུག
དོན་དངོས་སུ་བཀའ་ཤག་འདིའི་སྐབས་སུ་བུད་མེད་ས་གནས་འགོ་འཛིན་ཉུང་དུ་ཕྱིན་ཞིང་། བཙན་བྱོལ་བོད་མིའི་བཅའ་ཁྲིམས་རིན་པོ་ཆེ་དང་ལས་བྱེད་འདེམས་ལྷན་གྱི་སྒྲིག་གཞིའི་དགོངས་དོན་ལས་འགལ་བའི་སྲིད་ཇུས་ལག་བསྟར་བྱས་ཡོད། བེུད་ས་གནས་འགོ་འཛིན་ཉུང་དུ་བཏང་བ་དེ་བེུད་ལ་གཟིགས་ཚུལ་ཡག་པོ་ཡོད་པར་ངོས་འཛིན་ཞུ་ཐབས་བྲལ།
གསར་འགོད་པས་སྲིད་སྐྱོང་མཆོག་གི་བཀའ་སློབ་ཞིབ་ཚགས་འཁོད་པ་ཐུགས་རྗེ་ཆེ། བཀའ་སློབ་ཀྱི་ནང་དོན་ལ་གཞིགས་ན་ཁོང་ཉིད་ཤེས་རིག་བཀའ་སློབ་ཡིན་བཞིན་བོད་པའི་བུད་མེད་ཚོ་ཤེས་ཡོན་ཐོག་ཡར་རྒྱས་ཕྱིན་ཡོད་རབས་དང་། གཞུང་གི་ལས་བྱེད་ཚོ་ས་གནས་ཁག་ཏུ་འགྲོ་འདོད་མེད་པ་ལྟར་ད་ལྟ་ཉུང་དུ་ཕྱིན་ཡོད་སྐོར་སོགས་གསུངས་འདུག
བུད་མེད་ཀྱི་གྲུབ་འབྲས་ཡར་རྒྱས་ཕྱིན་པ་དེ་བཙན་བྱོལ་སྤྱི་ཚོགས་ནང་བུད་མེད་ཀྱི་གྲངས་འབོར་བརྒྱ་ཆ་མང་བས་རེད་དམ། ཡང་ན་སྲིད་སྐྱོང་མཆོག་གིས་བཀའ་སློབ་བཞིན་་་་་
གང་ལྟར་ཡར་རྒྱས་སོང་བར་བསྔགས་བརྗོད་ཡི་རང་ཞུ། བཀྲིས་བདེ་ལེགས།
སྲིད་སྐྱོང་གི་བུད་མེད་ལ་གཟིགས་ཚུལ་དེ་ཡག་པ་རེད། ཡིན་ཡང་བུད་མེད་ཚོགས་པ་ཟེར་བ་དེ་ཤར་གླིང་ཟླ་སྒྲོན་ཟེར་བའི་ཆབ་སྲིད་པ་དེ་ཚོས་ཁ་ཕྱོགས་གང་སར་ཁྲིད་ཀྱི་ཡོད་པ་ལ་ཡག་པོ་མ་རེད། ཉིན་ཞིག་བུད་མེད་ཚོགས་པ་ཁོ་ཚོའི་ལྟོ་རྒྱབ་བསྟེན་ས་དང་འཚོལ་བྱེད་ངེས་རེད།