ཁ་སང་སྔ་དྲོ་ནས་བཟུང་རྒྱ་ནག་ཧུའུ་ནན་ཞིང་ཆེན་ཡེ་ཡཱང་གྲོང་ཁྱེར་ཕིན་ཅང་རྫོང་གི་མི་མང་སྟོང་ཕྲག་མང་པོས་ཧྭ་དེན་གློག་འདོན་བཟོ་གྲྭར་ངོ་རྒོལ་བྱེད་བཞིན་ཡོད་འདུག
རྒྱ་ནག་ཧུའུ་ནན་ཞིང་ཆེན་ཅི་ཡཱང་གྲོང་ཁྱེར་ཕིན་ཅང་རྫོང་དུ། ལོ་མང་རིང་ནས་ཧྭ་དེན་ཚོང་གཉེར་ཁང་ཟེར་བ་ཞིག་གིས་མེ་ཤུགས་གློག་འདོན་གྱི་ལས་གཞི་རྒྱ་ཆེན་པོ་ཞིག་ལག་བསྟར་བྱེད་བཞིན་ཡོད་སྟབས། ཁ་སང་ཕྱི་ཚེས་ ༡༨ ཉིན་གྱི་སྔ་དྲོར་རྫོང་དེའི་མི་མང་སྟོང་ཕྲག་མང་པོ་གྲོང་ཁྱེར་ལྟེ་གནས་སུ་འདུ་འཛོམས་ཀྱིས། འབོད་ཚིག་སྣ་ཚོགས་ཀྱི་འཕྲེད་དར་བཟུང་ནས་ངོ་རྒོལ་ཁྲོམ་སྐོར་དང་། ས་གནས་སྲིད་གཞུང་གི་སྒོ་འགྲམ་དུ་༼རྫས་དུག་གིས་གསོད་པ་ལས་མུ་གེ་ཡིས་ཤི་ན་དགའ༽ཞེས་པའི་བསྒྲགས་གཏམ་འོག་ཟས་བཅད་ངག་བཅད་ཀྱི་ངོ་རྒོལ་བྱེད་བཞིན་ཡོད་འདུག
ངོ་རྒོལ་བ་ཞིག་གིས་གསར་འགོད་པར། ཕིན་ཅང་རྫོང་མི་མང་སྲིད་གཞུང་གིས་མི་མང་གི་རེ་འདོད་ལ་དང་ལེན་ཉན་འཇོག་བྱས་མེད་པ་མ་ཟད། གོང་འོག་ཚང་མར་སྐྱག་རྫུན་བཤད་དེ་བཙན་གྱིས་མེ་ཤུགས་གློག་འདོན་ལས་གཞི་ལག་བསྟར་བྱེད་བཞིན་ཡོད་པ་རེད། ང་ཚོར་ལས་གཞི་མཚམས་འཇོག་བྱེད་དུ་འཇུག་བའི་ཐོབ་ཐང་མི་འདུག་ཀྱང་། ངོ་རྒོལ་བྱེད་པའི་ཐོབ་ཐང་ཡོད་སྟབས། ང་ཚོས་རང་ཉིད་ཀྱི་ཁྱིམ་གཞིས་སྲུང་སྐྱོབ་བྱས་ཏེ། སྲོག་བློས་གཏོང་གིས་ཧྭ་དེན་གློག་འདོན་བཟོ་གྲྭ་ཕིན་ཅང་ནས་ཕྱིར་ཕུད་གཏོང་བའི་དམ་བཅའ་བཞག་ཡོད། ཅེས་བརྗོད་འདུག
གསར་འགོད་པ། པདྨ་མཚོ།
ཡག་པོ་རེད་ད།
ཨོ། གསར་འགྱུར་འདི་ལྟར་ཐུང་ཐུང་ཁ་གསལ་སྙིང་བསྡུས་ཡིན་ན་ལྟ་བདེ་བོ་འདུག