ཨ་རིས་མཁའ་ཐོག་ནས་དྲག་རྒོལ་བྱས།

གཟའ་ལྷག་པའི་ཉིན་ཨ་རིའི་མཐུན་གྲོགས་རྒྱལ་ཁབ་ཁག་གིས་སི་རི་ཡའི་དྲག་སྤྱོད་ཤོག་ཁག་ལ་མཁའ་ཐོག་ནས་འཐབ་རྒོལ་བྱས་ཏེ་དྲག་སྤྱོད་ཤོག་ཁག་གི་རྡོ་སྣུམ་སྔོག་འདོན་ས་ཚིགས་ ༡༢ གཏོར་བཤིག་ཐེབས་ཡོད་འདུག

ཟླ་འདིའི་ཚེས་ ༢༤ ཉིན་ཨ་རིའི་མཐུན་གྲོགས་རྒྱལ་ཁབ་ཁག་གིས་སི་རི་ཡའི་ནང་གི་ཨི་རག་དང་སི་རི་ཡའི་མཉམ་འབྲེལ་དྲག་སྤྱོད་ཤོག་ཁག་ལ་མཁའ་ཐོག་ནས་འཐབ་རྒོལ་ཐེངས་ ༡༣ བྱས་ཏེ། ཨི་རག་དང་སི་རི་ཡའི་མཐའ་མཚམས་ཁུལ་དུ་འགྲོ་འོང་བྱེད་བཞིན་པའི་དྲག་སྤྱོད་ཤོག་ཁག་གི་དམག་རྒྱག་རླངས་འཁོར་ ༨ དང་། དྲག་སྤྱོད་ཤོག་ཁག་གི་རྡོ་སྣུམ་སྔོག་འདོན་ས་ཚིགས་ཁག་ ༡༢ གཏོར་ཡོད་འདུག་ལ། གཞན་དམག་སྒར་དང་། དོ་དམ་ཁང་སོགས་ལ་གཏོར་བཤིག་ཆེན་པོ་ཐེབས་པའི་ཁྲོད་དྲག་སྤྱོད་པ་ ༡༤ དང་མི་སེར་ ༥ བསད་ཡོད་སྟབས། ཁ་སང་ཨལ་ཇེ་རི་ཡའི་དྲག་སྤྱོད་ཤོག་ཁག་གིས་ཧྥ་རན་སིའི་མི་སེར་ཞིག་གི་སྐེ་བཅད་དེ་བསད་ཡོད་པ་མ་ཟད། ད་དུང་ཨ་རིར་དགྲ་ཤ་ལེན་རྒྱུ་ཡིན་སྐོར་ཡང་བསྒྲགས་ཡོད་སྟབས། ཨ་རིའི་སྲིད་འཛིན་ཨོ་བྷ་མས་མཉམ་འབྲེལ་རྒྱལ་ཚོགས་བདེ་འཇགས་ལྷན་ཚོགས་ཐོག་སི་རི་ཡ་དང་ཨི་རག་གི་ཁ་ཆེ་དྲག་སྤྱོད་དག་རྩ་མེད་གཏོང་དགོས་སྐོར་གཏམ་བཤད་བྱས་ཡོད་འདུག

དེའི་ཐད་ཨོ་བྷ་མས་བརྗོད་དོན། €œསྡིགས་སྤྱོད་ལ་དགའ་བའི་ཁ་ཆེ་དྲག་སྤྱོད་ཤོག་ཁག་དང་གྲོས་མོལ་བྱས་ཏེ་ཞི་འགྲིག་ཡོང་རྒྱུ་དཀའ་ལས་ཁག་པོ་ཡིན་སྟབས། ཨ་རིས་མཐུན་གྲོགས་རྒྱལ་ཁབ་ཁག་དང་མཉམ་རུབ་ཐོག་འཇིགས་སྐུལ་རིང་ལུགས་པ་དག་རྩ་མེད་གཏོང་ཐབས་བྱེད་བཞིན་ཡོད་སྟབས། དེ་རིང་ངས་རྒྱལ་ཁབ་ཁག་གིས་ཨ་རིར་མཉམ་སྡེབ་བྱ་རྒྱུར་རེ་སྐུལ་ཞུ་བཞིན་ཡོད། €ཅེས་དང་། ཨ་རི་དང་དཀྱིལ་ཤར་ཡུལ་གྲུ་སཱོ་ཌི་ཨ་ར་བྷེ་ཡ་དང་། ཨ་རབ་ཨི་མེ་ར་ཌི་གཅིག་སྒྲིལ་རྒྱལ་ཁབ། ཇོར་ཌན། བྷ་རན། ཁཱ་ཌར་སོགས་རྒྱལ་ཁབ་ཁག་ ༤༠ ཙམ་གྱིས་མཉམ་འབྲེལ་ཐོག་འཇིགས་སྐུལ་རིང་ལུགས་པར་རྒོལ་ལན་སློག་གི་ཡོད། ཅེས་སོགས་བརྗོད་འདུག

ཧྥ་རན་སིའི་སྲིད་འཛིན་ཧོ་ལན་ཌི་ (Hollande)ཡིས། €œདྲག་སྤྱོད་ཤོག་ཁག་འདིས་རྒྱལ་སྤྱི་རྒྱལ་ནང་གི་མང་ཚོགས་མང་པོར་སྡུག་སྦྱོང་མནར་གཅོད་བཏང་ཡོད་པ་མ་ཟད། ཁ་ཆེ་སྤུན་གྲོགས་ཚོ་ལའང་བཙན་གཡེམ་དང་དམར་གསོད་གཏོང་གི་ཡོད་སྟབས། རྒྱལ་སྤྱིའི་སྒྲིག་འཛུགས་ཁག་གིས་མཉམ་རུབ་བྱས་ཏེ་དྲག་སྤྱོད་ཤོག་ཁག་རྩ་མེད་གཏོང་དགོས། ཞེས་བརྗོད་འདུག

ཚེས་ ༡༠ ཉིན་ཨ་རིས་སི་རི་ཡའི་ནང་གི་དྲག་སྤྱོད་ཤོག་ཁག་ལ་དམག་འཐབ་རྒྱག་རྒྱུ་ཡིན་སྐོར་བསྒྲགས་ཡོད་ཀྱང་། དཀྱིལ་ཤར་ཡུལ་གྲུ་མང་པོ་ཞིག་གིས་རྒྱབ་སྐྱོར་བྱས་མེད་སྟབས་མཁའ་ཐོག་དྲག་རྒོལ་བྱེད་ཐུབ་མེད་ཀྱང་། ཟླ་འདིའི་ཚེས་ ༢༢ ཉིན་ཨ་རིས་དཀྱིལ་ཤར་ཡུལ་གྲུའི་རྒྱལ་ཁབ་ཁག་ཅིག་གིས་རྒྱབ་སྐྱོར་འོག་སི་རི་ཡ་ནང་མཁའ་ཐོག་གི་དྲག་རྒོལ་བྱས་ཏེ། སི་རི་ཡའི་དྲག་སྤྱོད་ཤོག་ཁག་གི་ས་ཚིགས་འགར་གཏོར་རྒོལ་བཏང་ཡོད་པ་དང་། ཚེས་ ༢༣ ཉིན་ཨ་རིས་མཁའ་ཐོག་དྲག་རྒོལ་ཐེངས་ ༢༠ ཙམ་བྱས་ཏེ། སི་རི་ཡའི་ཨ་ལེབ་པོ་ (Aleppo) མངའ་སྡེའི་ནང་ཡོད་ཁཱོ་ར་སན་ (Khorasan) དྲག་སྤྱོད་ཤོག་ཁག་གི་ས་ཚིགས་གཏོར་བ་དང་འབྲེལ་མགོ་གཙོ་ཧྥ་ཌི་ལི་(Fadhli) བསད་ཡོད་པ་མ་ཟད། དེ་ཁུལ་གྱི་དྲག་སྤྱོད་ཤོག་ཁག་ནུ་སཱ་ར་མདུན་སྐྱོད་(Nusra Front)ཤོག་ཁག་གི་དམག་སྒར་དང་། དོ་དམ་ཁང་མང་པོ་ཞིག་རྩ་མེད་བཏང་ཡོད་པ་དང་། ཚེས་ ༢༤ ཉིན་ཨ་རིས་ཐེངས་ ༡༣ ལ་ཕར་རྒལ་བྱས་ཡོད་འདུག

ཟླ་འདིའི་ཚེས་ ༢༣ ཉིན་སི་རི་ཡའི་འཇིགས་སྐུལ་རིང་ལུགས་པས་ཨ་ཡན་ཨ་རབ་ (Ayn Arab) ས་ཁུལ་བརྒྱུད་ཀྲར་ཀིའི་ནང་སྐྱབས་བཅོལ་འགྲོ་མཁན་གྱི་ཀར་ཌི་ཤི་མི་རིགས་ ༥༠ ཙམ་སྐེ་བཏུབ་སྟེ་བཀལ་ཡོད་པ་མ་ཟད། དེ་སྔོན་ཨ་རི་དང་དབྱིན་ཇི་བ་སོགས་མང་པོ་ཞིག་གི་སྐེ་བཅད་ཡོད་སྟབས། དབྱིན་ཇིའི་སྲིད་བློན་ཁེམ་རོན་གྱིས་མཉམ་འབྲེལ་རྒྱལ་ཚོགས་ཐོག་ཨ་རིར་རྒྱབ་སྐྱོར་བྱས་ཏེ་དྲག་སྤྱོད་པ་རྩ་མེད་གཏོང་རྒྱུ་དང་། ནེ་ཐར་ལན་ཌི་གཞུང་གིས་མཁའ་དམག་གནམ་གྲུ་ ༡༦ དང་དམག་སྦྱོང་སྤྲོད་མཁན་ ༡༣༠ ཙམ་བཏང་སྟེ་ཨ་རིར་རྒྱབ་སྐྱོར་བྱ་རྒྱུ་ཡིན་སྐོར་བསྒྲགས་ཡོད་འདུག་ལ། ཀྲར་ཀིའི་གཞུང་གིས་ཀྱང་མཉམ་འབྲེལ་ཐོག་དྲག་སྤྱོད་པར་ཁ་གཏད་གཅོག་རྒྱུ་ཐག་གཅོད་བྱས་ཡོད་འདུག

ཨ་རིས་སི་རི་ཡ་དང་ཨི་རག་གི་མཉམ་འབྲེལ་དྲག་སྤྱོད་ཤོག་ཁག་གཏོར་ཕམ་གཏོང་ཆེད། ད་ལོའི་ཕྱི་ཟླ་ ༨ པ་ནས་བཟུང་ཨི་རག་ནང་མཁའ་རྒོལ་ཐེངས་ ༢༠༠ ཙམ་དང་། སི་རི་ཡ་ནང་ཐེངས་ ༤༠ ཙམ་བྱས་ཡོད་འདུག ད་བར་དྲག་སྤྱོད་ཤོག་ཁག་གིས་ཨི་རག་དང་སི་རི་ཡ་གཙོས་པའི་རྒྱལ་ཁབ་འདྲ་མིན་གྱི་ཉེས་མེད་མི་སེར་ ༢༨༦༢༩༥ ལྷག་བསད་ཡོད་པ་མ་ཟད། ཡུལ་མི་ ༡༣༠༠༠༠ ལྷག་ཊར་ཀིའི་དང་། མི་ས་ཡ་ ༡ མ་ཟིན་ཙམ་ཡུལ་ལུང་གཞན་ནང་སྐྱབས་བཅོལ་འགྲོ་དགོས་བྱུང་ཡོད་འདུག

ཁ་སང་མཉམ་འབྲེལ་རྒྱལ་ཚོགས་བདེ་འཇགས་ལྷན་ཚོགས་ཐོག་འཇིགས་སྐུལ་རིང་ལུགས་པར་ཁ་གཏད་གཅོག་རྒྱུའི་གྲོས་ཆོད་ཅིག་བཞག་ཡོད་པ་དང་། རྒྱལ་ཁབ་འདྲ་མིན་གྱི་ཁ་ཆེའི་མཁས་པ་ ༡༢༠ ཙམ་གྱིས་མཚན་འཁོད་སྙན་ཞུ་ཞིག་ཀྱང་བསྒྲགས་ཏེ། ཁ་ཆེའི་ཆོས་ལུགས་ཁ་ལ་འཁྱེར་ནས་གཞུང་ཚབ་པ་དང་རྒྱལ་སྤྱིའི་གནད་ཡོད་མི་སྣ། གསར་འགོད་པ། ཞབས་ཞུ་བ། ཉེས་མེད་མི་སེར་གང་བྱུང་དམར་གསོད་གཏོང་གི་ཡོད་པ་དེ་ནི། ཁ་ཆེའི་ཆོས་ལུགས་དང་རྒྱབ་འགལ་ཆགས་ཡོད་སྟབས། འཕྲལ་དུ་མཚམས་འཇོག་དགོས་སྐོར་སོགས་འཁོད་ཡོད་འདུག

ཆབ་སྲིད་དབྱེ་ཞིབ་པ་ཚོས། ཨ་རིའི་མཐུན་གྲོགས་རྒྱལ་ཁབ་ཁག་གིས་དྲག་སྤྱོད་ཤོག་ཁག་དང་དམག་འཐབ་བྱེད་བཞིན་ཡོད་པ་དེས། གལ་ཏེ་དྲག་སྤྱོད་ཤོག་ཁག་དག་རྩ་མེད་གཏོང་མ་ཐུབ་ཚེ། མ་འོངས་པར་ཁོ་ཚོར་དེ་ལས་ལྷག་པའི་ཉེན་ཁ་ཆེན་ཆགས་ཀྱི་ཡོད་སྐོར་རྗོད་བཞིན་ཡོད་འདུག

གསར་འགོད་པ། དོན་གྲུབ།