རྒྱ་གར་དང་ཝེ་ཋི་ནམ་གྱི་མཉམ་འབྲེལ།

ཁ་སང་ཝེ་ཋི་ནམ་དང་རྒྱ་གར་གྱི་སྲིད་བློན་རྣམ་གཉིས་ཐུག་འཕྲད་བྱས་ཏེ་ཚོང་འབྲེལ་དང་དམག་དོན། ལྷོ་ཤར་ཨེ་ཤ་ཡའི་བདེ་འཇགས་བཅས་ལ་གྲོས་ཆོད་བཞག་པ་དེས་རྒྱ་ནག་ལ་འདྲོག་མགོ་བསླངས།  

ཟླ་འདིའི་ཚེས་ ༢༧ ཉིན་ཝེ་ཋི་ནམ་གྱི་སྲིད་བློན་ནོང་ཡེན་ཊེན་ཌོང་(Nguyen Tan Dung)ལགས་དང་ཁོང་གི་སྐུ་ཟླ་གཉིས་ཐོག་མར་རྒྱ་གར་མངའ་སྡེ་བྷེ་ཧར་མངའ་སྡེ་ནང་ཡོད་པའི་ནང་པའི་གནས་ཆེན་རྡོ་རྗེ་གདན་དང་། དེ་གའི་ཝེ་ཋི་ནམ་གྱི་དགོན་པ་བཅས་སུ་གཟིགས་སྐོར་གནང་ཡོད་པ་དང་། ཁ་སང་ཚེས་ ༢༨ ཉིན་ཝེ་ཋི་ནམ་གྱི་སྲིད་བློན་གཙོས་པའི་ཚོང་ལས་སྐུ་ཚབ་་མི་སྣ་ ༥༠ ལྷག་རྒྱལ་ས་ལྡི་ལིར་འབྱོར་བ་དང་འབྲེལ། རྒྱ་གར་གྱི་སྲིད་བློན་མུ་དྷི་མཆོག་དང་ཐུག་འཕྲད་གནང་སྟེ། རྒྱལ་ཁབ་གཉིས་བར་ཚོང་འབྲེལ་དང་དམག་དོན། ལྷོ་ཨེ་ཤ་ཡའི་བདེ་འཇགས་སྲུང་སྐྱོབ། རྒྱ་ནག་དང་ཝེ་ཋི་ནམ་གཉིས་བར་རྩོད་རྙོག་ཡོད་པའི་ལྷོ་རྒྱ་ནག་རྒྱ་མཚོའི་མངའ་ཁུལ་དུ་རྡོ་སྣུམ་སྔོག་འདོན་བྱེད་པའི་ལས་གཞི་བཅས་ལ་གྲོས་ཆོད་བཞག་ཡོད་འདུག

ཐེངས་འདིར་རྒྱ་གར་གྱིས་ཝེ་ཋི་ནམ་མཚོ་ཁུལ་བདེ་འཇགས་ཆེད་ཨ་སྒོར་ས་ཡ་ ༡༠༠ ལྷག་གི་བུ་ལོན་གཡར་ཏེ། ཝེ་ཋི་ནམ་གྱིས་རྒྱ་གར་ནས་མཚོ་དམག་གྲུ་གཟིངས་ཆེན་པོ་བཞི་ཉོ་རྒྱུ། དེ་བཞིན། རྒྱ་གར་གྱིས་ཝེ་ཋི་ནམ་གྱི་མཚོ་དམག་ལ་དེང་རབས་མཚོན་ཆའི་རོགས་སྐྱོར་དང་དམག་སྦྱོང་སྤྲོད་རྒྱུ་དང་། རྒྱལ་ཁབ་གཉིས་ཀྱིས་མཚོ་ངོས་ཀྱི་གནས་ཚུལ་ཕན་ཚུན་མཁོ་སྤྲོད་བྱས་ཏེ་ལྷོ་ཨེ་ཤ་ཡའི་མཚོ་ཁུལ་དུ་ཚོང་ཟོག་སྐྱེལ་འདྲེན་དང་སྲུང་སྐྱོབ་བཅས་ལ་གྲོས་བསྡུར་བྱས་ཡོད་འདུག  

རྒྱལ་ཁབ་གཉིས་ཀྱིས་ཐུན་མོང་གསལ་བསྒྲགས་སྤེལ་སྐབས། སྲིད་བློན་མུ་དྷི་ཡིས་ “ ང་རང་རྒྱ་གར་སྲིད་བློན་ལས་ཁུངས་ནང་འཛུལ་བ་ནས་བཟུང་ངའི་སྲིད་གཞུང་གིས་ལྷོ་ཨེ་ཤ་ཡ་ཁུལ་དུ་ཕྱི་སྲིད་འབྲེལ་ལམ་དམ་ཟབ་གཏོང་རྒྱུར་འབད་བརྩོན་བྱས་ཡོད། དེ་ནི་འབྱུང་འགྱུར་རྒྱ་གར་གྱི་བདེ་འཇགས་ལ་གལ་འགངས་ཆེན་པོ་ཆགས་ཡོད་སྟབས། ཐེངས་འདིར་རྒྱལ་ཁབ་གཉིས་བར་འབྲེལ་ལམ་བཙུགས་པ་གསར་པ་གང་ཡང་མ་རེད།”ཅེས་བརྗོད་འདུག སྲིད་བློན་ནོང་ཡེན་ཊེན་ཌོང་གིས། “ཝེ་ཋི་ནམ་གཞུང་གིས་རྒྱ་གར་གྱིས་ཤར་ཕྱོགས་སུ་ལྟ་བའི་སྲིད་བྱུས་ལ་རྒྱབ་སྐྱོར་བྱེད་ཀྱི་ཡོད་པ་མ་ཟད། རྒྱ་གར་གྱིས་ཝེ་ཋི་ནམ་གྱི་ཤར་ཕྱོགས་མཚོ་ཁུལ་དུ་རྡོ་སྣུམ་དང་སོལ་རླངས་སྔོག་འདོན་བྱེད་པར་མཉམ་ལས་བྱས་ཏེ། ལྷོ་ཤར་ཨེ་ཤ་ཡའི་ཁུལ་གྱི་བརྟན་བརླིང་དང་ཞི་འཇགས་སྲུང་སྐྱོབ་བྱེད་དགོས་ཞེས་བརྗོད་ཡོད་འདུག

ཐེངས་འདིའི་རྒྱལ་ཁབ་གཉིས་ཀྱི་གྲོས་མོལ་བརྒྱུད་དེ། ཟླ་རྗེས་མའི་ཚེས་ ༥ ཉིན་ནས་བཟུང་རྒྱ་གར་གྱི་རྒྱལ་ས་ལྡི་ལི་དང་མུམ་བྷེ་གྲོང་ཁྱེར་གཉིས་ནས་ཐད་ཀར་ཝེ་ཋི་ནམ་གྱི་ཧོ་ཆིན་མིན་གྲོང་ཁྱེར་ (Ho Chi Minh City) རུ་རྒྱ་གར་གྱི་འགྲུལ་སྐྱེལ་གནམ་གྲུ་ (Jet Airways) འཕུར་སྐྱོད་དང་། ༢༠༡༥ ལོའི་ལོ་མགོར་ཝེ་ཋི་ནམ་གྱི་རྒྱལ་ས་ནས་ཝེ་ཋི་ནམ་གྱི་འགྲུལ་སྐྱེལ་གནམ་གྲུ་ (Vietnam Airline) གོང་གི་གྲོང་ཁྱེར་གཉིས་ནང་གཏོང་རྒྱུ་ཡིན་འདུག གཞན། ཝེ་ཋི་ནམ་དངུལ་ཁང་དང་རྒྱ་གར་དངུལ་ཁང་གཉིས་ཀྱིས་རྒྱལ་ཁོངས་སོ་སོའི་ནང་ཡན་ལག་དངུལ་ཁང་འཛུགས་རྒྱུ་སོགས་ཐག་གཅོད་བྱས་ཡོད་འདུག

ཐེངས་འདིར་གྲོས་ཆོད་དོན་ཚན་བདུན་བཞག་པའི་དང་པོ། བྷེ་ཧར་ནང་ཡོད་པའི་དཔལ་ནཱ་ལེནྜའི་གཙུག་ལག་མཐོ་སློབ་བསྐྱར་གསོ་དང་། གཉིས་པ། རྒྱ་གར་གྱིས་ཝེ་ཋི་ནམ་བརྡ་འཕྲིན་གཙུག་ལག་མཐོ་སློབ་ཏུ་དབྱིན་སྐད་དང་བརྡ་འཕྲིན་ཚན་རྩལ་གྱི་སྦྱོང་བརྡར་བསྟི་གནས་གསར་འཛུགས་བྱ་རྒྱུ། གསུམ་པ། ཝེ་ཋི་ནམ་ནང་ཡོད་པའི་གནའ་ཤུལ་ (My Son) བསྐྱར་གསོ་དང་སྲུང་སྐྱོབ་བྱ་རྒྱུ། བཞི་པ། རྒྱལ་ཁབ་གཉིས་ཀྱི་རླུང་འཕྲིན་ལས་ཁུངས་ཕན་ཚུན་བར་ཉམས་མྱོང་བརྗེ་ལེན་བྱ་རྒྱུ། ལྔ་པ། ༢༠༡༥ ལོ་ནས་ ༢༠༡༧ ལོའི་བར་རིག་གཞུང་འཁྲབ་སྟོན་བརྗེ་ལེན་བྱ་རྒྱུ། དྲུག་པ། རྒྱ་གར་རྡོ་སྣུམ་སོལ་རླངས་ཁེ་ལས་མཉམ་སྡེ་ (ONGC)དང་ཝེ་ཋི་ནམ་རྡོ་སྣུམ་སོལ་རླངས་ཁེ་ལས་མཉམ་སྡེ་ (PetroVietnam) གཉིས་ཀྱིས་མཉམ་འབྲེལ་ཐོག་རྡོ་སྣུམ་དང་སོལ་རླངས་འཚོལ་ཞིབ་དང་སྔོག་འདོན་བྱ་རྒྱུ། བདུན་པ། རྒྱ་གར་གྱི་ཨོ་བེ་ལད་ལི་ (OVL) ཁེ་ལས་དང་ཝེ་ཋི་ནམ་རྡོ་སྣུམ་སོལ་རླངས་ཁེ་ལས་གཉིས་ཀྱིས་འབྲེལ་ལམ་ཡར་རྒྱས་གཏོང་རྒྱུ་སོགས་ཡིན་འདུག

ཐེངས་འདིར་སྲིད་བློན་གཉིས་ཀྱིས་ ༢༠༡༥ ལོར་རྒྱལ་ཁབ་གཉིས་བར་ཚོང་འབྲེལ་ཨ་སྒོར་ཐེར་འབུམ་ ༧ དང་། ༢༠༢༠ ལོའི་བར་ཨ་སྒོར་ཐེར་འབུམ་ ༡༥ ལྷག་གི་ཚོང་ལས་འབྲེལ་ལམ་བཙུགས་ཡོད་པ་དང་། ད་ལྟའི་ཆར་རྒྱ་གར་ཝེ་ཋི་ནམ་ནང་ཚོང་འབྲེལ་བྱེད་མཁན་ཆེ་ཤོས་རྒྱལ་ཁབ་བཅུའི་ནང་ཚུད་ཡོད་དེ་རྒྱལ་ཁབ་གཉིས་བར་ཨ་སྒོར་ཐེར་འབུམ་ ༥.༢༤ ཙམ་གྱི་ཚོང་འབྲེལ་བྱེད་བཞིན་ཡོད་འདུག  

ཟླ་སྔོན་མར་རྒྱ་གར་གྱི་སྲིད་འཛིན་པུར་ནཱ་མོར་ཀར་ཇེ་ (Pranab Mukherjee) མཆོག་ཝེ་ཋི་ནམ་དུ་གཞུང་འབྲེལ་གཟིགས་སྐོར་གནང་སྟེ། ཝེ་ཋི་ནམ་ནང་དུ་ལས་འཆར་ཁག་༨༤ ལ་ཨ་སྒོར་ས་ཡ་ ༢༦༠ ལྷག་གི་འགྲོ་གྲོན་གཏོང་བར་གྲོས་མཐུན་བྱུང་ཡོད་པ་དང་། དེའི་སྔོན་རྒྱ་གར་ཕྱི་སྲིད་བློན་ཆེན་ཝེ་ཋི་ནམ་ནང་བསྐྱོད་དེ། རྒྱལ་ཁབ་གཉིས་བར་ཞིང་ལས་ཐོན་སྐྱེལ་དང་ཐག་རས། འཕྲུལ་ཆས། སྨན་རྫས། བརྡ་འཕྲིན་ཚན་རྩལ། བཟོ་ལས་སྐོར་ལའང་གྲོས་ཆོད་ཁག་ཅིག་བཞག་ཡོད་འདུག

རྒྱ་གར་དང་ཝེ་ཋི་ནམ་མཉམ་འབྲེལ་ཐོག་ལྷོ་རྒྱ་ནག་རྒྱ་མཚོའི་ནང་སོལ་རླངས་དང་རྡོ་སྣུམ་སྔོག་འདོན་བྱེད་འཆར་དེའི་ཐད། ཁ་སང་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཧོང་ལེ་ཡིས་གསར་འགོད་པར། རྒྱལ་ཁབ་གང་ཞིག་ཡིན་ཡང་ཁྲིམས་མཐུན་ཐོག་ནས་ལྷོ་རྒྱ་ནག་རྒྱ་མཚོའི་ཁུལ་དུ་སོལ་རླངས་དང་རྡོ་སྣུམ་སྔོག་འདོན་བྱེད་ཆོག གལ་སྲིད། རྒྱ་ནག་ལ་བདག་དབང་ཡོད་པའི་ལྷོ་རྒྱ་ནག་རྒྱ་མཚོའི་ནང་གི་མཚོ་གླིང་ཁག་ (Spratly Islands)དང་དེའི་ཉེ་འགྲམ་མཚོ་ཁུལ་གྱི་བདག་དབང་ལ་ཕོག་ཐུག་བཏང་ཚེ་དུས་ཐོག་རྒོལ་ལན་ལོག་ངེས་ཡིན་ཞེས་བརྗོད་ཡོད་འདུག