ཁ་སང་ཕྱི་དྲོར་ཨུ་རུ་སུ་དང་ཡུའུ་ཁུ་རེན་གློག་ཤུགས་བློན་ཆེན་གཉིས་ཡང་བསྐྱར་གྲོས་མོལ་བྱས་མཐར་ཨུ་རུ་སུས་ཡུའུ་ཁུ་རེན་ལ་སོལ་རླངས་བཙོང་རྒྱུར་གྲོས་མཐུན་བྱུང་ཡོད་འདུག
ཁ་སང་ཕྱི་ཚེས་ ༣༠ ཉིན་གྱི་ཕྱི་དྲོར་སྦེལ་ཇམ་རྒྱལ་སར་ཡུ་རོབ་མཐུན་ཚོགས་ཀྱི་གློག་ཤུགས་འགན་འཛིན་གྱི་བར་འདུམ་འོག ཨུ་རུ་སུ་དང་ཡུའུ་ཁུ་རེན་བར་བསྐྱར་དུ་གྲོས་མོལ་སྟེང་། ཡུ་རོབ་མཐུན་ཚོགས་ཀྱིས་ཡུའུ་ཁུ་རེན་ལ་དཔལ་འབྱོར་རོགས་རམ་བྱེད་པར་ཁག་ཐེག་བྱས་སྟབས། ཡུའུ་ཁུ་རེན་གྱིས་དེ་སྔོན་ཨུ་རུ་སུ་ལ་བུ་བོན་ཆད་ཡོད་པ་ལས་ཨ་སྒོར་ཐེར་འབུམ་ ༡།༤༥ ཙམ་གང་མགྱོགས་སྤྲོད་རྒྱུ་དང་། དེའི་འཕྲོས་ཀྱི་ཨ་སྒོར་ ༡།༦༥ དེ་ད་ལོའི་ལོ་མཇུག་བར་སྤྲོད་རྒྱུ་སོགས་ཁས་ལེན་བྱས་པར་བརྟེན། ཨུ་རུ་སུས་ཡུའུ་ཁུ་རེན་ལ་ ༢༠༡༥ ལོའི་ཟླ་ ༣ པ་བར་སོལ་རླངས་རྒྱ་དཔངས་གྲུ་བཞི་མ་ཐེར་འབུམ་ ༤ བཙོང་རྒྱུར་གྲོས་མཐུན་བྱུང་ཡོད་འདུག
ཐེངས་འདིར་ཨུ་རུ་སུ་དང་ཡུའུ་ཁུ་རེན་བར་གྲོས་མཐུན་བྱུང་བའི་ནང་། ད་ལོའི་ལོ་མཇུག་བར་ཡུའུ་ཁུ་རེན་གྱིས་ཨུ་རུ་སུའི་སོལ་རླངས་རྒྱ་དཔངས་གྲུ་བཞི་མ་ ༡༠༠༠ རེའི་གོང་ཚད་ལ་ཨ་སྒོར་ ༣༧༨ སྤྲོད་རྒྱུ་དང་། ༢༠༡༥ ལོའི་ཟླ་ ༡ ནས་ཟླ་ ༣ བར་སོལ་རླངས་རྒྱ་དཔངས་གྲུ་བཞི་མ་ ༡༠༠༠ རེ་ལ་ཨ་སྒོར་ ༣༦༥ སྤྲོད་རྒྱུ་བཅས་ཀྱི་ཐག་གཅོད་བྱས་ཡོད་འདུག
རྒྱལ་ཁབ་གཉིས་ཀྱིས་གྲོས་མཐུན་ལ་མིང་རྟགས་བཀོད་རྗེས་ཐུན་མོང་གི་གསར་འགོད་གསལ་བསྒྲགས་ཤིག་སྤེལ་བའི་ཐོག ཨུ་རུ་སུའི་གློག་ཤུགས་བློན་ཆེན་ནོབ་བཱ་ཁུ་ཡིས་བརྗོད་དོན། ཨུ་རུ་སུ་ནི་ཡུ་རོབ་མཐུན་ཚོགས་དང་ཁྱིམ་མཚེས་རྒྱལ་ཁབ་ཁག་ལ་ཡིད་ཆེས་བྱས་ཏེ་སོལ་རླངས་མཁོ་སྤྲོད་བྱེད་མཁན་ཞིག་ཡིན་སྟབས། ཐེངས་འདིའི་གྲོས་མཐུན་བརྒྱུད་ཨུ་རུ་སུ་དང་འབྲེལ་ཡོད་རྒྱལ་ཁབ་ཁག་གི་ཕྱི་སྲིད་འབྲེལ་ལམ་ཇེ་བཟང་དུ་འགྲོ་རྒྱུར་ནུས་པ་གལ་ཆེན་ཐོན་ཡོད་ཅེས་བརྗོད་ཡོད་པ་དང་། ཡུའུ་ཁུ་རེན་གྱི་གློག་ཤུགས་བློན་ཆེན་ཡོ་རེ་པུ་རོབ་ཌེན་གྱིས་ཀྱང་། ཐེངས་འདིའི་གྲོས་མཐུན་གྱིས་ཡུའུ་ཁུ་རེན་གྱི་མི་མང་ས་ཡ་ ༤༥ ཙམ་གྱི་སོལ་རླངས་དཀའ་ངལ་སེལ་ངེས་ཡིན་པ་མ་ཟད། ཡུའུ་ཁུ་རེན་བརྒྱུད་དེ་ཡུ་རོབ་མང་ཚོགས་ལའང་སོལ་རླངས་རག་རྒྱུར་ཕན་ཐོགས་ཆེན་པོ་འབྱུང་བའི་ཡིད་ཆེས་ཡོད། ཅེས་སོགས་བརྗོད་འདུག
ཡུ་རོབ་མཐུན་ཚོགས་ཀྱིས་ཐེངས་འདིའི་གྲོས་མོལ་ལམ་ལྷོང་བྱུང་བར་དགའ་བསུ་དང་བཅས་བརྗོད་དོན། ཡུ་རོབ་མཐུན་ཚོགས་ཀྱི་ངོས་ནས་ཡུའུ་ཁུ་རེན་ལ་གང་ཐུབ་ཀྱིས་རོགས་དངུལ་བགོ་འགེམས་བྱེད་བཞིན་ཡོད་ལ། རྒྱལ་སྤྱིའི་དངུལ་ཁང་དང་རྒྱལ་སྤྱིའི་ཚོང་ལས་དངུལ་ཁང་བཅས་ནས་ཀྱང་རོགས་རམ་བྱེད་འཆར་ཡོད་ཅེས་སོགས་བརྗོད་འདུག
གཞན། ཁ་སང་མཚན་མོར་འཇར་མན་གྱི་སྲིད་བློན་ལྕམ་ཨན་རྗི་ལཱ་ (Angela Merkel) དང་ཧྥ་རན་སིའི་སྲིད་འཛིན་ཧོད་ལན་ཌི་ (Francois Hollande)སོགས་ཀྱིས། ཨུ་རུ་སུའི་སྲིད་འཛིན་པུ་ཊིན་དང་ཡུའུ་ཁུ་རེན་གྱི་སྲིད་འཛིན་པོ་རོབ་ཤེན་ཀོ་ (Petro Poroshenko) གཉིས་ལ་ཁ་པར་བཏང་སྟེ། རྒྱལ་ཁབ་གཉིས་བར་གྱི་སོལ་རླངས་དཀའ་ངལ་ལ་གྲོས་མཐུན་བྱུང་བར་རྟེན་འབྲེལ་ཞུས་ཡོད་འདུག
གསར་འགོད་པ། ལྷ་སྐྱབས་རྒྱལ།
