ཤེས་རབ་དགའ་ཚལ་སློབ་གླིང་དུ་སློབ་སྦྱོང་གི་གོ་སྐབས་གཉིས་པ་ཡོད།

ཉེ་བའི་ལོ་འགའི་ནང་བོད་ནས་བཙན་བྱོལ་དུ་ཡོང་མཁན་ཇེ་ཉུང་དུ་ཕྱིན་པ་དང་། རྒྱ་བལ་འབྲུག་གསུམ་ཁུལ་གྱི་བོད་མི་མང་པོ་ཕྱི་རྒྱལ་ཁག་ཏུ་སྐྱོད་པ་དང་ཕྱིར་བོད་དུ་ལོག་པ་སོགས་ལ་བརྟེན་ཏེ། བཙན་བྱོལ་བོད་མིའི་སློབ་གྲྭ་དང་དགོན་སྡེ། དེ་བཞིན་གཞིས་ཆགས་ཁག་སོགས་སུ་མི་ཉུང་དུ་འགྲོ་བཞིན་པའི་དཀའ་ངལ་ཞིག་མེ་བཙའ་ཤ་ལ་ཟུག་པ་ལྟར་གཏིང་ཇེ་ཟབ་ཏུ་འགྲོ་བཞིན་ཡོད་པ་དང་། ལྷག་པར་དུ་དྷ་རམ་ས་ལའི་ཉེ་འཁྲིས་སུ་ཡོད་པའི་ཤེས་རབ་དགའ་ཚལ་སློབ་གླིང་ལྟ་བུར་མཚོན་ན། བོད་ནས་ཡོང་བའི་གསར་འབྱོར་བ་རྐྱང་བས་གྲུབ་པའི་སློབ་གྲྭ་ཞིག་ཡིན་སྟབས། སློབ་རྒྱུན་ཉུང་དུ་འགྲོ་བཞིན་པའི་དཀའ་ངལ་མངོན་གསོལ་དོད་ཤོས་དེ་ཆགས་འདུག

ཉེ་སྔོན་འདི་གའི་གསར་འགོད་པས་ཤེས་རབ་དགའ་ཚལ་སློབ་གླིང་གི་སློབ་སྤྱི་ཚེ་རིང་གཡུ་སྒྲོན་ལགས་སུ། སློབ་གྲྭའི་སྤྱིའི་གནས་སྟངས་དང་དཀའ་ངལ་སོགས་ཀྱི་ཐོག་བཅར་འདྲི་ཞུས་དོན་ལྟར་ན། ༢༠༡༡ ལོར་ཤེས་རབ་དགའ་ཚལ་སློབ་གླིང་སཾ་བྷོ་ཊའི་ཁོངས་སུ་རྩིས་ལེན་བྱས་རྗེས། སློབ་ཡུན་ལོ་ ༥ ནས་ ༨ ལ་སྤར་བ་དང་སློབ་གྲྭ་གཞན་དང་དགོན་སྡེ་སོགས་ནས་སློབ་མཐར་མ་འཁྱོལ་བ་ཚོར་བསྐྱར་དུ་སློབ་སྦྱོང་གི་གོ་སྐབས་གཉིས་པ་བསྐྲུན་པ། ལྷག་པར་དུ་ཤེས་ཡོན་ལ་དོ་སྣང་ཡོད་མཁན་ཚོར་རྒྱ་གར་རྒྱལ་ཡོངས་ནང་ངོས་ལེན་ཡོད་པའི་སློབ་ཐོན་ལག་འཁྱེར་ཐོབ་ཆེད་སྒྲོམ་གཞི་མེད་པའི་སློབ་སྦྱོང་(Open School)སྡེ་ཚན་ཆེད་འཛུགས་གནང་བ་སོགས་འགྱུར་བ་མང་པོ་བཏང་ཡོད་འདུག

ཤེས་རབ་དགའ་ཚལ་སློབ་གླིང་དེ་ཐོག་མ་ ༡༩༩༣ ལོར་གསར་འཛུགས་བྱས་ཡོད་པ་དང་། དང་ཐོག་དབུས་སྣེ་ལེན་ཁང་གི་འཛིན་སྐྱོང་འོག་སློབ་ཡུན་ལོ་གཅིག་དང་རིམ་གྱིས་ལོ་ ༣ ། དེ་ནས་ལོ་ ༥ བཅས་སུ་སྤར་ཡོད་པ་དང་། ༢༠༡༡ ལོར་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་སཾ་བྷོ་ཊའི་ཁྱབ་ཁོངས་འོག་རྩིས་ལེན་བྱས་པ་དང། ༢༠༡༣ ལོ་ནས་བཟུང་སློབ་ཡུན་རིང་ཤོས་ལོ་ ༨ ཡིན་ཡང་། ཚེམ་བཟོ་ལ་ལོ་ ༣། མ་བྱན་སྦྱོང་བརྡར་ལ་ལོ་ ༡།༦། ལྷ་བྲིས་ལ་ལོ་ ༥། གློག་ཀླད་ཆེད་སྦྱོང་ལ་ལོ་ ༣ སོགས་སྡེ་ཚན་མི་འདྲ་བར་སློབ་སྦྱོང་གི་དུས་ཡུན་ཡང་མ་འདྲ་བ་ཡོད་འདུག ད་ལྟའི་ཆར་སློབ་གྲྭའི་ནང་བུ་ ༡༡༥ དང་བུ་མོ་ ༧༥ བཅས་ཁྱོན་སློབ་མ་ ༡༩༠ དང་། དགེ་ལས་ ༤༢ བཅས་ཡོད་འདུག

སློབ་སྤྱི་ཚེ་རིང་གཡུ་སྒྲོན་ལགས་ཀྱིས་གསར་འགོད་པར་ངོ་སྤྲོད་གནང་བ་ལྟར་ན། ༢༠༡༣ ལོ་ནས་སློབ་གྲྭའི་ནང་གསར་དུ་སླེབ་པའི་ཐོག་མའི་ལོ་ ༣ ལ་སྐད་ཡིག་གི་རྨང་གཞི་རང་གི་ཐོག་ཤུགས་རྒྱག་གི་ཡོད་པ་དང་། དེའི་རྗེས་སོ་སོའི་འདོད་མོས་ལྟར་སྡེ་ཚན་ཁག་ ༦ ནང་འཛུལ་ཞུགས་བྱེད་ཆོག་ཀྱང་། དབྱིན་ཡིག་ལ་དོ་སྣང་ཡོད་མཁན་ཚོ་རང་བཞིན་གྱིས་སྒྲོམ་གཞི་མེད་པའི་སློབ་སྦྱོང་ནང་འཛུལ་གྱི་ཡོད་པ་དང་། བོད་ཡིག་ལ་དོ་སྣང་ཡོད་མཁན་ཚོ་མཚམས་སྦྱོར་འཛིན་གྲྭའི་ནང་འཛུལ་གྱིན་ཡོད་འདུག ཁོང་མོས་བརྗོད་དོན། “སྤྱིར་བཏང་རྒྱ་གར་རྒྱལ་ཡོངས་འཛིན་གྲྭ་བཅུ་པ་ཐོན་རྗེས་སྡེ་ཚན་མང་པོ་ཡོད་ཀྱང་། འདིར་འབྱུང་རིགས་སྡེ་ཚན་མ་གཏོགས་ཡོད་པ་མ་རེད། ཡིན་ནའང་། སློབ་ཚན་དེ་ཚོ་རྒྱ་གར་རང་གི་ཡིན་སྟབས་བོད་ནས་གསར་དུ་འབྱོར་བ་ཚོ་ས་ཆའི་མིང་སོགས་ལ་ཆ་རྒྱུས་མེད་པའི་དཀའ་ངལ་ཏོག་ཙམ་འཕྲད་ཀྱིན་འདུག ལོ་རེ་བཞིན་སློབ་མ་ཉུང་དུ་འགྲོ་བཞིན་ཡོད་པ་དེ་དཀའ་ངལ་ཆེན་ཤོས་རེད” ཅེས་བརྗོད་སོང་།

འཛིན་རིམ་བཅུ་པའི་སློབ་མ་བདེ་སྟོང་ལགས་སུ་བཅར་འདྲི་ཞུས་པར། ང་ཚོས་དཀའ་ལས་མང་པོ་ཞིག་བརྒྱབ་སྟེ་བོད་ནས་རྒྱ་གར་དུ་ཡོང་བ་དང་། ལྷག་པར་དུ་ཕ་ཡུལ་ནས་དབྱིན་ཡིག་སྦྱོང་བའི་གོ་སྐབས་མེད་སྟབས། ད་ཆར་དབྱིན་ཡིག་ཐོག་ཤུགས་རྒྱག་དགོས་བསམ་པའི་སེམས་ཤུགས་ཆེན་པོ་འདུག རྒྱ་གར་གྱི་ས་ཆ་དང་མིའི་མིང་སོགས་མ་ཤེས་པའི་དཀའ་ངལ་ཅུང་ཙམ་འདུག་མ་གཏོགས་སོ་སོས་དཀའ་ལས་རྒྱག་ཐུབ་ན་དབྱིན་ཡིག་རང་གི་ཐོག་དཀའ་ངལ་ཞེ་དྲག་མི་འདུག མ་འོངས་པར་འཛིན་གྲྭ་བཅུ་པ་མཐར་ཕྱིན་རྗེས། མུ་མཐུད་འཛིན་གྲྭ་བཅུ་གཉིས་འདོན་དགོས་བསམ་ཡོད། ཅེས་བརྗོད་སོང་།

འཛིན་རིམ་བཅུ་གཉིས་ཡིན་པའི་བུ་མོ་བཀྲ་ཤིས་ཆོས་མཚོ་ལགས་ཀྱིས། ང་རང་སྐྱེས་ས་གྲོང་གསེབ་ཡིན་སྟབས། བོད་དུ་སློབ་སྦྱོང་གི་གོ་སྐབས་རག་མྱོང་མེད། ཅུང་ཙམ་ཆེན་པོ་ཆགས་དུས་འགྲོ་འདོད་ཞེ་དྲག་ཡོད་ཀྱང་ལོ་ཆེན་པོ་ཆགས་ཚར་བ་རེད། འདིར་སློབ་སྦྱོང་བྱེད་པའི་གོ་སྐབས་ཡག་པོ་འདི་འདྲ་རག་དུས་ང་རང་སྒྲོམ་གཞི་མེད་པའི་སློབ་སྦྱོང་གི་ཁོངས་སུ་འཛུལ་ཞུགས་བྱས་པ་ཡིན། སྤྱིར་བཏང་དབྱིན་ཇིའི་སྐད་དེ་སྐད་གསར་པ་ཞིག་ཡིན་སྟབས། ཐོག་མ་ཏོག་ཙམ་དཀའ་ངལ་འཕྲད་སོང་། ཡིན་ནའང་ད་ལྟ་དཀའ་ངལ་དེ་ཙམ་མི་འདུག ཅེས་བརྗོད་སོང་།

སཾ་བྷོ་ཊ་སྤྱི་ཁྱབ་འགན་འཛིན་ཀརྨ་ཆུང་བདག་ལགས་སུ་སྒྲོམ་གཞི་མེད་པའི་སློབ་སྦྱོང་གི་གནས་སྟངས་དང་། མ་འོངས་པར་མཐོ་སློབ་ཏུ་འགྲོ་བར་སློབ་ཡོན་གྱི་རོགས་རམ་ཡོད་མེད་བཅར་འདྲི་ཞུས་པར་ཁོང་གིས། སྒྲོམ་གཞི་མེད་པའི་སློབ་སྦྱོང་དེ་ཕྱི་ལོ་ ༢༠༡༡ ལོར་སློབ་གྲྭ་རྩིས་ལེན་གནང་རྗེས་སློབ་ཕྲུག་ལ་འདོད་པ་ཡོད་པ་ལྟར་བཙུགས་པ་རེད། ད་ལྟའི་ཆར་འཛིན་གྲྭ་བཅུ་པར་སློབ་ཕྲུག་ ༢༣ དང་། འཛིན་གྲྭ་བཅུ་གཉིས་ནང་སློབ་མ་ ༨ ཡོད། ཁོང་ཚོའི་བསླབ་གཞི་རྒྱ་གར་རྒྱལ་ཡོངས་ཀྱི་འཛིན་རིམ་བཅུ་པ་དང་བཅུ་གཉིས་ཀྱི་བསླབ་གཞི་རེད། ཡིན་ནའང་སྒྲོམ་གཞི་མེད་པའི་སློབ་སྦྱོང་ལ་སློབ་ཚན་གྱི་གདམ་ག་ཏོག་ཙམ་མང་བ་ཡོད་པ་རེད། ལོ་རྗེས་མའི་ཕྱི་ཟླ་ ༤ པར་རྒྱལ་ཡོངས་འཛིན་རིམ་བཅུ་གཉིས་ཀྱི་ཡིག་རྩལ་གཏོང་དགོས་པ་དང། ཡིག་རྩལ་བཏང་ནས་ཟླ་ ༣ ཙམ་གྱི་རྗེས་ལ་གྲུབ་འབྲས་འཐོན་ཡོང་གི་རེད། བོད་མིའི་སྒྲིག་འཛུགས་ཀྱི་ངོས་ནས་ཤེས་རབ་དགའ་ཚལ་སློབ་གླིང་གི་སློབ་མ་ ༡༠ ལ་སློབ་ཡོན་གནང་གཏན་འཁེལ་ཡོད་པ་མ་ཟད། སློབ་ཡོན་གྱི་བརྒྱ་ཆའི་ཚད་གཞི་ལའང་དམིགས་བསལ་ཡོད་པ་རེད། ཡིན་ནའང་། རྒྱ་གར་གྱི་མཐོ་སློབ་ཁ་ཤས་ལ་སློབ་མའི་ལོ་དང་བརྒྱ་ཆ་ལ་ཚད་གཞི་ཡོད་སྟབས། གནས་སྟངས་དེ་དག་ལ་བལྟ་དགོས་ཆགས་ཀྱི་ཡོད་པ་རེད། གལ་སྲིད་ཁོང་ཚོ་ཐད་ཀར་མཐོ་སློབ་ལ་འགྲོ་མ་ཐུབ་ཀྱང་། ཡིག་འབྲེལ་གྱི་ལམ་ནས་མཐོ་སློབ་ཀྱི་སློབ་སྦྱོང་རག་པའི་ལམ་ཁ་ཡོད་པ་རེད་བསམ་གྱི་འདུག ཅེས་བརྗོད་སོང་།

ད་ལྟའི་ཆར་ཤེས་རབ་དགའ་ཚལ་སློབ་གླིང་དུ་སློབ་སྦྱོང་གི་གོ་སྐབས་གཉིས་པ་ལེན་མཁན་ག་ཚོད་ཡོད་པ་དང་སློབ་འཇུག་བྱེད་པར་ཆ་རྐྱེན་ག་རེ་ཚང་དགོས་དྲིས་པར། ད་ལྟའི་བར་གོ་སྐབས་གཉིས་པ་ལེན་མཁན་སེར་སྐྱ་ ༣༡ བྱུང་འདུག སློབ་འཇུག་བྱེད་པར་ཐོན་ཁུངས་ཆོས་སྡེ་དང་སློབ་གྲྭ་ཁག་གི་ཆ་རྐྱེན་མི་འདྲ་བ་རེད། དཔེར་ན། ཆོས་སྡེ་ཁག་ནས་ཡིན་ན། ༡། ཐོན་ཁུངས་ཆོས་སྡེ་ནས་དགག་བྱ་མེད་པའི་ངོས་སྦྱོར་ཡི་གེ་ཡོད་པ། ༢། ཐོན་ཁུངས་ཆོས་སྡེར་ཞུགས་ནས་ལོ་གསུམ་ལྷག་ལས་ཕྱིན་མེད་པ། ༣། ཐོན་ཁུངས་ཆོས་སྡེ་ནས་གནས་དབྱུང་ཕྱིར་འཕུད་བཏང་རིགས་མ་ཡིན་པ། ༤། ཞུགས་ཡུལ་སློབ་ཁང་གི་སྒྲིག་གསལ་ལོ་ཚད་ལས་མ་བརྒལ་བ། ༥། གསར་འབྱོར་གྲྭ་བཙུན་གྱི་འཚོ་དོད་དང་སློབ་དོད་ཐོབ་མཁན་ཡིན་ན། ཆོས་སྡེ་ནས་ཆོས་རིག་ལས་ཁུངས་ལ་དེ་དག་མཚམས་འཇོག་ཡོང་བར་ཞུས་པའི་ཡི་གེའི་ངོ་བཤུས་ཡོད་དགོས་པ་བཅས་རེད། སློབ་གྲྭ་གཞན་ནས་ཡིན་ན། ༡།ཐོན་ཁུངས་སློབ་གྲྭ་སོ་སོ་ནས་དགག་བྱ་མེད་པའི་ཡི་གེ་ཡོད་པ། ༢། བོད་ཁྱིམ་གཉིས་གང་རུང་གི་སློབ་ཁོངས་སུ་ཞུགས་ནས་ལོ་གཉིས་ལྷག་ཕྱིན་མེད་པ། ༣། ཐོན་ཁུངས་སློབ་གྲྭ་ནས་གནས་དབྱུང་ཕྱིར་འཕུད་བཏང་རིགས་མ་ཡིན་པ། ༤། ཤེས་རབ་དགའ་ཚལ་སློབ་གླིང་གི་སྒྲིག་གསལ་ལོ་ཚད་ལས་མ་བརྒལ་བ་བཅས་རེད། སློབ་ཞུགས་འདི་རིཊ་ལ་རང་ལོ་ ༡༨ སོན་མེད་ཀྱང་ཆོག་པ་རེད།

ཤེས་རབ་དགའ་ཚལ་སློབ་གླིང་རང་ནས་ཐོན་པ་དང་སློབ་གྲྭ་གཞན་གང་ནས་ཡིན་ཡང་། ཤེས་རབ་དགའ་ཚལ་སློབ་གླིང་གི་ལས་རིགས་སྦྱོང་བརྡར་ནང་ཞུགས་འདོད་ཡོད་ན། ༡། ༢༠༡༢ ལོའི་གོང་དུ་ཕྱིར་ཐོན་པ་ཞིག་ཡིན་དགོས། ༢། ཐོན་ཁུངས་སློབ་གྲྭ་གཞན་ནམ་ཆོས་སྡེ་གང་ཡིན་ཡང་དེ་ནས་སློབ་མཐར་མ་སོན་པའི་ངོས་སྦྱོར་ཡི་གེ་དགོས། ༣། ཐོན་ཁུངས་ནས་གནས་དབྱུང་ཕྱིར་འཕུད་བཏང་རིགས་མ་ཡིན་པ། ༤། ཞུཊ་ཡུལ་གཞུང་འབྲེལ་ལས་རིགས་སློབ་ཁང་སོ་སོའི་དགོས་ངེས་ཆ་རྐྱེན་ཁག་ཚང་བ་བཅས་ཡིན་དགོས་པ་རེད། སློབ་སྦྱོང་དང་ལས་རིཊ་སྦྱོང་བརྡར་གང་ཡིན་ཡང་ཐོག་མའི་ཆ་རྐྱེན་དེ་བོད་ནས་འབྱོར་བ་ཞིག་ངེས་པར་དུ་ཡིན་དགོས་པ་རེད། ཅེས་བརྗོད་སོང་།

ཤེས་རབ་དགའ་ཚལ་སློབ་གླིང་སློབ་ཕྲུག་ཉུང་དུ་ཕྱིན་པ་དང་མཉམ་དུ་སློབ་གྲྭར་རང་བཞིན་གྱིས་ཉམས་རྒུད་ཀྱི་རྣམ་པ་ཞིག་འཐོན་བཞིན་ཡོད་སྟབས། མ་འོངས་པར་ཡར་རྒྱས་གཏོང་ཐབས་ཀྱི་འཆར་གཞི་གསར་པ་དེ་འདྲ་ཡོད་མེད་དྲིས་པར་ཁོང་གིས། ད་ལྟའི་ཆར་དམིགས་བསལ་འཆར་གཞི་གསར་པ་དེ་འདྲ་མེད། སྤྱིར་བཏང་མི་ཉུང་དུ་འགྲོ་བཞིན་ཡོད་པ་དེ་ང་ཚོ་ཤེས་རབ་དགའ་ཚལ་སློབ་གླིང་གཅིག་པུ་མ་རེད། བཙན་བྱོལ་བོད་མིའི་སློབ་གྲྭ་གཞན་དང་དགོན་སྡེ་ཁག དེ་བཞིན་གཞིས་ཆགས་ཁག་སོགས་ཀྱི་ནང་མི་ཉུང་དུ་ཕྱིན་པའི་དཀའ་ངལ་འཕྲད་ཀྱི་ཡོད་པ་རེད། ཡིན་ནའང་། ང་ཚོའི་སྤྱི་ཚོགས་ནང་གི་མི་ཁ་ཤས་ཀྱིས་དེ་ལ་འཁྱོག་བཤད་བྱེད་ཀྱི་འདུག་སྟབས། དེ་རིང་ངས་འཁྱོག་བཤད་དེ་གསལ་བོ་བཟོས་ན་བསམ་སོང་། མི་ཁ་ཤས་ཀྱིས་ང་ཚོ་འཛིན་སྐྱོང་གི་ངོས་ནས་མཐུན་རྐྱེན་བསྐྲུན་མ་ཐུབ་པ་དང་། ཡག་པོ་མ་བྱས་པའི་རྐྱེན་གྱིས་བོད་ནས་ཡོང་མཁན་ཉུང་དུ་ཕྱིན་སྐོར་རྗོད་ཀྱི་ཡོད་ཀྱང་དེ་རྩ་བ་ཉིད་ནས་མ་རེད། དཔེར་ན། ཤེས་རབ་དགའ་ཚལ་སློབ་གླིང་ལྟ་བུ་ཡིན་ན་སློབ་སྦྱོང་གི་མཐུན་རྐྱེན་སྔར་ལས་ཡག་ཏུ་ཕྱིན་ཡོད་པ་རེད། ཡིན་ནའང་། ཆབ་སྲིད་ཀྱི་འཕོ་འགྱུར་ཞིག་གི་དབང་གིས་བོད་ནས་ཡོང་མཁན་ཉུང་དུ་ཕྱིན་ཡོད་པ་ལས། འཛིན་སྐྱོང་གི་ངོས་ནས་ལྟ་སྐྱོང་མ་ཐུབ་པ་མ་རེད། ད་ལྟའི་ཆར་ཤེས་རབ་དགའ་ཚལ་སློབ་གླིང་དུ་སློབ་མ་ ༡༨༠ ལྷག་ཡོད་ལ། མ་འོངས་པར་བོད་ནས་མི་མང་ཙམ་ཡོང་ཐུབ་པར་ང་ཚོས་མུ་མཐུད་རེ་བ་རྒྱག་གི་ཡོད། གང་ཡིན་ཟེར་ན། ཆབ་སྲིད་ཀྱི་འཕོ་འགྱུར་ཟེར་བ་དེ་ལམ་སང་འགྱུར་བ་འགྲོ་ཆོག་ཆོག་ཅིག་ཡོད་པ་རེད། ཅེས་བརྗོད་སོང་།

གསར་འགོད་པ། པདྨ་མཚོ།