དེ་རིང་སྤྱི་འཐུས་གྲོས་ཚོགས་ནང་སྦེལ་ཀོབ་འཕྲོད་བསྟེན་སྨན་ཁང་གི་འགན་འཛིན་གྱིས་ལྐོག་ཟ་རུལ་སུངས་བྱས་ཡོད་པའི་གནས་ཚུལ་ཞིག་དང་འབྲེལ་ཏེ། འཕྲོད་བསྟེན་བཀའ་བློན་ཡང་རྙོག་གྲ་དེ་དང་འབྲེལ་བ་ཡོད་མེད་ཀྱི་རྙོག་གླེང་ཞིག་བྱུང་བར་བཀའ་ཤག་གིས་ཞིབ་འཇུག་གནང་སྟེ་སྙན་ཐོ་སྤྱི་འཐུས་ལ་སྤྲོད་དགོས་པའི་ཐག་གཅོད་གནང་སོང་།
དེ་རིང་ཉིན་རྒྱབ་བོད་མི་མང་སྤྱི་འཐུས་ལྷན་ཚོགས་སྟེང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ལས་བསྡོམས་སྙན་སྒྲོན་ཞུས་པ་དང་འབྲེལ་ཏེ། སྤྱི་འཐུས་ཤིག་གིས་རྒྱ་གར་ལྷོ་ཕྱོགས་སྦེལ་ཀོབ་འཕྲོད་བསྟེན་སྨན་ཁང་དུ་ལྐོག་ཟ་རུལ་སུངས་ཀྱི་གནས་ཚུལ་ཞིག་བྱུང་ཡོད་པའི་ཐོག་འཕྲོད་བསྟེན་བཀའ་བློན་མཆོག་ལ་དོགས་འདྲི་ཞུས་ཡོད་པ་དང་། གནས་ཚུལ་དེ་དང་འབྲེལ་ནས་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས་ཀྱང་ཡིག་ཆ་རྫུན་མ་བཟོས་ཡོད་མེད་ཀྱི་གནད་དོན་ཞིག་གི་ཐོག་སྤྱི་འཐུས་མང་པོ་ཞིག་གིས་དོགས་འདྲི་དང་དགོངས་ཚུལ་གསུངས་སོང་།
གནད་དོན་དེར་འཕྲོད་བསྟེན་བཀའ་བློན་དང་སྲིད་སྐྱོང་མཆོག་བཅས་ནས་གསལ་བཤད་གནང་བར། ད་ལོའི་ཕྱི་ཟླ་ ༢ ཚེས་ ༢༦ ཉིན་སྦེལ་ཀོབ་འཕྲོད་བསྟེན་སྨན་ཁང་གི་ལས་བྱེད་གཉིས་ཀྱིས་ཁོང་ཚོའི་སྨན་ཁང་གི་འགན་འཛིན་ལ་སྐྱོན་འཛུགས་ཡི་གེ་ཞིག་ས་གནས་མགོ་འཛིན་ལ་བཏང་ཡོད་པ་དང་། དེའི་ངོ་བཤུས་དབུས་འཕྲོད་བསྟེན་བཀའ་བློན་དང་དྲུང་ཆེར་ཡང་ཕུལ་ཡོད་འདུག དེ་ལ་འཕྲོད་བསྟེན་བཀའ་བློན་གྱི་ངོས་ནས་འཕྲོད་བསྟེན་དྲུང་ཆེ་དང་དྲུང་ཕར། ཟུང་དྲུང་། ས་གནས་ལུགས་ཟུང་དང་བདེ་སྐྱིད་སླར་གསོའི་གཞིས་མགོ་གཉིས་བཅས་ལས་གྲུབ་པའི་ཞིབ་འཇུག་ཚོགས་ཆུང་ཞིག་བཙུགས་ཡོད་འདུག
ཞིབ་འཇུག་ཚོགས་ཆུང་དེས་ཕྱི་ཟླ་ ༤ པའི་ཚེས་ཉི་ཤུ་རྩ་གྲངས་ནས་ཞིབ་འཇུག་དངོས་སུ་མགོ་འཛུགས་གནང་སྟེ། ཕྱི་ཟླ་ ༥ ཚེས་ ༣༠ ཉིན་ཞིབ་འཇུག་སྙན་ཐོ་དེ་དབུས་འཕྲོད་བསྟེན་ལས་ཁུངས་ལ་ཕུལ་ཡོད་ཀྱང་། འཕྲོད་བསྟེན་བཀའ་བློན་མཆོག་གིས་ཞིབ་འཇུག་སྙན་ཐོར་གཟིགས་ཞིབ་བརྒྱུད། སྙན་ཐོ་དེར་ངོས་ལེན་བྱེད་ཐུབ་མེད་སྐོར་གསུངས་ཏེ་བཀའ་ཤག་ལ་ཞུས་དོན་ལྟར། སླར་ཡང་བཀའ་ཤག་གིས་ནང་སྲིད་བཀའ་བློན་དང་ནང་སྲིད་དྲུང་ཆེ། དཔལ་འབྱོར་དྲུང་འཕར། ལྷོ་སྤྱི་བཅས་ལས་གྲུབ་པའི་ཞིབ་འཇུག་ཚོགས་ཆུང་ཞིག་བཙུགས་ཏེ་བསྐྱར་དུ་རྟོག་ཞིབ་མགོ་འཛུགས་གནང་ཡོད་འདུག
གནས་ཚུལ་དེའི་ཐད་གྲོས་ཚོགས་ནང་སྤྱི་འཐུས་ཁག་ཅིག་གིས་བཀའ་ཤག་གི་ཞིབ་འཇུག་ཚོགས་ཆུང་དེ་གང་འདྲ་ཡོད་མེད་དང་། ཞིབ་འཇུག་ཚོགས་ཆུང་དེ་སྤྱི་འཐུས་རྒྱུན་ལས་ནས་འཛུགས་གལ་ཆེ་པ། རྙོག་དྲ་དེའི་ནང་འཕྲོད་བསྟེན་བཀའ་བློན་ཡང་ཚུད་ཀྱི་ཡོད་སྟབས། དྲུང་ཆེའི་གནས་རིམ་ལས་གྲུབ་པའི་ཚོགས་ཆུང་ཞིག་གིས་བཀའ་བློན་རིམ་པར་འདྲི་ཞིབ་ཚད་ལྡན་གཏོང་ཐུབ་མིན་དང་། དེ་ལ་གྲུབ་འབྲས་གསལ་ཁ་ཆོད་པ་ཞིག་འབྱུང་ཐུབ་མིན་བཅས་ཀྱི་ཐད་བགྲོ་གླེང་མང་པོ་གནང་སོང་།
སྐབས་དེར་སྲིད་སྐྱོང་མཆོག་གིས་གསལ་བཤད་གནང་དོན། “ང་ཚོས་གོ་ཐོས་ལ་ཀོ་ལེ་གལ་གཞིས་ཆགས་ནས་ཡིག་ཆ་དང་སྒྲ་འཇུག་ཡོད་པ་དང་། སྦེལ་ཀོབ་ཀྱི་གནས་ཚུལ་དེ་དང་འབྲེལ་བའི་ཐོག་ནས་ཚོང་ཁང་དེ་ནས་ཡིག་ཆ་ཁག་གཉིས་དང་སྒྲ་ཐག་ཁག་གཉིས་ཡོད་པ་དེར། ང་ཚོ་བཀའ་ཤག་གིས་ཞིབ་འཇུག་ཚོགས་ཆུང་བཙུགས་བཞག་པ་དེས་ཡིག་ཆ་དང་སྒྲ་ཐག་དེ་དག་ཚང་མ་ལ་ཞིབ་འཇུག་ཡག་པོ་ཞིག་བྱས་ཏེ། སྤྱི་འཐུས་ལ་ཕུལ་བ་ཡིན་ན་སྤྱི་འཐུས་ཀྱིས་ཞིབ་འཇུག་ཚོགས་ཆུང་འཛུགས་དགོས་མིན་གསལ་བོ་ཆགས་ཡོང་གི་རེད”ཅེས་གསུངས་སོང་ལ། དེའི་རྗེས་སུ་སྤྱི་འཐུས་ཤིག་གི་དོགས་འདྲི་དང་འབྲེལ་ནས་སྲིད་སྐྱོང་མཆོག་གིས་སླར་ཡང་ཁ་ཇེ་གསལ་དུ་བཏང་སྟེ། “འགན་འཛིན་ཁོང་སྔོན་མ་ཀོ་ལེ་གལ་འཕྲོད་བསྟེན་སྨན་ཁང་གི་འགན་འཛིན་གནང་སྐབས། ས་གནས་མི་མང་ཚོས་སྐྱོན་འཛུགས་ཀྱི་ཡི་གེ་ཞིག་འབྱོར་ཡོད་པ་དེ་དང་མཉམ་དུ་ཞིབ་འཇུག་བྱས་བཞག་ན་ཡག་གི་རེད་ལབ་པ་ཡིན” ཞེས་གསུངས་སོང་།
འཕྲོད་བསྟན་བཀའ་བློན་མཆོག་གིས་གསལ་བཤད་གནང་དོན། འཕྲོད་བསྟེན་བཀའ་བློན་གྱིས་ཡིག་ཆ་རྫུན་མ་བཟོས་དང་མ་བཟོས་ཐོག་སྤྱི་འཐུས་མང་པོ་ཞིག་གིས་དོགས་འདྲི་བསླེབས་སོང་། དེ་ལ་གསལ་བཤད་ཅིག་ཞུས་པ་ཡིན་ན། ཕྱི་ཟླ་ ༧ ཚེས་ ༣༡ ཉིན་ང་གཞུང་འབྲེལ་ཕྱོགས་སྐྱོད་ཅིག་དང་མཉམ་དུ་མེལ་སོར་ན་ཡོད། དེའི་སྔོན་ལ་ཞིབ་འཇུག་སྙན་ཐོ་ཡར་འབྱོར་ཡོད་པ་རེད། སྙན་ཐོའི་ནང་གི་གནས་ཚུལ་མང་པོ་ཞིག་གི་ཐོག་སོ་སོར་དོགས་པ་བསླེབས་སོང་། སོ་སོའི་ནང་མིའི་ཐོག་ནས་གནས་ཚུལ་གང་འཚམ་ཞིག་བསྡུ་རུབ་བྱས་པ་ཡིན། སྔོན་མ་ཞིབ་འཇུག་བྱེད་སྐབས་དོན་ཚན་ ༩ ཡོད་པ་ལས། དང་པོ་ནས་ལྔ་པའི་བར་གློག་གསོག་སྣོད་(UPS)དང་འབྲེལ་བ་ཆགས་ཡོད། དེ་ལ་ཧིན་སྒོར་འབུམ་ ༡ དང་ཕྱེད་མན་ཙམ་གྱི་བར་ཁྱད་ཕྱིན་ཡོད་པ་རེད། གློག་གསོག་སྣོད་ཚོང་ཁང་གིས་བར་བརྒལ་དངུལ་དེ་གློག་ཆས་དེ་དག་གི་བཟོ་བཅོས་ MC དངུལ་ཡིན་ཟེར་ནས་ཡིག་ཆ་ཞིག་སྨན་ཁང་འགན་འཛིན་ལ་སྤྲད་འདུག ང་རང་གིས་ཞིབ་འཇུག་བྱས་བར་གློག་གསོག་སྣོད་རིགས་ལ་བཟོ་བཅོས་ཀྱི་དངུལ་སྤྲོད་པའི་ལམ་སྲོལ་ཧ་ཅང་ཉུང་ཉུང་རེད། གློག་གསོག་སྣོད་དེ་དག་ལ་འགན་ལེན་ལོ་གཉིས་འདུག ཅེས་གསུངས་སོང་།
བཀའ་བློན་མཆོག་གིས་མུ་མཐུད་དུ་གསུངས་དོན། ང་མགྲོན་ཁང་ནས་ཕར་འགྲོ་རྒྱུའི་འཆར་གཞི་མེད་པར་ཚོང་ཁང་བདག་པོར་ཁ་པར་བཏང་སྟེ་ཚུར་ཕེབས་རོགས་ལབ་ཡིན། འོན་ཀྱང་ཁོ་ནང་དུ་བསྡད་མེད་སྐོར་སོགས་བཤད་དེ་གཡོལ་གྱིན་འདུག དེ་ནས་རྒྱ་གར་ངོ་ཤེས་ཤིག་ཡོད་པ་ཁོ་འཁྲིད་ནས་ཕར་སོང་བ་ཡིན། གང་ཡིན་ཟེར་ན། ཡིག་ཆ་མང་པོ་ཞིག་གི་ནང་དུ་སྨན་ཁང་འགན་འཛིན་གྱིས་ལྐོག་ཟ་རུལ་སུངས་བྱས་སོང་ཟེར་ནས་སྐྱོན་འཛུགས་ཤིག་བྱེད་ཀྱི་ཡོད་པ་རེད། ཞིབ་འཇུག་སྙན་ཐོའི་ནང་དེ་དང་འགལ་ཟླ་ཞིག་ཆགས་ཡོང་གི་འདུག དེ་ནས་ང་ཚོང་ཁང་ལ་སོང་ནས་སྤྱིར་བཏང་གི་མི་ཞིག་ཡིན་ལབ་ན་ཁོས་དེ་སྔོན་སྡིགས་ར་སྐུལ་གྱི་ཡོད་པ་ཞིག་གོ་སོང་བས། འཕྲོད་བསྟེན་བཀའ་བློན་ཡིན་ལབ་ན་ཏོག་ཙམ་མཉམ་རུབ་ཡོང་རྒྱུར་ཕན་ཐོགས་མེད་འགྲོ་བསམ་སྟེ། ང་འཕྲོད་བསྟེན་བཀའ་བློན་ཡིན་ཞེས་ཞུས་པ་ཡིན། ཁྱོད་རང་གིས་གནས་ཚུལ་གང་ཡིན་པ་དེ་དྲང་མོར་བཤད་རོགས། ང་ཚོའི་གྲོས་ཚོགས་ནང་དུའང་གནས་ཚུལ་འདི་བསླེབས་ཚར་བ་རེད་ཅེས་ཞུས་སྐབས། ཁོས་གནས་ཚུལ་དྲང་མོར་བཤད་སོང་། ཁོས་གང་བཤད་པ་ཚང་མ་ངས་སྒྲ་འཇུག་བྱས་ཡོད། ཁོ་རང་གིས་གང་ལབ་སོང་ཟེར་ན། སྤྱིར་བཏང་གློག་གསོག་སྣོད་ལ་གོང་ཚད་འདི་རེད། ཡིན་ནའང་ཉོ་མཁན་ཁོ་རང་གིས་གོང་ཚད་ཆེན་པོ་རྒྱོབས་ལབ་སོང་། ཞེས་ཆ་ཚང་ལབ་སོང་བས། ངས་ཁྱོད་ཀྱིས་གང་བཤད་པ་དེ་ཡིག་ཐོག་ལ་འགོད་རོགས་ལབ་སྐབས་ཁོས་འགྲིག་གི་རེད་ཟེར་ནས་ཡིག་ཆ་སྤྲད་སོང་།
ངས་ཁོ་ལ་སྡིགས་ར་སྐུལ་བ་སོགས་རྩ་བ་ནས་བྱུང་མེད། དེར་མ་ཟད་ངེད་གཉིས་སྐད་ཆ་ཤོད་བཞིན་པའི་སྐབས་ལ་སྨན་ཁང་འགན་འཛིན་གྱིས་ཚོང་ཁང་བདག་པོར་ཁ་པར་འབྱོར་སོང་། ཁོ་རང་གཉིས་ཀྱིས་ཁ་པར་ནང་སྐད་ཆ་བཤད་པའང་སྒྲ་འཇུག་བྱས་ཡོད། དེ་དུས་ག་རེ་ལབ་སོང་ཟེར་ན། འཕྲོད་བསྟེན་བཀའ་བློན་དེར་བསླེབས་སོང་ངམ། སྐད་ཆ་དྲིས་སོང་ངམ་སོགས་ལབ་སོང་། དེས་མ་ཚད་འཕྲོད་བསྟེན་བཀའ་སློན་དེ་རིང་དགོང་མོ་ཧཱོབ་ལེ་ལ་འགྲོ་རྒྱུ་རེད། དེའི་བར་སྐད་ཆ་ག་རེ་བྱུང་ན་ང་ལ་ལབ་རོགས། ཅེས་སོགས་ལབ་སོང་། གནས་ཚུལ་དེ་དག་ཕྱི་ཟླ་ ༧ ཚེས་ ༣༡ ཉིན་བྱུང་བ་རེད། དེ་ནས་ང་མོན་གྷོ་ཊིར་ཕྱིན་ཏེ་ཕྱིར་བྷིང་ལོར་ལ་ལོག་ཡོང་བ་ཡིན། ཕལ་ཆེར་ཕྱི་ཟླ་ ༨ ཚེས་ ༢ ཡིན་ས་ཡོད། ངས་རྒྱ་གར་ཚོང་ཁང་དེ་ལ་ཁ་པར་ཞིག་བཏང་བ་ཡིན། གང་ཡིན་ཟེར་ན། སྐབས་དེར་སྨན་ཁང་འགན་འཛིན་གྱིས་ལས་ཀ་བར་མཚམས་བཞག་ཡོད་པ་རེད་དེ་སྨན་ཁང་བསྡད་མི་འདུག་ཟེར་ནས་གོ་སོང་། དེ་ནས་ངས་ཁ་པར་བཏང་དུས་སྐད་ཆ་མང་པོ་བཤད་ཡོང་གི་འདུག དེའི་སྐོར་སྒྲ་འཇུག་ལས་རྣམ་པ་ཚོས་མཁྱེན་གསལ་རེད། དེའི་རྗེས་ལ་རྒྱ་གར་དེས་ཚུར་ཁ་པར་བསླེབས་ཏེ། ཁ་སང་ཡི་གེ་སྤྲད་པ་དེ་རྫུན་མ་ཡིན། དེ་འདྲ་ཞིག་ལབ་རྗེས་མཚམས་བཞག་པ་རེད། དེར་བརྟེན། འཕྲོད་བསྟེན་བཀའ་བློན་གྱི་ངོས་ནས་ཡིག་ཆ་རྫུན་མ་བཟོས་ཡོད་མེད་ཡིག་ཆ་དེ་དག་དང་སྒྲ་འཇུག་སོགས་ལ་ཡག་པོ་ཞིབ་འཇུག་གནང་ན་གསལ་བོ་ཆགས་ཡོང་གི་རེད། ཅེས་གསུངས་སོང་།
མཇུག་ཏུ་གྲོས་ཚོགས་ནང་མང་མོས་འོས་བསྡུ་བྱས་སྐབས། བཀའ་ཤག་གི་ཞིབ་འཇུག་ཚོགས་ཆུང་དེས་མུ་མཐུད་ཞིབ་འཇུག་གནང་རྒྱུར་འོས་ ༢༡ དང་། སྤྱི་འཐུས་རྒྱུན་ལས་ནས་ཞིབ་འཇུག་ཚོགས་ཆུང་གསར་དུ་འཛུགས་རྒྱུར་འོས་ ༡༡ བཅས་ཐོབ་པ་ལྟར། སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས། བཀའ་ཤག་གི་ཞིབ་འཇུག་ཚོགས་ཆུང་དེས་འབྱུང་འགྱུར་ཟླ་བ་གཉིས་ཏེ་སྤྱི་ཟླ་ ༡༡ པའི་ཚེས་ ༡༥ ནང་ཚུད་དུ་ཞིབ་འཇུག་སྙན་ཐོ་སྤྱི་འཐུས་རྒྱུན་ལས་ལ་སྤྲོད་དགོས་པ་དང་། ཞིབ་འཇུག་གནང་ཕྱོགས་ཐད། གནད་དོན་གཙོ་བོ་ལྐོག་ཟ་རུལ་སུངས་གནས་ཚུལ་གཞི་རྩར་བཟུང་སྟེ། དེ་དག་ཚོགས་ཆུང་སྔོན་མའི་ཞིབ་འཇུག་སྙན་ཐོ་ལ་བསྐྱར་ཞིབ་དང་། འཕྲོད་བསྟེན་བཀའ་བློན་གྱིས་རྩིས་མེད་གཏོང་དོན་གང་ཡིན། འཕྲོད་བསྟེན་བཀའ་བློན་གྱིས་ཡིག་ཆ་རྫུན་མ་བཟོས་ཡོད་མེད་དང་། དེ་བཞིན། སྒྲ་འཇུག་དང་ཡིག་ཆ་གང་ཡོད་པ་ཆ་ཚང་སྙན་ཐོ་དང་མཉམ་དུ་འཁྱེར་ཡོང་དགོས་པ་བཀའ་ཤག་གིས་ཡིག་ཐོག་ནས་ལམ་སྟོན་གསལ་བོ་གནང་དགོས་སྐོར་སོགས་ཀྱི་ལམ་སྟོན་གནང་སོང་།
