བློ་ཁོག་ཆེན་པོ་དང་སེམས་རྒྱ་ཡངས་པོའི་ཐོག་ནས་ལས་འགུལ་སྤེལ་དགོས།

དྷ་རམ་ས་ལར་གནས་སྡོད་ན་གཞོན་རྩོམ་པ་པོ་དང་སྲིད་དོན་དཔྱད་བརྗོད་པ་བུ་ཆུང་ལྡུམ་རྭ་བསོད་ནམས་ལགས་སུ་ད་ལྟའི་བཙན་བྱོལ་སྤྱི་ཚོགས་དང་རྩ་དོན་ཆབ་སྲིད་འཐབ་རྩོད་སྐོར་ལ་བཅར་འདྲི་ཞུས།

དྲི་བ། ལོ་གཉིས་གསུམ་གོང་ལ་བོད་ཕྱི་ནང་གཉིས་ནས་རྩ་དོན་འཐབ་རྩོད་ཐོག་ཚ་ཚ་འུར་འུར་འདྲ་ཞིག་བྱས་ཡོད་ཀྱང་། ལོ་སྔ་ཕྱི་འདིར་བཙན་བྱོལ་སྤྱི་ཚོགས་ཀྱི་གཞུང་དམངས་གཉིས་ཀ་གྲགས་མེད་འགུལ་མེད་ལྟ་བུ་ཞིག་ཆགས་ཡོད་པ་འདིར་གཟིགས་ཚུལ་གང་འདྲ་ཡོད།

ལན། ༢༠༠༨ ལོར་ས་བྱི་ཞི་རྒོལ་བྱུང་རྗེས་ལོ་གཅིག་གཉིས་ཤིག་རིང་བོད་དོན་ཚ་ཚ་འུར་འུར་འདྲ་པོ་ཞིག་བྱུང་པ་རེད། ཡིན་ནའང་རིམ་གྱིས་བཙན་བྱོལ་སྤྱི་ཚོགས་ཁྱོན་ཡོངས་ལ་འགྱུར་ཆེན་པོ་ཐེབས་ཏེ། ཕྱོགས་གཅིག་ནས་བོད་ནས་བཙན་བྱོལ་ལ་ཡོང་མཁན་རྦད་དེ་ཉུང་དུ་ཕྱིན་པ་དང་། ཕྱོགས་གཞན་ཞིག་ནས་ཕྱི་རྒྱལ་ལ་འགྲོ་མཁན་མང་དུ་ཕྱིན་ཡོད་སྟབས། སྔོན་ཆད་ལོ་ངོ་ ༥༠ ལྷག་ནང་བཙན་བྱོལ་སྤྱི་ཚོགས་ཀྱི་སློབ་གྲྭ་དང་ཚོགས་པ་སྒྲིག་འཛུགས། དགོན་སྡེ་སོགས་ཧྲ་ཏག་ཏག་ཅིག་ཆགས་ཡོད་ནའང་། ད་ཆ་འགྱུར་བ་ཤུགས་ཆེན་པོ་ཞིག་ཐེབས་ཡོད་པ་མ་ཟད། ལྷག་པར་དུ་གཞུང་གིས་དབུ་མའི་ལམ་བརྒྱུད་དེ་བོད་རྒྱ་ཞི་མོལ་ཡོང་ཐབས་བྱེད་ཀྱིན་ཡོད་ཀྱང་། ༢༠༡༠ ལོ་ནས་བཟུང་ད་བར་རྒྱ་ཕྱོགས་ནས་ཡ་ལན་གང་ཡང་སྤྲད་མེད་སྟབས། ང་ཚོར་ཕྱོགས་གཅིག་ནས་རེ་བ་ཡོད་པ་འདྲ་པོ་ཞིག་དང་། ཕྱོགས་གཞན་ཞིག་ནས་བོད་རྒྱའི་འབྲེལ་ལམ་ཆད་དེ་རེ་བ་གང་ཡང་མེད་པའི་བཟོ་འདྲ་བོ་ཞིག་ཆགས་བསྡད་ཡོད་པ་རེད། ཐབས་ལམ་གཞན་པ་སྤེལ་མཁན་ཚོས་ཀྱང་འདི་བྱས་ན་འགྲིག་གི་ཨེ་ཡོད། དེ་བྱས་ན་འགྲིག་གི་ཨེ་ཡོད་བསམ་སྟེ་ག་རེ་བྱེད་དགོས་མ་ཤེས་པའི་གནས་སྟངས་ཤིག་གི་འོག་ཏུ་བསྡད་ཡོད་པ་རེད། ཡིན་ནའང་སྤྱིར་བཏང་ཆབ་སྲིད་ཀྱི་འཐབ་རྩོད་ཟེར་བ་དེ་མཚམས་རེར་ཚ་ཚ་འུར་འུར་ཆགས་པ་དང་། མཚམས་རེར་ཕྱི་ནང་གི་རྒྱུ་རྐྱེན་འོག་ལོ་གཅིག་གཉིས་ལ་མདུན་སྐྱོད་མ་ཐུབ་པ་དེ་འདྲ་ཡོང་གི་རེད།

དྲི་བ། བོད་མིའི་སྒྲིག་འཛུགས་ཀྱི་ངོས་ནས་ད་ཆར་བོད་དོན་འཐབ་རྩོད་ཐོག་ཕྱག་ལས་གནང་སྟངས་ཐད་གཟིགས་ཚུལ་གང་འདྲ་ཡོད་དམ།

ལན། བཀའ་ཤག་བཅུ་བཞི་པ་ཕེབས་རྗེས་བོད་མིའི་སྒྲིག་འཛུགས་ཀྱི་འགྲོ་ལུགས་འགྲོ་སྟངས་ལ་སྔོན་དང་མ་འདྲ་བའི་ཁྱད་པར་ཆེན་པོ་ཕྱིན་ཡོད་པ་དེ་འདྲ་གང་ཡང་མཐོང་གི་མེད། ལྷག་པར་དུ་གསར་གཏོད་གང་ཙམ་ཞིག་བྱུང་ཡོད་ཀྱང་མིས་སྨོན་རང་སྐྱིད་བྱུང་བ་དེ་འདྲ་དམིགས་བསལ་ད་བར་གང་ཡང་བྱུང་མ་སོང་བསམ་ཡོད། ༡༩༥༩ ལོར་བཙན་བྱོལ་བོད་གཞུང་དབུ་བཙུགས་པ་ནས་བཟུང་ད་བར་གཞུང་གི་ཕྱག་ལས་དེ་མུ་མཐུད་ནས་འགྲོ་བཞིན་པ་ཞིག་རེད། དངོས་གནས་བྱས་ན་ད་ལྟའི་སྲིད་སྐྱོང་མཆོག་མང་ཚོགས་ཀྱིས་ཐད་ཀར་འོས་འདེམས་བྱས་པ་གང་ཞིག་ལ་༧གོང་ས་མཆོག་གིས་ཆབ་སྲིད་ཀྱི་ཐུགས་འགན་ཐད་ཀར་གནང་ཡོད་པ་ཞིག་ཀྱང་ཆགས་ཡོད་སྟབས། ཆབ་སྲིད་ཀྱི་འགྲོ་སྟངས་ཐོག་ནས་འགྱུར་བ་ཤུགས་ཆེན་པོ་དང་དམིགས་བསལ་ཅན་ཞིག་ཆགས་ཡོད་པ་རེད། ཡིན་ན་ཡང་སྤྱི་ཡོངས་ཀྱི་བོད་གཞུང་གི་འགྲོ་སྟངས་དང་སྲིད་བྱུས་འཛིན་ཕྱོགས་ཐད་མངོན་སུམ་དོད་པོས་དོན་ཕན་ལྡན་པའི་འགྱུར་བ་ཞིག་ཐེབས་པ་མཐོང་མ་སོང་བསམ་ཡོད། དེ་འདྲ་ཡིན་དུས་ང་ལ་བསམ་ཚུལ་དང་ལྟ་ཚུལ་གསར་པ་དེ་འདྲ་གང་ཡང་ཞུ་རྒྱུ་མེད།

དྲི་བ། བོད་རྒྱ་འབྲེལ་མོལ་མཚམས་ཆད་དེ་ལོ་བཞི་ལྷག་ཕྱིན་པ་རེད། དེའི་རིང་ཕྱོགས་གཉིས་ཀས་གྲོས་མོལ་གྱི་སྒོ་མོ་ཕྱེ་ཡོད་སྐོར་དང་གྲ་སྒྲིག་ཡོད་སྐོར་ཤོད་བཞིན་ཡོད་ཀྱང་། དངོས་ཡོད་ཐོག་འབྲེལ་མོལ་མཐུད་ཐུབ་ཀྱི་མེད་པའི་དཀའ་ངལ་གཙོ་བོ་གང་ལ་ཐུག་ཡོད་པ་རེད་དམ།

ལན། ད་བར་བཙན་བྱོལ་བོད་གཞུང་ངོས་ནས་བོད་དོན་བདེན་མཐའ་སེལ་ཐབས་ཀྱི་གུ་ཡངས་ཡོད་ཚད་བྱས་ཡོད་པ་མ་ཟད། དབུ་མའི་ལམ་བརྒྱུད་བདེན་མཐའ་སེལ་ཆེད་ཀྱི་ཡིག་ཆ་ཡན་ཆད་རྒྱ་ནག་ལ་སྤྲད་ཚར་བ་རེད། བོད་རྒྱའི་དཀའ་རྙོག་དེ་རྒྱ་ནག་ལ་དབང་ནས་ང་ཚོས་སྤྲད་པ་ལས་བྱུང་བ་ཞིག་མིན་པར་རྒྱ་མིས་བོད་ལ་བཙན་འཛུལ་བྱས་ཏེ་བྱུང་བ་ཞིག་ཡིན་དུས། བཙན་འཛུལ་བྱེད་མཁན་དེས་ང་ཚོས་བཏོན་པའི་དགོས་འདུན་དེ་དག་ལ་ཡ་ལན་བྱེད་དགོས་པ་ཞིག་ཆགས་ཡོད། ད་ལྟ་བོད་པའི་ངོས་ནས་གུ་ཡངས་ཡོད་ཚད་བྱས་ཚར་ཡོད་ཀྱང་། རྒྱ་ཕྱོགས་ནས་མུ་མཐུད་མཁྲེགས་འཛིན་བྱེད་ཀྱིན་ཡོད། ངའི་བསམ་པར། མ་འོངས་པར་རྒྱ་ཕྱོགས་ནས་སྐད་ཆ་བཤད་རྒྱུའི་རྣམ་འགྱུར་ཞིག་བསྟན་པ་ཡིན་ནའང་། རྒྱལ་སྤྱིའི་གནོན་ཤུགས་ཤིག་དང་། ཕྱི་ཕྱོགས་སུ་རྣམ་པ་སྟོན་ཆེད་ཙམ་མ་གཏོགས། ད་ལྟའི་རྒྱ་ནག་གི་གནས་སྟངས་སོགས་ཕྱོགས་གང་ནས་བལྟས་ཀྱང་དོན་ཕན་ལྡན་པའི་གྲུབ་འབྲས་ཤིག་ཡོང་གི་རེད་བསམ་གྱི་མི་འདུག

དྲི་བ། བཙན་བྱོལ་སྤྱི་ཚོགས་ཁྲོད་ཀྱི་གཞུང་འབྲེལ་མིན་པའི་ཚོགས་པ་ཁག་གིས་བོད་པའི་རྩ་དོན་འཐབ་རྩོད་ཐད་དགོངས་ཚུལ་གང་འདྲ་ཡོད།

ལན། བོད་དོན་འཐབ་རྩོད་ནི་ང་ཚོ་ཚང་མའི་འཐབ་རྩོད་ཅིག་ཡིན་སྟབས། ཚང་མས་འཕྱར་གྲུ་མཉམ་འདེགས་བྱེད་རྒྱུ་གལ་ཆེན་པོ་ཆགས་ཡོད། ད་ལྟའི་ང་ཚོའི་གཞུང་འདི་བཙན་བྱོལ་གཞུང་ཞིག་ཡིན་སྟབས་ངོ་བོ་དང་གནས་སྟངས། རྒྱུ་རྐྱེན་མང་པོ་ཞིག་ལ་བརྟེན་ཏེ་ལས་ཀ་མང་པོ་ཞིག་བྱེད་ཐུབ་དང་ལས་དོན་འགའ་ཞིག་བྱེད་མ་ཐུབ་པ་གཉིས་ཀ་ཡོད་པ་མ་ཟད། འགའ་ཤས་བྱས་ན་མ་འཚམ་པ་དེ་འདྲ་ཡོད་པ་རེད། ཡིན་ཡང་གཞུང་འབྲེལ་མིན་པའི་ཚོགས་པ་ཟེར་དུས་གནས་སྟངས་ལོགས་ཀ་ཞིག་རེད། གཞུང་གི་ལངས་ཕྱོགས་ལ་བལྟས་ནས་ཕྱག་ལས་བྱེད་དགོས་པ་གལ་ཆེན་པོ་ཡིན་སྲིད་ཀྱང་། རྒྱལ་སྤྱིའི་ཆབ་སྲིད་འཕོ་འགྱུར་དང་དུས་ཀྱི་འགྱུར་འགྲོས། འཛམ་གླིང་གི་གནས་སྟངས་ལ་བལྟས་ཏེ་རྣམ་དཔྱོད་འདོན་རྒྱུ་གལ་ཆེན་པོ་རེད། གང་ཡིན་ཞེ་ན། ང་ཚོའི་འཐབ་རྩོད་འདི་རྒྱལ་སྤྱི་དང་རྒྱ་ནག་གི་འགྱུར་འགྲོས་ལ་བསྟུན་ཏེ་འགྱུར་བ་འགྲོ་བཞིན་ཡོད། ནུབ་ཕྱོགས་རྒྱལ་ཁབ་ཀྱིས་རྒྱ་ནག་ལ་ལྟ་སྟངས་དེ་དཔལ་འབྱོར་གྱི་ཁེ་ཕན་ཡོད་མིན་ལ་གཞིགས་ཏེ་འགྱུར་བ་འགྲོ་བཞིན་ཡོད་སྟབས། གཞུང་འབྲེལ་མིན་པའི་ཚོགས་པ་ཁག་གིས་ཀྱང་སྐབས་དང་དུས་ལ་བསྟུན་ཏེ་མདུན་སྐྱོད་བྱེད་དགོས་པ་རེད་བསམ་གྱི་འདུག གཞུང་འབྲེལ་མིན་པའི་ཚོགས་པ་ཁག་ནས་མཐའ་གཅིག་ཏུ་བཙན་བྱོལ་བོད་གཞུང་ལ་ཡར་བལྟས་ཏེ། བྱེད་ཆོག་དང་མ་ཆོག་ལ་ཐེ་ཚོམ་བྱས་བསྡད་ན་འགྲིག་གི་ཡོད་པ་མ་རེད། གང་ཡིན་ཞེ་ན། ཚོགས་པ་སྒྲིག་འཛུགས་ཕལ་ཆེ་བ་འཐབ་རྩོད་ཀྱི་ངོ་བོ་རང་བྱས་ནས་བཙུགས་པ་ཡིན་དུས། ད་ལྟའི་དུས་ཚོད་འདིར་བློ་ཁོག་ཆེན་པོ་དང་སེམས་རྒྱ་ཡངས་པོའི་ཐོག་ནས་ལས་འགུལ་སྤེལ་དགོས་པ་རེད་བསམ་གྱི་འདུག

དྲི་བ། བཙན་བྱོལ་སྤྱི་ཚོགས་ནང་དང་། ལྷག་པར་དུ་ཕྱི་རྒྱལ་ཁག་གི་བོད་རིགས་གཞོན་སྐྱེས་ཚོའི་ངོས་ནས་བོད་དོན་འཐབ་རྩོད་ཐོག་སེམས་འཁུར་དང་འགན་འཁུར་གནང་ཕྱོགས་ཐད་ཁྱད་པར་གང་མཐོང་གི་འདུག

ལན། ངས་བོད་ནས་སྐྱེས་པ་དང་བཙན་བྱོལ་ནང་སྐྱེས་པ་གཉིས་བར་བོད་དོན་འཐབ་རྩོད་ཀྱི་འགན་འཁུར་ཕྱོགས་ཐད་ཁྱད་པར་ཆེན་པོ་ཡོད་པ་མཐོང་གི་མི་འདུག་ཀྱང་། སེམས་འཁུར་བྱེད་ཕྱོགས་ཐད་ཏན་ཏན་ཁྱད་པར་འདུག་བསམ་གྱི་ཡོད། ད་ལྟ་བཙན་བྱོལ་སྤྱི་ཚོགས་ནང་བོད་ནས་འཚར་ལོངས་བྱུང་ཞིང་བཙན་བྱོལ་ནང་བསླེབས་པའི་མི་རབས་ཤིག་དང་། རྒྱ་བལ་འབྲུག་གསུམ་ནང་སྐྱེས་པའི་མི་རབས་ཤིག ཕྱི་རྒྱལ་ཡུལ་གྲུ་ཁག་ཏུ་སྐྱེས་པའི་མི་རབས་ཤིག་བཅས་བོད་པའི་གཞོན་སྐྱེས་མི་འདྲ་བ་གསུམ་ཡོད། དེ་དག་ཚང་མར་སེམས་ནང་ན་ཟུག་ཅིག་ཡོད་པ་གཅིག་མཚུངས་རེད། ཡིན་ནའང་ན་ཟུག་ཆེ་ཆུང་ལ་ཁྱད་པར་ཏོག་ཙམ་ཡོད་པ་རེད་བསམ་གྱི་འདུག དཔེར་ན། བོད་ནས་ཕེབས་མཁན་ཞིག་ཡིན་ན་བོད་ནང་གི་དངོས་ཡོད་གནས་སྟངས་དང་དཀའ་ངལ་མིག་མཐོང་ལག་ཟིན་ཡིན་དུས་སེམས་ནང་ཚོར་ཤུགས་ཁྱད་པར་བ་ཞིག་དང་། རྒྱ་བལ་འབྲུག་གསུམ་ནང་འཚར་ལོངས་བྱུང་བ་ཚོར་སྤྱི་ཚོགས་དང་ཆབ་སྲིད་གནས་སྟངས་འོག་ན་ཟུག་མ་འདྲ་བ་ཞིག་ཡོད། ནུབ་ཕྱོགས་རྒྱལ་ཁབ་ཁག་ཏུ་འཚར་ལོངས་བྱུང་བ་ཚོར་ཆ་རྐྱེན་ཏོག་ཙམ་ཡག་པོ་ཡོད་ཀྱང་སྤྱི་ཚོགས་དང་དཔལ་འབྱོར་གནོན་ཤུགས་འོག་ཚོར་བ་མ་འདྲ་བ་ཞིག་ཡོད། ངས་བོད་ནས་ཡོང་མཁན་ཚོར་ན་ཟུག་ཏོག་ཙམ་ཆེ་བ་དང་། རྒྱ་བལ་འབྲུག་གསུམ་ནང་འཚར་ལོངས་བྱེད་མཁན་ཚོར་ན་ཟུག་འབྲིང་བ། ནུབ་ཕྱོགས་རྒྱལ་ཁབ་ཁག་ཏུ་ཡོད་མཁན་ཚོར་ཅུང་ན་ཟུག་ཆུང་བ་ཡོད་པ་རེད་བསམ་གྱི་འདུག མི་རིགས་ཤིག་དང་རྒྱལ་ཁབ་ཞིག་གི་འཐབ་རྩོད་ཁྲོད་སེམས་ནང་ན་ཟུག་དགོས་རྒྱུ་དེ་གལ་ཆེན་པོ་རེད། གང་ཡིན་ཞེ་ན། སེམས་ནང་ངའི་རྒྱལ་ཁབ་དང་ཕ་ཡུལ་ཤོར་སོང་བསམ་པའི་ན་ཟུག་དེ་ཡོད་ཚེ། ལས་དོན་སྒྲུབ་སྐབས་སེམས་ཤུགས་དང་ངར་ཆེ་བ་ཡོད་པ་མ་ཟད། རྩ་དོན་གྱི་ཆེད་དུ་ལས་ཀ་ཞིག་བྱེད་དགོས་བསམ་པའི་བློ་སྟོབས་བརྟན་པོ་ཡོད་རེད།

དྲི་བ། ཁྱེད་རང་རྩོམ་པ་པོ་དང་སྒྱུ་རྩལ་བ་ཞིག་ཡིན་སྟབས། བོད་དོན་འཐབ་རྩོད་ལ་སྒྱུ་རྩལ་བ་ཚོས་ནུས་པ་འདོན་སྤེལ་ག་རེ་བྱེད་དགོས་པ་རེད་བསམ་གྱི་འདུག

ལན། སྤྱིར་བཏང་སྤྱི་ཚོགས་ཡར་རྒྱས་འགྲོ་མིན་དང་ཚད་གཞི་མཐོ་པོ་གང་འདྲར་བསླེབ་མིན་དེ། སྤྱི་ཚོགས་དེའི་ནང་གི་སྒྱུ་རྩལ་ལ་རག་ལས་ཡོད་པ་རེད། སྤྱི་ཚོགས་ཤིག་ནང་སྒྱུ་རྩལ་གྱི་རིམ་པ་ཚད་མཐོ་བོ་ཡོད་ན། སྤྱི་ཚོགས་ཀྱི་གནས་བབ་དང་མིའི་བསམ་བློར་བཟང་ཕྱོགས་ཀྱི་ཤུགས་རྐྱེན་ཆེན་པོ་ཐེབས་ཡོད་སྟབས། སྒྱུ་རྩལ་བ་ནི་སྤྱི་ཚོགས་གང་འདྲ་ཞིག་ཡིན་ཡང་ཧ་ཅང་གནད་འགག་ཆགས་ཡོད། ལྷག་པར་དུ་ང་ཚོའི་སྤྱི་ཚོགས་ནང་མེད་དུ་མི་རུང་བ་ཞིག་ཆགས་ཡོད། སྒྱུ་རྩལ་བ་ཚོ་བསམ་བློ་མི་འདྲ་བ་གཏོང་མཁན་ཞིག་ཡིན། མི་ཚང་མས་ཤར་ལ་བལྟས་ནས་བསྡད་ཡོད་ན་སྒྱུ་རྩལ་བས་ནུབ་ནས་ག་རེ་ཡོང་གི་ཡོད་མེད་ལ་ལྟ་བཞིན་ཡོད། སྒྱུ་རྩལ་པ་ཞིག་ཡིན་ན་བསམ་བློ་གསར་པ་གཏོང་ཐུབ་མཁན་ཞིག་དང་། སེམས་ནང་ག་རེ་དྲན་པ་དེ་ཁ་ནས་བཤད་ཕོད་མཁན་ཞིག་ཡིན་དགོས། ང་ཚོས་བོད་ཀྱི་རྒྱལ་རབས་ལོ་རྒྱུས་ལ་བལྟས་ན། དུས་རབས་བདུན་པའི་གོང་བོད་ལ་ནང་ཆོས་མ་དར་སྔོན་ལ་བོད་ཀྱི་ཆོས་དེ་བོན་ཆོས་དང་། དེའི་རྗེས་ནང་ཆོས་ཆགས་ཡོད་ཀྱང་། ད་ཆ་བོད་པ་ནང་ཆོས་བྱེད་མཁན་ཙམ་མིན་པར་ཁ་ཆེ་དང་ཡེ་ཤུ་ཡང་ཡོད་སྟབས། ཆོས་ཀྱི་ལྟ་གྲུབ་དེ་དུས་རབས་མང་པོའི་ཁྲོད་འགྱུར་སྲིད་པ་ཞིག་རེད། ཆབ་སྲིད་ཀྱི་འཕོ་འགྱུར་ཡང་དེ་བཞིན་རེད། སྔོན་མ་ཡིན་ན་བོད་ཀྱི་བཙན་པོའི་དུས་རབས་དང་། དེའི་རྗེས་བོད་སིལ་བུར་འཐོར་བ་དང་། དུས་རབས་ཉི་ཤུའི་ནང་བོད་རང་བཙན་བསྐྱར་གསོ་བྱས་ཡོད་ཀྱང་། ད་ལྟ་བོད་རྒྱ་ལག་ཏུ་ཤོར་ཡོད་པ་རེད། འགྱུར་བ་མ་ཕྱིན་པར་གནས་ཡོད་པ་དེ་སྒྱུ་རྩལ་རེད། བོད་པའི་གཞས་དང་ཞབས་བྲོ་དེ་ཚོ་བོད་སྲིད་པ་ཆགས་པ་ནས་ད་བར་གནས་ཡོད་པ་མ་ཟད། ཆབ་སྲིད་དང་ཆོས་ལུགས་ཀྱི་འཕོ་འགྱུར་གང་འདྲ་ཞིག་གི་འོག་ཏུའང་གཞས་དང་ཞབས་བྲོ། སྙན་ངག་སོཊ་གནས་བསྡད་ཡོད། མི་རིགས་ཤིག་ལ་སྒྱུ་རྩལ་གཏིང་ཟབ་མོ་ཞིག་དགོས་པ་དེ་ཧ་ཅང་གལ་ཆེན་པོ་རེད། སྒྱུ་རྩལ་པས་རང་གི་མི་རིགས་དང་རང་གི་ལོ་རྒྱུས། རང་གི་སྤྱི་ཚོགས་འཕོ་འགྱུར་སོགས་ལ་སློབ་སྦྱོང་བྱས་ཏེ། སྙན་ངག་དང་རི་མོ། རྩོམ་རིགས་དང་གློག་བརྙན་སོཊ་ཀྱི་ལམ་ནས་ཐབས་ལམ་དང་རིག་པ་གསར་པ་སྤྱད་དེ་སྤྱི་ཚོགས་ཀྱི་མགོ་འཁྲིད་དགོས།

གསར་འགོད་པ། དོན་གྲུབ།