རྒྱ་ནག་གི་སྲིད་འཛིན་ཞི་ཅིན་ཕིན་གྱིས་སྟག་ལ་འཐབ་པའི་གོ་རིམ་ཁྲོད་། ཅང་ཙེ་མིན་དང་ཁོའི་ཁྱིམ་རྒྱུད་སོགས་དམིགས་འབེན་དུ་བཟུང་སྟེ་རྒྱ་ནག་གི་ཁ་པར་འབྲེལ་མཐུད་ལྷན་ཚོགས་དང་ཁ་པར་འབྲེལ་མཐུད་སྡེ་ཁག་སོགས་བདག་བཟུང་བྱས་ཡོད་པའི་ཧྲང་ཧེ་ཚོགས་ཁག་སྐོར་བཅོམ་བྱེད་བཞིན་ཡོད།
རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་གི་འགན་འཛིན་ཝང་ཆི་ཧྲན་གྱི་དྲུང་ཆེ་ཏོན་ཧོན་ (Dong Hong) དབུས་སྐོར་སྐྱོད་ཚོགས་ཆུང་བཅུ་གཉིས་པའི་ཚོགས་གཙོར་བསྐོས་རྗེས་ཀྱི་འགུལ་སྐྱོད་གཙོ་བོ་ཞིག་ནི། ཉེ་ལམ་ཕྱི་ཟླ་ ༢ ཚེས་ ༢༨ ཉིན་ནས་བཟུང་རྒྱ་ནག་དབུས་བརྡ་འཕྲིན་ཁ་པར་འབྲེལ་ལམ་མཉམ་འབྲེལ་ (中国移动通信集团公司) སོགས་ཀྱི་ཚོང་ལས་ལྟེ་བ་ཁག་ཏུ་སྐོར་སྐྱོད་བྱས་ཏེ། ཕྱི་ཟླ་ ༤ ཚེས་ ༢༩ ཉིན་མཇུག་སྒྲིལ་ཡོད་པ་དེ་ཡིན་པ་དང་། འགུལ་སྐྱོད་དེའི་ཁྲོད་ཀྲུང་གོའི་བརྡ་འཕྲིན་མཉམ་འབྲེལ་གྱི་ས་གནས་ཁག་གི་དཔོན་རིགས་ ༥ ལ་ཞིབ་བཤེར་བྱས་ཡོད་འདུག
ཕྱི་ཕྱོགས་ཀྱི་བརྒྱུད་ལམ་ཁག་ཏུ་དེའི་སྐོར་གྱི་གནས་ཚུལ་བཀོད་པའི་ནང་། ཀྲུང་གོའི་ཁ་པར་འབྲེལ་ལམ་ལྷན་ཚོགས་ནི་ཅང་ཙེ་མིན་གྱི་བུ་ཆེ་བ་ཅང་མིན་ཧིན་གྱི་ཁེ་ཕན་ས་ཆ་ཡིན་པ་དང་། ཅང་མིན་ཧིན་ལ་རྒྱ་ནག་རུལ་སུངས་དང་པོའམ་གློག་འཕྲིན་རྒྱལ་བོ་ཞེས་འབོད་ཀྱིན་ཡོད་འདུག གློག་འཕྲིན་རྒྱལ་ཕྲན་དེའི་གྲུབ་ཆ་ནི་རྒྱ་ནག་དབུས་ཁ་པར་འབྲེལ་མཐུད་བརྒྱུད་ལམ་ (中国联通)དང་། རྒྱ་ནག་དྲ་འབྲེལ་བརྒྱུད་ལམ་ (中国网通)སོགས་ཡིན་འདུག
གཟའ་པ་སངས་ཉིན། ཏཱ་ཅི་ཡོན་གྱིས་གནས་ཚུལ་སྤེལ་བའི་ནང་། རྒྱ་ནག་དབུས་བརྡ་འཕྲིན་ཁ་པར་འབྲེལ་ལམ་ལྷན་ཚོགས་ནི་ཅང་ཙེ་མིན་ཁྱིམ་རྒྱུད་སྒེར་གྱིས་ཁེ་བཟང་ལེན་སའི་ཚོང་ལས་སྟེ་གནས་ཡིན་པ་གསང་བ་ཞིག་མིན་པར་ད་ལྟ་རྒྱ་ནག་ནང་ཡོངས་གྲགས་ཆགས་ཡོད་པ་དང་། གནས་ཚུལ་དེའི་ཐད་ཅང་མིན་ཧིན་གྱིས། གློག་འཕྲིན་རྒྱལ་ཕྲན་འདི་ནི་འཛམ་གླིང་སྟེང་ཆེས་དངུལ་གསོག་ཐུབ་སའི་ཚོང་ལས་ཡིན་པ་དང་། དེ་དག་ནི་ཅང་ཚང་གི་དངུལ་གྱི་ཁུག་མ་ལྟ་བུ་དེ་ཡིན་སྐོར་བརྗོད་ཡོད་འདུག
རེས་གཟའ་ལྷག་པའི་ཉིན་ཀོང་ཏུང་ཞིང་ཆེན་སྒྲིག་ཁྲིམས་ཞིབ་བཤེར་ལྷན་ཁང་དྲ་བའི་སྟེང་། ཀྲུང་གོའི་ཁ་པར་བརྡ་འཕྲིན་ཀོང་ཏུང་ཡན་ལག་ལས་ཁུངས་ཀྱི་སྤྱི་ཁྱབ་འགན་འཛིན་གཞོན་པ་ཝིན་ནན་ཀྲན་ (Wen Nanzhan) ལ་ཞིབ་བཤེར་བྱེད་ཀྱིན་ཡོད་པ་ཁྱབ་བསྒྲགས་བྱས་ཡོད་པ་དང་། གནས་ཚུལ་དེའི་ནང་ཟླ་གཅིག་རིང་རྒྱ་ནག་ཁ་པར་བརྡ་འཕྲིན་གྱི་ས་གནས་མི་འདྲ་བ་ཁ་ཤས་ཀྱི་མཐོ་རིམ་དཔོན་རིགས་ཁག་ཅིག་བསྟུད་མུར་གོ་གནས་ནས་ལྷུང་ཡོད་སྐོར་བརྗོད་འདུག
ཕྱི་ཟླ་ ༤ ཚེས་ ༡༠ ཉིན་ཧྲན་ཞི་ཞིང་ཆེན་སྒྲིག་ཁྲིམས་ཞིབ་བཤེར་དྲ་བའི་སྟེང་། རྒྱ་ནག་ཁ་པར་བརྡ་འཕྲིན་ཧྲན་ཞི་ཡན་ལག་ལས་ཁུངས་ཀྱི་འགན་འཛིན་དང་གཙོ་གཉེར་བ་མོའུ་ཅན་ཀྲོན་ (Miao Jianzhong)ལ་ཞིབ་བཤེར་བྱེད་བཞིན་པ་ཁྱབ་བསྒྲགས་བྱས་ཡོད་པ་དང་། ཕྱི་ཟླ་ ༤ པའི་ཚེས་ ༢༣ ཉིན་ཧུའུ་ནན་ཞིང་ཆེན་སྒྲིག་ཁྲིམས་ཞིབ་བཤེར་དྲ་བའི་སྟེང་། རྒྱ་ནག་ཁ་པར་བརྡ་འཕྲིན་མཉམ་འབྲེལ་ཧུའུ་ནན་ཡན་ལག་ལས་ཁུངས་ཀྱི་ཏང་རྩ་འཛུགས་མགོ་གཙོ་ཟུར་བ་ཝང་ཅན་ཀིན་ (Wang Jiangen) ལ་ཞིབ་བཤེར་བྱེད་བཞིན་ཡོད་པ་ཁྱབ་བསྒྲགས་བྱས་འདུག
དེ་བཞིན། ཕྱི་ཟླ་ ༤ ཚེས་ ༢༩ ཉིན་གྱི་དགོང་མོར་ཧྥོ་ཅན་ཞིང་ཆེན་སྒྲིག་ཁྲིམས་ཞིབ་བཤེར་ལྷན་ཁང་གི་དྲ་བའི་སྟེང་། ཧྥོ་ཅན་ཁ་པར་བརྡ་འཕྲིན་སྤྱི་གཉེར་བ་གཞོན་པ་ལིན་པད་ཅང་ (Lin Paijiang)ལ་གྱོད་དོན་དོགས་གཞིའི་འོག་ཞིབ་བཤེར་བྱེད་བཞིན་ཡོད་པ་ཁྱབ་བསྒྲགས་དང་། རེ་གཟའ་ཕུར་བུའི་ཉིན་ཚད་ཅིན་དུས་དེབ་ཀྱིས་གནས་ཚུལ་སྤེལ་བ་ལྟར་ན། པེ་ཅིན་ཁ་པར་བརྡ་འཕྲིན་སྤྱི་ཁྱབ་འགན་འཛིན་གཞོན་པ་ལིས་ཏཱ་ཁྲན་ (Li Dachuan)ཕྱི་ཟླ་ ༤ ཚེས་ ༢༣ ཡས་མས་ལ་འབྲེལ་ཡོད་ལས་ཁུངས་ཀྱིས་ཞིབ་བཤེར་བྱེད་པར་ཁྲིད་ཡོད་སྐོར་བཀོད་འདུག
གཟའ་ལྷག་པའི་ཉིན། ཏཱ་ཅི་ཡོན་དྲ་བས་ཀྲུང་གོའི་བརྡ་འཕྲིན་གྱི་གནས་ཚུལ་སྐོར་གླེང་མོལ་བྱས་པའི་ནང་། ཀྲུང་གོའི་ཁ་པར་བརྡ་འཕྲིན་གྱི་སྐྱོན་ཚང་ལ་མུ་མཐུད་གོད་ཆག་འགྲོ་བཞིན་པ་ནི་ཅང་ཙི་མིན་གྱི་བུ་ཆེ་བ་ཅང་མིན་ཧིན་ཕྱི་ཤོལ་བྱེད་པའི་ས་ཆར་བརྡིབ་སྐྱོན་བྱུང་བ་ཞིག་ཡིན་པ་དང་། དེ་ནི་པེ་ཅིན་གཞུང་གིས་ཅང་མིན་ཧིན་གྱི་ཏང་གི་གཤོག་པ་ཚར་གཅོད་བྱས་པ་དང་ཅང་ཚང་གི་སྟོབས་ཤུགས་ལ་རྡུང་རྡེག་བཏང་པ་ཞིག་ཡིན་ཚུལ་བརྗོད་འདུག
༢༠༠༩ ལོའི་ལོ་མཇུག་ཏུ་རྒྱ་ནག་བརྡ་འཕྲིན་ཏང་གི་རྩ་འཛུགས་མགོ་གཙོ་ཀྲང་ཁྲོན་ཅང་ (Zhang Chunjiang) ལ་གྱོད་དོན་བྱུང་པ་ནས་བཟུང་། འདས་པའི་ལོ་གཉིས་ནང་རྒྱ་ནག་བརྡ་འཕྲིན་ལྟེ་གནས་ཁག་གི་མཐོ་རིམ་དཔོན་རིགས་དག་ལ་ཞིབ་བཤེར་གྱི་ཚད་གཞི་མཐོ་རུ་ཕྱིན་ཡོད་ཅིང་། དེའི་དཔེ་མཚོན་དག་ནི། ༢༠༠༩ ལོར་མི་ ༢ དང་། ༢༠༡༠ ལོར་མི་ ༤། ༢༠༡༡ ལོར་མི་ ༣། ༢༠༡༢ ལོར་མི་ ༡། ༢༠༡༣ ལོར་མི་ ༤ ། ༢༠༡༤ ལོར་མི་ ༣ ། ད་ལོར་མི་ ༥ བཅས་ལ་ཞིབ་བཤེར་བྱས་ཡོད་འདུག
ཞི་ཅིན་ཕིན་ ༢༠༡༥ ལོར་ཅང་ཤོག་ཁག་གི་རུལ་སུངས་ལ་རྒོལ་རྡུང་གཏོང་བའི་ལས་རིམ་གསར་བའི་ཁྲོད། ད་ལོའི་ཕྱི་ཟླ་ ༣ པའི་ཟླ་མགོ་ནས་བཟུང་རྒྱ་ནག་དབུས་སྐོར་སྐྱོད་ཐེངས་ཤིག་ལ་ཅང་ཙེ་མིན་ཁྱིམ་རྒྱུད་ཀྱི་རྒྱ་ནག་ཁ་པར་བརྡ་འཕྲིན་གཙོས་པའི་ལས་ཁུངས་ཁག་ ༢༦ ལ་སྐོར་སྐྱོད་བྱས་ཡོད་འདུག
ཕྱི་ཟླ་ ༣ ཚེས་ ༡༠ ཉིན་ཧྲང་ཧེ་གྲོང་ཁྱེར་ནས་ ༢༠༡༥ ལོའི་སྐབས་དང་པོའི་སྐོར་སྐྱོད་ལས་བྱེད་ཀྱི་ཚོགས་འདུ་བསྐོངས་ཡོད་པ་དང་། ཟླ་ ༣ པའི་ཟླ་མཇུག་ནས་ཟླ་ ༥ བའི་ཟླ་མཇུག་བར་གྲོང་ཁྱེར་དཔལ་འབྱོར་དང་ཆ་འཕྲིན་ཨུ་ཡོན། གྲོང་ཁྱེར་ལྟ་རྟོག་ཨུ་ཡོན། ཧྲང་ཧེ་ཡི་གྲོང་ཁྱེར་འཛུགས་སྐྲུན་ལྷན་ཚོགས། གྲོང་ཁྱེར་འཛུགས་སྐྲུན་དོ་དམ་ཨུ་ཡོན་སོགས་ཀྱི་ལས་ཁུངས་ ༡༠ ལ་སྐོར་སྐྱོད་བྱེད་འཆར་ཡོད་པ་དང་། དེའི་ཁྲོད་ལས་ཁུངས་མང་པོ་ཞིག་ནི་ཅང་ཙེ་མིན་གྱི་བུ་ཅང་མིན་ཧིན་དང་ཅང་མིན་ཁཱང་གཉིས་ཀྱིས་ཁེ་ལས་ཁག་ཆགས་ཡོད་འདུག
ཆབ་སྲིད་དཔྱད་ཞིབ་པ་ཞཱ་ཞོ་ཆང་གིས། ཞི་ཅིན་ཕིན་གྱིས་སྟག་ལ་འཐབ་སྟེ་ཅང་ཙེ་མིན་བཙིར་རྒྱུ་ལ་ཅང་ཙེ་མིན་མཐའ་འཁོར་དང་། ཁོའི་ཁྱིམ་མིར་ཞིབ་བཤེར་བྱེད་མགོ་བཙུགས་ཡོད་དེས་རང་བཞིན་གྱིས་རུལ་སུངས་གཏེ་བོ་ཅང་མིན་ཧིན་དམིགས་འབེན་ཆགས་ཡོད་པ་དང་། དབུས་སྒྲིག་ཁྲིམས་ཞིབ་བཤེར་ལྷན་ཁང་གིས་རྒྱ་ནག་བརྡ་འཕྲིན་མཉམ་འབྲེལ་དང་། རྒྱ་ནག་ཁ་པར་བརྒྱུད་ལམ་སྡེ་ཁག་སོགས་ལ་སྐོར་སྐྱོད་བྱས་བའི་དམིགས་འབེན་ཡང་ཅང་ཙེ་མིན་ཆགས་ཡོད། དེ་བཞིན། ཝང་ཆི་ཧྲན་གྱིས་རང་ཉིད་ཀྱི་བློས་ཐུབ་ ཏོན་ཧོན་ལ་ལམ་སྟོན་བྱས་ཏེ། སྟག་ལ་འཐབ་པའི་ལས་དོན་ཁྲོད་ཅང་མིན་ཧིན་ལ་སྒོ་ལྕགས་རྒྱག་པ་དང་། ཅང་ཙེ་མིན་ལ་སྣོན་བཙིར་རྒྱག་རྒྱུ་སོགས་ཀྱི་ཐབས་ལམ་གོ་སྒྲིག་བྱས་ཡོད་སྐོར་བརྗོད་འདུག
རྒྱ་ནག་གི་དཔལ་འབྱོར་སྲོག་རྩ་དག་ཅང་ཙེ་མིན་ཚབ་མཚོན་གྱི་ཁེ་ལས་ལྷན་ཚོགས་དག་གི་ལག་ཏུ་ཡོད་པ་དང་། ཅང་ཙེ་མིན་གྱིས་གཞུང་བཟུང་རྗེས་ལྐོག་ཟ་རུལ་སུངས་ཀྱིས་རྒྱལ་ཁབ་སྐྱོང་བའི་ཁྲོད་རྡོ་སྣུམ་དང་གློག་འཕྲིན། ལྕགས་ལམ། དཔལ་འབྱོར་སོགས་གྱི་ཁེ་ཕན་ཕུན་སུམ་ཚོགས་པ་ཡོད་པའི་རྒྱལ་ཁབ་ཀྱི་ཚོང་འབྲེལ་མང་ཆེ་བ་ཅང་ཙེ་མིན་གྱི་བློས་ཐུབ་ཁྱིམ་རྒྱུད་དག་གི་ལག་ཏུ་བཞག་ཡོད། དེ་ནི་ཅང་མིན་ཧིན། ཚིན་ཆིན་ཧོན། ཀྲུའུ་ཡོན་ཁཱང་། ལིའུ་ཡོན་ཧྲན་སོགས་ཡིན་ཞིང་། ཞི་ཅིན་ཕིན་དཔུང་ཁག་དང་ཅང་ཙེ་མིན་ལྷན་ཚོགས་གཉིས་ཀྱི་དམར་འཛིང་དྲག་པོའི་ཁྲོད། རྒྱལ་ཁབ་ཀྱི་ཚོང་འབྲེལ་དང་དཔལ་འབྱོར་ལྟེ་གནས་ཁག་ཅང་ཤོག་གི་ལག་ཆ་ཡིན་འདུག
