གྲྭ་བྱང་ཆུབ་སེམས་པ་ལགས་ཀྱིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཕྱི་ཚེས་ ༡༩ ཉིན་རྒྱ་གཞུང་ཉེན་རྟོག་པས་ལ་སྟོད་དིང་རི་རྫོང་ནས་ཡིན་པའི་བོད་མི་ཧྲི་དར་ཞུ་བ་ཞིག་ལྷ་ས་གྲོང་ཁྱེར་ནས་འཛིན་བཟུང་བཙན་ཁྲིད་བྱས་ཡོད་པ་དང་། དེ་བཞིན་ཟླ་འདིའི་ཕྱི་ཚེས་ ༡༦ ཉིན་དིང་རི་བྲག་རྩེ་གྲོང་ཚོ་ནས་གྲྭ་ལྷུན་གྲུབ་ཞུ་བ་ཞིག་བཙན་ཁྲིད་བྱས་ཏེ། ད་ལྟ་ཁོང་གཉིས་གཞིས་ཀ་རྩེར་བཀག་ཉར་བྱས་ཡོད་འདུག
ཁོང་གཉིས་ཅིའི་ཕྱིར་འཛིན་བཟུང་བྱས་པ་སོགས་ཀྱི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་ཀྱང་། ཡུལ་མི་དང་ཁོང་རང་གཉིས་ཀྱི་ངོ་ཤེས་ཚོས། ཁོང་གཉིས་ཀྱིས་སྐད་འཕྲིན་ནང་༸གོང་ས་མཆོག་གི་སྐུ་པར་དང་། བོད་དོན་དང་འབྲེལ་བའི་གསར་འགྱུར་བསྐུར་བར་ཆབ་སྲིད་ཀྱི་ནག་ཉེས་བཙུགས་ཡོད་པའི་ཚོད་དཔག་བྱེད་བཞིན་ཡོད་འདུག
ཧྲི་དར་ལགས་རང་ལོ་ ༢༡ དང་། གྲྭ་ལྷུན་གྲུབ་ལགས་རང་ལོ་ ༢༧ ཡིན་ལ། ཁོང་གཉིས་དིང་རི་རྫོང་བྲག་རྩེ་གྲོང་ཚོ་ནས་ཡིན་འདུག
གསར་འགོད་པ། པདྨ་མཚོ།
ལ་སྟོད་དིང་རིའི་ཡུལ་སྐད་དུ། ཧྲི་དར་ཞེས་ལབ་པ་བདེན་ཡང་། འབྲི་དུས་སྲིད་ཐར། ཞེས་དགོས་སྙམ་སྟེ། དཔེར་ན། སྲོག་རྩ་དམར་པོ། ཧྲོག་རྩ་དམར་པོ་ལབ་པ་བཞིན་ནོ།།