ཤེས་རིག་བཀའ་བློན་མཆོག་བལ་ཡུལ་ནང་རྟོག་ཞིབ་ཏུ་ཕེབས་པའི་གནས་ཚུལ་གསལ་བསྒྲགས་གནང་བ་ལྟར་ན། བོད་མིའི་སྒྲིག་འཛུགས་ངོས་ནས་བོད་མི་གཅིག་འདས་གྲོངས་སུ་ཕྱིན་རིགས་ལ་བལ་སྒོར་ཁྲི་ ༥ དང་། གཉིས་ལས་མང་བ་གྲོངས་པར་འབུམ་ ༡ ། སྡོད་ཁང་ཞིག་རལ་གྱུར་བར་བལ་སྒོར་ ༡༠༠༠༠ རེ་བཅས་སྤྲོད་རྒྱུ་ཡིན་སྐོར་གསུངས་སོང་།
དེ་རིང་ཉིན་རྒྱབ་ཆུ་ཚོད་ ༣།༠༠ ཐོག་གངས་སྐྱིད་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། ཤེས་རིག་བཀའ་བློན་དངོས་གྲུབ་ཚེ་རིང་མཆོག་དང་དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་དངོས་གྲུབ་རྡོ་རྗེ་ལགས་རྣམ་གཉིས་ཀྱིས་ཉེ་ལམ་བལ་ཡུལ་དུ་བསྐྱོད་དེ་ས་ཡོམ་གོད་ཆག་འོག་དཀའ་སྡུག་མྱོང་བཞིན་པའི་བོད་མི་རྣམས་ཀྱི་གནས་སྟངས་ལ་གཟིགས་ཞིབ་གནང་བའི་གནས་ཚུལ་སྐོར་ལ་གསར་འགོད་གསལ་བསྒྲགས་ཤིག་སྤེལ་སོང་།
ཤེས་རིག་བཀའ་བློན་དངོས་གྲུབ་ཚེ་རིང་མཆོག་གིས་གསར་འགོད་གསལ་བསྒྲགས་སྒྲོགས་སྦྱང་གནང་བའི་ནང་། ཤེས་རིག་བཀའ་བློན་མཆོག་ ༢༠༡༥ ཟླ་ ༥ ཚེས་ ༡༨ ནས་ ༢༡ བར་གཙོ་བོ་བལ་ཡུལ་རྒྱལ་ས་ཀ་ཐ་མན་གྲུ་བོད་མིའི་གཞིས་ཆགས་ཁག་དང་སློབ་གྲྭ་བཟོ་གྲྭ དགོན་སྡེ་ཆེ་ཁག སྣེ་ལེན་ཁང་། རྒན་གསོ་ཁང་། ལས་ཁུངས་ཁག་ལ་ཐུགས་གསོའི་འཚམས་འདྲི་དང་རྟོག་ཞིབ་གནང་སྟེ། དགོན་སྡེ་ཁག་གིས་༧སྐྱབས་མགོན་ཆེན་པོ་མཆོག་གི་བཞེད་དགོངས་ལམ་སྟོན་ལྟར། མ་བསྐུལ་དྭང་བླངས་ཀྱིས་ས་ཡོམ་ནང་གཟེངས་སུ་ཐོན་པའི་རོགས་སྐྱོར་བྱེད་བཞིན་ཡོད་པར་ཡི་རངས་བསྔགས་བརྗོད་ཡོད། ཅེས་བཀོད་འདུག
འཇོ་ཁེལ་གཞིས་སྡོད་མི་མང་དང་མཆོད་འཇོར་ས་གནས་མགོ་འཛིན་ཁྱབ་ཁོངས་མི་མང་ཁག་ཅིག་ཐུག་འཕྲད་གནང་བ་དང་། དེ་རྗེས་བལ་ཡུལ་བོད་མིའི་འབྲེལ་མཐུད་གྱིས་གཙོ་སྐྱོང་གནང་བའི་ས་གནས་ཛ་དྲག་ངལ་སེལ་ཚོགས་ཆུང་བསྐོངས་ཏེ་ལས་དོན་འདྲི་ཞིབ་དང་། ངལ་སེལ་མཐུན་སྐྱོར་བྱ་ཕྱོགས་དང་འབྲེལ་བའི་བྱེད་སྒོ་ཁག་གཅིག་བཀོད་མངགས་གནང་ཡོད། ཅེས་འཁོད་འདུག
ཡང་བསྒྲགས་གཏམ་ནང་། སྤྱི་ཚོགས་ཡར་རྒྱས་ཐེབས་རྩའི་འགན་འཛིན་ནས་ཕྱི་ཚེས་ ༡༣ ནས་ ༡༩ བར་གཙོ་བོ་པོག་ར་ཁུལ་གྱི་བོད་མིའི་གཞིས་ཆགས་ཁག་ཏུ་བསྐྱོད་དེ། ས་གནས་མགོ་འཛིན་དང་རང་བདེན་ཚོགས་ཆུང་གི་ཚོགས་མི་བཅས་ཚང་འཛོམས་ཐོག་སེམས་གསོ་གནང་ཡོད། དེའི་རྗེས་རྭ་སུ་ཝ་རྫོང་ཁོངས་རང་རིགས་ས་གནས་ཁག་ལྔའི་ནང་གནས་སྡོད་ཤབ་རུ་དང་ཐེམ་པོ་ཆེ་ས་ཁག་གཉིས་སུ་ཕེབས། ཐེམ་པོ་ཆེའི་གཞིས་ཁང་འགའ་ཤས་མ་གཏོགས་དེ་མིན་ས་གནས་ཁག་གཞན་ནང་གཞིས་ཁང་དང་སྒེར་གྱི་ཁང་ཁྱིམ་མང་ཆེ་བ་དང་། ཤབ་རུ་སློབ་ཁང་དང་ཕྲུ་གུའི་ཉལ་ཁང་། ལས་ཁུངས་སོགས་ཆ་ཚང་ས་ཡོམ་གྱི་གོད་ཆག་འོག་ཞིག་རལ་དུ་གྱུར་འདུག
བལ་ཡུལ་ནང་ས་ཡོམ་གྱི་གནོད་འཚེ་བྱུང་མ་ཐག་༧གོང་ས་མཆོག་གིས་བལ་ཡུལ་གཞུང་ལ་ཐུགས་གསོའི་གསུང་འཕྲིན་བསྩལ་བ་དང་༧ཏཱ་ལའི་བླ་མའི་ཐེབས་རྩ་བརྒྱུད་དེ་བལ་སྒོར་འབུམ་ ༥༠ དང་། བོད་མིའི་སྒྲིག་འཛུགས་ངོས་ནས་བལ་སྒོར་འབུམ་ ༢༠ ཞལ་འདེབས་གནང་ཡོད། ཞལ་འདེབས་དེ་དག་བལ་ཡུལ་འབྲེལ་མཐུད་པ་བརྒྱུད་འབུལ་ལམ་ཞུ་ཐུབ་ཡོད།
དེ་བཞིན་བོད་མིའི་སྒྲིག་འཛུགས་ནས་བལ་ཡུལ་གནས་སྡོད་བོད་མི་ཚོར་བལ་སྒོར་འབུམ་ ༡༦ དང་། དེའི་རྗེས་བལ་སྒོར་འབུམ་ ༤༠ བཅས་བལ་ཡུལ་བོད་མིའི་འབྲེལ་མཐུད་པའི་གཙོ་སྐྱོང་འོག་ཚོགས་མི་དྲུག་ལས་གྲུབ་པའི་ཛ་དྲག་ངལ་སེལ་ཚོགས་ཆུང་ལ་གནང་ཟིན་སྟབས། ས་ཡོམ་འོག་འདས་གྲོངས་སུ་ཕྱིན་པའི་ནང་མི་དང་། སྨས་སྐྱོན་ཕོག་པ། གཞིས་ཁང་རྩ་འཐོར་ཕྱིན་པ་སོགས་ལ་ངལ་སེལ་ཐུབ་པ་བྱུང་ཡོད། ཅེས་སོགས་བཀོད་འདུག
གསར་འགོད་པས་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་དངོས་གྲུབ་རྡོ་རྗེ་ལགས་སུ་གསར་འགོད་གསལ་བསྒྲགས་ནང་བལ་ཡུལ་སྤོག་ར་ཁུལ་དང་རྭ་སུ་ཝ་རྫོང་ཁོངས་བོད་མིའི་གཞིས་ཆགས་ཁག་ལྔར་ས་ཡོམ་གྱི་གོད་ཆག་ཆེན་པོ་ཕོག་ཡོད་པ་འཁོད་འདུག་པས། དེ་གར་བོད་མིའི་སྒྲིག་འཛུགས་ངོས་ནས་རོགས་རམ་གང་འདྲ་གནང་འཆར་ཡོད་མེད་དྲིས་པར་ཁོང་གིས། རྩ་བའི་དེའི་ཐོག་ལ་སང་ཉིན་ནངས་ཉིན་ཞིག་ལ་བསྐྱར་དུ་གསལ་བསྒྲགས་གནང་གི་རེད། ཡིན་ཡང་དེའི་ཐོག་ལ་གཏོར་བཤིག་ཕྱིན་པ་དག་ལ་བཟོ་བཅོས་བྱེད་དགོས་སར་བཟོ་བཅོས་རྒྱག་རྒྱུ་དང་། སྡོད་ཁང་དཀའ་ངལ་ཡོད་པ་དག་ལ་གུར་དང་དེང་དུས་དང་མཐུན་པའི་འཕྲལ་སེལ་སྡོད་ཁང་གསར་འཛུགས་བྱ་རྒྱུའི་འཆར་གཞི་སྒྲིག་བཞིན་པ་རེད། ཅེས་སོགས་གསུངས་སོང་།
ཤེས་རིག་བཀའ་བློན་མཆོག་ལ། བལ་ཡུལ་ནང་ས་ཡོམ་བྱུང་རྗེས་རྒྱ་ནག་གཞུང་གིས་བལ་ཡུལ་གཞུང་ཚབ་བརྒྱུད་མཆོད་རྟེན་ཁུལ་གྱི་བོད་མི་ཚོར་རོགས་དངུལ་སྤྲད་ཡོད་ཚུལ་བསྒྲགས་པ་དེའི་ཐད་བོད་མིའི་སྒྲིག་འཛུགས་ཀྱི་གཟིགས་ཚུལ་གང་འདྲ་ཡོད་མེད་དྲིས་པར་ཁོང་གིས། སྤྱིར་བཏང་ང་བལ་ཡུལ་ནང་བསླེབས་པའི་ཉིན་དང་རྩིས་ན་ཕལ་ཆེར་ཉི་མ་གཉིས་དང་ཕྱེད་ཀ་འདྲ་པོ་ཞིག་ཆགས་ཀྱི་འདུག ཆབ་སྲིད་ཐོག་ནས་དཀའ་ངལ་ཞིག་འཕྲད་ཀྱི་རེད་བསམ་ནས་བལ་ཡུལ་ནང་བསླེབས་པ་དང་གནས་སྟངས་དེ་ཚོ་གང་མགྱོགས་ལྟ་རྒྱུའི་ཐབས་ཤེས་བྱས་པ་ཡིན། སློབ་གྲྭ་དང་བཟོ་གྲྭ་ཁག་ནང་ཕྱིན་ནས་གང་ཡོང་རྟོག་ཞིབ་བྱས་པ་ཡིན། བལ་ཡུལ་མཆོད་རྟེན་གཡས་གཡོན་ལ་རྒྱ་ནག་གཞུང་གིས་རོགས་རམ་དང་སྐྱོབ་གསོ་དེ་འདྲ་སྤྲད་པ་རེད་ཟེར་བ་ཞིག་མ་གཏོགས་དོན་དངོས་ལ་གུར་སོགས་མངོན་གསལ་དོད་པོ་དེ་འདྲ་མཐོང་མ་སོང་། ཡིན་ཡང་རྒྱ་ནག་གཞུང་གི་གུར་རེད་ཟེར་བ་དེ་འདྲ་མང་པོ་ཞིག་རྒྱལ་པོའི་ཕོ་བྲང་དང་ལས་ཁུངས་ཨ་མ་ཡོད་སའི་ས་ཆ་ཆེན་པོ་དེ་ཚོའི་ནང་མཐོང་རྒྱུ་འདུག དེ་ནས་རྒྱ་ནག་གཞུང་གིས་སྔོན་མ་གཉེན་འཕྲད་ལ་ཡོང་མཁན་བར་ལམ་ཞིག་ནས་ཕྱིར་ལོག་བྱ་རྒྱུའི་འགྲོ་སྐྱོད་ལག་ཁྱེར་བཀག་བཞག་པ་དག་ལ། བར་སྐབས་ཤིག་ནས་ཚང་མར་སྤྲད་པ་རེད་ཟེར་བ་ཞིག་གོ་རྒྱུ་འདུག ངས་མཐོང་བ་དག་ནི་དགོན་པ་གྲྭ་ཚང་ཚོས་རོགས་རམ་ཤུགས་ཆེན་པོ་གནང་གི་འདུག དཔེར་ན། བཤད་སྒྲུབ་གླིང་དགོན་པས་བལ་སྒོར་འབུམ་༤༠༠ ལྷག་གི་འགྲོ་སོང་བཏང་སྟེ། ཡུལ་མི་དང་བོད་མི་ཚོར་རོགས་རམ་གནང་འདུག་པ་མ་ཟད། ཞི་ཆེན་དགོན་པ་དང་ཀོ་པན་དགོན་པས་བལ་སྒོར་འབུམ་ ༡༠༠ ལྷག་དང་། དེ་བཞིན་དགེ་ལུགས་དགོན་པ་བཅུ་ལྷག་གིས་ཐུན་མོང་ཐོག་ནས་རོགས་དངུལ་གནང་བ་སོགས་ལ་བརྟེན་ཏེ། ཡུལ་མི་ཚོས་བླ་མ་དང་གྲྭ་པ་ཚོར་ལྟ་སྟངས་བཟང་དུ་ཕྱིན་ཡོད་ས་རེད། ཅེས་གསུངས་བྱུང་།
བཀའ་བློན་མཆོག་ལ་ས་ཡོམ་འདིའི་རྐྱེན་པས་སྐྱིད་གྲོང་དང་འགྲམ་སོགས་སུ་གོད་ཆག་ཆེན་པོ་བྱུང་ཡོད་སྟབས། བོད་མིའི་སྒྲིག་འཛུགས་ངོས་ནས་བོད་ནང་གི་གནོད་འཚེ་ཕོག་ཡུལ་དག་ལ་རོགས་རམ་གྱི་འཆར་གཞི་ཡོད་མེད་དྲིས་པར། ད་ལྟ་བཀའ་ཤག་ཐོག་ནས་ཤུགས་ཆེ་བ་འདྲ་པོ་བལ་ཡུལ་ཁུལ་དུ་བསྐྱར་གསོ་བྱ་རྒྱུའི་ལས་འགུལ་ཐོག་གནང་གི་ཡོད་སྟབས། གཞན་པ་དེ་ཕལ་ཆེར་ལས་འཆར་གཉིས་པ་འདྲ་པོ་ཆགས་ཀྱི་ཡོད་པ་རེད། བལ་ཡུལ་ཁུལ་དུ་བསྐྱར་གསོ་བྱ་རྒྱུའི་ལས་ཀ་དེ་ལས་ཀ་ཤུགས་ཆེན་པོ་ཆགས་ཀྱི་འདུག གང་ཡིན་ཟེར་ན། ད་ལྟ་ང་ཚོར་ཐོ་གཞུང་འབྱོར་བ་དང་དོན་གཅོད་ནས་གསུངས་བ་ལྟར་ན། ས་ཡོམ་ཁྲོད་ཁྱོན་བོད་མི་ ༡༣ འདས་གྲོངས་ཕྱིན་འདུག ནང་མི་ཞིག་འདས་གྲོངས་ཕྱིན་པ་ཡིན་ན་ཁྲི་ ༥ དང་གཅིག་ལས་མང་བ་ཕྱིན་པ་ཡིན་ན་འབུམ་གཅིག་སྤྲོད་གྱི་ཡོད་པ་རེད། ལས་ཀ་དེ་ཚོ་དོན་གཅོད་དབུ་བཞུགས་ཐོག་གནང་བཞིན་ཡོད་པ་རེད། ཁང་པ་གཏོར་སྐྱོན་བྱུང་བ་ཡིན་ན་སྔོན་ལ་བལ་སྒོར་ ༡༠༠༠༠ འབུལ་རྒྱུ་དང་། བཟའ་བཅའ་དང་གུར་སོགས་ས་གནས་མགོ་འཛིན་གྱིས་ཐབས་ཤེས་གནང་གི་ཡོད་པ་རེད། ཇོ་ལ་ཁེལ་བཟོ་གྲྭར་ཆ་བཞག་ན། ལས་ཁུངས་དང་ཚོང་བཅོལ་འཇོག་སའི་ཁང་པའི་ཀ་བར་སྐྱོན་ཆ་ཆེན་པོ་ཤོར་ཏེ་བེད་སྤྱོད་གཏོང་རྒྱུར་དཀའ་ངལ་ཆགས་ཏེ་ང་ཚོ་དེའི་ནང་བཏང་མ་སོང་། དེ་དག་བཟོ་བཅོས་རྒྱག་པར་འབུམ་ ༨༠༠ ལྷག་ཙམ་འགྲོ་ས་རེད།
དེ་བཞིན་སྲོང་བཙན་སློབ་གྲྭའི་འཛིན་ཁང་ ༢༠ བྱས་པའི་ཐོག་ཁང་དང་དེའི་ཉེ་འཁྲིས་ལ་ལས་ཁུངས་ཆེན་པོ་ཞིག་ཡོད་པ་དེ་ཡང་འཕྲོག་བརླག་ཏུ་ཕྱིན་འདུག རྣམ་རྒྱལ་འབྲིང་སློབ་དང་མཐོ་སློབ་གཉིས་ཀར་སྐྱོན་གང་འཚམ་ཞིག་དང་། མི་མང་ ༣༣ གྱི་ཆོས་ཟུར་སྡོད་ཁང་ཆེན་པོ་ཞིག་ཡོད་པ་དེ་ལའང་སྐྱོན་ཆ་ཆེན་པོ་ཤོར་ཡོད་སྟབས། དེ་ཚོ་བཟོ་བཅོས་བྱ་རྒྱུར་ཟླ་དྲུག་ནས་ལོ་གཅིག་ཙམ་འགོར་གྱི་ཡོད་སྟབས། ཁོ་ཚོར་འཕྲལ་སེལ་གྱི་སྡོད་ཁང་གྲ་སྒྲིག་གང་འདྲ་བྱེད་དགོས་མིན་དང་། སློབ་གྲྭ་ཡིན་ན་འཕྲལ་སེལ་གྱི་སློབ་གྲྭ་ཚོགས་ས་གོ་སྒྲིག་ཞུ་དགོས་པ་མ་ཟད། ཕུགས་ལའང་ཁོ་ཚོར་རྟེན་ས་ཞིག་བཟོ་དགོས་སྟབས། བཀའ་ཤག་ངོས་ནས་དེ་ཚོའི་ཐོག་ལ་དགོངས་པ་བཞེད་བཞིན་པ་རེད། ཅེས་གསུངས་བྱུང་།
